1-2. Uno veya vatela kukafwa vilongesa vyaMbimbiliya vazovoloke nakutamo kuvambapachisa?

AMY uze atwama mulifuchi lyaFiji ambile ngwenyi: “Ngwazangile chikuma vyuma vize vapwile nakungunangula muMbimbiliya. Ngwatachikijile ngwami ngunawane muchano. Omu ngwaputukile kulikata navandumbwami, changukafwile ngwalumuneko vilinga vyami nakutamo kungumbapachisa.” Mazu ahanjikile Amy asolola chishina chachilemu. Chikupu vene, chilongesa chaMbimbiliya eji kuzovolokanga nakutamo kumumbapachisa hakumukafwa kuli vandumbwetu vavavulu.

² Vaka-kwambulula vosena vatela kufwila kukafwa vilongesa vazovoloke. (Efwe. 4:16) Payiniya walijina lyaLeilani, uze atwama kulifuchi lyaVanuatu, ambile ngwenyi: “Nge mwana navamulela kuvatu vavavulu eji kukolanga kanawa. Omu mukiko chapwa nahakunangula vatu vapwenga tumbaji. Chikungulwilo chosena chatela kuzachila hamwe hakukafwa mutu atachikize muchano.” Vausoko, namasepa, navalongeshi kushikola veji kuzachilanga hamwe hakukafwa mwana mangana akole kanawa. Veji kulinganga ngocho hakumukolezeza, nahakumunangula vyuma vyavilemu mukuyoya. Chochimwe nawa, vaka-kwambulula vosena vatela kukafwa vilongesa nakuvakolezeza, nakuvahana chakutalilaho chamwaza mangana vazovoloke nakutamo kuvambapachisa.—Vishi. 15:22.

3. Uno vyuma ahanjikile ndumbwetu Ana, naDorin, naLeilani navitukafwa ngachilihi?

³ Mwomwo ika muka-kwambulula atela kuwahilila kachi nge vandumbwenyi muchikungulwilo navakafwa chilongesa chenyi? Achishinganyekenu havyuma ahanjikile ndumbwetu Ana, uze apwa payiniya wakulipwila mulifuchi lyaMoldova. Ambile ngwenyi: “Kachapwa chachashi kuli muka-kwambulula ukawenyi kulinga vyuma  vyosena vinakusakiwa kuli chilongesa chenyi mangana azovolokeko.” Ndumbwetu Dorin, uze apwa payiniya wakulipwila mulifuchi lyolimwe ambile ngwenyi: “Kakavulu vakwetu vaka-kwambulula vaze ngunazatenga navo mumulimo wamuwande, vanahanjikanga vyuma vize vinahetenga chilongesa chami kumuchima, vize kangwashinganyekelengako.” Ndumbwetu Leilani uze twavulukanga, avulukile chishina chikwavo chatela kutulingisa tuwahilile kachi nge vakwetu navakafwa chilongesa chetu. Ambile ngwenyi: “Zangi navamusolwela vandumbwetu nakumuzakama, nachikafwa chilongesa atachikize chikupu ngwenyi twapwa tuvatu jaYehova.”—Yowa. 13:35.

4. Vyuma muka natushimutwila muchihande chino?

⁴ Pamo munahase kulihulisa ngwenu, ‘Uno nangukafwa ngachilihi chilongesa chaMbimbiliya azovoloke, okunyi keshi yami ngweji kumunangulangako?’ Tushimutwilenu havyuma tunahase kulinga kachi nge ndumbwetu natusanyika tuyenga nenyi kuchilongesa chenyi. Navyuma tunahase kulinga kuli chilongesa uze naputuka kukunguluka. Natushimutwila nawa omu tulama muchikungulwilo vanahase kukafwa vilongesa vyaMbimbiliya vazovoloke nakutamo kuvambapachisa.

5. Chuma muka mwatela kulinga kachi nge ndumbwenu namisanyika muyenga nenyi kuchilongesa chenyi?

⁵ Hakutwaminyina chilongesa chaMbimbiliya, atwama namulimo waunene wakukafwa chilongesa evwishise Mazu aKalunga, shina ndumbwetu uze eji kumunangulanga. Shikaho, nge ndumbwetu namisanyika muyenga nenyi kuchilongesa chenyi, kaha mwatela kuzachila hamwe. (Kwambu. 4:9, 10) Uno vyuma muka mwatela kulinga mangana mukafwe ndumbwenu, uze ali nakutwaminyina chilongesa chenyi?

