1. Mbimbiliya yalumbununa ngachilihi lizu kuzangamisa?

VYUMA muka vyeji kwizanga muvishinganyeka vyenu nge munevu lizu “kuzangamisa”? Lizu lize valumuna ngwavo “kuzangamisa” vanahase nawa kulyalumuna ngwavo “jindongi.” Kakavulu eli lizu lyemanyinako chinyingi, namangana, nazangi, nakuyoya. (Vishi. 1:2-7; 4:11-13) Ngocho Kalunga eji kutuzangamisanga mwomwo atuzanga kaha nawa asaka ngwenyi tukayoye haya myaka yosena. (Hepe. 12:6) Kuzangamisa chenyi kachapwa chakuhenga chipwe chaukenyako. Shikaho lizu “kuzangamisa” lyatalisa nawa kukunangula ngana muze chisemi eji kunangulanga mwanenyi uze azanga chikuma.

2, 3. Uno mukuzangamisa mwaliweza vyuma muka? (Talenu muvwimbimbi wakulivanga.)

² Achishinganyekenu kanyike walunga walijina lyaKaumba ali nakwashila ngunja muzuvo. Naye mwamutenukila ngwenyi katela kwashila ngunja muzuvoko mwomwo nahase kwenyeka vyuma. Oloze muchishishisa chakwivwilila naye, ikiye mwatwalaho lika kwasa ngunja nakujiha jino mulondo uze uli hamesa. Uno naye atela kumuzangamisa mujila muka? Nahase kumuzangamisa hakumuveta chipwe hakumunangula vyuma vize navimukafwa. Nahase  nawa kumunangula amone ngwenyi chuma nalingi chakuhenga. Mwamukafwa nawa atachikize ovyo chapwila chachilemu vana kwivwilila visemi javo nakumulweza nawa ngwenyi vyuma veji kuhanjikanga visemi vyapwa vyavilemu. Shikaho hakusaka mwanenyi alinanguleko vimwe, mwamutambula yize ngunja nakuyitumbika. Kulinga chuma kana nachikafwa Kaumba atachikize ngwenyi kuhona kwononoka chapwa chachipi chikuma.

³ Hakuwana nge twatwama muchikungulwilo chavaka-Kulishitu, ngocho tuvosena twapwa tuvakuzuvo yaKalunga. (Chimo. 1, 3:15) Evi vikiko vyalingisa Yehova apwenga nalisesa lyakutuhana jishimbi nakutuzangamisa nawa muzangi nge tunajihokola. Shikaho kachi nge vilinga vyetu navitunehela ukalu, kaha kuzangamisa chenyi nachitukafwa tutachikize ovyo chapwila chachilemu kwivwilila kuli Setu wamwilu. (Ngale. 6:7) Kalunga atuzakama chikuma, ngocho kasaka tupwenga navilinga vize navikatulingisa tukaliveyeko.—Petu. 1, 5:6, 7.

4. (a) Yehova asaka tunangulenga ngachilihi vana navilongesa vyetu? (b) Vyuma muka natushimutwila muchihande chino?

⁴ Kuzangamisa chamuVisoneka chinahase kutulingisa tukafwe mwanetu chipwe chilongesa chetu atengamo kupwa muka-kukavangiza Kulishitu. Mazu aKalunga apwa chinoma chize cheji kutukafwanga, kaha anahase ‘kutuzangamisa mukwoloka.’ Ngocho anahase kukafwa mwanetu chipwe chilongesa chetu ‘alamenga vyuma vyosena vize atulweza Yesu.’ (Chimo. 2, 3:16; Mateu 28:19, 20) Yehova eji kukisulanga vaze veji kunangulanga mujila kaneyi, mwomwo yeji kukafwanga vilongesa vanangule vakwavo vapwenga tumbaji twaKulishitu. (Tangenu WaChituse 2:11-14.) Tushimutwilenu jino havihula vitatu vyavilemu vize vakumbulula: (1) Uno kuzangamisa chaKalunga chasolola ngachilihi nge atuzanga? (2) Vyuma muka natulinangula kuvatu vaze Yehova azangamishile kunyima? (3) Natulondezeza ngachilihi Yehova naMwanenyi nge tuli nakuhuhumuna vakwetu?

