1-3. Kuzachila Yehova ‘namuchima wosena’ chasakiwa kulinga ika? Lumbununenu.

TUVOSENA tweji kulimbenjanga mwomwo katwakupukako. Chipwe ngocho, Yehova keshi kutuzangamisa “kweseka najishili jetuko,” kachi nge natupihilila nakwalumuka nakumulomba mulufwelelo kuhichila mundando yakusokola yaYesu. (Samu 103:10) Oloze nganomu Ndavichi alwezele Solomone, twatela ‘kuzachila Yehova namuchima wetu wosena’ numba atwitavile. (Miji. 1, 28:9) Uno natuhasa kulinga ngachilihi ngocho hakuwana nge katwakupukako?

² Tutalenu hachiyoyelo chaMwangana Asa nachize chaMwangana Amajiya. Ava vamyangana vavaYuleya vavali valingile vyuma vyakwoloka kuli Yehova, oloze Asa alingilenga ngocho namuchima wenyi wosena. (Miji. 2, 15:16, 17; 25:1, 2; Vishi. 17:3) Vosena vapwile vakuhona kukupuka, kaha valimbenjelenga. Oloze Asa kasezele Kalungako, mwomwo amuzachililile namuchima wenyi wosena. (Miji. 1, 28:9) Oloze Amajiya kazachililile Yehova namuchima wenyi wosenako. Omu afungulwile vaka-kole jaKalunga, ambachile vaze tulunga twavo nakukinduluka  navo kwimbo lyenyi nakuputuka kuvalemesa.—Miji. 2, 25:11-16.

³ Kuzachila Kalunga ‘namuchima wosena’ chalumbununa kulihana kuli ikiye namuchima wosena nakumulemesa mukuyoya chetu chosena. MuMbimbiliya lizu “muchima” lyalumbununa vyuma twafwila, vyuma tweji kushinganyekanga, vilinga vyetu, nauhashi wetu. Shikaho mutu uze eji kuzachilanga Yehova namuchima wenyi wosena keshi kulyongako. Keshi kuzachila Yehova mwomwo yakulondezeza kaha vakwavoko. Nyi ngachilihi yetu? Nge natulihana kuli Kalunga chakuhona kulyonga, kaha natumuzachila namuchima wetu wosena numba tuhu katwakupukako.—Miji. 2, 19:9.

4. Vyuma muka natushimutwila?

⁴ Hakusaka kutachikiza omu chapwa kuzachila Kalunga namuchima wosena, tutalenu hachakutalilaho chaAsa navamyangana veka vamuYuta vaze vazachililenga Kalunga namichima yavo yosena, vakufwana nge Yehoshafwate naHezekiya naYoshiya. Ava vamyangana vosena valimbenjelenga, oloze Yehova evevwililile uselewa. Mwomwo ika Kalunga ahanjikilile ngwenyi vamuzachililile namuchima wavo wosena, kaha tunahase kuvalondezeza ngachilihi?

5. Vyuma muka vyakulipwila alingile Asa?

⁵ Asa apwile mwangana wamuchitatu muYuta, uze ayulile omu yalingile miyachi likumi yamuwangana wavaIsalele yinalihandununa lyehi. Afumishile makombelo, nakuhanga malunga vaka-ujila mungalila yenyi. Afumishile nawa kaka yenyi wapwevo Maka hachihela chenyi, uze vavulukilenga ngwavo, “naye yamwangana, mwomwo atengele kaponya waunyengwe.” (Vamya. 1, 15:11-13) Asa alwezele nawa vatu jenyi “vatondetonde Yehova . . . nakulama Jishimbi jenyi.” Chikupu vene, akundwijile kulemesa chamuchano.—Miji. 2, 14:4.

6. Vyuma muka alingile Asa omu vavalukukile kuli vaEchopa?

⁶ MuYuta mwapwile kuunda hamyaka likumi yakulivanga yachiyulo chaAsa, mwomwo Yehova avakiswile. Kaha Zela kaEchopa alukukile Yuta namalunga 1,000,000 namatemba ajita 300. (Miji. 2, 14:1, 6, 9, 10) Uno Asa alingile ngachilihi haukalu kanou? Afwelelele muli Yehova nakumulomba. (Tangenu Mijimbu 2, 14:11.) Kalunga akumbulwile kulomba chenyi hakumukafwa afungulule vaEchopa. (Miji. 2, 14:12, 13) Numba tuhu vamyangana vavavulu kavashishikile kuli Yehovako, oloze avakafwilenga vafungulule vaka-kole javo mwomwo yalijina lyenyi. (Vamya. 1, 20:13, 26-30) Asa afwelelele muli Kalunga, kaha Yehova akumbulwile kulomba chenyi. Chipwe ngocho mukuhita chalwola, Asa alimbenjele. Chakutalilaho, ayile kuli mwangana waSulya mangana amukafwe muchishishisa chakulomba kuli Yehova. (Vamya. 1, 15:16-22) Chipwe ngocho Kalunga amwene ngwenyi Asa amuzachililile “namuchima wenyi wosena hamakumbi akuyoya chenyi osena.” Natuhasa kulondezeza ngachilihi Asa?—Vamya. 1, 15:14.

