1. Vyuma muka navitukafwa tupwenga namangana, kaha nganyo muka nayifumamo?

YEHOVA ikiye Kasulu kamangana, kaha nawa eji kutukafwanga tupwenga namangana. Mukanda WaYakova 1:5 wamba ngwawo: “Kachi nge mutu umwe hali enu nahono mangana, alombenga lika Kalunga, mwomwo eji kuhananga vosena namuchima umwe chakuzeneka kutoleka.” Jila yimwe tweji kutambwilangamo mangana akufuma kuli Kalunga shina hakwitavila kuhuhumuna chenyi. Ngocho mangana anahase kutukinga kumujimba nakushipilitu. (Vishi. 2:10-12) Echi cheji kutulingisanga ‘tutwamenga muzangi yaKalunga nakuvandamina kuyoya chahaya myaka yosena.’—WaYuta 21.

2. Vyuma muka navitukafwa tumone kuzangamisa chaKalunga kupwa chachilemu?

² Chipwe ngocho, kuhona kukupuka najila vatulelelamo navyuma vyeka vinahase kutulingisa chitukaluhwile kwitavila kutuhuhumuna chipwe kuchimona kupwa chachilemu. Oloze nge natumona nganyo yatwama hakutuhuhumuna, kaha tunahase kutachikiza ngwetu Kalunga atuzanga. Mukanda waVishimo 3:11, 12 wamba ngwawo: “Ove mwanami, kanda naukana kuzangamisa chaYehovako, . . . mwomwo vaze azanga Yehova eji kuvahanjikilanga.” Shikaho, twatela kwanuka ngwetu Yehova atuzanga kaha asaka tuyoyenga kanawa. (Tangenu WavaHepeleu 12:5-11.) Hakuwana nge Yehova atutachikiza kanawa, ngocho eji kutuzangamisanga mujila yize nayitunganyalisa.  Tushimutwilenu vyuma vino viwana: (1) Kupwa namuchima wakulikanyisa, (2) kuzangamisa vana, (3) kuhuhumuna vandumbwetu, (4) kulihenda kuukalu weji kwizanga mwomwo yakulikanga.

3. Uno mwana nahase kupwa ngachilihi namuchima wakulikanyisa? Hanenu chakutalilaho.

³ Muchima wakulikanyisa nautukafwa tuhone kupwa navilinga navishinganyeka vyavipi. Katwasemuka namuchima wakulikanyisako, oloze tweji kulinangulawo. Chakutalilaho, kachi nge mwana ali nakulinangula kuvuwa kinga, chisemi chenyi eji kumukwachililanga kuchina mwaholoka. Nge mwana natachikiza lyehi kuvuwa kanawa, kaha chisemi eji kuputukanga kumwechelela chindende chindende. Kutwala muze mwana eji kulivuwilanga jino ivene. Chochimwe nawa, nge visemi navatwalaho kunangula vana vavo ‘mukuzangamisa namukuhuhumuna chakuli Yehova,’ kaha vana vavo navapwa namangana namuchima wakulikanyisa.—Efwe. 6:4.

4, 5. (a) Mwomwo ika muchima wakulikanyisa wapwila waulemu? (b) Mwomwo ika katwatela kuzeyako kachi nge tunalimbenje?

⁴ Jindongi kana jeji kukafwanga nawa vaze navalinangula muchano muukulwane. Numba tuhu vatu kana vanahase kupwa namuchima wakulikanyisa mwomwo yakukola, oloze kushipilitu vachili vakemba. Chipwe ngocho, nge vatu kana navavwala “mutu wamuhya,” kaha navazovoloka kushipilitu. (Efwe. 4:23, 24) Muchima wakulikanyisa ukiko unahase kukafwa mutu azovoloke kushipilitu. Kaha nawa nachitukafwa “tukane vilinga vyakuhona kumwivwa Kalunga woma, namuchima wakufwila vyuma vyahakaye, oloze tupwenga tuvaka-kushinganyeka mwamangana, vakwoloka, vakwechi muchima wakuzachila Kalunga mukatwamino kamyaka yino.”—Chitu. 2:12.

