1. Ukalu muka vanahase kumona vatu jaYehova?

KUTALA muli muukalu waunene tahi? Chakutalilaho, pamo kuliko ndumbwenu umwe uze namilingi mwamupi. (Yako. 3:2) Nyi pamo vakwenu mwazata navo, chipwe vakwenu vaka-shikola, vali nakumitoleka mwomwo yakuzachila Yehova. (Petu. 1, 4:3, 4) Chipwe vaka-tanga yenu, vali nakumikanyisa kuya kukukunguluka, chipwe kwambulilako vakwenu vyuma mwafwelela. (Mateu 10:35, 36) Kachi nge ukalu kana unamitohwela, munahase kushinganyeka ngwenu nachiwaha kwecha kuzachila Yehova. Oloze tachikizenu ngwenu chamokomoko nakala ukalu namumona, Yehova mwamihana mangana, aze nawamikafwa musakule kanawa vyakulinga, nangolo jakumika muukalu kana.

2. Kweseka naWavaka-Loma 15:4, kutanga Mbimbiliya chinahase kutukafwa ngachilihi?

² MuMbimbiliya mwatwama mijimbu yavatu jaKalunga vakuhona kukupuka, vaze vomikile muukalu. Mwomwo ika vayisonekelamo? Mwomwo yakusaka tulinanguleko vyuma vimwe. Echi chikiko chalingishile Yehova alweze kaposetolo Paulu asoneke mazu ahali Wavaka-Loma 15:4 (Tangenu.) Kutanga mijimbu kana chinahase kutukolezeza, nakutukafwa tupwenga nalutalililo. Hakusaka tunganyale, twatela kulinga vyuma vyavivulu keshi kutanga Mbimbiliya kahako. Mujimbu natutanga muMbimbiliya, watela kutuheta kumuchima nakwalumuna vishinganyeka vyetu. Chakutalilaho, vyuma muka twatela kulinga kachi nge tunakutonda jindongi jakutukafwa tumike muukalu tuli nawo? Twatela kulinga vyuma vino viwana. (1) Kulomba, (2) Kuhumikiza, (3) Kushinganyeka, kaha (4) Kukavangiza. Tushimutwilenu jino vyuma twatela  kulinga hakukavangiza vyumevi viwana. * Kufumaho, natuzachisa vyuma kanevi mangana tulinangule kuvyuma vyasolokele kuli Mwangana Ndavichi, nakuli kaposetolo Paulu.

3. Shimbu kanda muputuke kutanga Mbimbiliya, chuma muka mwatela kulinga, kaha mwomwo ika?

³ (1) Kulomba. Shimbu kanda muputuke kutanga Mbimbiliya, mwatela kulomba Yehova amikafwe munganyale kuvyuma muli nakutanga. Chakutalilaho, nge munakutonda jindongi jize najimikafwa muwane mwakukumishila ukalu wenu, kaha mwatela kulomba Yehova amikafwe muwane jindongi kana muMazu enyi.—Fwili. 4:6, 7; Yako. 1:5.

4. Vyuma muka navimikafwa munganyale kumujimbu munakutanga muMbimbiliya?

⁴ (2) Kuhumikiza. Yehova atuhana uhashi wakuhumikiza vyuma. Hakusaka munganyale kumujimbu muli nakutanga, esekenu kuhumikiza vyuma vyasolokele, nakushinganyeka nge vyasolokele kuli enu. Esekenu kumona vyuma amwene mutu vanavuluka mumujimbu kana, nomu evwile havyuma vyasolokele.

5. Vyuma muka mwatela kushinganyeka hakutanga Mbimbiliya, kaha munahase kulinga ngachilihi ngocho?

⁵ (3) Kushinganyeka. Kushinganyeka kanawa hamujimbu muli nakutanga, nomu unakwate hali enu, nachimikafwa mumone omu vishina vinalinungasana, nakumikafwa mwivwishise chikuma mujimbu kana. Kutanga Mbimbiliya chakuzeneka kushinganyeka hamujimbu muli nakutanga, chinafwane nge mutu uze ali nakutala hatumenga chakuzeneka kuvatunga. Mutu kana keshi kuhasa kutachikiza omu zuvo nayikasolokako. Oloze kutanga nakushinganyeka chinafwane nge mutu uze mwambata tumenga, nakuputuka kutunga zuvo. Nakumona jino omu zuvo anakutunga nayikasoloka. Hakusaka mushinganyeke hamujimbu muli nakutanga, munahase kulihulisa vihula vino nakuvikumbulula: ‘Vyuma muka alingile mutu vanavuluka mumujimbu kana mangana akumise ukalu wenyi? Uno Yehova amukafwile ngachilihi? Uno vishina ngunalinangula vinahase kungukafwa ngachilihi ngumike muukalu wami?’

