MUJIMBU WAKUYOYA CHAVATU
Ngunanganyala Mwomwo Yakulikata naVaka-Mangana
LIKUMBI limwe nachimene muBrookings, South Dakota, U.S.A., kwapwile nakuhita peho yituta. Ngocho ngwashinganyekele ngwami nakupwa chishika chikuma. Oloze namulikomokela hakwivwa nge halikumbi kana ami navakwetu twapwile nakuchikima chishika mwomwo twapwile muzuvo muze mwatuchile chikuma. Twemanyine kwakamwihi nalikola lyakulila vimuna muze vahakile meya atuta. Manenu ngumilweze jino omu chapwile.
OMU NGWAPWILE NGUKANYIKE
Tata nayayenyi Alfred
Ngwasemukile haMarch 7, 1936, kaha twasemuka tuvawana, ami yami muchinyikila. Twatwaminenga hafwamu kungalila yakumututuko kuSouth Dakota. Tanga yetu yazangilenga chikuma kulima nakuheta vimuna, oloze kachapwile chuma chachilemu chikuma mukuyoya chetuko. Visemi jami vavambapachishile nakupwa Vinjiho jaYehova mu 1934. Valihanyine kuli Setu wamwilu Yehova, kaha kumuzachila chikiko chapwile chachilemu chikuma mukuyoya chavo. Tata Clarence apwile muka-kuwanyisa lizavu lyavakulwane muchikungulwilo chetu chaConde, muSouth Dakota, kaha mukuhita chamyaka tata wamukulwane Alfred ikiye azachile mulimo kana.
Tanga yetu yamwenenga kukunguluka nakuyanga mumulimo wakuzuvo hizuvo nakulweza vatu vyalutalililo lwakulutwe kupwa chachilemu. Chakutalilaho chavisemi jetu navyuma vatunangwilenga vyatukafwile chikuma. Yami nayaya Dorothy twapwile vaka-kwambulula Wangana omu twapwile namyaka 6. Kuheta mu 1943, ngwalisonekesele muShikola yaMulimo waTeokalasi, omu yapwile yichili mukuputuka.
Kuzata upayiniya mu 1952
Twapwilenga nakuya kukukunguluka changalila nachachihanda. Hali vaze vahanyine vihande hakukunguluka chamu 1949 muSioux Falls, South Dakota hapwile nandumbwetu Grant Suiter uze apwile muka-kuhanjika chihande wangeji. Nguchili nakwanuka chihande ahanjikile chakwamba ngwavo, “Kukuma Chili Hakamwihi!” Akolezezele
vaka-Kulishitu vosena ngwenyi vatela kwambulula mujimbu wamwaza waWangana waKalunga natwima. Echi chikiko changukunywile ngulihane kuli Yehova. Hakukunguluka chachihanda chapwile muBrookings hakiko ngwapwile muzuvo yize ngwavulukanga hakavanga, nakuvandamina vangumbapachise. Ami navakwetu vatatu vatumbapachishile muze mulikola haNovember 12, 1949.Ngwafwililile kuzata upayiniya, kaha kuheta haJanuary 1, 1952, ngwaputukile kuzata upayiniya omu ngwapwile namyaka 15. Mbimbiliya yamba ngwayo: “Ou mwatambuka navaka-mangana mwakapwa muka-mangana,” kaha mutanga yami mwapwile vaka-mangana vavavulu vaze vangukundwijilenga nguzate upayiniya. (Vishi. 13:20) Tata wamukulwane Julius, uze apwile namyaka yakusemuka 60, yikiye ngwazachilenga nenyi upayiniya. Numba tuhu ou tata apwile kashinakaji, oloze twalivwishilenga kuwaha kuzachila hamwe muwande. Ngwalinangwile vyavivulu kuvyuma ahichilemo mukuyoya chenyi. Yayami Dorothy nayikiye apwile payiniya.