⁵ Tuvosena katwakupukako. (Kwambu. 7:20) Shikaho nge mutu nalimbenje, kaha kacheshi nakulumbununa nge napu wakukuminamo chipwe katwama namuchima wakulikanyisako. Mukanda waVishimo 24:16 wamba ngwawo: “Muka-kwoloka nahase kulimbuka mapapa 7 nakukatuka cheka.” Jino vyuma muka navimukafwa? Shipilitu yaKalunga yikiko nayimukafwa keshi mungolo jenyi kahako. (Tangenu Wavaka-Fwilipi 4:13.) Shikaho, muchima wakulikanyisa wapwa muhako washipilitu.

6. Vyuma muka navitukafwa tupwenga vaka-kulinangula Mazu aKalunga vamwenemwene? (Talenu muvwimbimbi wakulivanga.)

⁶ Chuma chachilemu chinahase kukafwa mutu apwenga namuchima wakulikanyisa shina kulomba, nakulinangula Mbimbiliya, nakushinganyeka havyuma mwalinangula. Pamo chinahase kumikaluhwila kulinangula Mazu aKalunga mwomwo yakushinganyeka ngwenu kamweshi kuhasako. Tachikizenu ngwenu Yehova mwamikafwa ‘mufwile chikuma’ kulinangula Mazu enyi. (Petu. 1, 2:2) Chatete mwatela kulomba kuli Yehova mangana amikafwe muwanengako lwola lwakulinangula Mbimbiliya. Kufumaho munahase kuputuka kulinangula haminyutu yayindende. Mukuhita chalwola munahase kuputuka jino kulivwisa kuwaha kulinangula Mazu aKalunga nakushinganyeka havilinga vyaYehova vyakulipwila.—Chimo. 1, 4:15.

7. Uno muchima wakulikanyisa nautukafwa ngachilihi tutesemo vyuma vyakushipilitu twalitomena?

⁷ Muchima wakulikanyisa weji kutukafwanga tutesemo vyuma vyakushipilitu twalitomena kulinga. Chakutalilaho omu chisemi umwe walunga amwene ngwenyi ali nakuzeya kushipilitu, alitomenenene kuzatako upayiniya washimbu yosena. Ngocho aputukile kutanga jimangazini jize jahanjikilenga vyaupayiniya, nakulomba. Kulinga vyuma kana chamukafwile azame nakutwalaho lika kuzovoloka kushipilitu. Kufumaho aputukile kuzata upayiniya wakukafwa hatukweji vamwe. Nganyo muka yafuminemo? Numba tuhu amwenenga ukalu, oloze atwalileho kuzata  nangolo mangana atengamo kuzata upayiniya washimbu yosena.

8-10. Vyuma muka vinahase kukafwa visemi vanangule vana vavo vazachile Yehova? Hanenu chakutalilaho.

⁸ Visemi vaka-Kulishitu vatwama namulimo waulemu wakulela vana vavo ‘mukuzangamisa namukuhuhumuna chakuli Yehova.’ (Efwe. 6:4) Makumbi ano, chili chachikalu visemi kunangula vana vavo mujila kaneyi. (Chimo. 2, 3:1-5) Chipwe ngocho, vana kavasemuka nachinyingi chakutachikiza vyuma vyakwoloka nevi vyakuhengako. Oloze chivezu chavo chasakiwa kuchinangula chipwe kuhuhumuna. (Loma 2:14, 15) Mujimbu umwe wamuMbimbiliya wasolola nge lizu lyachiHelase valumuna ngwavo “kuzangamisa,” linahase nawa kulumbununa “kukola chamwana.”

