CHIHANDE CHAKULINANGULA 10
Kuzanga Yehova naKumusakwilila Nachimilingisa Vamimbapachise
“Chuma muka nachinguhonesa ami kungumbapachisa?”—VILI. 8:36.
MWASO 37 Kuzachila Yehova naMuchima Wosena
VYUMA NATUSHIMUTWILA *
1-2. Kweseka namukanda waVilinga 8:27-31, 35-38, chuma muka chalingishile chilolo waka-Echopa alihane vamumbapachise?
KUTALA muli nakusaka kumimbapachisa mangana mupwenga kambaji kaKulishitu tahi? Vavavulu vanavambapachisanga mwomwo yakuzanga Yehova nakusaka kusolola kusakwilila chavo havyuma avalingila. Tuchishimutwilenu hali chilolo chamwangana wapwevo waka-Echopa.
2 Uze chilolo alinangwile Visoneka, kaha alingile vyuma alinangwile chakuzeneka kukwata kumashinde. (Tangenu Vilinga 8:27-31, 35-38.) Chuma muka chamukunywile numba alinge kweseka navyuma alinangwile? Omu apwile mulitemba, apwile nakutanga mukanda waIsaya, kulumbununa nge amwenenga Mazu aKalunga kupwa amalemu. Kaha nawa omu Fwilipu amwambulilile, amwene jino kulema chavyuma amulingililile Yesu. Uno ou chilolo akatukilile ika kuYelusalema? Mbimbiliya yamba ngwayo ayile nakulemesa Yehova kuYelusalema, kahechi chasolola nge azangile Yehova. Ou lunga pamo asezele kwitava chenyi nakulinunga namuyachi uze walemeselenga Kalunga wamuchano. Shikaho, kuzanga Yehova chikiko chamulingishile alihane mangana vamumbapachise nakupwa kambaji kaKulishitu.—Mateu 28:19.
3. Vyuma muka vinahase kulingisa mutu ahone kulihana vamumbapachise? (Talenu lipwata lyakwamba ngwavo, “ Uno Muchima Wenu Walifwana naMavu Muka?”)
3 Kuzanga Yehova chikiko chinahase kumilingisa mulihane vamimbapachise. Kaha nawa kuzanga vyuma vimwe chinahase kumilingisa muhone kulihana mangana vamimbapachise. Mujila muka? Achishinganyekenu havyuma vino: Pamo mwazanga chikuma vausoko chipwe masepa vaze kavapwa Vinjihoko, ngocho munahase kushinganyeka ngwenu nge navamimbapachisa kaha navamihunga. (Mateu 10:37) Chipwe pamo mwatwama najitato jimwe jize ahunga Kalunga, jize nawa jili nakumikaluhwila kumbila. (Samu 97:10) Kaha nawa pamo munalivwisanga kuwaha vilika vimwe vyamukwitava chamakuli kufuma vene kuunyike wenu. Pamo muchili nakwanuka vyuma vimwe vyamwaza vyeji kusolokanga havilika kana. Echi chinahase kumikaluhwila kwecha kwazana muvilika vize ahunga Yehova. (Koli. 1, 10:20, 21) Achilihulisenu ngwenu, “Mutu muka chipwe vyuma muka vize ngwamona kupwa vyavilemu chikuma mukuyoya chami?”
IYA MWATELA KUZANGA CHIKUMA?
4. Chuma muka chachilemu chatela kulingisa mutu alihane nakumumbapachisa?
4 Kuli vyuma vyavivulu vize munahase kuzanga nakuvimona kupwa vyavilemu. Chakutalilaho, pamo mwamwenenga Mbimbiliya kupwa yayilemu chikuma nahalwola mwalingile kanda muputuke kulinangula naVinjiho jaYehova. Kaha nawa, pamo mwalivangile kuzanga Yesu shimbu kanda muputuke kulinangula naVinjiho jaYehova. Oholyapwa jino hakuwana nge munatachikiza Vinjiho jaYehova, pamo muli nakufwila kulikata navo. Oloze kuzanga vyuma kana keshi chikiko kaha nachimilingisa mufwile kulihana kuli Yehova mangana vamimbapachiseko. Chuma chachilemu chatela kumikunyula mulihane vamimbapachise shina kuzanga Yehova Kalunga. Shikaho, nge namuzanga chikuma Yehova, kaha kamweshi kwechelela kala chuma chimihonese kumuzachilako. Kumuzanga nachimikafwa mulihane vamimbapachise nakumikafwa nawa mutwaleho kumuzachila.