7, 8. Namuhasa kulondezeza ngachilihi Asa hakuzachila Yehova?

⁷ Mutu himutu atela kulikekesa amone numba nge anakuzachila Kalunga namuchima wosena. Lihulisenu ngwenu, ‘Kutala ngwafwila kwivwisa Yehova kuwaha, nakuhakwila kulemesa chamuchano, nakukinga vatu jenyi kuvilinga vyavipi tahi?’ Achishinganyekenu hakuhamuka chaAsa omu afumishile Maka uze apwile “naye yamwangana” hachihela apwile. Pamo kakweshi mutu weka mwatachikiza alingile vyuma ngana mwaMakako, oloze kunahase kupwa vyuma vimwe  vinahase kumilingisa mulondezeze kuhamuka chaAsa. Chakutalilaho, namulinga ngachilihi nge mutu umwe mutanga yenu nalingi shili, kaha vanamufumisa muchikungulwilo mwomwo yakuhona kupihilila nakwalumuka? Kutala namulitwamina kulikata namutu kana tahi nyi chiku?

⁸ Namusolola ngwenu mwazachila Kalunga namuchima wenu wosena ngana muze alingile Asa, nge namupendamina hali Kalunga halwola navamifumbukila chikuma. Chakutalilaho, vanahase kumisekeleka kuli vakwenu vaka-shikola nakumitoleka mwomwo yakulisolola ngwenu muVinjiho jaYehova. Vanahase nawa kumisekeleka kuli vakwenu mumwazachila hakulomba makumbi mangana muzate milimo yakushipilitu, chipwe mwomwo yakuhona kuzata jola jajivulu mangana mukatambule jimbongo jajivulu. Halwola lwangana mwatela kulomba kuli Kalunga ngana muze alingile Asa. Pwenunga vakuhamuka nakupendamina hali Yehova nakulinga vyuma munejiva ngwenu vyakwoloka. Tachikizenu ngwenu Kalunga mwamikafwa nayenu nawa, ngana muze akafwile Asa.

9. Kwambulula mujimbu nachisolola ngachilihi ngwetu twazachila Kalunga namuchima wosena?

⁹ Vangamba jaKalunga kaveshi kushinganyeka hali vavene kahako. Asa akundwijile kulemesa chamuchano. Nayetu tweji kukafwanga vakwetu mangana “vatondetonde Yehova.” Yehova eji kuwahililanga hakutumona tunakuhanjika vyayikiye navatu twatunga navo, mwomwo twamuzanga nakuzanga nawa vatu vakayoye myaka yosena.

10, 11. Munahase kukavangiza ngachilihi chakutalilaho chaYehoshafwate?

¹⁰ Yehoshafwate mwanaAsa “akavilenga jijila jaise Asa.” (Miji. 2, 20:31, 32) Alingile ngachilihi ngocho? Ngana mwaise, Yehoshafwate akolezezele vatu vatondetonde Yehova. Alongesele mazavu anangule vatu kuzachisa “mukanda waJishimbi jaYehova.” (Miji. 2, 17:7-10) Ayile nakuwangana wavaIsalele wakunote, kungalila yaEfwalime yajipili “mangana avakindulwise kuli Yehova.” (Miji. 2, 19:4) Yehoshafwate apwile mwangana “uze atondeletondele Yehova namuchima wenyi wosena.”—Miji. 2, 22:9.

¹¹ Tuvosena twatela kwazana mumulimo natuhane Yehova wakunangula vatu makumbi ano. Kutala mwafwila kunangula vatu Mazu aKalunga kakweji hikakweji nakuvakafwa vazachile Kalunga tahi? Nge namukilikita nangolo, kaha Kalunga mwamikisula, ngocho namupwa nachilongesa chaMbimbiliya. Uno mweji kufwilanga kuzata natwima tahi? Kutala mweji kulisuulanga kuzachisa lwola lwenu mangana muzate mulimo kanou tahi? Ngana muze Yehoshafwate ayile kungalila yaEfwalime nakukafwa vatu vakinduluke kukulemesa chamuchano, nayetu tunahase kukafwa vaze vazeya kushipilitu vazate cheka natwima. Tulama nawa vatela kutambukilanga vatu vamungalila yavo vaze vafumisa muchikungulwilo, vaze vanaseze vilinga vyavo vyavipi, nakuvakafwa vakinduluke.

