1. Vyuma muka twatachikiza hali vandumbwetu vavakweze?

ENU vandumbwetu vavakweze, tachikizenu ngwenu munahase kuzata milimo yayivulu muchikungulwilo. Enu vavavulu muli nangolo chikuma. (Vishi. 20:29) Kaha nawa mweji kukilikitanga chikuma hakukafwa vandumbwenu. Pamo nawa muli nakutalilila kulwola luze navakamitongola kupwa vaka-kuzachila. Chipwe ngocho, munahase kushinganyeka ngwenu vandumbwenu vamwe vali nakumimona ngwavo kanda mukole, chipwe kamweshi nauhashi wakuzata milimo yayilemu navamihana muchikungulwiloko. Numba tuhu kanda mukole, oloze kuli vyuma munahase kuzachilaho mangana vandumbwenu vamifwelele.

2. Vyuma muka natushimutwila muchihande chino?

² Muchihande chino, natushimutwila havyuma vyasolokele mukuyoya chaMwangana Ndavichi, navamyangana vavali vamuYuta, Asa naYehoshafwate. Natushimutwila nawa haukalu vamwene, navyuma valingile mangana vakumise ukalu wavo. Novyo nawa vandumbwetu vavakweze vanahase kulinangulako.

3. Uno vandumbwetu vavakweze vanahase kukafwa ngachilihi vandumbwavo vatushinakaji?

³ Omu Ndavichi apwile mukweze, alinangwile milimo yize vamwene vakwavo kupwa yayilemu. Apwile nausoko wakukola naKalunga, kaha nawa alinangwile kwimba myaso, yize yevwishilenga kuwaha mwangana Saulu. (Samwe. 1, 16:16, 23) Enu vakweze, kutala munalinangulako milimo yimwe yize nayinganyalisa vandumbwenu tahi? Chakutalilaho, pamo munatachikiza ngwenu vandumbwetu vatushinakaji vanakusakiwa kuvakafwa  mwakuzachishila jitablet, namakina eka hachilongesa chavo chauka, nakukukunguluka. Shikaho, munahase kuvakafwa mwakuzachishila makina kana.

4. Vyuma muka vandumbwetu vavakweze vanahase kulinangula kuli Ndavichi? (Talenu muvwimbimbi wahalipapilo lyahelu.)

⁴ Omu Ndavichi apwile mukweze, azachilenga kanawa milimo, kaha vatu vamufwelelele chikuma. Chakutalilaho, azachile nangolo hakulama mikoko jaise. Mulimo kana kawapwile wawashiko. Mukuhita chalwola, alwezele Mwangana Saulu ngwenyi: “Ami ngamba yove ngweji kufunganga mikoko jatata. Jino likumbi limwe, ndumba akwachile mukoko hautanga. Omu mukiko alingile naulusu nawa. Ngocho ngwamuhangasanyine nakumuveta, kaha ngwapululwile mukoko kukanwa kenyi.” (Samwe. 1, 17:34, 35) Ndavichi atachikijile ngwenyi apwile namulimo wakukinga mikoko, nakuvalama. Navandumbwetu vavakweze nawa vanahase kulinangula kuli Ndavichi, hakufwila kutesamo kala mulimo navavahana.

5. Kweseka naSamu 25:14, chuma muka chachilemu vatela kulinga vandumbwetu vavakweze?

⁵ Ndavichi apwile nausoko wakukola naYehova. Kaha amwene usoko kana kupwa waulemu, kuhambakana uhashi wenyi wakwimba nakumika chenyi. Ndavichi amwene Yehova kupwa Kalunga kenyi, kaha nawa hisepa lyenyi. (Tangenu Samu 25:14.) Shikaho, nayenu vandumbwetu vavakweze, chuma chachilemu mwatela kulinga shina, kukolesa usoko wenu naSenu wamwilu. Nge namulinga ngocho, kaha chikungulwilo nachimizachisa.

6. Uno vatu vamwenenga ngachilihi Ndavichi?

⁶ Ukalu umwe amwene Ndavichi shina vatu vamumwenenga kupwa kanyike wamokomoko. Chakutalilaho, omu Ndavichi alisuwile azunge naNgolyate, Mwangana Saulu amupopolwele nakwamba ngwenyi: “Ove ukanyike wamundende.” (Samwe. 1, 17:31-33) Shimbu kanda ahanjike kuli Mwangana, yayenyi amwambile ngwenyi katelemo kuya kujitako. (Samwe. 1, 17:26-30) Chipwe ngocho, Yehova kamwene Ndavichi mujila kanako, mwomwo amutachikijile kanawa. Ndavichi ajihile Ngolyate mwomwo yakupendamina chikuma hali Yehova uze apwile sepa lyenyi.—Samwe. 1, 17:45, 48-51.