5. Vihula muka natushimutwila?
5 Yesu ambile ngwenyi twatela kuzanga Yehova namichima yetu yosena, namyono yetu yosena, navishinganyeka vyetu vyosena, nangolo jetu josena. (Mako 12:30) Chuma muka nachimikafwa muzange chikuma Yehova nakumuvumbika? Kushinganyekanga hazangi atusolwela Yehova, chikiko cheji kutulingisanga nayetu tumuzange. (Yowa. 1, 4:19) Uno kuzanga chikuma Yehova nachitulingisa tulinge vyuma muka vikwavo? *
6. Kweseka nachisoneka chaWavaka-Loma 1:20, chuma muka nachitukafwa tutachikize Yehova?
6 Tachikizenu Yehova hakutalanga vyuma atenga. (Tangenu Wavaka-Loma 1:20; Kuso. 4:11) Shinganyekenunga hamangana aKalunga aze twamwena kujijila jakukomwesa atengelamo mitondo natunyama. Kekesenunga nawa hajila vatungilamo mujimba wamutu. (Samu 139:14) Yehova atwama nawa nangolo jajinene. Shinganyekenu hangolo jize jatwama kulikumbi nakuvatanganyika vosena. * (Isa. 40:26) Kulinga ngocho nachimikafwa muvumbikenga chikuma Yehova. Chipwe ngocho, kutachikiza ngwenu Yehova atwama namangana nangolo keshi chikiko kaha nachimilingisa mumuzangeko, oloze, mwatela kutachikiza vyuma vyavivulu hali ikiye.
7. Chuma muka mwatela kufwelela numba muzange chikuma Yehova?
7 Mwatela kukunyuka chikupu ngwenu Yehova amizanga. Uno cheji kumikaluhwilanga kufwelela ngwenu Tengi uze atengele melu namavu amitachikiza nakumizakama tahi? Nge mukiko, kaha tachikizenu ngwenu Yehova katwama “kwakusuku nayetu tuvosena mutu himutuko.” (Vili. 17:26-28) “Eji kuhehwojolanga mumichima yavatu vosena,” kaha nawa amifwelelesa ngwenyi atwama hakamwihi, ngana muze Ndavichi alwezele Solomone ngwenyi “kachi nge naumutondatonda, kaha naumuwana.” (Miji. 1, 28:9) Yehova amba ngwenyi: ‘Ngunakupandamisa kuli ami.’ Echi chikiko chinamilingisa mulinangule Mbimbiliya. (Yele. 31:3) Shikaho, nge namutachikiza kanawa vyuma amilingila Yehova, kaha namumuzanga chikuma.
8. Vyuma muka mwatela kulinga mangana musolole ngwenu nayenu mwazanga Yehova?
8 Nge namulombanga kuli Yehova kaha namusolola ngwenu nayenu mwamuzanga. Shikaho, namumuzanga chikuma nge namumulwezanga vyuma vili kumuchima wenu nakumusakwilila havyuma amilingila. Kaha usoko wenu nayikiye naukola chikuma omu mwakumbulula kulomba chenu. (Samu 116:1) Namukunyuka nawa chikupu ngwenu amitachikiza kanawa. Chipwe ngocho, mwatela kutachikiza vishinganyeka vyaYehova numba usepa wenu nayikiye ukole. Mwatela nawa kutachikiza vyuma ali nakusaka mulinge. Kaha kutanganga Mbimbiliya chikiko nachimikafwa mutachikize vyuma kanevi.
Hakusaka tupandame kuli Yehova nakutachikiza nawa vyuma asaka kuli etu, twatela kutanganga Mbimbiliya (Talenu palangalafu 9) *
9. Namusolola ngachilihi ngwenu mwamona Mbimbiliya kupwa yayilemu?
9 Monenunga Mazu aKalunga kupwa amalemu. MuMbimbiliya kaha mukiko mwatwama muchano waYehova navyuma ajina kumilingila. Shikaho, nge namuyitanganga hakumbi hakumbi, nakuhitulukanga muvyuma namukalinangula namuka-kuminangula, nakuzachisa vyuma munakulinangula, kaha namusolola ngwenu mwamona Mbimbiliya kupwa yayilemu. (Samu 119:97, 99; Yowa. 17:17) Kutala mwanoneka lwola lwakutanganga Mbimbiliya hakumbi hakumbi tahi? Uno mweji kulamanga lwola kana tahi?