5. Uno kuzangamisa chaYehova cheji kusololanga ngachilihi nge atuzanga?

⁵ Yehova eji kutunangulanga nakutwolola nge tunalimbenje mwomwo atuzanga, kaha asaka tupandame kuli ikiye tukayoye haya myaka yosena. (Yowa. 1, 4:16) Kaha nawa katumona kupwa tuvamokomoko. (Vishi. 12:18) Yehova atumona kupwa tuvavalemu, kaha nawa avumbika lisesa lyakulisakwila etu vavene vyakulinga. Chikupu vene, kuzangamisa chaKalunga chakufuma muMazu enyi, chipwe mumikanda yize yahanjika haMbimbiliya, chipwe kuli visemi vaka-Kulishitu, chipwe kuli tulama muchikungulwilo cheji kusololanga nge atuzanga. Shikaho, nge tulama navatukafwa namuchima wauvwovu kaha nawa mujila yazangi nge ‘tunayi mujila yakuhenga’ chakuzeneka kutachikiza, veji kusololanga nge Yehova atuzanga.—Ngale. 6:1.

6. Uno Kuzangamisa chaYehova chasolola ngachilihi zangi yenyi numba tuhu mutu navamutambula milimo muchikungulwilo?

⁶ Lwola lumwe, kuzangamisa kachalumbununa kuhuhumuna chipwe kwolola mutu nakanwa kahako. Nge mutu nalingi shili yayinene, kaha vanahase kumutambula milimo muchikungulwilo. Chipwe ngocho, kuhuhumuna kana cheji kusololanga nge Kalunga atuzanga. Nge mutu vanamutambula milimo muchikungulwilo, chinahase kumukafwa atachikize ngwenyi kulinangula Mbimbiliya, nakushinganyeka havyuma mwalinangula, nakulomba vyapwa vyavilemu chikuma. Echi chinahase kumukafwa azame kushipilitu. (Samu 19:7) Mukuhita chalwola vanahase kumukindulwishila milimo yenyi. Kufumisa mutu muchikungulwilo nawa chasolola nge Yehova atuzanga mwomwo cheji kukinganga chikungulwilo kuvilinga vyavipi. (Koli. 1, 5: 6, 7, 11) Hakuwana nge Kalunga eji kuzangamisanga mujila yakwoloka, ngocho kuhanga mutu muchikungulwilo chinahase kumukafwa apihilile nakwalumuka.—Vili. 3:19.

7. Chihela muka apwile nacho Shevena, kaha muchima muka waupi apwile nawo?

⁷ Hakusaka tumone ovyo kuzangamisa chapwila chachilemu, tushimutwilenu havatu vavali vaze ahuhumwine Yehova. Mutu watete shina Shevena uze ayoyelele mulwola lwamwangana Hezekiya, kaha mukwavo shina Graham wamakumbi ano. Hakuwana nge Shevena apwile kaselwa kaha nawa “mukulwane wakuzuvo yamwangana,” apwile nangolo. (Isa. 22:15) Chaluvinda Shevena aputukile kulivwimba nakusaka ulemu. Alitungililile nachimbumbe chauhando kaha nawa atambukililenga ‘mumatemba aupahu.’—Isa. 22:16-18.