6. Mwomwo ika twatela kukavangiza vyuma tuli nakulinangula?

⁶ (4) Kukavangiza. Yesu ambile ngwenyi nge natuhona kukavangiza vyuma tunakulinangula, kaha natufwana nge lunga uze atungile zuvo yenyi hausekeseke. Numba tuhu ou lunga akilikichile hakutunga zuvo yenyi, oloze ngolo jenyi jayile mwanganavene. Mwomwo ika? Mwomwo omu peho yayinene nalivaji vyalivetele hazuvo kana, yize zuvo yashiukile. (Mateu 7:24-27) Nayetu nawa nge natulomba, nakuhumikiza, nakushinganyeka, oloze natuhona kukavangiza vyuma tunalinangula, kaha nevi tunalingi vene vyauchi. Mwomwo nge natumona vyeseko chipwe nge vatu navatufumbukila, kaha katweshi kumikako. Oloze nge natutanga Mbimbiliya nakukavangiza vyuma tunalinangula, kaha nachitukafwa tulinge vyuma vyakwoloka, nakuunda muchima, nakupwa nalufwelelo lwakukola. (Isa. 48:17, 18) Tuzachisenu vyuma evi viwana tunashimutwila, mangana tumone vyuma vyasolokele kuli Ndavichi, navyuma natulinangulako.

7. Mujimbu muka natushimutwila?

⁷ Kutala muli nakwivwa kupihya kumuchima, mwomwo yakumifumbukila kuli sepa lyenu chipwe kausoko kenu tahi? Nge mukiko, kaha chuma nachimikafwa shina kushimutwila hamujimbu waNdavichi, uze vafumbukililile kuli mwanenyi Avasalome, nakusaka kumutambula wangana.—Samwe. 2, 15:5-14, 31; 18:6-14.

8. Vyuma muka mwatela kulinga mangana Yehova amikafwe?

 ⁸ (1) Kulomba. Nge munatange mujimbu umwe muMbimbiliya, mwatela kulweza Yehova omu munakwivwa havyuma vyavipi vize vanamilingi vakwenu. (Samu 6:6-9) Kufumaho mulombenu amikafwe muwane jindongi jize mwatela kukavangiza mangana mumike muukalu wenu.

9. Vyuma muka vyasolokele kuli Ndavichi naAvasalome?

⁹ (2) Kuhumikiza. Achishinganyekenu hamujimbu waMwangana Ndavichi, nakuhumikiza omu evwile kweseka navyuma vyasolokele. Avasalome mwanaNdavichi akilikichile hamyaka yayivulu mangana akunyule vatu. (Samwe. 2, 15:7) Omu amwene jino ngwenyi lwola lunatemo, atumine vandoji muIsalele mangana vakunyule vatu vamwitavile kupwa mwangana. Kaha nawa akunywile Ahitofwele, uze apwile sepa lyaNdavichi, kaha nawa muka-kumulweza mangana. Alingile ngocho mangana alipanjike naAvasalome vafumbukile Ndavichi. Kutwala muze, Avasalome alitongwele ivene kupwa Mwangana nakusaka kujiha Ndavichi halwola avijile chikuma. (Samu 41:1-9) Omu Ndavichi atachikijile chuma kana, achinyine muYelusalema, kaha maswalale jaAvasalome vaputukile kuzunga namaswalale jaNdavichi. Maswalale jaAvasalome vavafungulwile, kaha ivene Avasalome nawa vamujihile.

10. Kweseka naukalu apwilemo Ndavichi, vyuma muka kachi alingile?

¹⁰ Humikizenu nawa omu evwile Ndavichi havyuma vyosenevi vyasolokele. Azangile chikuma mwanenyi Avasalome. Kaha nawa afwelelele chikuma sepa lyenyi Ahitofwele. Oloze vosena vavali vamufumbukilile nakusaka kumujiha. Vyuma kanevi vyevwishile chikuma Ndavichi kupihya kumuchima. Nge Ndavichi azangile, kachi kafwelelele masepa jenyi vosenako, hakushinganyeka ngwenyi pamo navakiko vali nakukundwiza Avasalome. Ngocho kachi afumine muze mulifuchi nakuchina ukawenu. Chipwe kachi ahombele chikuma. Oloze kalingile vyumevi tunavulukako. Ikiye omikile muukalu kana. Uno chuma muka chamukafwile omike?

11. Vyuma muka alingile Ndavichi omu apwile muukalu waunene?

¹¹ (3) Kushinganyeka. Jindongi muka natulinangula kumujimbu kana? Kumbululenu chihula chino, “Vyuma muka vyakafwile Ndavichi?” Ndavichi kalusukile nakusakula kulinga vyuma vyakuhengako. Kaha nawa kechelele woma umuhonese kusakula vyakulingako. Oloze alombele kuli Yehova amukafwe, nakulweza nawa masepa jenyi vamukafwe. Kaha nawa kalangishile kulinga vyuma vize ajinyine kulingako. Numba tuhu Ndavichi vamwimanyinyine nakole, oloze atwalileho lika kuzanga vakwavo. Kaha nawa atwalileho lika kufwelela Yehova namasepa jenyi.

