1. Ukalu muka vamwenenga vaka-Kulishitu vamulikulukaji lyamyaka lyakulivanga?

KUFUMA mumwaka wa 62 nakuheta mu 64 C.E., Petulu asonekelele “vaka-kuzuzumana [vaze valimwangile kwosena] muPondu, namuNgalesha, namuKapotosha, namuAja namuMbitunya.” (Petu. 1, 1:1) Vandumbwetu vapwile muvikungulwilo vasakiwile kuvakolezeza nakuvatwaminyina. Ava vandumbwetu vavayanjishilenga nakuvatoleka. Valitalasanyinenga ‘navyeseko vyavinene,’ kaha nawa vapwile nakuyoyela mulwola lwalukalu chikuma. Petulu asonekele ngwenyi: “Kukuma chavyuma vyosena chinapandama kwakamwihi.” Shikaho kwasalile kaha myaka yayindende mangana Yelusalema vayinongese. Vyuma muka vyakafwile vaka-Kulishitu numba vomike halwola kanelu lwalukalu?—Petu. 1, 4:4, 7, 12.

2, 3. Mwomwo ika Petulu akolezezele vandumbwenyi vasolwelenga vakwavo chisambo? (Talenu muvwimbimbi wakulivanga.)

² Chuma chimwe chize Petulu akolezezele vandumbwenyi shina ngwenyi, ‘valitambulenga navakwavo nachisambo.’ (Petu. 1, 4:9) Lizu lyachiHelase valumuna ngwavo “chisambo” lyalumbununa “kuzanga vangeji chipwe kuvasolwela likoji.” Petulu alwezele nawa vandumbwenyi vasololenga chisambo  kuli vakwavo vaze valitachikiza lyehi navo. Uno kupwa nachisambo nachivakafwa ngachilihi?

³ Kupwa nachisambo nachivalingisa vapwenga vakulinunga. Chakutalilaho, kutala vamisanyikaho lyehi kuzuvo yandumbwenu tahi? Kutala kamweshi nakwanuka vyuma mwalivwishile kuwaha likumbi kanako tahi? Kachi nge mwasanyikile ndumbwenu umwe muchikungulwilo, kutala chuma kana kachazamishile usepa wenuko tahi? Kusolwela vandumbwetu chisambo cheji kutulingisanga tuvatachikize kanawa. Vaka-Kulishitu vamumakumbi aPetulu vasakiwile kupwa vakulinunga mwomwo vapwile nakuyoyela mulwola lwalukalu. Omu mukiko chatela kupwa nakuli vaka-Kulishitu makumbi ano mwomwo tuli ‘mumakumbi akukuminyina.’—Chimo. 2, 3:1.

4. Vihula muka natushimutwila muchihande chino?

⁴ Mujijila muka tunahase kusolwelamo vakwetu chisambo? Natuhonesa ngachilihi vyuma vize vinahase kutuhonesa kusolwela vakwetu chisambo? Vyuma muka navitukafwa tuhone kwivwisa vandumbwetu kupihya nge vanatusanyika kuzuvo yavo?

5. Natuhasa kusolola ngachilihi chisambo nge tuli kukukunguluka?

⁵ Kukukunguluka: Tweji kutambwokesanga vosena vaze veji kwizanga kukukunguluka. Yehova naliuka lyenyi vakiko veji kutusanyikanga. (Loma 15:7) Oloze nge kuneza vangeji tweji kuvatambwokesanga nachisambo. Shikaho twatela kutambwokesanga vangeji chamokomoko navwaliso chipwe kulilenga chavo. (Yako. 2:1-4) Nge ngeji kanda vachimulweze hakutwama, kaha munahase kutwama nenyi. Munahase nawa kumukafwa ejive vyuma muli nakulinangula nakumupandumwinako Mbimbiliya. Eyi hijila yamwaza yakusolwelamo chisambo.—Loma 12:13.