KUNGUKAFWA KULI TULAMA VAKUJINGULUKA
Omu ngwapwile ngukanyike, visemi jami vetavililenga tulama vakujinguluka namapwevo javo vatwame hazuvo yetu nge vanakutambukila chikungulwilo chetu. Kalama angukafwile chikuma shina Jesse Cantwell napuwenyi Lynn. Vangukolezezele chikuma, ngocho ngwaputukile upayiniya. Muchima walikoji vangusolwelele hakungukafwa wangulingishile ngusakule kuzata milimo yakushipilitu. Nge vanakuzachila havikungulwilo vyahakamwihi, vangusanyikilenga nguyenga nakuzata navo muwande. Ocho kuwaha kana ngwevwilenga!
Kalama mukwavo azachililenga chikungulwilo chetu shina, Bud Miller napuwenyi Joan. Halwola kana ngwapwile namyaka 18, kaha fulumende yasakile nguzate uswalale. Lipatimende lyatala hakusoneka vatu vakuzata uswalale vangusonekele, oloze ngwamwene ngwami kachatelemo kuzata milimo kanako mwomwo vaka-kukavangiza Yesu kavatela kuyizatako. Yami nawa ngwafwililile kwazana chikuma mumulimo wakwambulula mujimbu wamwaza waWangana. (Yowa. 15:19) Ngocho ngwatwalile chihande kana kuzango yakusopela mangana vangufumise hamukana kana.
Ngwevwile kuwaha chikuma omu ndumbwetu Miller alisuwile kuya hamwe nayami kuzango yakusopela mangana akevwilile kuchihande. Ou ndumbwetu apwile wachisambo kaha nawa wakuhamuka. Echi changuhanyine
ngolo jakumika hakuwana nge ngwapwile namutu wakuhya kushipilitu. Ngocho mu 1954, vangufumishile haze hamukana wakupwa liswalale nakunguhana jino lisesa lyakupwa muka-kwambulula. Echi chasokolwele chikolo chakuzata milimo yeka muliuka.Nguchili wamuhya haMbetele ngunemana kumunyau wahafwamu
Halwola kana vangusanyikile kuya nakuzachila haMbetele vavulukilenga ngwavo Watchtower Farm, muStaten Island, New York. Ngwazachililileho hamyaka yitatu. Kaha ngwanganyalile chikuma mwomwo ngwazachilenga navatu vamangana vavavulu.
KUZACHILA HAMBETELE
Tunemana kuchinjikizo chachisaji chahapeho chaWBBR nandumbu Franz
Hafwamu yapwile mumbaka yaStaten Island hapwile nachisaji chahapeho chaWBBR. Vinjiho jaYehova vazachishilenga chisaji kana kufuma mu 1924 nakuheta mu 1957. Vaka-Mbetele 15 chipwe 20 vakiko kaha vazachililenga hafwamu. Etu vavavulu twapwilenga tuvanyike kaha nawa katwatachikijile kanawa mwakuzachila milimoko. Oloze twazachilenga hamwe nandumbu wamukulwane Eldon Woodworth uze apwile wakuwavisa. Ou ndumbwetu atukafwile mwamunene mwomwo apwile chikupu namangana. Atuzakaminenga chikuma nakutukafwa kushipilitu. Nge tunalimbalaka mwetumwetu, hakuwana nge katwakupukako, ndumbu Woodworth ahanjikilenga ngwenyi, “Mwata natesamo milimo yayivulu numba tuhu nazachisanga vatu vakuhona kukupuka.”
Ndumbwetu Harry Peterson azachilenga natwima mumulimo wakwambulula
Twawahililile nawa kuzata nandumbu Frederick W. Franz. Atuzakaminenga nakutukafwa chikuma mwomwo apwilenga namangana kaha nawa atachikijile Visoneka vyavivulu. Ndumbu Harry Peterson ikiye atutelekelelenga vyakulya. Chapwilenga chachashi kuzachisa lijina lyaPeterson kuhambakana lijina lyenyi lyaPapargyropoulos. Nayikiye nawa apwile wakuwavisa kaha nawa azachilenga natwima mumulimo wamuwande. Ndumbu Peterson apwilenga samalikita haMbetele oloze kahumbwilenga mulimo wakwambululako. Kakweji hikakweji ahanyinenga vatu jimangazini jajivulu. Akumbulwilenga nawa vihula vyavivulu twamuhulishilenga, mwomwo atachikijile Visoneka vyavivulu.
