1, 2. (a) Vyuma muka veji kulinganga visemi vamwe kachi nge mwanavo ali nakusaka kumumbapachisa? (b) Mwomwo ika vaka-kuya kulumbapachiso veji kuvahulishilanga numba nge vanalihane lyehi kuli Yehova? (Talenu muvwimbimbi wakulivanga.)

VISEMI vamwe vaze vapwa Vinjiho vapwile nakwivwilila kuchihande chalumbapachiso. Mwanavo ou natuvuluka ngwetu Kamwengo apwile hamukana wavaze vapwile nakuya kulumbapachiso. Ngocho omu lwola lwahetele lwakwitavila hatoma, ou kanyike akumbulwile nalizu lyakukanguka vihula vivali vize avahulishile muka-kuhanjika chihande. Kufumaho, vamumbapachishile.

² Visemi jaKamwengo vawahililile hakumona mwanavo nalihane kuli Yehova, kaha nawa vali nakumumbapachisa. Chipwe ngocho, hakavanga naye apwile nakukakasana. Alihulishile ngwenyi: ‘Kutala Kamwengo natemo kumumbapachisa tahi? Kutala atachikiza kulema chalumbapachiso tahi? Uno twatela kumulweza achivandamineko tahi?’ Evi hivihula vimwe veji kulihulisanga visemi kachi nge mwanavo mwavalweza ngwenyi ali nakusaka kumumbapachisa. (Kwambu. 5:5) Shikaho kulihana kuli Yehova nalumbapachiso vyapwa vyavilemu kuli vaka-Kulishitu vosena.—Talenu lipwata  lyakwamba ngwavo “ Kutala Munalihane Lyehi Enu Vavene Kuli Yehova Tahi?”

3, 4. (a) Kaposetolo Petulu alumbunwine ngachilihi kulema chalumbapachiso? (b) Mwomwo ika lumbapachiso valufwanyishilile kuwato asongele Nowa?

³ Kaposetolo Petulu afwanyishile lumbapachiso kumulimo azachile Nowa wakusonga wato. Ambile ngwenyi: “Lumbapachiso luze lwalitombola nachuma echi luli nakumilwila nayenu nawa oholili.” (Tangenu WaPetulu 1, 3:20, 21.) Wato uze asongele Nowa wahanyine unjiho wakumusolola nge alingile mwayile muchima waKalunga. Nowa ateselemo mulimo amuhanyine Yehova. Mulimo azachile wamuyowele navaka-tanga yenyi kuLivaji. Uno Petulu atwalile mulihi hakuvuluka chakutalilaho kana?

⁴ Wato kana wasolwele hatoma lufwelelo lwaNowa. Nalumbapachiso nawa lweji kuhananga unjiho kuli vaze navatumona. Uno unjiho muka? Unjiho wakusolola nge kambaji kaYesu nalihane kuli Yehova hakufwelela muli Kulishitu. Ngana mwaNowa, natumbaji vakulihana veji kwononokanga kuzata mulimo avahana Kalunga. Ngana muze Nowa ayovokele kuLivaji, navatu vakushishika vaze vambapachisa navakayovoka omu nakakakuma kano kaye kakuhuka. (Mako 13:10; Kuso. 7:9, 10) Echi chasolola hatoma nge kulihana nalumbapachiso vyapwa vyavilemu chikuma. Mutu uze eji kulangisanga kumumbapachisa, eji kuhakanga lutalililo lwenyi lyakuyoya chahaya myaka yosena muponde.

5. Vyuma muka natushimutwila muchihande chino?

⁵ Natushimutwila vihula vitatu vize navitukafwa tumone kulema chalumbapachiso. Vyuma muka yahanjika Mbimbiliya halumbapachiso? Vyuma muka atela kulinga mutu shimbu kanda vamumbapachise? Mwomwo ika muka-Kulishitu atela kushinganyekanga hakulema chalumbapachiso omu ali nakunangula mwanenyi chipwe chilongesa chenyi?

6, 7. (a) Uno kumbapachisa chaYowano chalumbunwine ika? (b) Lumbapachiso muka lwakulipwila alingile Yowano?