6. Uno munahase kuzachisa ngachilihi lundongi lwatwama hali Vishimo 20:18, shimbu kanda muyenga kuchilongesa?

⁶ Lizangenu nakuliwahishila chimweza. Shimbu kanda muyenga kuchilongesa chandumbwenu, chatete, vangilenu kumuhulisa amilwezeko vyuma vimwe hali chilongesa chenyi. (Tangenu Vishimo 20:18.) Kaha munahase kumuhulisa ndumbwenu ngwenu: “Vyuma muka watachikiza hali chilongesa chove? Chihande muka namuya nakulinangula? Vyuma muka uli nakufwila kukafwa chilongesa chove hachihande kanechi? Uno kuliko vyuma vimwe vize kangwatela kulinga, chipwe kuhanjika kuli ikiyeko tahi? Vyuma muka vize ngunahase kuhanjika mangana ngukafwe chilongesa chove azovoloke? Chipwe ngocho, muka-kunangula katela kuhanjika vyuma vyakusweka hali chilongesa chenyiko. Oloze vyuma mwalweza ndumbwenyi vinahase kumukafwa. Ndumbwetu Joy uze apwa kamishonali, eji kuhanjikanga vyumevi kuli vandumbwenyi vaze eji kuyanga navo kuchilongesa chenyi. Ahanjikile ngwenyi: “Echi cheji kukafwanga vandumbwami ngweji kuyanga navo kuchilongesa chami, vatachikize kanawa chilongesa chami, nakwijiva mwakumukafwila.”

7. Mwomwo ika mwatela kuliwahishila chimweza shimbu kanda muyenga nandumbwenu kuchilongesa chenyi?

⁷ Nge ndumbwenu namisanyika mukaye nenyi kuchilongesa chenyi, kaha nachipwa chamwaza  kuli yenu kulizanga nakuliwahishila chimweza hakapetulu namukashimutwila. (Ezela 7:10) Ndumbwetu Dorin uze twavulukanga hakavanga ambile ngwenyi: “Ngweji kwivwanga kuwaha chikuma, kachi nge ndumbwami uze nanguya nenyi kuchilongesa chami mwawahishila chimweza chihande natukashimutwila. Echi nachimukafwa akanangule kanawa.” Kaha nawa kuliwahishila chimweza, chinahase kukafwa chilongesa naikiye aliwahishilenga chimweza. Numba tuhu kamweshi kuhasa kuliwahisa kanawako, oloze wanenuko lwola lwakuwana vishina vyavilemu vili muchihande namukalinangula.

8. Chuma muka mwatela kulinga numba vyuma namulomba vihete chilongesa kumuchima?

⁸ Kulomba chapwa chachilemu nge muli nakutwaminyina chilongesa. Shikaho shinganyekelenu chimweza vyuma namukahanjika mukulomba. Nge namulinga ngocho, kaha vyuma namulomba naviheta chilongesa kumuchima. (Samu 141:2) Ndumbwetu Hanae, uze atwama muJapan, eji kwanukanga kulomba chandumbwetu, uze ejilenga hamwe namuka-kumunangula. Ambile ngwenyi: “Ngwamwene ngwami apwile nausoko wakukola naYehova. Ngocho nayami nawa ngwasakile kumulondezeza. Ngwevwilenga kuwaha omu avulukilenga lijina lyami mukulomba.”

9. Kweseka naWaYakova 1:19, vyuma muka mwatela kulinga mangana mukafwe ndumbwenu ali nakunangula chilongesa?

⁹ Kafwenu ndumbwenu halwola ali nakutwaminyina chilongesa. Ndumbwetu Omamuyovbi, uze apwa payiniya wakulipwila muNigeria ambile ngwenyi: “Chapwa chamwaza nge ndumbwove uli nakuzata nenyi mwakavangiza chihande munakulinangula. Atela kutachikiza ngwenyi vishina mwahanjika navikafwa chilongesa, oloze atela kuhanjika mukavatu mwomwo keshi ikiye ali nakutetekela chilongesako.” Mwatela kwijiva lwola lwakuhanjika, navyuma namuhanjika hachilongesa. (Vishi. 25:11) Ivwililenu kanawa omu ndumbwenu ali nakunangula, nomu chilongesa ali nakuhanjika. (Tangenu WaYakova 1:19.) Echi nachimikafwa mutachikize lwola mwatela kuhanjika. Chipwe ngocho, mwatela kupwa vakunangakana navyuma namuhanjika. Chakutalilaho, kamwatela kuhanjika vyuma vyavivulu, chipwe kuvatwijiza ndumbwenu omu ali nakuhanjika, chipwe kunehaho chihande chekako. Oloze hanjikenu mukavatu, chipwe kuzachisa chakutalilaho, chipwe chihula mangana mushindakanye chishina chize munakusaka kunangula chilongesa. Shimbu jimwe munahase kwivwa nge kamweshi navyuma vyavivulu vyakuhasa kuhanjikahoko. Oloze munahase kukafwa chilongesa azovoloke hakumusangejeka, nakusolola ngwenu mwamuzakama.