8. Yehova azangamishile ngachilihi Shevena kaha nganyo muka yafuminemo?

⁸ Hakuwana nge Shevena alitohweselenga, ngocho Kalunga ‘amufumishile hamilimo yenyi’ nakushishisaho Elyakime. (Isa. 22:19-21) Chuma kana chalingiwile omu Mwangana waAsulya Senakelive asakile kuya nakulukuka Yelusalema. Mukuhita chalwola, ou mwangana atumine vilolo jenyi nalizavu lyamaswalale kuya kuYelusalema mangana vakevwise vaYuleya woma nakulingisa mwangana wavo Hezekiya asume kupoko. (Vamya. 2, 18:17-25) Mwangana atumine Elyakime kuya nakuhanjika navaze vilolo oloze kayile ukawenyiko. Ayile navakwavo vavali, kaha umwe apwile Shevena uze jino apwile muka-kusoneka. Echi chili nakusolola nge Shevena kapwile namuchima wamatotoko, oloze alinyishile nakwitavila kuzata mulimo vamuhanyine. Jino vyuma muka natulinangula kuli Shevena? Tushimutwilenu havishina vino vitatu.

9-11. (a) Vyuma muka vyavilemu tunalinangula kuli Shevena? (b) Uno jila Yehova azangamishililemo Shevena yinamikafwe ngachilihi?

⁹ Chatete, Shevena vamutambwile mulimo azachilenga. Vyuma alingile vyatela kutwanukisa mazu akwamba ngwavo: “Kulivwimba cheji kutwalanga kukulimbuka, kaha muchima wakulitohwesa weji kuhukanyisanga mutu.” (Vishi. 16:18) Kachi nge mweji kuzatangako milimo yimwe muchikungulwilo yize yasoloka nge yaulemu, kutala mweji kulinyisanga tahi? Kutala mweji kusakwililanga Yehova hawana amihana chipwe hamilimo yimwe mweji kutesangamo tahi? (Koli. 1, 4:7) Kaposetolo Paulu asonekele ngwenyi: “Nangwamba kuli mutu himutu ali muli enu ngwami, kanda alishinganyeka mweka mwakuhambakana omu mwatela kushinganyekako. Oloze kushinganyeka chenyi chipwenga chamangana.”—Loma 12:3.

¹⁰ Chamuchivali, Yehova hakuzangamisa Shevena asolwele ngwenyi nahase kukamuzachisa  cheka kulutwe. (Vishi. 3:11, 12) Chakutalilaho kana chinahase kukafwa vaze vanatambula milimo muchikungulwilo. Muchishishisa chakupihilila, vatela kutwalaho kuzachila Kalunga kweseka noho hakumina ngolo javo, nakumona nawa ngwavo Yehova navazangamisa mwomwo avazanga. Anukenu ngwenu nge natulinyisa kuli Setu Yehova, kaha mwatumona kupwa tuvatu vaze nahase kuzachisa cheka mumulimo wenyi. (Tangenu WaPetulu 1, 5:6, 7.) Kutuzangamisa muzangi hijila yimwe Kalunga eji kutwolwelangamo, shikaho tulinyisenunga kuli ikiye.

¹¹ Chamuchitatu, jila Yehova azangamishililemo Shevena yatela kukafwa vaze vali nangolo jakuhuhumuna vakwavo, vakufwana nge visemi natulama muchikungulwilo. Numba tuhu kuzangamisa cheji kusololanga nge Yehova ahunga shili, oloze cheji kusololanga nawa nge azakama mutu uze navulumuna. Kachi nge mwapwa muvisemi chipwe mutulama, kaha mwatela kulondezeza Yehova hakuhunga vyuma vyavipi vize mwalinga mwanenu chipwe ndumbwenu oku nawa muli nakutala havyuma vyamwaza veji kulinganga.—WaYuta 22, 23.

12-14. (a) Vatu vamwe veji kwivwanga ngachilihi nge vanavazangamisa Kuli Yehova? (b) Mbimbiliya yakafwile ngachilihi ndumbwetu umwe walunga alumune vishinganyeka vyenyi, kaha nganyo muka yafuminemo?