KUNGANYALA KUVANDUMBWETU VAMAPWEVO VAVAVULU
Jimbuto twaliminenga hafwamu twajiwahishilenga nakujilonga muvifwoyo. Mwaka himwaka twalongelenga jilita 42,600 javyakulya vize twazachishilenga haMbetele. Ngocho ngwazachililenga hamwe nandumbwetu Etta Huth. Ou ndumbwetu wapwevo yikiye asonekelenga mwakuzachila
mulimo kana. Vandumbwetu vamapwevo muvikungulwilo vejilenga nakukafwa halwola lwakulonga jimbuto, kaha Etta yikiye avahanyinenga milimo. Numba tuhu Etta akilikichilenga chikuma oloze avumbikilenga vandumbwetu vamalunga vaze vapwilenga nakutetekela hafwamu. Chakutalilaho chenyi changukafwile nayami nguvumbikenga vaze vapwile nakutwaminyina.Nguli naAngela naEtta Huth
Angela Romano apwile hali vaze vandumbwetu vamapwevo vejilenga nakutukafwa kuzata milimo. Etta ikiye amukafwilenga azovoloke kushipilitu. Shikaho ngwawanyine mutu mukwavo wamangana halwola ngwazachilililenga haMbetele, uze jino ngunazatenga nenyi hamyaka 58. Twalimbachile naAngie muApril 1958, kaha tunalivwisa kuwaha kuzachila hamwe milimo yakushipilitu. Kushishika chaAngie kuli Yehova chinatukafwe tuzamise ulo wetu. Ngweji kupendaminanga hali yikiye mukala ukalu ngweji kumonanga.
KUZATA UMISHONALI NAMULIMO WAKUTAMBWOJOKA
Omu valanjishile chisaji chaWBBR chize chapwile muStaten Island mu 1957, ngwazachilile jino haMbetele muBrooklyn hatukweji vavandende. Kufumaho, twalimbachile naAngie, ngocho twafumine haMbetele, kaha twazachile upayiniya hatukweji vatatu muStaten Island. Ngwazachilililengako nakuchisaji chahapeho chize vavulukilenga ngwavo WPOW.
Ami naAngie twafwililile kwashiwisako chiyoyelo chetu mangana tuhase kuzata kweshokwo navatutuma. Ngocho mu 1961 vatutumine tuzate upayiniya wakulipwila muFalls City, Nebraska. Omu twashiwishileko chiyoyelo chetu nakuya nakuzata upayiniya wakulipwila, hahaze vene vatusanyikile jino kuShikola yaMulimo waWangana muSouth Lansing, New York. Shikola kana yapwile yakakweji umwe. Twalivwishile kuwaha vyuma twalinangwile, kaha twafwililile kukazachisa vyuma twalinangwile omu natukakinduluka kuNebraska. Oloze hakukumisa shikola twalikomokelele mwomwo vatutumine kuya nakuzata umishonali kuCambodia. Lifuchi kana lyatwama kuSoutheast Asia, kaha twalivwishile kuwaha vyuma vyavivulu kulifuchi kana vize kanda tumonengaho lyehi. Twafwililile kutandakanyisa mujimbu wamwaza mulifuchi kana.
Oloze fulumende yamulifuchi kana yalumukile, kaha vatulwezele tufumeko ngocho twayile kuSouth Vietnam. Chaluvinda, ngwaputukile kuviza omu twazachile kaha myaka yivali kuze, kaha vatulwezele tukinduluke kwimbo. Omu ngwevwileko kanawa, twaputukile kuzata cheka mulimo washimbu yosena.