⁹ Vana vaze veji kuzangamisanga muzangi vapwa vakukingiwa. Vatachikiza ngwavo lisesa likwechi noho lyakumina, kaha nawa vyuma navasakula kulinga vinahase kuvanehela ukalu chipwe kuwaha. Shikaho chapwa chachilemu visemi kupendamina hali Yehova avakafwe mwakulelela vana vavo. Anukenu nawa ngwenu leleso yalihandununa kweseka nachisemwa nachisemunwino chavatu. Ngocho nge visemi navevwilila kuli Kalunga nakuhona kupendamina hamangana avatu, kaha navalela vana vavo mujila yamwenemwene.

¹⁰ Achitalenu chakutalilaho chaNowa. Omu Yehova amulwezele asonge wato, Nowa kapendaminyine hachinyingi chenyi kahako. Halwola kana katachikijile mwakusongela watoko. Echi chamulingishile apendamine hali Yehova, nakulinga vyuma vyosena ngana muze vamulwezele. (Kupu. 6:22) Kaha vyuma muka vyafuminemo? Wato uze asongele wamuyowele natanga yenyi. Nowa apwile nawa chisemi wamwenemwene mwomwo apendaminyine hamangana aKalunga. Numba tuhu Nowa ayoyelele mulwola lwalukalu chikuma, oloze anangwilenga kanawa vana venyi nakuvahana chakutalilaho chamwaza.—Kupu. 6:5.

11. Mwomwo ika visemi vatela kuzata nangolo hakunangula vana vavo?

¹¹ Enu visemi, chuma muka nachimikafwa mulele kanawa vana venu? Chuma nachimikafwa shina kwivwilila kuli Yehova mangana amitwaminyine hakulela vana venu. Munahase kulinga ngocho hakuzachisa Mbimbiliya, najindongi tweji kutambulanga kuhichila muliuka lyenyi. Mukuhita chalwola, vana venu vanahase kumisakwilila hamilimo munakuzata. Ndumbwetu umwe walunga ambile ngwenyi: “Ngunawahilila chikuma najila vanangulelelamo visemi jami. Vanangunangula nakunguheta hamuchima. Ngunakuvasakwilila chikuma mwomwo vanangukafwe kuzovoloke kushipilitu.” Chipwe ngocho, visemi vamwe veji kuzatanga nangolo hakunangula vana vavo, oloze chaluvinda vana vamwe veji kusezanga Yehova. Visemi kana veji kupwanga nachivezu chitoma mwomwo vanakilikita kweseka noho hakumina ngolo  javo. Shikaho vatela kutachikiza ngwavo numba tuhu mwanavo naseze Yehova, oloze nahase kukakinduluka cheka.

12, 13. (a) Visemi navasolola ngachilihi ngwavo vononoka Kalunga kachi nge mwanavo vanamufumisa muchikungulwilo? (b) Uno tanga yimwe yanganyalile ngachilihi hakwononoka Yehova?

¹² Visemi vamwe cheji kuvakaluhwilanga kupwa lika vakushishika kuli Kalunga nge mwanavo vanamufumisa muchikungulwilo. Tuchitalenu chakutalilaho chachisemi umwe wapwevo uze apwile namwanenyi vafumishile muchikungulwilo uze afumine hembo. Ou chisemi ambile ngwenyi: “Ngwatangilenga mikanda yetu nakushinganyeka ngwami pamo nanguwanako hamwe haze vahanjika ngwavo ngunahase tuhu kushimutwila nenyi. Oloze lunga lyami angukafwile ngutachikize ngwami mwanetu kapwile cheka mumavoko etuko, ngocho katwatelelele kulikanga kukuzangamisa chaYehovako.”