¹² Chaluvinda, vamwe nge vanavahuhumuna veji kupihililanga nakuhanduka kuli Kalunga navatu jenyi. (Hepe. 3:12, 13) Uno echi chili nakusolola nge vatu kana vapwa vamokomoko tahi? Talenu chakutalilaho chino. Graham vafumishile muchikungulwilo nakumukindulwisa, kaha himwazeya cheka kushipilitu. Mukuhita chamyaka alwezele kalama uze alijililile nenyi mangana amunangule cheka Mbimbiliya.

¹³ Ou kalama ambile ngwenyi: “Graham apwile namuchima wakulivwimba. Ahungile vakulwane vaze vasopele mulonga wenyi nakumufumisa muchikungulwilo. Nakushimbula chiku, twashimutwilile hachihande chakulivwimba novyo chapwila chachipi. Mazu aKalunga akafwile Graham amone jino ngwenyi vyuma alingile vyapwile vyavipi. Kahomu amwene ngwenyi apwile namuchima wakulivwimba, hahaze vene aputukile kukilikita mangana alumuke. Aputukile kukunguluka lwola lwosena, nakulinangula Mazu aKalunga, nakulomba. Aputukile nawa kuzakama tanga yenyi kushipilitu kahechi chasuulwishile puwenyi navana venyi.”—Luka 6:41, 42; Yako. 1:23-25.

¹⁴ Ou kalama ambile nawa ngwenyi: “Likumbi limwe, Graham angulwezele vyuma vize vyangukwachile kumuchima. Graham ambile ngwenyi, ‘ngunatwame mumuchano hamyaka yayivulu, kaha nawa ngwazachilengako upayiniya. Oloze oholyapwa hakiko ngunakumona jino ngwami ngwazanga chikuma Yehova.’ Ambile ngwenyi vamulwezele azate mulimo wakuhana mayikolofwoni kuvatu muZuvo yaWangana, kaha mulimo kana auzangile chikuma. Ou kalama ambile ngwenyi, vyuma alingile vyangukafwile ngutachikize ngwami nge mutu mwapwa wakulinyisa nakwitavila Kalunga amuzangamise, kaha navamukisula mwamunene.”

15. Vyuma muka twatela kulinga hakusaka kuzangamisa chetu chikafwe vatu?

¹⁵ Hakusaka tupwenga tuvaka-kunangula vamwenemwene, chatete twatela kulinangula kanawa etu vavene. (Chimo. 1, 4:15, 16) Chochimwe nawa, vosena vaze vatwama nalisesa lyakuhuhumuna vakwavo vatela kutwalaho lika kukavangiza jindongi jaYehova. Kulinyisa chavo chinahase kuvalingisa vavavumbike kuli vakwavo nakupwa nawa vakukasunuka kuhanjika nge vali nakunangula chipwe kuhuhumuna vakwavo. Tuchitalenu hachakutalilaho chaYesu.

16. Vyuma muka natulinangula kuli Yesu hakuhuhumuna nakunangula mujila yamwaza?

 ¹⁶ Yesu evwilililenga kuli Ise lwola lwosena, numba tuhu lwola lumwe kulinga ngocho chapwilenga chachikalu. (Mateu 26:39) Kaha nawa alwezelenga vatu vaze vapwile nakumwivwilila ngwenyi vyuma anangwilenga nachinyingi apwile nacho vyapwile vyakufuma kuli Ise. (Yowa. 5:19, 30) Kulinyisa nakwononoka chaYesu chakafwile vatu vapandame chikuma kuli ikiye nakumulingisa nawa apwenga muka-kunangula wamwenemwene. (Tangenu Luka 4:22.) Mazu ahanjikilenga akolezezele vaze vahombele. (Mateu 12:20) Kaha nawa Yesu atalililenga vatu chikoki nakuvasolwela zangi lwola lwosena. Alingile ngocho hakuhuhumuna vaposetolo jenyi vaze vapwilenga namuchima wakulivwimba.—Mako 9:33-37; Luka 22:24-27.