10. Uno vyuma munaliwanenga navyo mukuyoya chenu vinahase kukafwa ngachilihi chilongesa?

¹⁰ Valwezenuko vyuma munaliwane navyo mukuyoya chenu. Nge chinahase, mulwezenu omu mwalinangwile muchano, najila munafungulwilamo ukalu, nomu Yehova namikafwe mukuyoya chenu. (Samu 78:4, 7) Kumulweza vyuma kana chinahase kujikijisa lufwelelo lwenyi, nakumukolezeza atwaleho kuzovoloka nakutamo kumumbapachisa. Nakumukafwa nawa amone mwakuhonesela ukalu ali nakumona mukuyoya chenyi. (Petu. 1, 5:9) Ndumbwetu Gabriel wamuBrazil uze apwa payiniya,  eji kwanukanga vyuma vyamukafwile halwola apwile nakulinangula Mbimbiliya. Ambile ngwenyi: “Omu vandumbwetu vahanjikile vyuma valiwanyinenga navyo mukuyoya chavo, vyangulingishile ngutachikize ngwami, chikupu vene Yehova eji kumonanga ukalu tweji kuhitangamo. Hakuwana nge navakiko vahashile kuhonesa ukalu kana, nayami ngunahase kuuhonesa.”

11-12. Mwomwo ika twatela kutambula chilongesa uze mweza kukukunguluka nachisambo?

¹¹ Hakusaka chilongesa azovoloke nakutamo kumumbapachisa, atela kukungulukanga lwola lwosena. Kulinga ngocho nachimukafwa. (Hepe. 10:24, 25) Kakavulu, mwenya chilongesa ikiye eji kulanyanga chilongesa chenyi ezenga kukukunguluka halwola lwatete. Nge naputuka kukunguluka, kaha tuvosena twatela kumukolezeza, mangana atwaleho lika kukungulukanga. Uno tunahase kulinga ngachilihi ngocho?

¹² Mutambulenu nachisambo. (Loma 15:7) Kachi nge natutambula chilongesa chaMbimbiliya nachisambo uze neza kukukunguluka, kahechi chinahase kumukafwa atwaleho lika kwizanga kukukunguluka. Mwatela kumumeneka nakumujimbula kuli vandumbwenu. Kahechi nachimukafwa ahone kwivwa woma nakulizakamina. Kanda kushinganyeka ngwenu navamuzakama kuli muka-kumunangulako, mwomwo ou ndumbwetu nahase kukotokela kwiza kukukunguluka, chipwe kuzatako milimo yeka halwola tuli nakukunguluka. Mwivwililenu kanawa omu mwahanjika nakumuzakama. Uno kumutambula nachisambo chinahase kumukafwa ngachilihi? Tutalenu hachakutalilaho chandumbwetu Dmitrii, uze vambapachisanga mumyaka yakalinwomu, uze apwa muka-kuzachila. Eji kwanukanga vyuma vyasolokele halwola lwatete ayile kukukunguluka. Ahanjikile ngwenyi: “Ndumbwetu umwe walunga angumwene hanga ngunemanyina haweluka. Kaha ejile nakungumbata mangana twingilile hamwe muZuvo yaWangana, mwomwo ukawami ngwevwile sonyi. Vatu vavavulu vapwile kuze kukukunguluka, vangumenekele. Ngwalikomokelele chikuma. Ngwevwile kuwaha chikuma, kaha ngwashinganyekele ngwami kachi kukunguluka chipwengangako hakumbi hakumbi. Kanda lyehi ngumonengaho vatu vachisambo ngana.”

