Yehova Eji Kutwaminyinanga Vatu Jenyi Mujila yaKuyoya
“Eyi yikiko jila. Tambukenungamo.”—ISAYA 30:21.
MYASO: 65, 48
1, 2. (a) Jindongi muka jinayovola vatu vavavulu? (Talenu muvwimbimbi wakulivanga.) (b) Vyuma muka vyeji kuyovolanga vatu jaKalunga?
“IMANENU, TALENU, IVWILILENU.” Awa mazu vawasonekele havinjikizo vize vyatwama haze halivatasanyina njanji namukwakwa mumafuchi amwe hamyaka yakuhambakana 100 yinahichimo. Mwomwo ika vawasonekelele? Kuchina jiminyau navajihitula kumasuwa hakuzomboka njanji. Kukavangiza kanawa jindongi kaneji jakuhuhumuna chinayovola vatu vavavulu.
2 Yehova eji kutunangulanga vyuma vyavivulu keshi kutuhana kaha jindongi jakutuhuhumunako. Eji kutwaminyinanga etu vatu jenyi mangana tulihende kuponde nakukayoya haya myaka yosena. Yehova apwa ngana mwakafunga wazangi uze eji kutwaminyinanga mikoko jenyi nakuvakinga kuponde.—Tangenu Isaya 30:20, 21.
YEHOVA EJI KUTWAMINYINANGA VATU JENYI
3. Chuma muka chalingishile vatu vosena vapwenga mujila yakuya kukunonga?
3 Putu vene kushikulu, Yehova nahanenga vatu jenyi jindongi. Chakutalilaho, mumilemba yaEtene, Yehova ahanyine jindongi jize jatelelele kulingisa vatu vawahililenga nakuvatwaminyina kukuyoya chahaya myaka yosena. (Kuputuka 2:15-17) Oloze Alama naEve vakanyine kuvatwaminyina kuli Sevo wazangi. Eve evwililile kulizu lize lyevwakanyine nge linoka ikiye apwile nakuhanjika, kaha Alama nawa evwililile kuli puwenyi. Jino vyuma muka vyafuminemo? Vosena vavali vaputukile kuyanda, kaha vafwile chakuzeneka kupwa nalutalililo. Kulikanga chavo chalingishile jino vatu vosena hano hamavu vapwenga mujila yakuya kukunonga.
4. (a) Mwomwo ika Kalunga ahanyinyine vatu jindongi jeka omu lyakumine Livaji? (b) Uno lushimbi luze Kalunga ahanyine vatu lwasolwele ngachilihi omu amona kuyoya?
4 Kalunga ahanyine Nowa jindongi jize jayowele vatu. Omu lyakumine Livaji, Yehova alwezele vatu ngwenyi kavatela kunwa chipwe kulya manyingako. Mwomwo ika? Mwomwo Yehova asakile jino kwitavisa vatu valyenga nyama. Chuma kanechi etavishile Yehova chalumwine kuyoya chavo, ngocho chapwile chakutamo kuvahana jindongi jajihya. Avalwezele ngwenyi: “Kamwatela kulya nyama namwono wayo hamweko, akiko manyinga ayo.” (Kuputuka 9:1-4) Lushimbi kana lwasolola omu Kalunga amona kuyoya, mwomwo ikiye apwa kasulu kakuyoya. Hakuwana nge apwa Tengi uze atuhana kuyoya, ngocho akwechi lisesa lyakutuhana jishimbi jakutalisa kukuyoya. Chakutalilaho, ahanyine vatu lushimbi ngwenyi kavatela kujiha vakwavoko. Kalunga amona kuyoya namanyinga kupwa vyajila, kaha mwakazangamisa vaze veji kuzachisanga vyuma kana mujila yakuhenga.—Kuputuka 9:5, 6.
5. Vyuma muka natushimutwila, kaha mwomwo ika?
5 Kufuma halwola luze apwileko Nowa, Kalunga natwaminyinanga lika vatu jenyi. Muchihande chino, natushimutwila havyakutalilaho vimwe vize vyasolola omu natwaminyinanga vatu jenyi. Vyuma kana navitukafwa tusakule kukavangiza jindongi jaYehova omu ali nakututwaminyina tukayoyele mukaye kakahya.
MUYACHI WAUHYA NAJINDONGI JAJIHYA
6. Mwomwo ika vatu jaKalunga vatelelele kukavangiza jishimbi jize avahanyine kuhichila muli Mose, kaha vyuma muka vatelele kulinga?