17. Vilinga muka vyamwaza vatela kupwa navyo tulama numba vafunge kanawa utanga muchikungulwilo?

¹⁷ Vosena vaze veji kuhuhumunanga vakwavo kuzachisa Visoneka vatela kulondezeza Kulishitu. Kulinga ngocho nachisolola nge vasaka Kalunga naMwanenyi vavatwaminyine. Kaposetolo Petulu ambile ngwenyi: “Fungenunga utanga waKalunga uze vamihana kulama hakupwa mutulama, keshi nakulishinjilako, oloze nakulisuula kumeso aKalunga, keshi nakufwila kulinganyalisa enu vaveneko, oloze mukulisakila, keshi kulilingisa kupwa muvakaka javava vanapu uswana waKalungako, oloze pwenunga muvakutalilaho kuutanga. Kahomu mwakasoloka kafunga wamunene, namukatambula muchama waupahu wakuhona kupiluka.” (Petu. 1, 5:2-4) Shikaho, tulama vaze valiluula kuli Kalunga naKulishitu uze apwa mutwe wachikungulwilo veji kunganyalanga nakunganyalisa nawa vakwavo.—Isa. 32:1, 2, 17, 18.

18. (a) Vyuma muka Yehova asaka visemi valingenga? (b) Uno Kalunga eji kukafwanga ngachilihi visemi vatesemo mulimo wavo?

¹⁸ Jindongi kana jinahase nawa kukafwa jitanga. Mitwe yajitanga vavalweza ngwavo “Kanda namwivwisanga kupihya vana venuko, oloze valelenunga mukuvazangamisa namukuhuhumuna chakuli Yehova.” (Efwe. 6:4) Mwomwo ika chuma kana chapwila chachilemu? Mukanda waVishimo 19:18 wamba ngwawo: “Zangamisa mwanove shimbu achili kanyike, kuchina mulonga wakufwa chenyi naukeza hamutwe wove.” Yehova eji kuhananga milonga visemi vaka-Kulishitu kachi nge kaveshi kuhuhumuna vana vavoko. (Samwe. 1, 3:12-14) Shikaho Yehova eji kuhananga mangana nangolo kuli visemi kachi nge navalomba kuli ikiye, nakupendamina haMazu enyi, nashipilitu yajila mangana vivatwaminyine.—Tangenu WaYakova 1:5.

19, 20. (a) Nganyo muka yinahase kufuma hakwitavila kuzangamisa chaKalunga? (b) Vyuma muka natushimutwila muchihande nachikavangizaho?

¹⁹ Nge natwitavilanga kuzangamisa chaKalunga, nakulondezeza nawa jila yize Yehova naYesu veji kuzangamishilangamo, kaha vanahase kutukisula chikuma. Kaha nawa mujitanga namuvikungulwilo munahase kupwa kuunda chachivulu. Cheji kukafwanga nawa vatu vamone ngwavo vavazanga kuli vakwavo, nakuvamona kupwa vavalemu, nakupwa vakukingiwa. Omu mukiko nachikapwa chiyoyelo kulutwe. (Samu 72:7) Chikupu vene, kuzangamisa chaYehova cheji kutunangulanga mwakutwamina mukuunda navakwetu nakutulingisa jino tupwenga mutanga yenyi. (Tangenu Isaya 11:9.) Nge natumonanga kuzangamisa kupwa chachilemu, kaha tunahase kumona ngwetu Kalunga atuzanga.

²⁰ Muchihande nachikavangizaho, natushimutwila vyavivulu omwo tunahase kulondezeza Kalunga hakuhuhumuna vana navandumbwetu. Natulinangula nawa ovyo chapwila chachilemu kwononoka nakulihenda nawa kuukalu uze weji kwizanga mwomwo yakulikanga.