7. Uno chihande chaNdavichi chinamikafwe ngachilihi?

⁷ Vyuma muka natulinangula kuli Ndavichi kweseka navyuma ahichilemo? Tunalinangula nge twatela kupwa namuchima wakutalilila chikoki. Cheji kumbatanga lwola numba vatu  vaze vanamimono kufuma kuunyike wenu, vamifwelele ngwavo munatemo kulinga vyuma vimwe. Oloze ijivenu ngwenu Yehova ikiye amitachikiza kanawa kuhambakana vatu. Amitachikiza omu mwapwa, navyuma munahase kulinga. (Samwe. 1, 16:7) Shikaho zamisenu usoko wenu naKalunga. Ndavichi azamishile usoko wenyi naYehova hakutala vyuma atenga. Ngocho alinangwile vyuma vyavivulu kuli Kalunga uze avitengele. (Samu 8:3, 4; 139:14; Loma 1:20) Chuma chikwavo mwatela kulinga shina, kupendamina hali Yehova amihane ngolo. Chakutalilaho, kutala vakwenu vaka-shikola, veji kumisehanga mwomwo yakupwa muVinjiho jaYehova tahi? Nge mukiko, kaha lombenu kuli Yehova amikafwe muhonese ukalu kana. Fwilenu nawa kuzachisa vyuma namulinangula muMbimbiliya, namujivindiyo, namumikanda yetu yize yahanjika haMbimbiliya. Lufwelelo lwenu naluzama chikuma, omu Yehova mwamikafwa muukalu wenu. Kahomu vakwenu navamona ngwavo mwapendamina chikuma hali Yehova, navamifwelela.

8-9. Vyuma muka vyakafwile Ndavichi atwaleho lika kuvandamina palanga nakulwola vamuswanyishile hawangana, kaha vandumbwetu vavakweze vanahase kulinangulako vyuma muka?

⁸ Tushimutwilenu nawa haukalu ukwavo amwene Ndavichi. Omu Ndavichi vamuwavishile kupwa mwangana, avandaminyine myaka yayivulu numba vamuswanyise halitanda nakupwa mwangana wavaYuta. (Samwe. 1, 16:13; Samwe. 2, 2:3, 4) Halwola apwile nakuvandamina, vyuma muka vyamukafwile apwenga namuchima wamwaza wakutalilila chikoki? Muchishishisa chakuhomba, Ndavichi azachishile lwola lwenyi mangana alinge vyuma vize ahashile. Chakutalilaho, omu achinyinyine mulifuchi lyavaFwilishite, azachishile lwola kana mangana azunge navaka-kole javaIsalele. Echi chamulingishile akinge jingiza jangalila yaYuta.—Samwe. 1, 27:1-12.

⁹ Vyuma muka vandumbwetu vavakweze vanahase kulinangula kuli Ndavichi? Vatela kuzachisa kanawa lwola lwavo mangana vakafwe vandumbwavo. Achishinganyekenu havyuma ahichilemo ndumbwetu Ricardo. * Omu apwile kanyike, alwezele vakulwane ngwenyi asakile kuzata upayiniya washimbu yosena. Oloze vakiko vamukafwile ngwavo katelemoko. Muchishishisa chakupihilila nakuzeya kushipilitu, Ricardo atwalileho lika kuzata mulimo wakwambulula natwima. Ambile ngwenyi: “Nge nangwanuka vyuma vangukafwile vakulwane, chikupu vene ngwatelelele kwalumunako vyuma vimwe mangana nguzovoloke. Kaha ngwaliwahishililenga chimweza, mangana ngukindulukile kuvatu vakuwahilila. Kutwala muze, ngwaputukile kutwaminyina chilongesa chaMbimbiliya. Kwazana mumulimo wakwambulula shimbu yosena, changukafwile ngwambululenga chakuzeneka kwivwa woma.” Oholyapwa jino Ricardo apwa payiniya washimbu yosena, kaha nawa muka-kuzachila.

10. Omu Ndavichi apwile muukalu, chuma muka alingile shimbu kanda asakule vyakulinga?

¹⁰ Tutalenu nawa vyuma vikwavo vize vyasolokele kuli Ndavichi. Omu Ndavichi navatu jenyi vapwile nakutwama mungalila yavaFwilishite, halwola vachinyine Saulu, vasele jitanga javo nakuya nakulwa jita. Omu Ndavichi navatu jenyi vapwile kujita, vaka-kole javo vejile nakulukuka jitanga javo, nakujitwala muufunge. Hakuwana nge Ndavichi apwile kuluwa mukulwa jita, pamo kachi alwezele vatu jenyi jila yamwaza yakupulwilamo jitanga javo. Oloze kalingile ngochoko. Alombele Yehova amulweze vyakulinga kuhichila muli kapilishitu Aviyatale. Ndavichi ahulishile Yehova ngwenyi: “Uno nguhangasane eli lizavu linatunyemukila nyi?” Yehova amulwezele ngwenyi  avahangasane kaha mwapululula vaze vanatwale muufunge. (Samwe. 1, 30:7-10) Vishina muka munahase kulinangula kuli Ndavichi?