⁶ Lumbapachiso lwatete vavuluka muMbimbiliya shina lwavatu vaze ambapachishile Yowano Muka-kumbapachisa. (Mateu 3:1-6) Vatu vejile kuli Yowano avambapachise, mwomwo vasakile vavakonekele hakuhokola Jishimbi jaMose. Oloze Yowano ambapachishile namutu uze kapwile nashiliko. Ou mutu ambapachishile apwile Yesu Mwana Kalunga uze apwa wakukupuka. (Mateu 3:13-17) Yesu kapwile nashiliko, ngocho katelelele kupihilila nakwalumukako. (Petu. 1, 2:22) Lumbapachiso lwenyi lwasolwele nge alihanyine ivene mangana alinge mwaya muchima waKalunga.—Hepe. 10:7.

⁷ Omu Yesu apwile nakuzata mulimo wenyi hano hamavu, tumbaji twenyi nawa vambapachishilenga vatu. (Yowa. 3:22; 4:1, 2) Ngana mwavatu vaze ambapachishilenga Yowano, navatu vaze vambapachishilenga kuli tumbaji twaYesu vavakonekelelenga hakuhokola Jishimbi jaMose. Oloze omu alingile Yesu hanafu kaha nawa vanamusangula lyehi, lumbapachiso jino lwapwile naulumbunwiso weka kuli vaka-kumukavangiza.

8. (a) Omu Yesu asangukile, mulimo muka ahanyine vaka-kumukavangiza? (b) Uno lumbapachiso lwavaka-Kulishitu lwalumbununa ika?

⁸ Mu 33 C.E., omu Yesu asangukile, asolokele kulizavu lyamalunga vakuzomboka 500, kuhakilako mapwevo navanyike. Halwola kana hakiko pamo ahanjikilile ngwenyi: “Yenunga mukanangule vatu vakumafuchi osena vakapwe tumbaji, mukavambapachise mulijina lyaTata, neli lyaMwana, neli lyashipilitu yajila. Mukavanangule kulamanga vyuma vyosena vize ngunamilweze.” (Mateu 28:19, 20; Koli. 1, 15:6) Chasoloka nge vaka-kumukavangiza vavavulu kuvapwile omu Yesu avalwezele vazate mulimo wakukafwa vatu vapwenga tumbaji. Mazu ahanjikile Yesu asolwele nge lumbapachiso lwapwile hichuma chize chasakiwile kuli vosena vaze vasakile kumbata toka yenyi. (Mateu 11:29, 30) Kala mutu uze asakile kuzachila Kalunga atelelele kwitavila ngwenyi Yehova eji kuzachisanga Yesu mangana atesemo vyuma ajina. Kachi nge mutu netavila chuma kana, kaha vanahase kumumbapachisa. Jila kaneyi yikiko etavila Kalunga. Mijimbu yamuMbimbiliya yasolola nge tumbaji twaKulishitu vavahya vamulikulukaji lyamyaka lyakulivanga vatachikijile ulumbunwiso walumbapachiso. Kaha kavalangishile kulihana vavambapachiseko.—Vili. 2:41; 9:18; 16:14, 15, 32, 33.

9, 10. Vyuma muka natulinangula kulumbapachiso lwakaposetolo Paulu naluze lwakaEchopa uze alumukile nakupwa kaYuleya?

⁹ Tangenu Vilinga 8:35, 36. Achishinganyekenu hachakutalilaho chakaEchopa uze alumukile nakupwa kaYuleya. Mutu kana apwile nakufuma kuYelusalema kuze ayile nakulemesa Kalunga, kaha apwile nakukinduluka kwimbo lyenyi. Kangelo kaYehova atwaminyinyine Fwilipu ayenga kuli ou kaEchopa mangana ‘akamwambulile mujimbu wamwaza waYesu.’ Vyuma muka alingile ou kaEchopa? Vyuma alingile vyasolwele hatoma nge amwene muchano alinangwile kupwa waulemu. Asakile kulinga mwaya muchima waKalunga, ngocho hahaze vene etavilile vamumbapachise.

