1. Chuma muka atela kulinga mutu shimbu kanda aputuke kutunga zuvo?

ACHISHINGANYEKENU mutu ali nakusaka kutunga zuvo. Numba tuhu nejiva muyachi wazuvo mwatunga, kutala mwavundumuka kaha nakuya nakulanda vyakuzachisa nakuputuka kutunga tahi? Nduma. Atela kuvangila kutwama hamavu mangana alave jimbongo jili nakusakiwa. Mwomwo ika? Mangana atachikize numba nge ali najimbongo jakutamo nyi chiku. Kachi nge mwalavila chimweza jimbongo, kaha chinahase kupwa chachashi kukumisa zuvo yenyi.

2. Kweseka naLuka 14:27-30, vyuma muka atela kushinganyekaho mutu shimbu kanda vamumbapachise?

² Uno kuzanga Yehova nakupwa namuchima wakusakwilila havyuma amilingila vinamilingisa mufwile kumimbapachisa tahi? Nge mukiko, kaha munalifwane nauze mutu ali nakusaka kutunga zuvo. Mwomwo ika? Achishinganyekenu hamazu ahanjikile Yesu hali Luka 14:27-30. (Tangenu.) Yesu apwile nakulumbununa vyuma atela kulinga mutu numba apwenga kambaji kenyi. Hakusaka tupwenga tuvaka-kumukavangiza, twatela kulisuula kumona ukalu nakuseza vyuma vize yafwila michima yetu. (Luka 9:23-26; 12:51-53) Shikaho, shimbu kanda vamimbapachise, mwatela kushinganyeka kanawa havyuma vyasakiwa. Echi nachimikafwa mupwenga vakulizanga kutwalaho lika kuzachila Kalunga nakashishi hakupwa muvaka-Kulishitu vakumbapachisa.

3. Vyuma muka natushimutwila muchihande chino?

³ Uno kuseza vyuma twalivwishilenga kuwaha nakupwa kambaji kaKulishitu wakumbapachisa chikwechi nganyo tahi? Eyo. Lumbapachiso lweji kulingisanga mutu alivwise kuwaha vyuma vyamwaza vyavivulu oholyapwa nakulutwe nawa. Tushimutwilenu vihula vimwe vyavilemu kupandama kulumbapachiso vize navimikafwa mukumbulule chihula chakwamba ngwavo, “Kutala ngunalizange kungumbapachisa tahi?”

4. (a) Uno kulihana chapwa chika? (b) Kweseka naMateu 16:24, mutu ‘kulikana’ ivene chalumbununa ika?

⁴ Uno kulihana chapwa chika? Shimbu kanda vamimbapachise, mwatela kulihana kuli Kalunga. Echi chalumbununa nge mwatela kulomba Yehova nakumushika ngwenu namumuzachilanga mukuyoya chenu chosena. Kulihana kuli Kalunga chalumbununa nge ‘munalikane’ enu vavene. (Tangenu Mateu 16:24.) Namupwa jino mutu waYehova, kahechi hikutokwa chachinene. (Loma 14:8) Halwola kana namumushika ngwenu namutwalaho kumuzachilanga nakulihenda kukulisuulwisa enu vavene. Kulihana chapwa kushika Kalunga lushiko. Numba tuhu Yehova katushinjila tumushike lushiko kanako, oloze nge tunamushiki lyehi, asaka tulutesemo.—Samu 116:12, 14.

5. Chihandwa muka chatwama hakulihana nahalumbapachiso?

⁵ Chihandwa muka chatwama hakulihana nahalumbapachiso? Mutu eji kulihananga kuli Yehova kwauka wenyi, oloze veji kumumbapachishilanga kumeso avatu. Kakavulu cheji kupwangako hakukunguluka chachihanda chipwe changalila. Omu veji kumbapachisanga mutu, cheji kusololanga kuvatu vosena nge mutu kana nalihane lyehi kuli Yehova. * Shikaho, cheji kulingisanga vatu vejive ngwavo mutu kana azanga Yehova Kalunga kenyi namuchima wenyi wosena, namwono wenyi wosena, navishinganyeka vyenyi vyosena, nangolo jenyi josena, kaha nawa ngwenyi ali nakufwila kumuzachila mukuyoya chenyi chosena.—Mako 12:30.

6-7. Kweseka nachisoneka chaWaPetulu 1, 3:18-22, vyuma muka vivali vyalingisa lumbapachiso kupwa lwalulemu?

