1. Vyuma muka vasaka kulinga visemi vaze vapwa Vinjiho shimbu kanda mwanavo vamumbapachise?

NDUMBWETU Blossom Brandt ambile ngwenyi: “Ngwalwezelenga visemi jami ngwami nguli nakusaka kungumbapachisa, kaha twashimutwililenga hachihande kana mapapa kakavulu. Vasakilenga ngutachikize kanawa kulema chalumbapachiso. Jino kuheta haDecember 31, 1934, hakiko vangumbapachishile.” Namakumbi ano nawa, visemi vaze vapwa Vinjiho vasaka kukafwa vana vavo mangana vasakule kanawa vyakulinga. Shikaho kuzezeka mwanavo chipwe kumukanyisa kumumbapachisa, chinahase kumunehela ponde kushipilitu. (Yako. 4:17) Chipwe ngocho visemi vatela kutachikiza ngwavo shimbu kanda mwanavo vamumbapachise vatela kumulumbunwina ovyo chapwila chachilemu kupwa kambaji kaKulishitu.

2. (a) Vyuma muka vyeji kulingisanga tulama valikomokele? (b) Vyuma muka natushimutwila muchihande chino?

 ² Tulama vakujinguluka vamwe veji kulikomokela chikuma mwomwo veji kuwananga vakweze vavavulu vaze vanakolela mutanga yaVinjiho oloze kavavambapachisako. Kakavulu ava vakweze veji kuyanga kukukunguluka namumulimo wamuwande. Veji kushinganyekanga ngwavo navakiko vapwa Vinjiho jaYehova. Oloze mwomwo yavyuma vimwe, kavasaka kulihana kuli Yehova nakuvambapachisako. Vyuma muka vyeji kuvalingisanga vahone kulinga ngocho? Vamwe veji kuvalwezanga kuli visemi javo ngwavo vavandamineko. Muchihande chino natushimutwila vyuma viwana vize vyeji kulingisanga visemi vahone kukafwa vana vavo mangana vatengamo kuvambapachisa.

3. Visemi jaBlossom valizakaminyine havyuma muka?

³ Visemi jaBlossom vaze tunavuluka mupalangalafu yakulivanga valizakaminyine chikuma ngwavo pamo mwanavo keshi kutachikiza kulema chalumbapachisoko. Uno visemi vanahase kutachikiza ngachilihi numba nge mwanavo nalihane kuli Yehova namuchima wenyi wosena?

4. Uno lushimbi lwaYesu lwahali Mateu 28: 19, 20 nalukafwa ngachilihi visemi omu navanangulanga vana vavo?

⁴ Tangenu Mateu 28:19, 20. Ngana muze twashimutwilanga muchihande chinafumuho, Mbimbiliya kayatulweza myaka atela kupwa nayo mutu numba vamumbapachiseko. Chipwe ngocho, chapwa chachilemu visemi kutachikiza kulema chakupwa kambaji. Mazu ahali Mateu 28:19 asolola nge kambaji apwa mutu uze mwalinangula vyuma anangwilenga Yesu nakufwila kuvikavangiza. Shikaho visemi vaze vapwa Vinjiho vatela kufwila kunangula vana vavo kufuma kuukemba nakuvakafwa mangana vapwenga tumbaji twaKulishitu vakumbapachisa. Chipwe ngocho, kemba keshi kuhasa kutamo kumumbapachisako. Oloze Mbimbiliya yasolola hatoma ngwayo navanyike vanahase kulinangula muchano wamuMbimbiliya nakuwivwishisa.

5, 6. (a) Lumbapachiso lwaChimoteu lwatukafwa tutachikize vyuma muka hali ikiye? (b) Uno visemi vakunangakana vanahase kukafwa ngachilihi vana vavo?

⁵ Chimoteu apwile kambaji uze alinangwile muchano kuunyike wenyi. Kaposetolo Paulu ambile ngwenyi, Chimoteu alinangwile muchano wamuMbimbiliya kufuma kuukemba wenyi. Numba tuhu Chimoteu akolelele mutanga yakwitava chakulihandununa, oloze naye nakaka yenyi vaze vapwile vaYuleya, vamukafwile atachikize Visoneka ngana muze valingilenga vaYuleya. Echi chamukafwile apwenga nalufwelelo lwakukola. (Chimo. 2, 1:5; 3:14, 15) Omu Chimoteu apwile namyaka yakusemuka yamuji 20, aputukile kuzata milimo yakulipwila muchikungulwilo.—Vili. 16:1-3.