6. Uno vatu muka twatela kusanyikanga kujizuvo jetu?

⁶ Hakulihizumuna chipwe hakulya: Kushikulu vatu vasolwelenga chisambo hakusanyika vakwavo kujizuvo javo. (Kupu. 18:1-8; Kuyu. 13:15; Luka 24:28-30) Kulila hamwe vyakulya chazamishilenga usepa wavo nakutwama mukuunda. Uno vatu muka twatela kusanyikanga kujizuvo jetu? Twatela kusanyikanga vandumbwetu vamuchikungulwilo mwomwo vakiko vanahase kutukafwa nge ukalu unatusolokela. Shikaho twatela kufwila kupwa nausepa wakukola navakiko nakutwama navo mukuunda. Mu 2011, Lizavu Lyakutwaminyina lyalumwine lwola lwaChilongesa chaKaposhi Kakutalila haMbetele yamuUnited States. Hakavanga chilongesa kana chaputukilenga nalwola lwa 18:45 oloze vachihakile jino ha 18:15. Mwomwo ika valumwinyine lwola kana? Vavilikile ngwavo nge chilongesa kana nachikumanga washi, kaha vaka-Mbetele vavavulu navapwanga nalwola lwakulisolwela chisambo navakwavo. NahajiMbetele jikwavo vakavangijile kwalumuka kana. Echi chinakafwe vaka-Mbetele kupwa vakulinunga chikuma.

7, 8. Natuhasa kusolwela ngachilihi chisambo vandumbwetu vaze veji kwizanga nakuhanjika vihande muvikungulwilo vyetu?

⁷ Tuvosena tweji kwivwanga kuwaha kututambukila kuli vaka-kuhanjika vihande vakufuma kuvikungulwilo vyeka, natulama vakujinguluka, navaka-kwimanyinako mitango. Elu lwapwa hilwola lwamwaza tunahase kusolwela vandumbwetu chisambo. (Tangenu WaYowano 3, 5-8.) Kupwa nalwola lwakulihizumuna chipwe kulila hamwe vyakulya navandumbwetu hijila yimwe yamwaza yakulingilamo ngocho. Kutala nayenu munahase kulinga chuma kana tahi?

⁸ Ndumbwetu umwe wamuUnited States ambile ngwenyi: “Hamyaka yayivulu ami nalunga lyami twazumbwilenga vandumbwetu vaze vejilenga namapwevo javo nakuhanjika vihande kuchikungulwilo chetu. Shimbu yosena twalingilenga chuma kana, twevwilenga kuwaha, kaha nawa chazamishile lufwelelo lwetu. Katweshi kukavulyama vyuma kanako.”

9, 10. (a) Vatu muka vaze twatela kukafwa chikuma? (b) Kutala navandumbwetu vaze kavatwama naluheto vanahase kukafwa vandumbwavo tahi? Lumbununenu.

⁹ Vangeji vaze navatwama tando yayisuku: Kushikulu vatu vasolwelelenga chisambo vangeji hakuvahana hakusavala. (Yopa 31:32; Fwile. 22) Namakumbi ano nawa kuli vandumbwetu vavavulu vaze vali nakusakiwa kuvakafwa mujila yoyimwe. Chakutalilaho tulama  vakujinguluka vapendamina hali vandumbwavo vakuvikungulwilo veji kutambukilanga mangana vavawahishile hakusavala. Kaha nawa vaze veji kuyanga kumashikola amuliuka navaka-kutunga vakulisakila navakiko veji kusakiwanga kuvakafwa mujila yoyimwe. Ukalu wakulijila nawa weji kwenyekanga jizuvo javatu, ngocho vatu kana veji kusakiwanga kwakusavala palanga nomu navakavawahishila jizuvo javo. Shikaho, katwatela kushinganyeka ngwetu vaze vali najizuvo jajinene vakiko kaha vatela kukafwa ava vandumbwetuko mwomwo pamo vakiko veji kuvakafwanga kakavulu. Kutala namulisuula kuwahishila vandumbwenu hakusavala numba tuhu mwapwa muvakuhutwa tahi?

¹⁰ Ndumbwetu umwe walunga wakuSouth Korea eji kwanukanga omu atambwilenga vandumbwetu vaze vejilenga kumashikola amuliuka. Ambile ngwenyi: “Hakavanga changukaluhwililenga kutambula vangeji mwomwo zuvo yetu yapwile yayindende kaha twapwile tuchili mukulimbata. Oloze kutambula vandumbwetu kana chatunganyalishile chikuma. Hakuwana nge twapwile tuchili mukulimbata, twamwene jino nge vatu vaze vali muulo vanahase kupwa vakuwahilila chikuma kachi nge navazachila Yehova nakufwila kuhaka vyuma vyakushipilitu kulutwe.”

