NGWAKOLELELE mungalila yaGraz muAustria. Omu ngwapwile namyaka yakusemuka 7 vangutwalile kushikola yakulinangula vyaushishita. Oloze ngwalikomokelele hakumona tupilishitu vamuchachi kana vali nakulinga ujila navashishita. Ngocho mama angwitavishile ngufume hashikola kana.

Kutwala muze, ngwayile jino kushikola yeka. Likumbi limwe naufuku, tata ejile nakungumbata tuchine mwomwo mbaka yaGraz vayilukukile namata atendazungu. Twachinyinyine mumbaka yaSchladming, kahomu twalingile tulumane mumbaka kana, mbaka yaGraz vayochele. Halwola lukwavo omu twapwile hembo nakaka, jindeke jize japwile nakuhita helu japutukile kutwasa mata. Kahomu yakumine jita twamwene ngwetu tunayovoka.

Kuheta mu 1950, Chinjiho chaYehova umwe aputukile kunangula mama Mbimbiliya. Kakavulu ngwevwilililenga omu apwile nakumunangula, kaha nayami ngwaputukile kuya namama kukunguluka chaVinjiho. Kuheta mu 1952, mama vamumbapachishile mwomwo atachikijile ngwenyi Vinjiho jaYehova vanangwilenga muchano.

Halwola kana muchikungulwilo ayilenga mama mwazalile kaha natushinakaji. Mukuhita chalwola, twayile nakukungulukila kuchikungulwilo chize chapwilenga navakweze vavavulu. Kahomu twakindulukile muGraz, ngwaputukile jino kukunguluka lwola lwosena, ngocho nakushimbula chiku ngwamwene jino ngwami vyuma ngwapwile nakulinangula vyapwile vyamuchano. Shikaho, ngwatachikijile jino ngwami Yehova apwa Kalunga uze eji kukafwanga vangamba jenyi, kaha eji kuvakafwanga namulwola luze veji kwivwanga nge kakweshi mutu nahase kuvakafwako.—Samu 3:5, 6.

Ngwasakilenga kukafwa vakwetu valinangule muchano. Kaha ngwaputukile kunangula vandumbwami ngwasemuka navo. Halwola kana vayaya jami vamapwevo vawana vapwile milongeshi. Ngocho ngwavatambukililenga nakuvakolezeza  valinangule Mbimbiliya. Mukuhita chalwola valingile vyuma ngwavakolezezele, ngocho vapwile jino Vinjiho jaYehova.

Muchalumingo chamuchivali kufuma haze ngwaputukile kwambulwila kuzuvo hizuvo, ngwawanyine mukulwane wapwevo wamyaka yakusemuka yamuji 30, kaha ngwaputukile kulinangula nenyi Mbimbiliya. Azovolokele nakumumbapachisa, kaha kutwala muze lunga lyenyi navana vavo vavali navakiko vavambapachishile. Chuma kana chazamishile lufwelelo lwami. Mwomwo ika? Mwomwo ou ikiye apwile mutu watete kulinangula nenyi Mbimbiliya. Shikaho ngwapwile nalwola lwaluvulu lwakuhitulukila chimweza muvyuma twalinangwilenga. Chapwile kwijiva nge ngwavangilililenga kulinangula ami ivene numba jino nguyenga nakunangula chilongesa chami. Echi changukafwile nguzange chikuma muchano. Kuheta muApril 1954, ngwalihanyine kuli Yehova nakungumbapachisa.

Mu 1955 ngwayile kukukunguluka chamafuchi amavulu chize chapwile muGermany, namuFrance, namuEngland. Omu ngwapwile muLondon ngwaliwanyine nandumbu Albert Schroeder uze apwile muka-kunangula muShikola yaNgileyate Yakulinangula Mbimbiliya. Kaha kutwala muze apwilenga jino muLizavu Lyakutwaminyina. Omu twapwile nakujinguluka muzuvo yakulamina vyuma vyakushikulu, ndumbu Schroeder atwinyikilile jimanyusikilipiti jaMbimbiliya jize japwile nalijina lyaKalunga muvasona vachiHepeleu nakutulumbunwina kulema chavasona kana. Chuma kana changukolezezele ngufwile kukundwiza chikuma muchano wamuMazu aKalunga.

Kuheta haJanuary 1, 1956, ngwaputukile kuzata upayiniya washimbu yosena. Omu mwahichile tukweji vawana vangutongwele kupwa payiniya wakulipwila, kaha vangutumine kuya nakuzachila kuAustria. Halwola kana mumbaka yaMistelbach muze ngwayile nakuzachila kamwapwilenga Vinjihoko. Oloze ngwalitalasanyine naukalu umwe. Ami ngwapwile namyaka kafwe 19, kaha nawa ngwafumine kumbaka oloze mukwetu ngwazachilenga nenyi apwile namyaka 25, kaha nawa afumine kwimbo. Ami kangwazangilenga kuhinduka washiko, oloze ikiye ahindukilenga chimenemene. Kaha nawa ngwasakilenga kushikama, oloze ikiye asavalilenga washi. Chipwe ngocho, Mbimbiliya yatukafwile, kaha twaputukile jino kutwama kanawa nakulivwisa kuwaha kuzata upayiniya.