10. Chuma muka chalingisa Mbimbiliya kupwa mukanda wakulipwila?
10 Chuma chimwe chalingisa Mbimbiliya kupwa yakulipwila shina mwatwama mijimbu yavatu vaze vamwene Yesu. Ukiko kaha mukanda wahanjika vyuma vyamuchano hali Yesu. Shikaho, omu namulinangulanga vyuma anangwilenga Yesu navize alingilenga, namufwila jino kutunga usepa nayikiye.
11. Chuma muka nachimikafwa muzange Yehova?
11 Nge namuzanga Yesu, kaha namuzanga naYehova nawa. Mwomwo ika? Mwomwo Yesu asolwelenga vilinga vyaIse. (Yowa. 14:9) Shikaho omu namulinangula hali Yesu, namumutachikiza chikuma Yehova nakumuvumbika. Chakutalilaho, achishinganyekenu hamuchima wakeke asolwelelele vatu vaze vamwenenga ulumbi, vakufwana nge vaka-kuhutwa, navaka-kuviza, navaze vazenekelenga wakuvakinga. Shinganyekenu nawa hamazu amangana ahanjikile aze anahase kumikafwa mukuyoya chenu kachi nge namuwakavangiza.—Mateu 5:1-11; 7:24-27.
12. Kulinangula hali Yesu nachimikafwa mulinge ika?
12 Chuma chikwavo nachimikafwa muzange chikuma Yesu shina kushinganyekanga handando yize alisuwile kuhana mangana Kalunga atukonekele jishili jetu. (Mateu 20:28) Kutachikiza ngwenu Yesu alisuwile kufwila jishili jenu nachimilingisa mupihilile nakwalumuka, nakulomba Yehova amikonekele. (Vili. 3:19, 20; Yowa. 1, 1:9) Ngocho, kuzanga Yesu naYehova nachimilingisa mufwile kulikata navatu vaze nawa vavazanga.
13. Yehova atuhana ika?
13 Zangenu vaze vazanga Yehova. Vausoko wenu vaze kavapwa Vinjihoko namasepa jenu vamwaka chinahase kuvakaluhwila kwivwishisa ovyo muli nakusakila kulihana kuli Yehova. Vanahase vene nakumihunga, oloze Yehova mwamikafwa hakumihana tanga yeka yakushipilitu. Kulikata natanga kaneyi yakushipilitu, nachimilingisa mumone ngwenu muli navatu vaze vamizanga nakumikafwa. (Mako 10:29, 30; Hepe. 10:24, 25) Kutwala muze, vausoko wenu vamwe vanahase kuputuka kuzachila Yehova nakwononoka jishimbi jenyi.—Petu. 1, 2:12.
14. Uno chisoneka chaWaYowano 1, 5:3 chinaminangula chishina muka kupandama kujishimbi jaYehova?
14 Monenunga jishimbi jaYehova kupwa jajilemu nakujikavangiza. Shimbu kanda mutachikize Yehova, pamo mwapwile najishimbi jenu jize mwakavangijilenga, oloze oholyapwa munamono jino ngwenu jishimbi jaYehova jikiko jamwenemwene. (Samu 1:1-3; tangenu WaYowano 1, 5:3.) Chakutalilaho, achishinganyekenu hajishimbi jamuMbimbiliya jize vatela kukavangiza malunga namapwevo navisemi navana. (Efwe. 5:22–6:4) Uno kukavangiza jishimbi kana, chinamikafwe mupwenga vakuwahilila mutanga tahi? Uno kukavangiza jishimbi jaYehova jize jahanjika hakusakula masepa vamwenemwene chinamikafwe mumbile vilinga vyavipi nakupwa navilinga vyamwaza tahi? Kaha munapu jino vakuwahilila tahi? (Vishi. 13:20; Koli. 1, 15:33) Pamo munakumbulula vihula kana ngwenu eyo.
15. Chuma muka mwatela kulinga kachi nge chili nakumikaluhwila kuwana mwakuzachishila jindongi jamuMbimbiliya?
15 Lwola lumwe chinahase kumikaluhwila kutachikiza mwakuzachishila jindongi jimwe jamuMbimbiliya jize munalinangula. Evi vikiko vyeji kulingisanga Yehova azachise liuka lyenyi lituhane vinoma vize vyahanjika haMbimbiliya mangana vitukafwe tutachikize vyuma vyamwaza nevi vyavipi. (Hepe. 5:13, 14) Shikaho nge namutanganga vinoma kana, namunona ngwenu vinahase kumikafwa mukuyoya, nakumilingisa mulikate chikuma naliuka lyaYehova.