⁶ Uno lumbapachiso lwapwa lwalulemu tahi? Achishinganyekenu hamazu atwama hali WaPetulu 1, 3:18-22. (Tangenu.) Ngana muze wato wasolwele hatoma nge Nowa apwile nalufwelelo, mukiko nalumbapachiso nawa lweji kusololanga hatoma nge mutu nalihane kuli Yehova. Uno lumbapachiso lwapwa lwalulemu tahi? Eyo. Petulu ahanjikile havyuma vyalingisa lumbapachiso kupwa lwalulemu. Chatete, ‘nalumilwila.’ Lumbapachiso lunahase kumilwila kachi nge namulinga vyuma vize navisolola hatoma nge mwafwelela Yesu nakwitavila ngwenu amifwililile, kaha vamusangula nakuya mwilu, kaha nawa oholyapwa “ali kulivoko lyachilyo lyaKalunga.”

⁷ Chamuchivali, lumbapachiso lweji kulingisanga mutu apwenga ‘nachivezu chamwaza.’ Nge tunalihane kuli Kalunga nakutumbapachisa, kaha natutunga usepa wakulipwila nayikiye. Kaha nawa nge tunalingi shili, Kalunga mwatukonekela kachi nge natupihilila nakwalumuka namuchima wetu wosena hakufwelela mundando yakusokola. Kahechi nachitulingisa tumuzachile nachivezu chamwaza.

8. Chuma muka chatela kumilingisa mufwile kumimbapachisa?

⁸ Chuma muka chatela kumilingisa mufwile kumimbapachisa? Hanyima yakulinangula Mbimbiliya, munatachikiza jino vyavivulu hali Yehova. Munatachikiza vilinga vyenyi najila eji kulingilangamo vyuma. Vyuma munalinangula vinamivwisa kuwaha nakumilingisa mumuzange chikuma. Shikaho, kuzanga Yehova chikiko chatela kumilingisa mufwile kumimbapachisa.

9. Kweseka naMateu 28:19, 20, kumbapachisa mutu mulijina lyaTata, neli lyaMwana, neli lyashipilitu yajila chalumbununa ika?

⁹ Chuma chikwavo nawa chatela kumilingisa vamimbapachise shina muchano wamuMbimbiliya uze munetavila. Chakutalilaho, achishinganyekenu havyuma ahanjikile Yesu hakuhana vaka-kumukavangiza mulimo wakunangula vatu vapwenga tumbaji. (Tangenu Mateu 28:19, 20.) Kweseka namazu ahanjikile Yesu, mutu vatela kumumbapachisa “mulijina lyaTata, neli  lyaMwana, neli lyashipilitu yajila.” Uno echi chalumbunwine ika? Mutu atela kwitavila vyuma yanangula Mbimbiliya hali Yehova nahali Yesu nahashipilitu yajila. Vyuma kana vyatwama nangolo kaha nawa vinahase kumivwisa kuwaha. (Hepe. 4:12) Tuchishimutwilenu havyuma vimwe.

10-11. Vyuma muka yanangula Mbimbiliya hali Yehova vize munalinangula nakuvitavila?

¹⁰ Achishinganyekenu havyuma mwalinangwile hali Setu wamwilu. Mwalinangwile nge ‘lijina lyenyi ikiye Yehova,’ apwa “Wakulitulaho Chikuma hamavu hosena,” kaha nawa ikiye kaha “Kalunga wamuchano.” (Samu 83:18; Isa. 37:16) Ikiye Tengi yetu, kaha nawa “ulwilo wapwa wakuli” ikiye. (Samu 3:8; 36:9) Alongesa vyuma mangana akatusokole kushili nakukufwa, nakutuhana lutalililo lwakuyoya chahaya myaka yosena. (Yowa. 17:3) Kulihana chenu nakwitavila kumimbapachisa navimisolola nge munapu jino Chinjiho chaYehova. (Isa. 43:10-12) Kaha namupwa jino mutanga yayinene yavatu vaze veji kulemesanga Kalunga nakuwahilila hakuvavulukila lijina lyenyi nakulitandakanyisa kuvatu.—Samu 86:12.

¹¹ Chapwa hikutokwa chachinene kutachikiza vyuma yanangula Mbimbiliya hali Setu. Kachi nge namwitavila vyuma kana, kaha nachimilingisa mufwile kulihana kuli Yehova nakumimbapachisa.

12-13. Vyuma muka munalinangula hali Mwana nakuvitavila?