⁶ Chipwe ngocho vana valihandununa, kaha kaveshi kuzovolokela hamweko. Vanyike vamwe veji kuzovolokanga washi kushipilitu, ngocho veji kufwilanga kuvambapachisa shimbu vachili vavandende. Oloze veka kavazovoloka washiko, ngocho veji kuvambapachisanga nge vanakolo. Shikaho visemi vakunangakana kavashinjila vana vavo mangana vavambapachiseko. Oloze veji kukafwanga mwana himwana mangana azovoloke kweseka nauhashi wenyi. Visemi navawahilila nge mwanavo mwakavangiza mazu atwama hali Vishimo 27:11. (Tangenu.) Chipwe ngocho kavatela kuvulyama mulimo wavo wakukafwa vana vavo vapwenga tumbaji twaKulishituko. Shikaho, visemi vatela kulihulisa ngwavo, ‘Kutala mwanami ali nachinyingi chakutamo chize nachimukafwa alihane kuli Kalunga nakumumbapachisa tahi?’

7. Kutala mutu atela kupwa nachinyingi chachivulu kutalisa kuMbimbiliya numba vamumbapachise tahi? Lumbununenu.

⁷ Visemi hakupwa vaka-kunangula, vatela kumona ngwavo vana vavo vali nachinyingi chakutamo chize nachivakafwa valihane kuli Yehova. Chipwe ngocho, mutu kasakiwa kutachikiza vyuma vyosena numba jino alihane kuli Kalunga nakumumbapachisako. Nge mutu vamumbapachisa lyehi, atela kutwalaho lika kuzovoloka kushipilitu. (Tangenu Wavaka-Kolose 1:9, 10.) Uno chinyingi muka atela kupwa nacho mutu?

8, 9. Vyuma muka tunahase kulinangula kumujimbu waPaulu nakuli muka-kulama kamenga?

⁸ Chakutalilaho chatanga yimwe yamulikulukaji lyamyaka lyakulivanga chinahase kukafwa visemi makumbi ano. (Vili. 16:25-33) Paulu atambukilile nganda yaFwilipi haungeji wenyi wamuchivali kafwe mu 50 C.E. Omu apwile kuze, ikiye nasepa lyenyi Shilase vavakashile nakuvahaka mukamenga chakuzeneka mulonga. Kuheta naufuku, kwejile mundenda uze walingishile vikolo vyakamenga visokoloke. Muka-kulama kamenga ashinganyekele ngwenyi vafunge vanachinyi, ngocho asakile kulijiha. Oloze Paulu amukanyishile. Paulu naShilase vahanyine unjiho wamwenemwene kuli uze muka-kulama kamenga natanga yenyi. Vyuma muka valingile omu valinangwile muchano wakuvuluka Yesu? Vavambapachishile chakuzeneka kukwata kumashinde. Vyuma muka natulinangula kumujimbu kana?

⁹ Kweseka nachisemwa chava-Loma, mutu kupwa muka-kulama kamenga atelelele kuvangila kupwa liswalale. Uze muka-kulama kamenga katachikijile Visonekako. Shikaho hakusaka atachikize Visoneka, atelelele kulinangula muchano wamaputukilo wamuMbimbiliya, nakutachikiza omwo chalumbunukila kupwa ngamba yaKalunga, nakufwila kukavangiza vyuma anangwilenga Yesu. Mukuhita chalwola, evwishishile chinyingi chamuVisoneka nakumona vyuma kana kupwa vyavilemu, ngocho chamulingishile atengamo kumumbapachisa. Chakuzeneka kukakasana, twafwelela ngwetu atwalilileho lika kulinangula nahanyima yakumumbapachisa. Kweseka nachakutalilaho kana, vyuma muka namulinga nge mwanenu ali nachinyingi chamaputukilo chamuMbimbiliya, nakutachikiza ulumbunwiso nakulema chakulihana nalumbapachiso? Enu visemi mwatela kumona numba nge mwanenu nahase kuya nakuliwana navakulwane muchikungulwilo mangana vamumone nge natemo kumumbapachisa. * Ngana mwatumbaji veka vakumbapachisa, naikiye nahase kutwalaho lika kulinangula vyaYehova mukuyoya chenyi chosena.—Loma 11:33, 34.