16. Uno Yehova nalongesa ngachilihi vatu jenyi?
16 Zangenunga liuka lyaYehova nakulikundwiza. Yehova nalongesa vatu jenyi nakuvahaka muliuka lyenyi, kaha Mwanenyi Yesu ikiye mutwe walyo. (Efwe. 1:22; 5:23) Yesu atongola lizavu lyalindende lyamalunga vakuwavisa vatwaminyine mulimo uze asaka vazatenga makumbi ano. Yesu avulukile lizavu kana ngwenyi, “ndungo wakushishika wakuzangama,” kaha eli lizavu lili nakuzata nangolo hakumilisa nakumikinga kushipilitu. (Mateu 24:45-47) Jila yimwe yize ndungo wakushishika ali nakumizakaminamo shina hakutongola tulama mangana vamifungenga. (Isa. 32:1, 2; Hepe. 13:17; Petu. 1, 5:2, 3) Tulama veji kulisuulanga kumikafwa nakumivendejeka, nakumipandamisa kuli Yehova. Oloze chuma chachilemu vanahase kumilingila shina kumikafwa munangule vakwenu vatachikize Yehova.—Efwe. 4:11-13.
17. Kweseka nachisoneka chaWavaka-Loma 10:10, 13, 14, mwomwo ika tweji kwambulilangako vakwetu vatachikize Yehova?
17 Kafwenu vakwenu vazange Yehova. Yesu alwezele vaka-kumukavangiza vanangulenga vakwavo vatachikize Yehova. (Mateu 28:19, 20) Nge katwazangamineko, kaha tunahase kukavangiza lushimbi kana kwijiva nge hichilika kaha. Oloze omu namuzanga chikuma Yehova, nayenu munahase kwivwa ngana muze evwile kaposetolo Petulu nakaposetolo Yowano hakwamba ngwavo: “Katweshi kuhasa kulitwamina kuhanjika vyuma tunamono nakwivwako.” (Vili. 4:20) Kachi nge natukafwa vakwetu vatachikize Yehova kaha chinahase kutulingisa tupwenga vakuwahilila. Achishinganyekenu hakuwaha evwile Fwilipu omu akafwile uze lunga waka-Echopa atachikize muchano wamuVisoneka nakumumbapachisa. Kachi nge namulinga ngana muze alingile Fwilipu hakukavangiza lushimbi lwaYesu lwakwambulula mujimbu wamwaza, kaha namusolola hatoma ngwenu muli nakusaka chikupu kupwa hamukana waVinjiho jaYehova. (Tangenu Wavaka-Loma 10:10, 13, 14.) Halwola kana, nayenu munahase kukahulisa chihula ngana chize ahulishile uze kaEchopa ngwenyi: “Chuma muka nachinguhonesa ami kungumbapachisa?”—Vili. 8:36.
18. Vihula muka natushimutwila muchihande nachikavangizaho?
18 Kulihana nalumbapachiso hivyuma vyavilemu chikuma vize mwatela kulinga mukuyoya chenu. Hakuwana nge lumbapachiso lwapwa lwalulemu chikuma, ngocho mwatela kuvangila kukekesa kanawa vyuma vyaliwezamo. Vyuma muka mwatela kutachikiza kupandama kulumbapachiso? Vyuma muka mwatela kulinga shimbu kanda vamimbapachise nahanyima yakumimbapachisa? Vihula kana navavikumbulula muchihande nachikavangizaho.
MWASO 2 Lijina Lyove Yove Yehova
^ par. 5 Numba tuhu vatu vamwe vazanga Yehova, oloze kavatachikiza numba nge vanatemo kuvambapachisa nakupwa Vinjiho jaYehovako. Kachi nge mukiko chapwa nakuli yenu, kaha chino chihande nachimikafwa mukekese vyuma vize mwatela kulinga mangana mutengamo kumimbapachisa.
^ par. 5 Hakuwana nge vatu valihandununa-handununa, ngocho vanahase kukavangiza vyuma vili muchihande chino mujijila jakulisezaseza.
^ par. 6 Nge muli nakusaka vyakutalilaho vikwavo, kaha talenu mbuloshuwa yakwamba ngwavo, Was Life Created? nayakwamba ngwavo, The Origin of Life—Five Questions Worth Asking.
^ par. 61 MAZU AKULUMBUNUNA MUVWIMBIMBI: Ndumbwetu wapwevo ali nakuhana talakiti kuli mwanapwevo uze nawane muchitanda.