11. Mwomwo ika twatela kusolwela chisambo vandumbwetu vananungulukila muchikungulwilo chetu?

¹¹ Vandumbwetu vaze vananungulukila muchikungulwilo chetu: Vandumbwetu vamwe vanahase kwalukila kungalila yenu. Vamwe vanahase kwiza nakuzachila kuze kunakusakiwa vaka-kwambulula. Kaha nawa vapayiniya vanahase kuvatuma mangana vakafwe chikungulwilo chenu. Echi chapwa hikwalumuka chachinene, mwomwo vatela jino kulijilisa chiyoyelo chachihya, nakutachikiza chisemwa nalilimi veji kuzachisa kungalila kana, nakufwila kulitachikiza navandumbwavo vamuchikungulwilo vanalukila. Shikaho kulihizumunanga navo, nakulila navo hamwe vyakulya nachivakafwa vatunge masepa vavahya nakwijilila nawa chiyoyelo chakungalila kana.

12. Chakutalilaho muka chasolola nge chisambo kachasakiwa kuhana mutu vyuma vyavivuluko?

¹² Kusolola chisambo kachasakiwa kuhana mutu vyuma vyavivuluko. (Tangenu Luka 10:41, 42.) Ndumbwetu umwe anukile omu aputukile mulimo waumishonali, kaha ambile ngwenyi: “Twapwile tuvanyike, katwapwile nachinyingi chikumako, kaha nawa twashinganyekelenga chikuma kwimbo lyetu. Likumbi limwe puwami ashinganyekele chikuma kwimbo lyetu, kaha kangwahashile kumuvendejekako. Oloze omu lwahete lwola lwa 19:30, twevwile mutu ali nakungongomweza kuchikolo chetu. Hakusokololako twamwene mutu uze apwile nakulinangula Mbimbiliya, neza nakututambwokesa oku natumbachila malalanja atatu. Twamulwezele engile muzuvo, kaha twamuhanyine lupasa lwameya. Kufumaho twamuhanyine visakwola vyeka. Halwola kana katwatachikijile lilimi lyaSwahiliko, kaha ikiye nawa katachikijile Chingeleshiko. Chuma kana chatulingishile tuputuke kutunga usepa navandumbwetu vamungalila kana.”

13. Nganyo muka yatwamamo hakusolwela vakwetu chisambo?

¹³ Kutala cheji kumikaluhwilanga kusolwela vakwenu chisambo tahi? Nge mukiko, kaha nachimikaluhwila kutunga masepa vamwenemwene nakulivwisa kuwaha. Kusolwelanga vakwetu chisambo hichuma chize chinahase kutukafwa tuhone kwivwa uli. Oloze munahase kulihulisa ngwenu, ‘Mwomwo ika vatu vamwe cheji kuvakaluhwilanga kusolwela vakwavo chisambo?’ Kwatwama vyuma vimwe vize vyeji kuvalingisanga vahone kulinga ngocho.

14. Twatela kulinga ika nge tweji kuzeyanga nakuhona kuwana lwola lwakusanyika vakwetu chipwe lwakuya kuze navatusanyika?

¹⁴ Lwola nangolo: Vangamba jaYehova vatwama navyakulinga vyavivulu. Vamwe vanahase kushinganyeka ngwavo veji kuzeyanga chikuma nakuhona kupwa nalwola lwakusanyika vakwavo kujizuvo javo. Nge omu mukiko mwapwa  nayenu, kaha mwatela kwalumunako jila mwanonekelamo vyuma. Kulinga ngocho nachimikafwa muhonenga kuzeya chikuma nakupwanga jino nalwola lwakusanyika vakwenu kujizuvo jenu nakuwana nawa lwola lwakuya kuli vandumbwenu vaze navamisanyika. Mbimbiliya yakolezeza vaka-Kulishitu vasolwelenga vakwavo chisambo. (Hepe. 13:2) Shikaho kusolwela vakwetu chisambo chapwa chuma chamwaza chikuma. Shimbu jimwe pamo munahase kukehesako vyakulinga.

