Makumbi ano, kakweshi mutu atachikiza kanawa omu asolokelenga Pauluko. Shikaho mivwimbimbi yaPaulu tweji kufunjejekanga mumikanda yetu, yapwa yakufwanyisako kaha keshi nge mukiko vene asolokelengako.

Chipwe ngocho, kuli unjiho uze unatukafwenga tutachikize omwo asolokelenga Paulu. Chakutalilaho, mangazini yaZion’s Watch Tower yaMarch 1, 1902 yahanjikile haunjiho umwe ngwayo: “Mukanda umwe vavuluka ngwavo, ‘Acts of Paul and Thecla uze vasonekele kafwe mu 150 A. D.,’ walumbununa mijimbu yimwe hali Paulu yize yinahase kutukafwa chikuma. Ou mukanda wahanjika ngwawo Paulu apwile ‘wamwihi, walwanja, wamahinji ateve, wamavoko amanene, wavikenyikenyi vyakuliwana, kaha nawa wamuzulu wausuku.’”

Mukanda waThe Oxford Dictionary of the Christian Church uze vasonekele mu 1997 wahanjika ngwawo: “Ou mukanda waActs watwama namijimbu yamuchano.” Kaha nawa hamakulukaji amyaka amavulu, vatu vamwenenga ou mukanda waActs kupwa waulemu chikuma. Twatachikiza chuma kana mwomwo watwama najimanyusikilipiti 80 jachiHelase, kaha nawa vawalumuna mumalimi eka. Shikaho, mivwimbimbi yaPaulu tweji kufunjejekanga mumikanda yetu kayapwa yakutaka kahako, oloze tweji kukavangizanga unjiho wakushikulu uze watukafwa tutachikize omwo asolokelenga.

Tachikizenu nawa ngwenu kuli navyuma vyeka vyavilemu twatela kutachikiza hali Paulu kuhambakana solokeso yenyi. Omu Paulu azachilenga mulimo wakwambulula, vaka-kufwefulula vamwe vamwambile ngwavo ‘asolokelenga kupwa wakuhehela, kaha nawa hanjikiso yenyi yamokomoko.’ (Koli. 2, 10:10) Chipwe ngocho, twatela kutachikiza ngwetu Paulu alumukile nakupwa muka-Kulishitu mwomwo yavyuma vyakukomwesa alingile Yesu. Twatela nawa kushinganyekanga havyuma alingile Paulu vize vyamulingishile apwenga ‘chuma chakusakula kuli Kulishitu, mangana avilike lijina lyaYesu kuli vaka-mafuchi.’ (Vili. 9:3-5, 15; 22:6-8) Kaha nawa twatela kushinganyekanga havyuma tunahase kunganyala kumikanda yamuMbimbiliya yize Yehova amuhwiminyinyine mangana asoneke.

Paulu kalivwimbilenga havyuma vyavilemu vize alingilenga shimbu kanda apwenga muka-Kulishitu chipwe kulilumbununa omwo asolokelengako. (Vili. 26:4, 5; Fwili. 3:4-6) Ambile ngwenyi: “Ami yami wamundende hali vaposetolo vosena, kaha kangwatelemo kunguvuluka ngwavo kaposetoloko.” (Koli. 1, 15:9) Kufumaho asonekele ngwenyi: “Eli likoji lyalinene vangusolwelelelyo ami wamokomoko muli ava vavandende vamuli vaka-kujila vosena, mangana mujimbu wamwaza waluheto lwaKulishitu luze vahona kulengeza nguuvilike kuli vaka-mafuchi eka.” (Efwe. 3:8) Shikaho mujimbu ambulwilenga Paulu ukiko waulemu keshi nge solokeso yenyiko.