¹³ Omu mwahichile myaka, uze mwana vamukindulwishile cheka muchikungulwilo. Ou chisemi ambile jino ngwenyi: “Oholyapwa jino tweji kushimutwilanga nakulitumina mijimbu hashinga hakumbi hakumbi. Kaha nawa mwanetu eji kutuvumbikanga mwomwo natachikiza jino ngwenyi tweji kwononokanga Kalunga. Twapwa jino tuvakuwahilila chikuma.” Kachi nge mwanenu vanamufumisa muchikungulwilo, kutala ‘namufwelela Yehova namuchima wenu wosena, nakuhona kupendamina hakunangakana chenu’ tahi’? (Vishi. 3:5, 6) Anukenu ngwenu kuzangamisa chaYehova cheji kusololanga nge apwa wazangi kaha nawa wamangana. Mwatela kutachikiza nawa ngwenu atumine Mwanenyi kwiza nakufwila vatu vosena kuhakilako namwanenu. Kalunga kasaka mutu naumwe akanongeko. (Tangenu WaPetulu 2, 3:9.) Numba tuhu chapwa chachikalu kwononoka, oloze visemi vatela kutachikiza ngwavo Yehova eji kuzangamisanga nakunangula mujila yakwoloka. Shikaho mwatela kwitavila kuzangamisa chaYehova.

14. Uno jindongi eji kutuhananga Yehova kuhichila muli “kaselwa wakushishika” jeji kutunganyalisanga ngachilihi?

¹⁴ Yehova atufwelelesa ngwenyi mwazakamanga, nakukinga, nakunangula chikungulwilo chavaka-Kulishitu. Eji kulinganga ngocho mujijila jakulisezaseza. Chakutalilaho, atongola Mwanenyi Yesu atwaminyine chikungulwilo. Kaha nawa Yesu atongola “kaselwa wakushishika” uze eji kutuhananga kulya chakushipilitu halwola lwakutamo. (Luka 12:42) Echi kulya tweji kuchitambulanga mujijila jakulisezaseza, kaha chikiko Yehova ali nakuzachisa hakutunangula nakutuzangamisa. Lihulisenu ngwenu: ‘Kutala kuliko chihande chaMbimbiliya chipwe chamumikanda yetu chize changukafwile ngwalumuneko vishinganyeka chipwe vilinga vyami tahi?’ Nge mukiko, kaha mwatela kuwahilila, mwomwo muli nakwitavila Yehova amitwaminyine nakumizangamisa mangana munganyale.—Vishi. 2:1-5.

15, 16. (a) Natunganyala ngachilihi kukuhuhumuna ‘chamalunga vaze vapwa wana’ muchikungulwilo? (b) Uno natuhasa kukafwa ngachilihi vakulwane valivwise kuwaha kuzata mulimo wavo?

¹⁵ Kulishitu atongola nawa ‘malunga vaze vapwa wana’ kulumbununa tulama mangana vafungenga utanga waKalunga. (Efwe. 4:8, 11-13) Natunganyala ngachilihi kuli ava malunga? Jila yimwe shina kulondezeza lufwelelo lwavo nachakutalilaho chavo. Jila yikwavo shina yakwitavila vyuma navatuhuhumuna kuzachisa Visoneka. (Tangenu WavaHepeleu 13:7, 17.) Twatela kutachikiza ngwetu tulama vatuzanga chikuma, kaha nawa vazanga tufukile kushipilitu. Chakutalilaho, nge vanamono ngwavo katweshi nakukunguluka chikumako, kaha nawa tunaputuka kuzeya kushipilitu, veji kutukafwanga washiwashi. Veji kwivwililanga kanawa kuukalu wetu nakutukolezeza kuzachisa Visoneka. Shikaho kukafwa kana chasolola nge Yehova atuzanga.