6 Halwola luze apwileko Mose, Yehova ahanyine vatu jenyi jindongi jakuvakafwa vapwenga navilinga vyamwaza najila yakumulemeselamo. Mwomwo ika? Mwomwo yavyuma vimwe vize vyalumukile mukuyoya chavo. VaIsalele vapwilenga vandungo muEjipitu muze vatu vosena valemeselenga vafu, namakombelo, nakulinga vyuma vyeka vize kavyanehele kavumbi kuli Kalungako. Omu vatu jaKalunga vavasokwele muEjipitu, vasakiwile kuvahana jindongi jajihya. Vapwile jino hivatu vamuyachi uze wakavangijilenga Jishimbi avahanyine Yehova kuhichila muli Mose. Mikanda yimwe yakukaye yahanjika ngwayo, muchiHepeleu, lizu “lushimbi” lyalifwana nalizu lyakwamba ngwavo “kutwaminyina, kutetekela, kunangula.” Jishimbi jaKalunga jize ahanyine vaIsalele kuhichila muli Mose, javakingile kuujila, nakukwitava chamakuli vize vyapwile mumafuchi aze avajingilikile. Omu vaIsalele vamwononokelenga, Kalunga avakiswile. Oloze omu valikangilenga, vamwenenga ukalu waunene chikuma.—Tangenu Lushimbi lwamuchivali 28:1, 2, 15.
7. (a) Lumbununenu ovyo Yehova ahanyinyinyine vatu jenyi jindongi. (b) Uno Jishimbi japwile ngachilihi nge muka-kutwaminyina vaIsalele?
7 Eji jindongi jajihya vahanyine vatu jaKalunga javakafwile nawa mujila yikwavo. Jishimbi jaMose jakafwile vaIsalele vatachikize chuma chachilemu muvyuma ajina Yehova. Chuma kana shina kwiza chaMeshiya, Yesu Kulishitu. Jishimbi jakafwile nawa vaIsalele vatachikize ngwavo, kavapwile vakukupukako. Kaha nawa javakafwile vatachikize ngwavo, vasakiwile kuvahana ndando yakuvasokola, kulumbununa wana wakukupuka mwosena uze naufumisa shili yavo yosena. (Wavaka-Ngalesha 3:19; WavaHepeleu 10:1-10) Cheka nawa, Jishimbi kana jakingile chisemunwino afumine Meshiya nakukafwa vaIsalele vahase kumutachikiza halwola asolokele. Chikupu vene, Jishimbi japwile nge muka-kutwaminyina, chipwe ‘muka-kulama,’ wakutwala kuli Kulishitu.—Wavaka-Ngalesha 3:23, 24.
8. Mwomwo ika jindongi jamuJishimbi jaMose jatela kututwaminyina?
8 Nayetu vaka-Kulishitu natunganyala kuJishimbi jize Yehova ahanyine vatu jenyi kuhichila muli Mose. Natunganyala ngachilihi? Natulinga ngocho nge natushinganyeka kanawa hajindongi haze hapendamina Jishimbi. Numba tuhu katweshi muJishimbi kanako, oloze jajivulu jinahase kutukafwa mukuyoya chetu chahakumbi hakumbi nomu tuli nakulemesa Yehova. Kaha jishimbi kana vajisoneka muMbimbiliya mangana jitukafwe, nakututwaminyina kujindongi jajo, nakusakwilila Yesu uze atunangwile vyuma vyavilemu kuhambakana Jishimbi jaMose. Ivwililenu mazu ahanjikile Yesu ngwenyi: “Mwevwa lyehi muze vambile ngwavo: ‘Kanda mukalinga ukojiko.’ Oloze aminyi nangwamba kuli enu ngwami, weshowo mwatala lika pwevo nakumwivwila peha, nalingi lyehi nenyi ukoji mumuchima wenyi.” Ngocho katwatela kulihenda kuujila kahako, oloze twatela nawa kukana vishinganyeka vize navineha uvumbi.—Mateu 5:27, 28.
9. Vyuma muka vyalumukile kuvatu jaKalunga vize vyalingishile Kalunga avahane jindongi jajihya?
9 Omu Yesu ejile hano hamavu nakupwa Meshiya, Yehova ahanyine vatu jindongi jajihya nakusolola hatoma vyuma ajina. Mwomwo ika? Mumwaka wa 33, Yehova akanyine muyachi waIsalele, kaha asakwile jino chikungulwilo chavaka-Kulishitu kupwa vatu jenyi. Ngocho, vyuma vyalumukile cheka kuvatu jaKalunga.