¹² Uno mwevwile ngachilihi omu mwalinangwile vyuma yahanjika Mbimbiliya hali Mwana? Mbimbiliya ngwayo, Yesu ikiye muhato waKalunga. Ikiye Muka-kutusokola. Alisuwile kutufwila. Shikaho, nge natupwa navilinga vize navisolola nge twafwelela mundando yakusokola, kaha Kalunga mwatukonekela jishili jetu, nakupwa nausoko naikiye, kaha nawa natukayoya haya myaka yosena. (Yowa. 3:16) Yesu ikiye Kapilishitu Wakulitulaho. Asaka kutukafwa tunganyale kundando yakusokola nakupwa nausoko naKalunga. (Hepe. 4:15; 7:24, 25) Hakupwa Mwangana waWangana waKalunga, ikiye navakazachisa kuli Yehova mangana akalingise lijina lyaKalunga kupwa lyajila, nakukumisa upi, nakuneha Palachise. (Mateu 6:9, 10; Kuso. 11:15) Yesu apwa nawa chakutalilaho chetu. (Petu. 1, 2:21) Alingilenga mwaya muchima waKalunga mukuyoya chenyi chosena, ngocho twatela kumulondezeza.—Yowa. 4:34.

¹³ Nge namwitavila vyuma yanangula Mbimbiliya hali Yesu, kaha namumuzanga chikuma ou MwanaKalunga. Zangi kana nayimilingisa mumulondezeze hakulinga mwaya muchima waKalunga. Ngocho, namufwila jino kulihana kuli Yehova nakumimbapachisa.

14-15. Vyuma muka munalinangula hashipilitu yajila nakuvitavila?

¹⁴ Vyuma muka mwashinganyekele omu mwalinangwile vyuma vimwe hashipilitu yajila? Chakutalilaho, shipilitu yajila kayapwa mutuko, oloze yapwa ngolo jaKalunga. Yehova azachishile shipilitu yajila hakukafwa vatu vasoneke Mbimbiliya, kaha nawa eyi shipilitu yikiko yeji kutukafwanga twivwishise vyuma tweji kutanganga muMbimbiliya nakuwana mwakuvizachishila mukuyoya chetu. (Yowa. 14:26; Petu. 2, 1:21) Eji kuzachisanga nawa shipilitu yajila hakutuhana “ngolo jakuhambakana jize javatu.” (Koli. 2, 4:7) Eyi shipilitu yeji kutuhananga ngolo twambulule mujimbu wamwaza, nakufungulula vyeseko, nakukakachila nge tuli nakumona ukalu nakutuvendejeka nge tunahombo. Yeji kutukafwanga nawa twimenga “mihako yashipilitu.” (Ngale. 5:22) Kalunga eji kuhananga shipilitu yenyi yajila kuli vaze vamufwelela, vaze nawa veji kumulombangayo.—Luka 11:13.

¹⁵ Twawahilila hakutachikiza ngwetu Yehova eji kukafwanga vaka-kumulemesa hakuzachisa shipilitu yenyi. Kwitavila vyuma yanangula Mbimbiliya hashipilitu yajila nachimilingisa mufwile kulihana kuli Kalunga nakumimbapachisa.

16. Vyuma muka tunalinangula muchihande chino?

 ¹⁶ Kachi nge namulihana kuli Kalunga nakumimbapachisa, kaha namulinga chuma chamwaza chikuma. Nganomu tunashimutwila, mwatela kulisuula kumona kala ukalu nakuseza vyuma vize wafwila muchima wenu. Ijivenu ngwenu, kulinga ngocho nachiminehela jikisu jajivulu chikuma. Lumbapachiso nalumilwila nakumilingisa mupwenga nachivezu chamwaza hakuzachila Kalunga. Kuzanga Yehova Kalunga chikiko chuma chatela kumilingisa mufwile kumimbapachisa. Mwatela nawa kufwelela vyuma yanangula Mbimbiliya hali Tata naMwana nashipilitu yajila. Hanyima yakushimutwila vyuma kana, twafwelela munalizange jino kukumbulula chihula chakwamba ngwavo, “Kutala ngunalizange kungumbapachisa tahi?”

17. Vyuma vimwe muka vize atela kulinga mutu numba atengamo kumumbapachisa?

¹⁷ Kachi nge munamono ngwenu munalizange kumimbapachisa, kaha chinalumbununa nge munalingi lyehi vyuma tunashimutwila mangana mupwenga nausoko wamwaza naYehova. * Kaha nawa kulinangula Mbimbiliya chinamilingisa mutachikize Yehova naYesu nakupwa nalufwelelo. (Hepe. 11:6) Mwafwelela ngwenu vyuma ashika Yehova muMbimbiliya navikatesamo, kaha nawa ngwenu kufwelela mundando yakusokola yaYesu nachimisokola kushili nakukufwa. Munapihilila nakwalumuka kujishili jenu nakwivwa kupihya havyuma kana kaha munalombo Yehova amikonekele. Kaha nawa munalumuna kuyoya chenu hakwecha vilinga vyenu vyavipi nakuputuka jino kuyoya mujila yize nayivwisa Kalunga kuwaha. (Vili. 3:19) Ngocho mwazanga kulwezako vakwenu vyuma mwafwelela. Kaha nawa mwatelemo kupwa muka-kwambulula wakuzeneka kumbapachisa nakuputuka kwambulula hamwe nachikungulwilo. (Mateu 24:14) Mwatela kwijiva ngwenu Yehova awahilila chikuma hakumimona munatesamo vyuma kanevi vyasakiwa.—Vishi. 27:11.