13. Uno vilinga vyenu vyamwaza vinahase kukafwa ngachilihi chilongesa chaMbimbiliya?

¹³ Muhanenu chakutalilaho chamwaza. Vilinga vyenu vyamwaza vinahase kukunyula chilongesa amone ngwenyi nawane muchano. (Mateu 5:16) Vitalii wamulifuchi lyaMoldova uze apwa payiniya, ambile ngwenyi: “Omu ngwatachikijile vilinga vyamwaza vyavatu muchikungulwilo, nachiyoyelo chavo, changulingishile ngukunyuke ngwami Vinjiho jaYehova vatwama mukwitava chamuchano.”

14. Chakutalilaho chenu chamwaza chinahase kukafwa ngachilihi chilongesa azovoloke?

¹⁴ Hakusaka chilongesa atengamo kumumbapachisa, atela kukavangizanga vyuma vize ali nakulinangula muMbimbiliya. Oloze kulinga ngocho kachapwa chachashiko. Chipwe ngocho, nge chilongesa mwamona omu muli nakunganyala hakukavangiza jindongi jamuMbimbiliya,  kaha nachimukunyula afwile kumilondezeza. (Koli. 1, 11:1) Tutalenu chakutalilaho chaHanae, uze twavulukanga hakavanga. Ambile ngwenyi: “Vandumbwami vanguhanyine chakutalilaho chamwaza, mwomwo vapwile nakukavangiza vyuma vyamuMbimbiliya vize ngwapwile nakulinangula nayami. Ngwalinangwileko omu ngunahase kukolezeza vakwetu, nakuvakonekela nakuvasolwela zangi. Ava vandumbwetu vahanjikilenga vyuma vyamwaza hali vandumbwavo lwola lwosena. Shikaho ngwafwililile kuvalondezeza.”

15. Kweseka naVishimo 27:17, mwomwo ika chapwila chachilemu kulikata navilongesa vyaMbimbiliya vaze veji kukungulukanga?

¹⁵ Tungenu usepa namutu uze ali nakulinangula Mbimbiliya. Omu chilongesa mwatwalaho kwiza kukukunguluka, mwatela kutwalaho kumuzakama. (Fwili. 2:4) Fwilenu kumutachikiza kanawa. Munahase kumusangejeka havyuma ali nakwalumunako mukuyoya chenyi, chipwe kumuhulisa vyuma ali nakunganyala hakulinangula Mbimbiliya, chipwe omu vali vaka-tanga yenyi, chipwe vyamilimo azata. Oloze kamwatela kumuhulisa vihula vize navimwivwisa sonyiko. Kushimutwila mujila kaneyi chinahase kumilingisa mulikate nenyi. Echi chinahase kumukafwa azovoloke nakutamo kumumbapachisa. (Tangenu Vishimo 27:17.) Ndumbwetu Hanae uze twavulukanga, apwa jino payiniya washimbu yosena. Ivwenu vyuma ahanjikile omu aputukile kukunguluka. Ambile ngwenyi: “Omu ngwaputukile kulikata navandumbwami muchikungulwilo, ngwazangilenga chikuma kuya kukukunguluka. Ngocho ngwayilenga kukukunguluka numba tuhu ngunazeye. Ngwevwilenga kuwaha kulikata navo. Ngocho echi changukafwile ngwechenga kulikata navatu vaze kavalemeselenga Yehovako. Ngwafwililile chikuma kupandama kuli Yehova nakuli vandumbwami. Ngocho vangumbapachishile.”

16. Vyuma muka vikwavo mwatela kulinga mangana mukafwe chilongesa alivwe kupwa wamulemu muchikungulwilo?

¹⁶ Omu chilongesa mwatwalaho kuzovoloka nakwalumunako vyuma vimwe mukuyoya chenyi, mwatela kumukafwa naikiye alivwe ngwenyi apwa wamulemu muchikungulwilo. Mwatela kumukafwa hakumusolwela chisambo. (Hepe. 13:2) Ndumbwetu Denis, uze atwama mulifuchi lyaMoldova eji kwanukanga halwola luze vapwile nakumunangula Mbimbiliya. Ambile ngwenyi: “Ami napuwami vatusanyikilenga kuli vandumbwami kuswa kumwe mangana tukashikame. Vatulwezelenga omu Yehova navakafwenga mukuyoya chavo. Vyuma kana vyatukolezezelenga chikuma. Vyuma twashimutwililenga navandumbwetu vyatukafwile tumone ngwetu, twatelelele kuzachila Yehova, nakumona nawa ngwetu kachi nge natuputuka kumuzachila, kaha natulivwisa kuwaha kuyoya.” Kachi nge chilongesa natemo kupwa muka-kwambulula, kaha munahase kumulweza muzachile hamwe muwande. Ndumbwetu Diego, wamuBrazil ambile ngwenyi: “Vandumbwetu vakulisezaseza vangulwezelenga tuzachile hamwe muwande. Echi changukafwile nguvatachikize kanawa. Ngwalinangwile vyavivulu hakuzata navo. Kahechi changukafwile ngupandame chikuma kuli Yehova naYesu.”