JINDONGI VAHANYINE VAISALELE VAKUSHIPILITU
10. Mwomwo ika chikungulwilo chavaka-Kulishitu vachihanyinyine jishimbi jajihya, kaha jishimbi kana jalihandunwine ngachilihi najize vahanyine vaIsalele?
10 Yehova ahanyine vaIsalele Jishimbi jenyi kuhichila muli Mose mangana avanangule mwakuyoyela nomu vatela kumulemesela. Kuputuka mulikulukaji lyamyaka lyakulivanga, vatu jaKalunga kavafumine cheka kumuyachi umweko, oloze vafumine kumiyachi yayivulu nakuchiyoyelo chakulisezaseza, nakuvavuluka jino ngwavo vaIsalele vakushipilitu. Vatungile jino chikungulwilo chavaka-Kulishitu, kaha vengilile mulushiko lwaluhya. Yehova avahanyine jindongi jajihya jize vatelele kukavangiza mukutwama chavo nahakumulemesa. Pundu vene, “Kalunga katala vatu kumesoko, oloze muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.” (Vilinga 10:34, 35) Ava vaka-Kulishitu vakavangijilenga “lushimbi lwaKulishitu” luze lwazamine chikuma hajindongi jize vasonekele hamichima yavo, keshi halilolwako. Elu lushimbi lwavatwaminyinyinenga nakuvanganyalisa -chamokomoko nakweshokwo vatwaminenga.—Wavaka-Ngalesha 6:2.
11. Jishimbi muka jivali vatela kukavangiza vaka-Kulishitu jize jatwama ‘mulushimbi lwaKulishitu’?
11 VaIsalele vakushipilitu vanganyalile chikuma hakuvatwaminyina kuli Yehova kuhichila muli Yesu. Shimbu kanda Yesu ahanjike vyalushiko lwaluhya, avahanyine jishimbi jivali jajilemu. Lushimbi lumwe lwapwile lwakwambulula mujimbu. Kaha lukwavo lwapwile lwakukafwa vaka-Kulishitu vatachikize mwakutwamina navakwavo. Eji jishimbi vajihanyine kuli vaka-Kulishitu vosena, ngocho tuvosena twatela kujikavangiza makumbi ano, numba nge tukwechi lutalililo lwakukayoyela mwilu chipwe hano hamavu haya myaka yosena.
12. Vyuma muka vyalumukile kutalisa kumulimo wakwambulula?
12 Kushikulu, vatu vakumafuchi eka vejilenga muIsalele nakuzachila Yehova. (Vamyangana 1, 8:41-43) Oloze Yesu ahanyine jino tumbaji twenyi lushimbi luze lwatwama hali Mateu 28:19, 20. (Tangenu.) Alwezele tumbaji ‘vayenga’ nakwambulila vatu vosena. HaPendekoseta mumwaka wa 33, Yehova asolwele ngwenyi mujimbu wamwaza vatela kuwambulula mukaye kosena. Halikumbi kana, vatu kafwe 120 vamuchikungulwilo kanechi chachihya vazalile nashipilitu yajila, kaha vaputukile kuhanjika mumalimi akulisezaseza kuli vaYuleya navaze valumukile kupwa vaYuleya. (Vilinga 2:4-11) Kufumaho, vavalwezele kuya nakwambulila navaSamaliya. Kaha mumwaka wa 36, vaputukile kwambulila navatu vakuhona kujihana vakumafuchi eka. Echi chalumbunwine nge vaka-Kulishitu vatelele kwambulila vatu mukaye kosena.
13, 14. (a) Vyuma muka vyatwama ‘mulushimbi lwaluhya’? (b) Vyuma muka natulinangula kuvyuma alingile Yesu?
13 Yesu ahanyine nawa “lushimbi lwaluhya” lwamwakutwamina navandumbwetu. (Tangenu Yowano 13:34, 35.) Twatela kuvazanga lwola lwosena, nakulisuula nawa kuvafwila. Oloze Jishimbi jaMose kajavulukile vyuma kanako.—Mateu 22:39; WaYowano 1, 3:16.
14 Yesu atusela chakutalilaho chamwaza chazangi kaneyi. Azangile chikuma tumbaji twenyi, kaha avafwililile. Kaha asaka vaka-kumukavangiza vosena valinge mwomumwe. Shikaho, twatela kumika nge tuli muukalu, nakulisuula kufwila vandumbwetu.—Wavaka-Tesolonyika 1, 2:8.
JINDONGI TWATELA KUKAVANGIZA MAKUMBI ANO NAKULUTWE
15, 16. Vyuma muka vinalumuka kuli etu, kaha Kalunga ali nakututwaminyina ngachilihi?