11. Uno vyuma muka mwatela kulinga shimbu kanda musakule vyakulinga?

¹¹ Shimbu kanda musakule vyakulinga, hulisenungako vakwenu vamikafwe. Mwatela kuhulisanga visemi jenu natulama vaze vapwa vasachitetahundu vamikafwe. Yehova afwelela malunga kana ava atongola, nayenu mwatela kuvafwelela. Yehova amona malunga kana kupwa “wana” muchikungulwilo. (Efwe. 4:8) Kulondezeza lufwelelo lwavo, nakwivwilila kuvyuma navamilweza nachimikafwa chikuma. Tutalenu jino vyuma tunahase kulinangula kuli Mwangana Asa.

12. Muchima muka asolwele Mwangana Asa omu aputukile kuyula?

¹² Omu Mwangana Asa aputukile kuyula, apwile wakulinyisa kaha nawa wakumika. Chakutalilaho, omu ise Aviya afwile, Asa ikiye aswanyine hawangana. Ngocho aputukile kufumisa makombelo muYuta mwosena. Kaha nawa, alwezele “vaYuta vatondetonde Yehova Kalunga kavakakuluka javo nakulama Jishimbi jenyi.” (Miji. 2, 14:1-7) Omu Zela wakuEchopa, namaswalale jenyi 1,000,000 valukukile Yuta, Asa alombele Yehova mangana amukafwe. Ambile ngwenyi: “Ove Yehova, ove weji kukafwanga vatu, numba vapwa vavavulu, numba vapwa vakuzeneka ngolo. Shikaho ove Yehova Kalunga ketu, tukafwe mwomwo tunapendamina hali ove.” Mazu kana anasolola hatoma nge, Asa afwelelele chikuma Yehova ngwenyi mwavayovola. Hakuwana nge Asa apendaminyine chikuma hali Ise wamwilu, ngocho “Yehova afungulwile vaze vaEchopa.”—Miji. 2, 14:8-12.

13. Vyuma muka vyasolokele kuli Asa mukuhita chalwola, kaha mwomwo ika?

¹³ Chikupu vene nayenu munahase kwitavila ngwenu, kulitalasana namaswalale 1,000,000, wapwile hiukalu waunene. Oloze Asa avafungulwile mwomwo yakupendamina hali Yehova. Oloze omu Asa apwile muukalu weka, chaluvinda kapendaminyine hali Yehovako. Omu vamwivwishile woma kuli Mwangana wakuhuka wavaIsalele Mbasha, Asa ayile nakulomba mwangana waSulya amukafwe. Evi vyuma alingile vyanehele ukalu waunene. Yehova alwezele Mwangana Asa kuhichila muli kapolofweto kenyi Hananyi ngwenyi: “Hakuwana nge kawafwelelanga muli  Yehova Kalunga koveko, oloze wafwelelanga muli mwangana waSulya, ngocho maswalale jamwangana waSulya vanakuchinyi.” Kufuma vene haze, mwangana Asa vamuzungishilenga shimbu yosena. (Miji. 2, 16:7, 9; Vamya. 1, 15:32) Uno vyuma muka natulinangula kuli Mwangana Asa?

14. Mujila muka munahase kupendamina hali Yehova, kaha kukavangiza mazu atwama hali WaChimoteu 1, 4:12, nachimikafwa ngachilihi?

¹⁴ Pwenunga vakulinyisa nakutwalaho kupendamina hali Yehova. Omu vamimbapachishile mwasolwele lufwelelo lwalunene. Kaha Yehova evwile kuwaha kumitambula mupwenga mutanga yenyi. Shikaho chuma chachilemu mwatela kulinga shina kutwalaho lika kupendamina hali ikiye. Chinahase kupwa chachashi kupendamina hali Yehova nge muli nakusakula kulinga vyuma vyavinene mukuyoya. Nyi ngachilihi vyuma vyavindende vyamukuyoya vyakufwana nge kulihizumuna, vyakuhemahema, milimo chipwe vyuma mwatela kulinga mukuyoya chenu? Chikupu vene twatela kupendamina chikuma hali Yehova muvyuma vyosena. Shikaho kanda kupendamina hamangana enuko, oloze pendaminenu hajindongi jamuMbimbiliya mangana jimikafwe hakusakula vyakulinga. (Vishi. 3:5, 6) Nge namulinga ngocho, kaha namwivwisa Yehova kuwaha. Kaha navandumbwetu muchikungulwilo navamifwelela.—Tangenu WaChimoteu 1, 4:12.