¹⁰ Chakutalilaho chamuchivali shina chakaYuleya uze ayanjishilenga vaka-Kulishitu. Lunga kana asemukilile munganda muze mwapwile vatu valemeselenga Kalunga. Oloze vaYuleya vajimbalishile usoko wavo naYehova. Ou lunga azangile chikuma kwitava chavaYuleya, oloze omu Yesu Kulishitu ahanjikile kuli ikiye atachikijile jino muchano. Kaha alingile vyuma muka? Etavilile vamukafwe kuli  kambaji kaKulishitu Ananyiya. Mbimbiliya yatulweza ngwayo: “Akatukile, vamumbapachishile.” (Vili. 9:17, 18; Ngale. 1:14) Twatachikiza ngwetu ou kaYuleya ikiye uze ejile nakupwa kaposetolo Paulu. Omu etavilile ngwenyi Yehova eji kuzachisanga Yesu mangana atesemo vyuma ajina, kalangishile kumumbapachisako.—Tangenu Vilinga 22:12-16.

11. (a) Vyuma muka vyeji kukafwanga vaka-kulinangula Mbimbiliya makumbi ano vatengamo kuvambapachisa? (b) Uno tweji kwivwanga ngachilihi nge mutu mwalihana kuli Yehova nakumumbapachisa?

¹¹ Omu mukiko chili nakuli vaze vali nakulinangula Mbimbiliya makumbi ano, numba vapwa vanyike chipwe vakulwane. Vatu vaze vatwama nalufwelelo nakumona muchano wamuMbimbiliya kupwa waulemu, vali nakufwila kulihana vavene kuli Yehova nakuvambapachisa. Hakukunguluka chachihanda nechi changalila, kweji kupwanga chihande chavaze veji kuyanga kulumbapachiso. Vinjiho jaYehova veji kuwahililanga kachi nge muka-kulinangula Mbimbiliya mwetavila muchano nakulihana vamumbapachise. Visemi vaze vapwa Vinjiho veji kuwahililanga hakumona vana vavo vali hamukana wavaze vali nakuya kulumbapachiso. Mumwaka wamulimo wa 2017, vatu vakuzomboka 284,000 vaze ‘vamichima yamwaza’ valihanyine kuli Yehova kuhichila mulumbapachiso. (Vili. 13:48) Ava tumbaji vavahya vatachikijile ngwavo lumbapachiso lwapwa hichuma chasakiwa kuli vaka-Kulishitu. Vyuma muka valingile numba jino vatengamo kuvambapachisa?

12. Vyuma muka atela kulinga muka-kulinangula Mbimbiliya shimbu kanda vamumbapachise?

¹² Shimbu kanda mutu vamumbapachise, atela kutachikiza muchano waKalunga, navyuma ajina, najila asokwelamo vatu kushili. (Chimo. 1, 2:3-6) Kutachikiza vyuma kana cheji kukafwanga mutu alihende kuvilinga vize ahunga Kalunga, nakufwila kukavangiza jindongi jaYehova jakwoloka. (Vili. 3:19) Shikaho mutu keshi kuhasa kulihana kuli Yehova oku nawa ali nakulinga vyuma vize navikamuhonesa kuswana Wangana waKalungako. (Koli. 1, 6:9, 10) Oloze kwasakiwa nawa kulingako vyuma vyeka. Mutu uze afwila kulinga vyuma vyakwoloka atela nawa kupwanga kukukunguluka, nakwazana natwima mumulimo wakwambulula, nakukafwa vatu vapwenga tumbaji. Yesu ambile ngwenyi, mulimo kana vatela kuuzata kuli tumbaji twenyi vamuchano. (Vili. 1:8) Kachi nge mutu mwalinga vyuma kanevi, kaha mwatamo kulihana kuli Yehova nakumumbapachisa.

13. Mwomwo ika vaze navanangula vakwavo Mbimbiliya vatela kwanuka ngwavo mutu uze mwasaka kupwa muka-Kulishitu vatela kumumbapachisa?

¹³ Omu natukafwanga vana vetu navaze tweji kunangulanga Mbimbiliya vazovoloke kushipilitu, twatela nawa kwanuka ngwetu lumbapachiso lwapwa lwalulemu kuli vaka-Kulishitu vamuchano. Kachi nge natushinganyekanga hakulema chalumbapachiso, kaha natukafwa kanawa vilongesa vyetu. Kaha nawa nachitukafwa tuvalumbunwine kanawa kulema chakulihana nalumbapachiso. Ngocho tufwilenu kukafwa vana vetu navaze tweji kunangulanga Mbimbiliya mangana vazovoloke nakuvambapachisa.