15. Vyuma muka vyeji kulingisanga vatu vamwe vahone kusolwela vakwavo chisambo?

¹⁵ Nge munakushinganyeka ngwenu kamweshi kuhasako: Kutala shimbu jimwe mweji kusakanga kusolwela vakwenu chisambo, oloze namulivwa kupwa muvamokomoko tahi? Vamwe veji kwivwanga sonyi nawoma ngwavo kaveshi kuhasa kusuulwisa vangejiko. Kaha veka nawa kavatwama najimbongoko, ngocho vashinganyeka ngwavo kaveshi kuhasa kukafwa vandumbwavo ngana muze veji kulinganga vakwavo muchikungulwiloko. Oloze mwatela kutachikiza ngwenu chuma chachilemu keshi kutohwa chipwe ulangaji wazuvoko, shina unyoji nachisambo namuvasolwela.

16, 17. Vyuma muka navimikafwa muhone kwivwa woma wakusanyika vandumbwenu?

¹⁶ Nge cheji kumikaluhwilanga kusolwela vakwenu chisambo, kaha keshi yenu kahako. Kalama umwe wakuBritain ambile ngwenyi: “Shimbu jimwe tunahase kwivwa woma wakusanyika vakwetu kuzuvo yetu. Oloze kuvasanyika cheji kunehanga nganyo yayinene nakulingisa mutu apwenga wakusuuluka. Ngweji kwivwanga kuwaha kushikama navandumbwami oku tuli nakunwa tiyi.” Tachikizenu ngwenu kusolwela vangeji chisambo chapwa chachilemu chikuma. (Fwili. 2:4) Vatu vavavulu veji kwivwanga kuwaha kulweza vakwavo vyuma vyamwaza vanalivwisanga kuwaha mukuyoya chavo. Shikaho lwola tweji kupwanga nakushikama navakwetu lukiko lwola lwamwaza tunahase kuvalweza vyuma kana. Kalama mukwavo asonekele ngwenyi: “Kusanyika vandumbwami kuzuvo yami cheji kungukafwanga mangana ngwivwishise kanawa ukalu wavo nakutachikiza vyavivulu vyakufwana nge jila valinangwilililemo muchano.” Kusolwela chisambo vaze munasanyika kuzuvo yenu nachivalingisa valivwise kuwaha.

¹⁷ Payiniya umwe wapwevo uze atambwilenga vandumbwetu vaze vejilenga kumashikola amuliuka ambile ngwenyi: “Hakavanga kangwasakilenga kusanyika vangeji kuzuvo yamiko mwomwo muzuvo kamwapwile mwauhandoko kaha nawa vitwamo vyapwilemo vyapwile vyamwaka. Oloze pwevo lyandumbwetu umwe uze apwile muka-kunangula ikiye anguvendejekele. Ambile ngwenyi chuma chavevwishilenga kuwaha chikuma hakuzata mulimo wakutambwojoka nalunga lyenyi, shina kushikama namutu wakuhya kushipilitu numba tuhu wakuhutwa chikalu kaha nge mutu kana afwila kuzachila Yehova nakwashiwisa chiyoyelo ngana mwavakiko. Echi changwanukishile mazu ahanjikilenga mama omu twapwile tuvanyike ngwenyi: ‘Chinawahe kulya visakwola oku munalizange.’” (Vishi. 15:17) Zangi yatela kumilingisa musolwelenga vakwenu chisambo chamokomoko nakuhutwa.

18, 19. Uno kupwa nachisambo nachitukafwa ngachilihi tuhone kumona vakwetu mujila yayipi?

¹⁸ Mujila mweji kumwenangamo vakwenu: Uno kuliko ndumbwenu umwe muchikungulwilo uze eji kumilinganga mwamupi tahi? Nge kamweshi kuvulyama vyuma vyavipi eji kumilinganga ou ndumbwenuko, kaha kamweshi kuhasa kumukonekelako. Kahechi chinahase kumilingisa muhone kumusanyikanga kuzuvo yenu. Nyi pamo kuliko ndumbwenu umwe uze amilingile mwamupi kunyima, kaha chili nakumikaluhwila kuvulyama vyuma amilingile.