12, 13. (a) Yehoshafwate alingile ngachilihi omu apwile muukalu waunene? (b) Mwomwo ika twatela kuvulukilanga ukalu wetu mukulomba ngana muze alingile Yehoshafwate?

¹² Yehoshafwate atwalileho lika kuzachila Kalunga nahalwola vamufumbukilile kuli vaka-kole, ngana muze alingile ise Asa. (Tangenu Mijimbu 2, 20:2-4.) Numba tuhu Yehoshafwate evwile woma, oloze ‘atondeletondele Yehova.’ Alombele nakulinyisa ngwenyi ikiye navatu jenyi kavapwile ‘nangolo jakulwa nalizavu lyalineneko,’ kaha kavatachikijile mwakulingilako. Apendaminyine hali Yehova nakwamba ngwenyi: “[Etu] tunatale kuli ove.”—Miji. 2, 20:12.

 ¹³ Shimbu jimwe nayetu tunahase kwivwa woma nakuhona kutachikiza mwakulingila ngana muze chapwile kuli Yehoshafwate. (Koli. 2, 4:8, 9) Chipwe ngocho mwatela kutachikiza ngwenu Yehoshafwate alombele hatoma mukachi kavatu nakusolola ngwenyi ikiye navatu jenyi kavapwile nangoloko. (Miji. 2, 20:5) Mitwe yajitanga yatela kulondezeza chakutalilaho chaYehoshafwate hakulomba Yehova avakafwe nakuvahana ngolo jakumika mukala ukalu vali nawo mutanga. Kanda namwivwa sonyi kuhanjika hatoma haukalu kana omu namulombanga hamwe natanga yenuko. Echi nachikafwa tanga yenu yimone ngwavo mwafwelela muli Yehova. Kalunga akafwile Yehoshafwate, ngocho mwamikafwa nayenu nawa.

14, 15. Vyuma muka alingile Hezekiya vize vyasolwele nge apendaminyine hali Yehova?

¹⁴ Hezekiya apwile mwangana uze “akakachililenga kuli Yehova,” numba tuhu ise alemeselenga tuponya. Hezekiya “afumishile vihela vyakulunduka, nakupuzula jipanda jajila jamalolwa, nakuteta panda yajila yamutondo. Achikile nawa linoka waunengu uze atengele Mose,” uze jino vazachishilenga vatu kukulemesa chamakuli. Azachilililenga lika Yehova namuchima wosena, mwomwo “alaminenga jishimbi jize Yehova ahanyine Mose.”—Vamya. 2, 18:1-6.

¹⁵ Nahalwola luze vaAsulya vaze vapwile chiyulo changolo chakaye vanyemukilile Yuta nakusaka jino kunongesa Yelusalema, Hezekiya apendaminyine chikuma hali Yehova. Senakelive Mwangana waAsulya, asawile Yehova nakusaka kwivwisa Hezekiya woma. Oloze Hezekiya alombele kuli Yehova nakufwelela ngwenyi mwamukafwa. (Tangenu Isaya 37:15-20.) Kalunga akumbulwile kulomba chenyi hakutuma kangelo kwiza nakujiha vaAsulya 185,000.—Isa. 37:36, 37.

16, 17. Namulondezeza ngachilihi Hezekiya hakuzachila Kalunga?

¹⁶ Kutwala muze Hezekiya avijile chikuma nakusaka kufwa. Kaha alembelelele Yehova amwanuke hamilimo amuzachilililenga mukuyoya chenyi. (Tangenu Vamyangana 2, 20:1-3.) Visoneka vyasolola hatoma nge makumbi ano Kalunga keshi kuka vatu mujila yakukomwesa chipwe kuvahakilako makumbi kukuyoya chavoko. Ngana muze chapwile kuli Hezekiya, tuvosena mutu himutu tunahase kulomba Yehova ngwetu: “Achanuke omu ngunakuzachilanga nakashishi namuchima wami wosena.” Kutala mwafwelela ngwenu Yehova nahase kumikafwa nahalwola muli nakuviza tahi?—Samu 41:3.