10, 11. (a) Vyuma muka veji kushinganyekanga visemi vamwe? (b) Vyuma muka vyavilemu vatela kwanuka visemi?

¹⁰ Visemi vamwe vanamononga ngwavo nachipwa chamwaza vana vavo kuhona kuvambapachisa washi mangana vavangile kuya kumashikola ahelu nakupwa hamilimo yayinene. Vishinganyeka kana vinahase kupwa vyamwaza, oloze kutala vinahase kukafwa mwanavo afukile kushipilitu tahi? Kutala vishinganyeka kana vyalitombola naVisoneka tahi? Mazu aYehova atukolezeza kulinga vyuma muka?—Tangenu Muka-kwambulula 12:1.

¹¹ Twatela kwanuka ngwetu, Yehova ahunga kano kaye navilinga vyosena vyavipi. (Yako. 4:7, 8; Yowa. 1, 2:15-17; 5:19) Nge mwanenu mwapwa  nausoko wamwaza naYehova, kaha nachimukinga kutufuta twaSatana nakuvishinganyeka vyavipi vili muno mukaye. Kachi nge chisemi mwalweza mwanenyi ahake kulutwe milimo yakukaye, kaha chinahase kulingisa mwana ahone kumona kulema chavyuma vyakushipilitu. Uno visemi vazangi vanahase kwechelela vyuma vyamuno mukaye vihonese vana vavo kuzovoloka tahi? Twatachikiza ngwetu tunahase kupwa vakuwahilila nakufukila nge natuhaka milimo yaYehova kulutwe mukuyoya chetu.—Tangenu Samu 1:2, 3.

12. Mwomwo ika visemi vamwe veji kukanyishilanga vana vavo kuvambapachisa washi?

¹² Chisemi umwe akanyishilenga mwanenyi kuhona kumumbapachisa mwomwo yakushinganyeka ngwenyi, “Nge mwanenyi mwakalinga shili navakamufumisa muchikungulwilo.” Ngana mwayou ndumbwetu, navisemi vamwe vanahase kushinganyeka ngwavo nachipwa chamwaza mwanavo kulangisa kumumbapachisa swi noho mwakechela vilinga vyavipi vyosena. (Kupu. 8:21; Vishi. 22:15) Vanahase kushinganyeka ngwavo, ‘Nge mwanami kavamumbapachishileko, kaha kaveshi kuhasa kumufumisa muchikungulwiloko.’ Mwomwo ika vishinganyeka kana vyapwila vyakutangisa?—Yako. 1:22.

13. Uno kukanyisa mwana vahone kumumbapachisa washi chinahase kulingisa Yehova ahone kumuwanyina mulonga tahi? Lumbununenu.

¹³ Twatachikiza ngwetu visemi kaveshi kusaka mwanavo vamumbapachise shimbu kanda atachikize chinyingi chakutamo chize nachimukafwa alihane ivene namuchima wenyi wosenako. Oloze nachipwa chakuhenga kushinganyeka ngwenu nge mwanenu mwalinga shili shimbu kanda vamumbapachise, kaha keshi kupwa namulonga kuli Yehovako. Mwomwo ika? Mwomwo Yehova eji kuwanyinanga mulonga kala mutu uze mwalinga vyuma vyakuhenga numba apwa wakumbapachisa chipwe chiku, chikalu kaha nge mutu kana natachikiza ngwenyi vyuma ali nakulinga vyakuhenga. (Tangenu WaYakova 4:17.) Muchishishisa chakukanyisa mwana vamumbapachise, visemi vakunangakana veji kuzatanga nangolo hakuhana mwanavo chakutalilaho chamwaza. Vasaka kukafwa mwanavo kufuma kuukemba mangana amone jindongi jaYehova kupwa jajilemu. (Luka 6:40) Kukafwa mwana mujila kaneyi chapwa himukingo, mwomwo nachimukafwa afwile kulinga mwaya vishinganyeka vyaYehova vyakwoloka.—Isa. 35:8.