Nguli naAngela mu 1975, tunakuvandamina vatwihwojole hachisaji
Kuheta muMarch 1965 twawahililile chikuma hakututongola tuzate mulimo wakutambwojoka. Ami naAngie tunazate mulimo wakutambwojoka hamyaka 33, kuhakilako namulimo wakulongesa nakutwaminyina kukunguluka changalila. Halwola lwakukunguluka changalila ngwalivwishilenga kuwaha chikuma, ngocho ngwazachilenga nangolo kuwahisa vyakukunguluka. Hamyaka yayivulu twapwilenga munganda yaNew York, kaha kakavulu twakungulukililenga muchivaza chakwashila ngunja chaYankee.
KUKINDULUKA HAMBETELE NAKUNANGULA MASHIKOLA AMULIUKA
Twazachilenga milimo yimwe yayikalu ngana mwavandumbwetu vavavulu vaze vazata mulimo wakulipwila washimbu yosena. Chakutalilaho, mu 1995, vanguhanyine mulimo wakunangula Shikola Yakulinangula Milimo YamuLiuka. Omu mwahichila myaka yitatu, vatulwezele kuya nakuzachila haMbetele. Ngwawahililile chikuma kukinduluka
kuze ngwaputukilile kuzata mulimo wakulipwila washimbu yosena myaka 40 kunyima. Hamyaka yayivulu ngwazachililenga kuLipatimende lyaMulimo nakunangula vaze vejilenga kumashikola amuliuka. Mu 2007 Lizavu Lyakutwaminyina lyatungile lipatimende lyalihya lyakwamba ngwavo, Lipatimende lyaMashikola aMuliuka mangana litwaminyine mashikola ahaMbetele, kaha vangutongwele kupwa kalama walipatimende kana.Hamyaka yakalinwomu, liuka linalumunanga vyuma vyavivulu hakunangula vatu jaKalunga. Chakutalilaho, mu 2008 vasokolwele Shikola yaVakulwane VamuChikungulwilo. Hamyaka yivali yahichilemo, vakulwane 12,000 vavanangwilile haMbetele yamuPatterson namuBrooklyn. Shikola kana yili nakuvihela vyeka nawa, kaha kuli vandumbwetu vananangula vaze vanakutetekelanga shikaho kana. Mu 2010, Shikola Yakulinangula Milimo YamuLiuka vayivulukilenga jino ngwavo, Shikola Yakulinangula Mbimbiliya yaVandumbwetu vaMalunga vaVajike, kaha nawa vahakileko shikola yikwavo yize vavulukilenga ngwavo, Shikola Yakulinangula Mbimbiliya yaVaka-Kulishitu Valimbata.
Kuputuka muSeptember 2014, awa mashikola avali vawafutwile nakupwa yimwe, kaha vayivulukilenga ngwavo, Shikola yaVaka-Kwambulula Wangana. Shikola kana yapwa yakunangula vandumbwetu vavajike chipwe vakulimbata. Vandumbwetu vavavulu vawahililile hakwivwa ngwavo shikola kana nayipwilanga hajiofesi jamitango jajivulu. Cheji kutwivwisanga kuwaha hakuwana nge mulimo wakunangula muliuka uli nakutohwelako, kaha nawa ngwawahilila chikuma hakutachikiza vandumbwetu vavavulu vaze vanezanga nakulinangula kumashikola kana.
Kushinganyeka hachiyoyelo chami shimbu kanda vangumbapachise nakuheta kulelo, ngweji kumusakwililanga Yehova hakunguhana vatu vamangana vaze vangukafwile ngulinangule vyavivulu muliuka lyenyi. Vatu kana vapwile vamyaka yakusemuka yakulisezaseza, kaha nawa vakufuma kuvisemwa vyakulisezaseza. Oloze vosena vapwile vatu vakuhya kushipilitu. Vilinga vyavo vyasolwele zangi vapwile nayo yakuzanga Yehova. Muliuka lyaYehova mwatwama vatu vamangana vavavulu vaze twatela kulikatanga navo. Kulikata navatu kana chinangunganyalisa mwamunene.
Ngweji kwivwanga kuwaha kushimutwila navaka-shikola vakufuma kumafuchi akulisezaseza