¹⁷ Kushinganyeka hachakutalilaho chaHezekiya nachitukafwa tulihende kukala vyuma vize navilingisa usoko wetu naKalunga ufwenga, chipwe kutuhonesa kulemesa Yehova namuchima wetu wosena. Katweshi kusaka kulondezeza vatu vamukaye vaze veji kumonanga vakwavo vatu kupwa nge tulungako. Vaka-Kulishitu vamwe veji kushimutwilanga najitanga namasepa javo kuzachisa Internet. Oloze vatu vavavulu mukaye veji kuzachisanga chikuma Internet hakufwila kutachikiza vatu vaze vaya fuma. Veka nawa veji kwenyekanga lwola lwaluvulu nakutala jifwato chipwe kutanga mijimbu yahanjika havatu kana. Chapwa chaponde kundupukila muvyuma kanevi. Muka-Kulishitu nahase kuputuka kulivwimba nge vatu vavavulu navatanga chikuma mijimbu yenyi nakutala jifwato anakuhakanga haInternet. Kaha nawa nahase kupihilila nge vatu navalitwamina kumusangejeka havyuma kana. Kutala mwashinganyeka ngwenu kaposetolo Paulu chipwe  Akwila naPilishila venyekelenga lwola lwavo hakushimutwilanga vyavatu vaze kavapwile vaka-kwitavako nakuvatuminanga jifwato tahi? Nduma, mwomwo Mbimbiliya ngwayo Paulu ahundanganyinenga “mulimo wakwambulula mazu.” Kaha nawa Akwila naPilishila vazachishile lwola lwavo hakulumbunwina vatu “jila yaKalunga mwakwoloka.” (Vili. 18:4, 5, 26) Mutu himutu atela kulihulisa ngwenyi, ‘Uno ngweji kumonanga vatu vamwe kupwa nge hitulunga chipwe kwenyekela lwola lwami havyuma vyamokomoko tahi?’—Tangenu Wavaka-Efwesu 5:15, 16.

18, 19. Mujijila muka muli nakusaka kulondezezelamo Yoshiya?

¹⁸ Mwangana Yoshiya uze apwile kakwatambuli kaHezekiya alaminenga jishimbi jaYehova “namuchima wenyi wosena.” (Miji. 2, 34:31) Omu apwile mukweze, “aputukile kutondatonda Kalunga kakakuluka yenyi Ndavichi,” kahomu apwile namyaka 20 aputukile kutomesa muYuta hakufumisamo vyuma vize vazachishilenga hakulemesa makombelo. (Tangenu Mijimbu 2, 34:1-3.) Yoshiya alingilenga mwayile muchima waKalunga, kuhambakana vamyangana veka vavavulu vamuYuta. Omu vamutangililile mukanda waJishimbi jaMose uze pamo asonekele Mose yivene, Yoshiya afwililile kuzata chikuma mwayile muchima waKalunga. Akolezezele navakwavo vazachile Yehova. Ngocho vatu “kavapyapumukile mujijila jaYehova” hamakumbi osena ayoyele Yoshiyako.—Miji. 2, 34:27, 33.

¹⁹ Vanyike vatela kulondezeza Yoshiya hakutondatonda Yehova shimbu vachili vavandende. Mwangana Manase uze apihililile nakwalumuka pamo ikiye anangwile Yoshiya atachikize muchima waKalunga wakeke. Enu vanyike, likatenunga navakulwane vakushishika vamutanga yenu chipwe muchikungulwilo mangana vaminangule vyuma vyamwaza vize Yehova navalingilanga. Tachikizenu nawa ngwenu, omu Yoshiya atangile Visoneka, vyamuhetele kumuchima nakumulingisa alingeho vyuma vimwe. Nayenu nawa nge namutanganga Mazu aKalunga, nawamikafwa mulinge vyuma vize navimilingisa muwahilile nakuzamisa usoko wenu naKalunga, nakumilingisa nawa mukafwe vakwenu vatondetonde Kalunga. (Tangenu Mijimbu 2, 34:18, 19.) Kulinangula Mbimbiliya nawa nachimikafwa mumone vyuma mwatela kuzachilaho mangana muzachile kanawa Kalunga. Nge munamono vyuma mwatela kuzachilaho, kaha lingenu ngocho washiwashi ngana muze alingile Yoshiya.

20, 21. (a) Vyuma muka valingile vaze vamyangana vosena vawana tunashimutwila? (b) Vyuma muka natushimutwila muchihande nachikavangizaho?

²⁰ Kutala munanganyala hakushimutwila hali ava vamyangana vawana vamuYuta vaze vazachililile Yehova namichima yavo yosena tahi? Vazachililenga Kalunga natwima, kaha vatwalileho kulinga mwayile muchima wenyi. Valingilenga ngocho nahalwola vavafumbukililenga kuli vaka-kole javo. Chuma chachilemu shina vafwililile kuzachila Yehova mwomwo vamuzangile namichima yavo yosena.

²¹ Ava vamyangana vosena vawana valimbenjelenga, kahevi vikiko natushimutwila muchihande nachikavangizaho. Chipwe ngocho, Yehova avamwene ngwenyi vamuzachililenga namichima yavo yosena. Nayetu nawa katwakupukako. Uno omu Yehova eji kutukekesanga, kutala eji kumonanga ngwenyi tunakumuzachila namuchima wetu wosena tahi? Natushimutwila havyuma kana muchihande chinakavangizaho.