14. Uno tulama vanahase kukolezeza ngachilihi visemi vakafwe vana vavo vatengamo kuvambapachisa?

¹⁴ Hakuwana nge tulama vapwa tufunga vakushipilitu, ngocho vanahase kukafwa visemi vamone kulema chakulitomena kuzata vyuma vyakushipilitu. Ndumbwetu umwe wapwevo uze azachile upayiniya hamyaka yakuzomboka 70, anukilenga vyuma vamukolezezele kuli Ndumbu Charles T. Russell omu apwile namyaka 6. Ambile ngwenyi, “Twashimutwilile haminyutu 15, kaha angukafwile ngulitomene kuzata vyuma vyakushipilitu.” Chapundu vene, mazu akukolezeza anahase kukafwa mutu mukuyoya chenyi. (Vishi. 25:11) Tulama vatela kuhananga visemi hamwe kaha navana vavo milimo yakuzata haZuvo yaWangana, kaha vanyike vatela kuvahana milimo yakuzata kweseka namyaka vali nayo nauhashi wavo.

15. Vandumbwetu muchikungulwilo vanahase kukafwa ngachilihi vanyike?

¹⁵ Vandumbwetu muchikungulwilo vanahase kukafwa vanyike hakuvasolwela chisambo. Shikaho vandumbwetu vatela kupwa vakuvanguluka mangana vamone kuzovoloka chavanyike  vali muchikungulwilo. Kutala kuli kanyike uze eji kukumbululanga vishina vyamwaza chipwe kuhanjika vihande hakukunguluka chamukachi kachalumingo tahi? Uno kanyike kana eji kwambulilanga vakwavo vaka-shikola chipwe kuhonesa cheseko mangana alame kulonga chenyi tahi? Nge mukiko, kaha mwatela kumusangejekanga. Shikaho mwatela kupwanga nachijililo chakushimutwilanga navanyike hanyima yakukunguluka chipwe shimbu kanda kukunguluka chiputuke, mangana vazovoloke kushipilitu. Kulinga ngocho nachikafwa vanyike valivwe nge navakiko vatwama “muchikungulwilo chachinene.”—Samu 35:18.

16, 17. (a) Mwomwo ika chapwila chachilemu vanyike kuvambapachisa? (b) Visemi vatela kwivwa ngachilihi hakumona vana vavo vanavambapachisa? (Talenu muvwimbimbi wakulivanga.)

¹⁶ Kulela mwana ‘mukuzangamisa namukuhuhumuna chakuli Yehova’ himulimo wamwaza atela kuzata chisemi uze apwa Chinjiho. (Efwe. 6:4; Samu 127:3) VaIsalele vahanyinenga mwana kuli Yehova hahaze vene mwasemuka, oloze omu keshi mukiko chili kuli vana vaVinjiho makumbi anoko. Kaha nawa kuzanga Kalunga namuchano kavyapwa vyakuswanako. Kufuma vene halikumbi lize mwasemuka mwana, visemi vatela kukafwa mwanavo apwenga kambaji, nakumukafwa alihane kuli Yehova nakumumbapachisa. Mwomwo ika? Mwomwo kulihana chamutu ivene, nalumbapachiso, nakuzachila Yehova nakashishi nachimukafwa vakamulwile halikumbi lyaluyando lwalunene.—Mateu 24:13.

¹⁷ Omu Blossom Brandt asakile ngwenyi vamumbapachise, visemi jenyi vasakile kutachikiza chikupu numba nge natemo kumumbapachisa nyi chiku. Jino omu vatachikijile ngwavo natemo, vawahililile nachuma asakwile kulinga. Ngocho haufuku wakulinga ngwavo hamene navamumbapachisa, ise alingile chuma chachilemu chikuma. Blossom ambile ngwenyi: “Tata atulwezele tuvosena tutwame, kaha alombele kuli Yehova. Alwezele Yehova ngwenyi nawahilila chikuma havyuma nasakula mwanenyi kulinga mukuyoya chenyi.” Omu mwahichile myaka 60, Blossom ambile ngwenyi: “Kangweshi kukavulyama mazu ahanjikile tata mukulomba chenyi uze ufukuko.” Shikaho enu visemi mwatela kupwanga muvakuwahilila hakumona vana venu navalihana kuli Yehova nakuvambapachisa.