17. Uno tulama vanahase kukafwa ngachilihi vilongesa vyaMbimbiliya?

¹⁷ Wanenungako lwola lwakupwa hamwe navilongesa. Kachi nge tulama navazanga vilongesa nakuvazakama, kaha nachivakafwa vazovoloke nakutamo kuvambapachisa. Shikaho wanenungako lwola lwakushimutwila navilongesa kukukunguluka. Munahase kusolola ngwenu mwavazakama, hakwanukanga majina avo chikumanyi nge vanaputuka kuhanjikaho hakukunguluka. Wanenungako lwola mangana muyenganga hamwe navaka-kwambulula kuvilongesa vyavo. Nge namulinga ngocho, kaha munahase kukafwa chilongesa azovoloke. Ndumbwetu Jackie wamuNigeria, uze apwa payiniya ambile ngwenyi: “Vilongesa vyami veji kulikomokelenga nge nanguvalweza ngwami uze ndumbwami ngwejile nenyi apwa kalama. Chilongesa chami umwe ambile ngwenyi: ‘Aminyi mukulwane wamuchachi yetu keshi kuhasa kulinga ngochoko. Eji kutambukilanga kaha vaze vatwama naluheto, kaha nawa kuvanga nge vanamufwete.’” Ou chilongesa naputuka jino kukunguluka.

18. Kweseka namazu ahali Vilinga 20:28, tulama vanahase kutesamo ngachilihi mulimo vavahana?

¹⁸ Nangulenunga vaka-kwambulula nakuvakolezeza. Tulama vatwama namulimo waunene chikuma wakukafwa vaka-kwambulula, vazatenga kanawa muwande, nakunangula kanawa vilongesa vyavo. (Tangenu Vilinga 20:28.) Nge muka-kwambulula muli nakuzata nenyi ali nakwivwa sonyi kutwaminyina chilongesa chenyi, kaha mwatela kumukafwa kuchitwaminyina. Ndumbwetu Jackie uze twavulukanga ambile ngwenyi: “Kakavulu tulama veji kunguhulisanga vevwenga omu vali nakuzovoloka vilongesa vyami. Nge vanamono ngwavo kuli vyuma vimwe ngwatela kuzachilaho hakutwaminyina chilongesa, kaha veji kungukafwanga.” Shikaho tulama vatwama namulimo waunene wakukafwa vaka-kwambulula nakuvakolezeza. (Teso. 1, 5:11) Jackie atwalileho nakwamba ngwenyi: “Ngweji kuwahililanga kachi nge tulama navangukolezeza, nakungulweza ngwavo vamona mulimo ngweji kuzatanga kupwa waulemu. Mazu kana eji kungwivwisanga nakumuchima songonyoko. Kungusangejeka mujila kaneyi, cheji kungulingisanga nguzate natwima, nakupwa nguwakuwahilila hakukafwa vilongesa vyami.”—Vishi. 25:25.

19. Vyuma muka navitukafwa tuvosena tuwahilile?

¹⁹ Nge katweshi nakutwaminyina chilongesa oholyapwako, kaha tunahase kukafwa vilongesa vyavandumbwetu vazovoloke nakutamo kuvambapachisa. Tunahase kukundwiza ndumbwetu anakutwaminyina chilongesa hakuhanjika chishina chize nachikafwa chilongesa chenyi. Oloze kamwatela kuhanjika vyavivuluko. Twatela kutunga usepa navilongesa kachi nge vaneza kukukunguluka, nakuvahana chakutalilaho chamwaza. Tulama vatela kuwanangako lwola lwakukolezeza vilongesa, nakusangejeka vaka-kwambulula nakuvanangula. Natuwahilila chikuma kachi nge natukafwa vilongesa vyavandumbwetu vazange Setu Yehova, nakuputuka kumuzachila.