VaLevi vamwe vaze kavapwilenga vapilishituko vakiko vazachilenga milimo yakufwana nge upokola namilimo yeka. Kapitau wahatembele ikiye avahanyinenga milimo kana. Philo muka-kusoneka wakaYuleya avulukile milimo vazachilenga ava tupokola. Ambile ngwenyi: “Vamwe vemanyinenga kuvikolo vyatembele, kaha veka vazachililenga mukachi katembele, kwakamwihi nachihela chajila nakukanyisa kala mutu kwingila muchihela kana. Kaha veka nawa vajingulukilenga tembele muvyazano, naufuku namusana mangana yipwenga yakukingiwa.”

Ava tupokola vavazachishilenga nawa kuli vaka-Sunendeline. Ava vakiko kaha tupokola vavaYuleya vaze vetavishile kuchiyulo chavaka-Loma.

Joachim Jeremias uze alinangula chikuma asonekele ngwenyi, “Mazu ahanjikile Yesu halikumbi vamukwachile akwamba ngwenyi atwaminenga muTembele hakumbi hakumbi nakunangula oloze kavamukwachileko (Mateu 26:55), asolola hatoma nge tupokola vahaTembele vakiko vejile nakumukwata.” Ou lunga afwelelele nawa ngwenyi vatu vaze vayile nakukwata Yesu shimbu kanda lwola kanelu, vapwile tupokola vahatembele. (Yowa. 7:32, 45, 46) Kaha nawa ava tupokola nakapitau kavo vakiko vatumine kuya nakukwata tumbaji twaYesu nakuvaneha kuSunendeline. Kaha pamo vakiko cheka vakwachile kaposetolo Paulu nakumukokela kuweluka watembele.—Vili. 4:1-3; 5:17-27; 21:27-30.