15. Kweseka nachisoneka chaMijimbu 2, 18:1-3; 19:2, vyuma muka alimbenjele Mwangana Yehoshafwate?

¹⁵ Tunatachikiza ngwetu enu vakweze kamwakupukako, nganomu vapwa vatu vosena. Shikaho, shimbu jimwe nayenu mweji kulimbenjanga. Oloze chuma kana kachatela kumilingisa muhone kuzachila Yehova nangolo jenu josenako. Tuchishimutwilenu hali Mwangana Yehoshafwate. Ou Mwangana apwile navilinga vyamwaza. Kahomu aputukile kuyula, “atondeletondelenga Kalunga kaise, akavangijilenga jishimbi jenyi.” Atumine vilolo jenyi mujinganda jaYuta josena, mangana vanangule vatu jishimbi jaYehova. (Miji. 2, 17:4, 7) Numba tuhu Yehoshafwate apwile navilinga vyamwaza, oloze shimbu jimwe alingile vyuma vyakuhenga. Mwomwo yavyuma kanevi vyavipi alingile ou mwangana, Yehova atumine ngamba yenyi ayenga nakumuhanjikila. (Tangenu Mijimbu 2, 18:1-3; 19:2.) Vyuma muka namulinangula kuli Mwangana Yehoshafwate?

16. Vyuma muka munahase kulinangula kuli ndumbwetu Rajeev?

 ¹⁶ Nge vanamihanjikila, kaha mwatela kwitavila vyuma vanamikafwe. Ngana mwavakweze vosena, nayenu chinahase kumikaluhwila kulitomena kulinga vyuma vyakushipilitu. Oloze kanda kuzeyako. Tuchishimutwilenu havyuma ahichilemo ndumbwetu wamukweze Rajeev. Ambile ngwenyi: “Kunyima changukaluhwilile kusakula vyuma vyakulinga mukuyoya chami, mwomwo ngwazangilenga chikuma vyakuhemahema, navyakulihizumuna, kuhambakana kuya kukukunguluka, chipwe kwazana mumulimo wamuwande.” Uno vyuma muka vyamukafwile? Kalama umwe amukafwile. Rajeev ambile ngwenyi: “Ou kalama angukafwile mangana ngushinganyeke mwakuzachishila lundongi lwatwama hali WaChimoteu 1, 4:8.” Rajeev alinyishile, nakukavangiza vyuma vamukafwile mangana akekese nakumona vyuma vyavilemu, atelelele kulinga mukuyoya chenyi. Kaha ambile ngwenyi: “Ngwasakwile kulitomena kulinga vyuma vyakushipilitu.” Jino vyuma muka vyafuminemo? Ambile ngwenyi: “Mwahichile kaha myaka yayindende kufuma haze vangukafwile, kaha ngwatelemo nakupwa muka-kuzachila muchikungulwilo.”

17. Uno vandumbwetu vosena veji kwivwanga ngachilihi kuzachila Yehova hamwe navakweze?

¹⁷ Enu vandumbwetu vavakweze, tachikizenu ngwenu vandumbwenu vosena veji kwivwanga kuwaha ‘kulinunga hamwe’ nayenu hakuzachila Yehova. (Zefwa. 3:9) Veji kwivwanga kuwaha omu mweji kuzatanga milimo muchikungulwilo natwima. Shikaho vamimona kupwa muvavalemu chikuma.—Yowa. 1, 2:14.

18. Kweseka naVishimo 27:11, Yehova eji kwivwanga ngachilihi havakweze vaze veji kumuzachilanga?

¹⁸ Enu vakweze, tachikizenu ngwenu Yehova amizanga kaha nawa amifwelela. Ahanjikilile chimweza ngwenyi hamakumbi akukuminyina, nakukapwa lizavu lyavakweze vaze navakalihana namichima yavo yosena. (Samu 110:1-3) Yehova atachikiza ngwenyi mwamuzanga, kaha nawa mwafwila kumuzachila nangolo jenu josena. Mwatela kuunda muchima hakuvandamina Yehova amizachise nakutalilila vakwenu chikoki. Kachi nge munalimbenje, kaha mwatela kwitavila vyuma navamikafwa nakuvimona nge vinafumu kuli Yehova. (Hepe. 12:6) Fwilenu kuzata nangolo kala mulimo navamihana muchikungulwilo. Kaha chuma chachilemu mwatela kufwila kulinga shina kwivwisa Senu wamwilu kuwaha.—Tangenu Vishimo 27:11.