14. Mwomwo ika katwatela kushinjila mutu vamumbapachiseko?

¹⁴ Mutu himutu atela kulisakwila ivene numba nge vatela kumumbapachisa nyi chiku. Shikaho kavatela kumushinjila kuli kala mutuko, mwomwo Yehova asaka mutu alihane ivene. (Yowa. 1, 4:8) Ngocho omu natunangulanga vilongesa vyetu, twatela kuvakafwa vamone kulema chakutunga usoko naKalunga. Kachi nge muka-kulinangula Mbimbiliya mwamona vyuma ali nakulinangula kupwa vyavilemu  nakufwila kulinga vyuma vize vatela kulinga vaka-Kulishitu vamuchano, kaha mwalihana vamumbapachise.—Koli. 2, 5:14, 15.

15, 16. (a) Mutu vatela kumumbapachisa namyaka yingahi? Lumbununenu. (b) Mwomwo ika muka-kulinangula Mbimbiliya vatela kumumbapachisa cheka numba tuhu vamumbapachishile muliuka lyeka?

¹⁵ Mutu vanahase kumumbapachisa chamokomoko namyaka ali nayo. Vatu kaveshi kuzovolokela hamweko. Vamwe vanahase kuzovoloka washi vamwe chiku. Vavavulu veji kuvambapachisanga shimbu vachili vanyike, kaha veji kutwalangaho lika kupwa vakushishika kuli Yehova. Oloze veka veji kuvambapachisanga oku vanakolo lyehi. Vamwe veji kupwanga namyaka yakusemuka yakuzomboka 100.

¹⁶ Kashinakaji umwe ahulishile muka-kumunangula numba nge chapwile chakutamo kumbapachisa cheka, mwomwo vamumbapachishile lyehi muliuka lyakwitava apwilenga. Uze muka-kumunangula ashimutwilile nenyi visoneka vize vyamukafwile. Ou kashinakaji evwishishile jino visoneka, kaha chamulingishile alihane kuli Yehova mulumbapachiso. Numba tuhu apwile namyaka yamuji 70, oloze amwene ngwenyi chapwile chachilemu kumumbapachisa. Eyo, lumbapachiso lwamwenemwene lwazama hakutachikiza muchano wavyuma ajina Yehova. Shikaho vaze vali nakulinangula Mbimbiliya vatela kuvambapachisa cheka numba tuhu vavambapachishile lyehi muliuka lyeka.—Tangenu Vilinga 19:3-5.

17. Vyuma muka atela kushinganyeka mutu halikumbi lyakumumbapachisa?

¹⁷ Likumbi lyalumbapachiso lyapwa lyalilemu chikuma mukuyoya chamutu. Lwapwa nawa hilwola lwakushinganyeka haulumbunwiso wakulihana kuli Yehova nalumbapachiso. Mutu atela kuzata nangolo numba atwaleho lika kupwa muka-Kulishitu. Echi chikiko chalingishile Yesu afwanyise mutu uze mwapwa kambaji kaKulishitu kutoka. Tumbaji twaYesu kavatela “kuliyoyela cheka vavene[ko], oloze vamuyoyelenga uze avafwililile, uze nawa vasangwile.”—Koli. 2, 5:15; Mateu 16:24.

18. Vihula muka natushimutwila muchihande nachikavangizaho?

¹⁸ Naye yaKamwengo naikiye ashinganyekelenga mwomumwe omu alihulishile vihula vize twavulukanga kumaputukilo. Nge mwapwa muvisemi, kaha pamo nayenu mwalihulisaho lyehi ngwenu: ‘Kutala mwanami natemo kumumbapachisa tahi? Kutala ali nachinyingi chakutamo chize nachimulingisa alihane ivene kuli Yehova tahi? Uno amona ngachilihi kuya kumashikola ahelu nakwingila milimo yayinene yajimbongo chikuma? Nyi ngachilihi nge navamumbapachisa, kaha kulutwe mwakavulumuna shili yayinene?’ Muchihande nachikavangizaho natushimutwila havihula kanevi nomwo visemi vaze vapwa vaka-Kulishitu vanahase kutwalaho lika kumona lumbapachiso kupwa lwalulemu.