18. Vyuma vyeka muka mwatela kulinga shimbu kanda vamimbapachise?

¹⁸ Kuli nawa vyuma vyeka mwatela kulinga shimbu kanda vamimbapachise. Ngana muze tunalinangula, mwatela kulihana kuli Kalunga, kulumbununa nge mwatela kumulomba nakumushika ngwenu namulinganga mwaya muchima wenyi mukuyoya chenu chosena. (Petu. 1, 4:2) Kufumaho, lwezenu muka-kuwanyisa lizavu lyavakulwane ngwenu muli nakusaka kumimbapachisa. Kaha ikiye mwalweza vakulwane vamwe vashimutwile nayenu. Kanda namwivwa woma kushimutwila navakulwane kanako, mwomwo ava vandumbwetu vamitachikiza, kaha nawa vamizanga. Navamihitulwisa muvishina munalinangula muMbimbiliya, mangana vatachikize numba nge munevwishisa vishina kana, kaha nawa munatachikiza kulema chakulihana kuli Kalunga nakumimbapachisa nyi chiku. Nge navamona ngwavo munatemo kumimbapachisa,  kaha navamilweza ngwavo navamimbapachisa hakukunguluka chachihanda chipwe changalila chize nachizaho.

19-20. Vyuma muka mwatela kulinga nge vanamimbapachisa lyehi, kaha ika nayimikafwa mutesemo vyuma kana?

¹⁹ Uno vyuma muka mwatela kulinga nge vanamimbapachisa lyehi? * Anukenu ngwenu kulihana chapwa lushiko luze tweji kushikanga Yehova ngwetu natumuzachilanga mukuyoya chetu chosena, kaha asaka tulutesemo. Shikaho, nge vanamimbapachisa, mwatela kutesamo lushiko kana. Uno vyuma muka navimikafwa mutesemo lushiko kana?

²⁰ Likatenu nachikungulwilo. Nge vanamimbapachisa lyehi, kaha namulinunga jino ‘navandumbwenu.’ (Petu. 1, 2:17) Vandumbwenu muchikungulwilo vanapu jino tanga yenu yakushipilitu. Shikaho, namuzamisa usoko wenu navakiko nge namupwanga kukukunguluka lwola lwosena. Tangenunga Mazu aKalunga nakuwashinganyekanga hakumbi hakumbi. (Samu 1:1, 2) Kachi nge munatange mujimbu umwe muMbimbiliya, kaha lihulikenu nakushinganyekaho. Nge namulinga ngocho, kaha mazu namutanga nawamiheta kumuchima. Chikwavo nawa, “lombenunga lika.” (Mateu 26:41) Kulomba nachimilingisa mupandame chikuma kuli Yehova. Kaha nawa “tondenunga lika chatete Wangana” waKalunga. (Mateu 6:33) Shikaho mwatela kumona mulimo wakwambulula kupwa waulemu. Nge namwazananga mumulimo wakwambulula lwola lwosena, kaha namupwa nalufwelelo lwakukola nakukafwa nawa vatu vapwenga nalutalililo lwakukayoya haya myaka yosena.—Chimo. 1, 4:16.

21. Uno kumimbapachisa nachiminehela nganyo muka?

²¹ Kulihana kuli Yehova nakumimbapachisa hivyuma vyavilemu mwatela kulinga mukuyoya chenu. Numba tuhu kuli vyuma vyavivulu mwatela kulinga numba mutengamo, oloze kulinga ngocho chapwa chachilemu. Kala luyando namumona mukaye kano lunapu “lwahakapyapya kakandende, kaha nawa lwalwashi kumika.” (Koli. 2, 4:17) Oloze kumimbapachisa nachimilingisa mupwenga nakuyoya chamwaza oholyapwa nakukapwa nawa ‘nakuyoya chamwenemwene’ kulutwe. (Chimo. 1, 6:19) Shikaho, shinganyekenu kanawa mwakukumbulwila chihula chino, “Kutala ngunalizange kungumbapachisa tahi?”