¹⁹ Mbimbiliya yatulweza ngwayo, hakusaka tupwenga nausepa wakukola navatu vosena kuhakilako navaka-kole jetu, twatela kusolwelanga chisambo vatu kana. (Tangenu Vishimo 25:21, 22.) Kusolwelanga chisambo mutu uze mwatulinga mwamupi cheji kukehesanga vikokojola nakutulingisa tulikonekelenga. Echi nachitukafwa tumone vilinga vyamwaza atwama navyo mutu kana, vize vyalingishile Yehova amwitavile kupwa muliuka lyenyi. (Yowa. 6:44) Zangi  yinahase kutulingisa tufwile kusanyika mutu uze natulingi mwamupi ezenga kuzuvo yetu. Kahechi nachitukafwa tutunge usepa wakukola naikiye. Uno zangi yinahase kumikafwa ngachilihi musolwelenga vakwenu chisambo? Jila yimwe shina kukavangizanga mazu ahali Wavaka-Fwilipi 2:3 akwamba ngwavo: “Linyisenunga nakumona vakwenu ngwenu vamihambakana enu.” Nge natutachikiza ngwetu vandumbwetu vatuhambakana etu, kaha nachitukafwa tulondezeze lufwelelo nalukakachila lwavo, nakumika chavo, navilinga vyeka vize vatwama navyo vaka-Kulishitu. Kaha kulinga ngocho nachitukafwa tuvazange chikuma nakuvasolwela chisambo.

20. Natusolola ngachilihi ngwetu twavumbika mutu uze natusanyika, kaha mwomwo ika?

²⁰ Muka-kwimba jisamu Ndavichi ahulishile ngwenyi: “Ove Yehova, iya nahase kupwa ngeji mumbalaka yove?” (Samu 15:1) Kufumaho Ndavichi avulukile vilinga vyamwaza vize atela kupwa navyo mutu uze mwasaka kupwa sepa lyaKalunga. Vilinga vimwe shina kuhona kulyonga mwomwo Mbimbiliya yamba ngwayo: “Eji kulinganga vyuma nashiki, numba nge vyuma vinamukaluhwila.” (Samu 15:4) Nge tunetavila kuya kuzuvo yandumbwetu, kaha twatela kutesangamo lushiko kana. Ndumbwetu nahase kuwahisa vyakulya vyavivulu, ngocho nachipihya chikuma kachi nge katweshi kuyako. (Mateu 5:37) Vatu vamwe veji kwalumunanga vishinganyeka vyavo mwomwo yakusaka kuya kuli uze ali naluheto. Kutala chuma kana nachisolola zangi nakavumbi tahi? Shikaho, twatela kusakwililanga kala vyuma navatulingila vandumbwetu vaze veji kutusanyikanga kujizuvo javo. (Luka 10:7) Nge tunamono ngwetu tunakashiwa, kaha twatela kuvalwezela chimweza ngwetu katweshi kukezako.

21. Uno kukavangiza visemwa vyetu nachitukafwa ngachilihi nge vanatusanyika kuzuvo yandumbwetu?

²¹ Chapwa nawa chachilemu kukavangiza visemwa vyetu. Muvisemwa vimwe mutu nahase kulijila ivene chakuhona kumusanyika, oloze muvisemwa vikwavo kuvangila munalishiki. Kujingalila jimwe veji kuvangilanga kuzakama ngeji numba jino vazakame venya limbo, oloze kujingalila jikwavo veji kulilanga hamwe nangeji. Kujingalila jimwe nawa ngeji eji kumbatanga vyuma vimwe akahane vaze vanamusanyika, oloze kujingalila jikwavo kavalinga ngochoko. Muvisemwa vimwe nawa nge mutu vanamusanyika halwola lwatete atela kuvangila kukana oloze muvisemwa vikwavo chuma kana kachasolola nge mutu ali namuchima wakusakwililako. Shikaho twatela kusuulwisanga vandumbwetu vaze navatusanyika.

22. Mwomwo ika chapwila chachilemu ‘kulitambulanga navakwenu nachisambo’?

²² Chuma chachinene chatela kutulingisa tulisolwele chisambo navakwetu shina kutachikiza ngwetu “kukuma chavyuma vyosena chinapandama kwakamwihi.” (Petu. 1, 4:7) Kalinwomu tumone luyando lwalunene luze kanda luchisolokengaho lyehi hano hamavu. Shikaho, twatela kulizanga chikuma navandumbwetu. Luno hilwola lwakukavangiza mazu asonekele Petulu ngwenyi: “Litambulenunga navakwenu nachisambo.” Kusolola chisambo hichuma chachilemu mwomwo natuchilinganga lika haya myaka yosena.—Petu. 1, 4:9.