Kaha nawa twamwenenga ukalu weka waunene. Vatuyanjishilenga oloze “katwasalile uka wetuko.” (Koli. 2, 4:7-9) Likumbi limwe omu twayile nakwambulula vatuswayishile tuwa. Vaze tuwa vatujingilikile oku vanatusenyamina mazo nakuwoza. Twalikwachile kumavoko namukwetu, kahami ngwalombele ngwami, “Ove Yehova nge ava tuwa navatusuma, kaha tukafwe tufwenga washi.” Oloze omu vahetele kwakamwihi nayetu vechele kuwoza nakuputuka kumyangisa mikila nakutuseza. Twamwene ngwetu chikupu vene Yehova ikiye natukingi. Twatwalileho kwambulwila mungalila kana, kaha vatu twawanyine vapwile vakuwahilila chikuma. Pamo valikomokelele hakumona vaze tuwa kavatusumineko nyi pamo mwomwo yakutumona tuli nakutwalaho lika kwambulula. Havatu kanava vamwe vetavilile muchano nakupwa jino vinjiho jaYehova.

Twamwene nawa ukalu weka. Likumbi limwe mwenya-zuvo yize twapwilenga nakutwama apendele, ngocho atwambile ngwenyi nangumijiha mwomwo muli nakuhungumwisa vatu mundandanda.  Puwenyi esekele kumuunjisa, oloze amuhonene. Twavevwile vali nakulikokojwesa omu twapwile mukapete ketu kahelu. Shikaho twashilikile washi vitwamo kuchikolo nakuputuka kulongejeka vikumba vyetu. Omu twasokolwele kuchikolo, twamumwene nemana oku nakwate poko yayinene, ngocho twalovokelele kuchikolo chakunyima nakuchina.

Kufumaho, twayile nakutulila kuzuvo yavangeji, kaha vatuhanyine kapete umwe muze twapwile nakutwama. Twatwamine mukapete kana kafwe hamwaka wamuundu, kahechi chalingishile mulimo wetu uzovoloke. Mwomwo ika? Mwomwo zuvo kana yapwile mukachi kambaka, kaha nawa vilongesa vyetu vazangilenga kwiza nakulinangwila Mbimbiliya kuze twapwilenga etu. Kutwala muze, twaputukile kupwa nachilongesa chamukanda nechi chaKaposhi Kakutalila mukapete ketu navatu kafwe 15.

Twatwamine muMistelbach hamwaka wamuundu nakuzombokaho. Kufumaho vangutumine kuya nakuzachila kuFeldbach, kusulo yambaka yaGraz. Vanguhanyine mukwetu weka wakuzata nenyi, oloze mungalila kana namukiko nawa kamwapwile chikungulwilo numba chimweko. Twatwaminenga mukapete kahelu kazuvo yamapulanga. Peho yahuhwilenga nakwingilila mumahanya azuvo, ngocho twajikilengamo namapapilo amijimbu. Kaha nawa twayilenga nakuswita meya kulishima. Numba tuhu twamwenenga ukalu kana oloze twanganyalile mwamunene. Omu mwahichile tukweji vavandende, twatungile lizavu. Kutwala muze, vatu 30 vaze vapwilenga mutanga yimwe yize twalinangwilenga nayo valumukile nakupwa Vinjiho jaYehova.

Vyuma ngwahichilemo vyangukafwile ngufwelele ngwami, chikupu vene Yehova eji kukafwanga vatu vaze veji kuhakanga milimo yaWangana kulutwe mukuyoya chavo. Numba tuhu vatu kaveshi kutukafwako, oloze Yehova mwatwalaho lika kutukafwa.—Samu 121:1-3.

Mu 1958 ngwasonekele mukanda wakulomba kungwitavisa kuya kukukunguluka chamafuchi amavulu chize chapwililile munganda yaNew York muchivaza chakuhemena chaYankee nechi chaPolo. Vakulwane vahaofesi yamutango yamuAustria vanguhulishile numba nge nangwitavila kuya kushikola yaNgileyate yakusokesa 32. Ngwamwene ngwami echi hikutokwa chachinene, ngocho hahaze vene ngwetavile ngwami, “Nanguya mwane.”

Omu twapwile mushikola ngwatwaminenga kwakamwihi naMartin Poetzinger. Naikiye  vamuyanjishile chikuma omu apwile muchilombo chakulamina vafunge muchiyulo chaNazi. Martin naikiye apwileko muLizavu Lyakutwaminyina. Kakavulu omu twapwilenga mushikola, Martin anguhulishilenga ngumulumbunwine mazu amwe mulilimi lyaGerman.