15 Yesu atongola “ndungo wakushishika wakuzangama” mangana ahanenga vaka-kumukavangiza kulya chakushipilitu “halwola lwakutamo.” (Mateu 24:45-47) Havyakulya kanevi hatwama najindongi jize eji kuhananga vatu jaKalunga nge vyuma vinalumuka mukuyoya chavo. Uno vyuma vinalumuka ngachilihi kuli etu?
16 Tuli nakuyoyela “hamakumbi akukuminyina,” kaha kalinwomu twingile muluyando lwalunene luze kanda lusolokengaho lyehi. (WaChimoteu 2, 3:1; Mako 13:19) Cheka nawa, Satana navandemone jenyi vavambila hano hamavu kufuma mwilu, kaha vali nakuyanjisa chikuma vatu. (Kusoloka 12:9, 12) Chuma chikwavo nawa, tuli nakwononoka Yesu halushimbi luze atuhana lwakwambulula mujimbu mukaye kosena kuvatu vavavulu mumalimi akulisezaseza.
17, 18. Uno twatela kwakula ngachilihi kujindongi vali nakutuhana oholyapwa?
17 Liuka lyaKalunga lili nakutuhana vinoma vyavivulu vyakutukafwa kuzata mulimo wakwambulula. Kutala mweji kuvizachisanga tahi? Omu tweji kupwanga kukukunguluka, veji kutuhananga jindongi jakutukafwa mwakuzachishila kanawa vinoma kanevi. Uno mweji kumonanga jindongi kaneji nge jeji kufumanga kuli Kalunga tahi?
18 Hakusaka Kalunga atukisule, twatela kukavangiza jindongi josena jize eji kutuhananga kuhichila muchikungulwilo chavaka-Kulishitu. Nge natukavangiza jindongi vali nakutuhana makumbi ano, kaha nachikapwa chachashi kukavangiza jindongi jize navakatuhana ‘haluyando lwalunene’ omu navakanongesa kaye kaSatana kakuhuka. (Mateu 24:21) Kufumaho, natukasakiwa jindongi jajihya mukaye kakahya kakwoloka, muze Satana keshi kukatuhungumwisako.
Mukaye kakahya, navakatuhana mikanda yakuvunga yize nayikapwa najindongi jajihya jakutulweza mwakuyoyela muPalachise (Talenu palangalafu 19 na 20)
19, 20. Mikanda muka navakatuhana, kaha vyuma muka vyamwaza navikafumamo?
19 Halwola luze apwileko Mose, vaIsalele vasakiwile kuvahana jindongi jajihya, ngocho Kalunga avahanyine Jishimbi kuhichila muli Mose. Kufumaho, chikungulwilo chavaka-Kulishitu chakavangijilenga “lushimbi lwaKulishitu.” Chochimwe nawa, Mbimbiliya yatulweza ngwayo, mukaye kakahya navakatuhana mikanda yakuvunga yize nayikapwa najindongi jajihya. (Tangenu Kusoloka 20:12.) Chasoloka nge eyi mikanda nayikalumbununa vyuma mwakasaka Yehova kuli vatu halwola luze. Hakulinangula mikanda kaneyi, vatu vosena hamwe kaha navaze navakasanguka, navakatachikiza jino vyuma vize mwakasaka Kalunga kuli vakiko. Mikanda yakuvunga nayikatukafwa tukatachikize chikuma omu Yehova amwena vyuma. Kaha nawa natukatachikiza kanawa Mbimbiliya, ngocho tuvosena muPalachise natukazanga vakwetu, nakuvavumbika, nakuvamona kupwa vavalemu. (Isaya 26:9) Chikupu vene, natukalinangula vyuma vyavivulu nakuvinangula nawa vakwetu hakututwaminyina kuli Mwangana Yesu Kulishitu.
20 Nge natukakavangiza jindongi jize natukalinangula ‘mumikanda yakuvunga’ nakukatwalaho kupwa vakushishika kuli Yehova nahalwola nakukapwa kweseka chamakumishilo, kaha mwakasoneka majina etu ‘mumukanda wakuyoya.’ Ngocho, natukayoya haya myaka yosena. Nge natutanganga Mbimbiliya, nakwivwishisa vyuma yanangula, nakukavangiza jindongi mwatuhana Kalunga oholyapwa, kaha natukayovoka luyando lwalunene nakukalivwisa kuwaha kulinangula vyaKalunga ketu wazangi, Yehova.—Muka-kwambulula 3:11; Wavaka-Loma 11:33.