¹⁶ Twatela kutachikiza ngwetu, lwola lumwe  tulama chinahase kuvakaluhwila kutuhuhumuna. Chakutalilaho, kapolofweto Natane chamukaluhwilile kuhuhumuna mwangana Ndavichi omu aswekele mulonga avulumwine. (Samwe. 2, 12:1-14) Chochimwe nawa, kaposetolo Paulu naikiye atelelele kupwa wakumika hakuhuhumuna kambaji Petulu, uze amwenenga ulumbi vandumbwenyi vavaYuleya. (Ngale. 2:11-14) Vyuma muka navitukafwa twitavile nge vakulwane muchikungulwilo navatuhuhumuna? Twatela kupwa vakulinyisa, vavavwovu, nakupwa namuchima wakusakwilila. Shikaho nge vanamikafwe, mwatela kumona ngwenu Kalunga amizanga. Echi nachimilingisa muwahilile nakulingisa tulama nawa valivwise kuwaha kuzata mulimo wavo.

17. Ndumbwetu umwe anganyalile ngachilihi hakumukafwa kuli vakulwane muchikungulwilo?

¹⁷ Ndumbwetu umwe chamukaluhwililenga kuzanga Yehova mwomwo yaukalu amwenenga. Ambile ngwenyi: “Omu ukalu wanguhombesele, ngwamwene ngwami ngwatelelele kulwezako tulama. Kavangutenukilile chipwe kungumona ulumbiko, oloze vangukolezezele, kahechi changujikijishile. Kaha lwola lwosena omu twakumishilenga kukunguluka vanguhulishilenga vatachikize numba nge kuliko ukalu weka. Hakavanga ukalu ngwamwenenga wangulingishile ngushinganyeke ngwami Yehova kanguzangako. Oloze Yehova nazachisanga tulama navandumbwetu muchikungulwilo mangana vangukafwe. Ngweji kumulombanga angukafwe nguhone kukamuseza.”

18, 19. Ukalu muka weji kwizanga mwomwo yakulikanga? Hanenu chakutalilaho.

¹⁸ Numba tuhu kuzangamisa cheji kwivwisanga kukola kumuchima, oloze kuhona kwitavila vatuzangamise chikiko cheji kunehanga ukalu waunene. (Hepe. 12:11) Tushimutwilenu hali Kena naMwangana Zetekiya. Omu Kena ajinyine kujiha songo yenyi Avele, Kalunga amuhuhumwine ngwenyi: “Ikaze unevwila matoto nakuhomba? Kachi nge naulinga mwamwaza, uno kaveshi kukwivwila uselewako numba? Oloze nge kaweshi kulinga mwamwazako, shili yili nakukuvembelela kuchikolo, kaha yili nakufwila kukufungulula. Kutala muhasa kuyihonesa tahi?” (Kupu. 4:6, 7) Kena kevwililile mazu vamuhuhumwineko. Ngocho ajihile songo yenyi, kahechi chamunehelele ukalu waunene. (Kupu. 4:11, 12) Nge Kena evwililile vyuma amuhuhumwine Yehova kachi kamwene ukalu kanako.

¹⁹ Zetekiya mwangana wakuhuka ayulilenga halwola muYelusalema mwapwile vatu vavilinga vyavipi. Kapolofweto Yelemiya ahuhumwine Zetekiya aseze vilinga vyenyi vyavipi, oloze ikiye alikangile. Ngocho naikiye amwene ukalu. (Yele. 52:8-11) Echi chasolola nge Yehova kasaka tulikokele ukaluko.—Tangenu Isaya 48:17, 18.

20. Uno Kalunga mwakalinga ngachilihi vaze veji kukananga kwitavila kuvazangamisa?

²⁰ Vatu mukaye kavamona kuvazangamisa kupwa chachilemuko. Oloze vatu vaze kavasaka kuvazangamisa kuli Kalungako kalinwomu vavanongese. (Vishi. 1:24-31) Shikaho twatela ‘kwivwilila kukunangula chaYehova, kaha natupwa namangana.’ Mukanda waVishimo 4:13 wamba ngwawo: “Linjilila kukunangula, kanda uchechako. Chilame, mwomwo hakiko hapendamina kuyoya chove.”