Omu kwasalile makumbi amandende nakukumisa shikola kana, ndumbwetu Nathan Knorr atulwezele kwakuya nakuzachila, kaha yami vangulwezele kuya nakuzachila kuParaguay. Hakuwana nge ngukanyike, ngocho ngwasakiwile kulomba lisesa kuli tata numba nguyenga kulifuchi kana. Omu tata angwitavishile ngwayile jino kuParaguay muMarch 1959. Ngwatwaminenga namukwetu, kaha twatwaminenga muzuvo yavamishonali yize yapwililile muAsunción.

Nakushimbula chiku, twaliwanyine naWalter Bright, kamishonali uze apwile mushikola yaNgileyate yakusokesa 30. Mukuhita chalwola twalimbachile, ngocho twaputukile jino kuzachila hamwe. Kakavulu nge tuli muukalu, twatangilenga vyuma ashika Yehova hali Isaya 41:10 ngwenyi: “Kanda nawivwa womako, mwomwo nguli nayove. Kanda naulizakaminako, mwomwo nguKalunga kove. Nangukujikijisa, nangukukafwa.” Mazu kana atukafwile tutachikize ngwetu nge natutwalaho lika kupwa vakushishika kuli Kalunga nakuhaka Wangana wenyi kulutwe mukuyoya chetu, kaha keshi kutwechelelako.

Nakushimbula chiku, vatutumine kuya nakuzachila kungalila yalihachile nangiza yaBrazil. Omu twahetele kuze vakulwane vamukwitava valwezele vatu mangana vasenga malolwa hazuvo yetu yize yapwile yakufwa lyehi. Ngocho Walter aputukile kunangula mukulwane watupokola. Uze mukulwane alwezele tupokola vakinge limbo lyetu hachalumingo chamuundu, ngocho kavatuyanjishilenga chekako. Kutwala muze twalukilile muzuvo yamwaza yize yapwililile muBrazil kwakamwihi nangiza. Echi chatukafwile tuhase kukungulukilanga muParaguay namuBrazil. Kaha shimbu kanda twechenga kuzata mulimo waumishonali twasezele vikungulwilo vivali vili nakuzovoloka.

Vandotolo vangulwezele ngwavo kangweshi kukapwaho namwanako, oloze kuheta mu 1962 twalikomokelele chikuma hakuwana nge ngwemichile. Ngocho twalukilile kuHollywood muFlorida ngalila yize yapwile kwakamwihi nakuze vatwaminenga vausoko walunga lyami Walter. Hamyaka yayivulu, ami nalunga lyami katwahashile kuzata upayiniyako mwomwo twapwile namulimo wakulela mwanetu. Chipwe ngocho, twatwalileho lika kuhaka Wangana kulutwe mukuyoya chetu.—Mateu 6:33.

Omu twahetele muFlorida muNovember 1962, twawanyine mujimbu wakwamba ngwavo vandumbwetu vavindele navava velava kavapwilenga nakukungulukila hamweko, kaha nawa vambulwililenga mujingalila jakulihandununa. Hakuwana nge Yehova katala vatu kumesoko, nakushimbula chiku vandumbwetu vavindele navava velava vaputukile kukungulukila hamwe. Chikupu vene, Yehova azachile nangolo, kaha oholyapwa ngana mungalila kana muli jino vikungulwilo vyavivulu chikuma.

Chaluvinda kuheta mu 2015, lunga lyami afwile namusongo wakasa yakuwongo. Twatwamine muulo nalunga lyami hamyaka 55, kaha nawa azangile chikuma Yehova nakukafwa vandumbwetu vavavulu. Shikaho nguli nakutalilila kulwola luze mwakasanguka oku nawa wakulikangula.—Vili. 24:15.

Chikupu vene, ngunanganyala chikuma hakupwa mumulimo washimbu yosena hamyaka yakuzomboka 40. Chakutalilaho, ami nalunga lyami twevwilenga chikuma kuwaha hakumona vatu 136 vaze twanangwilenga Mbimbiliya navalumuka nakupwa Vinjiho. Numba tuhu twamwenenga ukalu, oloze katwechelelele ukalu kana utuhonese kupwa vakushishika kuli Kalungako. Twapendaminyine chikuma hali ikiye, nakufwelela ngwetu mwatukafwa halwola atongola, kaha nawa mujila yakutamo. Kaha chikupu vene atukafwile.—Chimo. 2, 4:16, 17.

Shimbu jimwe ngweji kwanukanga chikuma lunga lyami, oloze kuzata upayiniya cheji kungukafwanga chikuma ngumike. Ngweji kufwilanga kunangulako vakwetu vyalutalililo lwakusanguka chize nachikapwa kulutwe. Chikupu vene, Yehova nangukafwe chikuma mukuyoya chami chosena. Ngana muze ahanjika Mazu enyi, Yehova nanguzamikisa, nangujikijisa kaha nangukwachililanga ‘nalivoko lyenyi lyachilyo lyakwoloka.’—Isa. 41:10.