12. Yehova akafwile ngachilihi Ndavichi?

¹² Uno Yehova akafwile ngachilihi Ndavichi? Kachi nge namuhehwojola, namuwana nge Yehova akafwile Ndavichi omike muukalu. (Samu 3:1-8; mazu akujimbula) Yehova akafwile Ndavichi atesemo vyuma asakwile kulinga. Akafwile nawa masepa jaNdavichi vakushishika omu vapwile nakuzunga navaka-kole javo mangana vakinge Ndavichi.

13. Namulondezeza ngachilihi Ndavichi kachi nge ndumbwenu namilingi mwamupi? (Mateu 18:15-17)

¹³ (4) Kukavangiza. Lihulisenu ngwenu, ‘Nangulondezeza ngachilihi Ndavichi?’ Kumisenunga washi ukalu wenu chakuzeneka kulangisa. Kweseka nomu vili vyuma, munahase kukavangiza mazu ahanjikile Yesu atwama hali Mateu kapetulu 18. (Tangenu Mateu 18:15-17.) Oloze kamwatela kulusuka nakusakula vyakulinga nge munapihililako. Lombenu kuli Yehova amikafwe muunde muchima, nakumihana mangana aze nawamikafwa haukalu muli nakuhitamo. Twalenuho lika kufwelela masepa jenu, nakwitavila vyuma navamilweza. (Vishi. 17:17) Chuma chachilemu chikuma shina, kukavangiza vyuma eji kutulwezanga Yehova muMazu enyi.—Vishi. 3:5, 6.

14. Ukalu muka unahase kumilingisa mutange mazu ahali WaChimoteu 2, 1:12-16; 4:6-11, 17-22?

¹⁴ Kutala vaka-tanga yenu vali nakumifumbukila tahi? Nyi mwatwama mulifuchi muze fulumende yakanyisako milimo yimwe yaVinjiho jaYehova, chipwe kuvakanyisa milimo yavo yosena tahi? Nge mukiko, kaha nachipwa chamwaza kutanga mazu akukolezeza atwama hali WaChimoteu 2, 1:12-16, na 4:6-11, 17-22. * Paulu asonekele jivesi kana halwola apwile mukamenga.

15. Vyuma muka mwatela kulweza Yehova?

¹⁵ (1) Kulomba. Shimbu kanda mutange jivesi kana, lwezenu Yehova ukalu wenu, nomu muli nakwivwa haukalu kana. Kufumaho lombenu Yehova amikafwe muwane jindongi, jili mumujimbu uze wasolola ukalu amwene Paulu. Jindongi kana najimikafwa muwane mwakulipikila naukalu wenu.

16. Ukalu muka amwene Paulu?

¹⁶ (2) Kuhumikiza. Humikizenu nge yenu muli nakumona ukalu uze amwene Paulu. Paulu vamukashile mukamenga muLoma. Elu kalwapwile lwola lwatete kupwa mukamengako. Oloze halwola kana atachikijile ngwenyi navamujiha. Masepa jenyi vamwe vamuchinyine, kaha nawa azeyele chikuma.—Chimo. 2, 1:15.

17. Vyuma muka kachi alingile Paulu kweseka naukalu amwene?

¹⁷ Kweseka naukalu apwilemo Paulu, pamo kachi ashinganyekele ngwenyi, nge kapwile muka-Kulishitu watwimako, pamo kachi kavamukashileko. Kaha nawa pamo kachi alaminyinyine koko vatu vamungalila yaAja vaze vamusezele, nakuhona nawa kufwelela masepa jenyi vosena. Oloze Paulu kalingile vyuma kanako, mwomwo atwalileho kufwelela ngwenyi masepa jenyi navapwa lika vakushishika kuli ikiye, kaha nawa ngwenyi Yehova mwakamukisula mwomwo yakukilikita chenyi.

18. Uno vyuma muka alingile Paulu omu apwile muukalu?

¹⁸ (3) Kushinganyeka. Kumbululenu chihula chino, “Vyuma muka vyakafwile Paulu?” Numba tuhu Paulu atachikijile ngwenyi navamujiha, oloze amwene ngwenyi, chuma chachilemu atelele kulinga shina kutohwesa Yehova. Kaha nawa atwalileho lika kushinganyeka awane omu nahase kukolezezelamo vandumbwenyi. Apendaminyine hali Yehova hakulombanga lwola lwosena. (Chimo. 2, 1:3) Muchishishisa chakushinganyeka chikuma hali vandumbwenyi vaze vamusezele, oloze ikiye atwalileho lika kusakwilila vandumbwenyi vakushishika vaze vamukafwilenga omu apwile muukalu. Kaha nawa Paulu atwalileho lika kulinangula Mazu aKalunga. (Chimo. 2, 3:16, 17; 4:13) Chachinenenyi, afwelelele chikupu ngwenyi Yehova, naYesu vamuzangile chikuma. Mwomwo atachikijile ngwenyi kavamusezeleko, kaha nawa navakamufweta hakukilikita chenyi.

19. Uno Yehova akafwile ngachilihi Paulu?

¹⁹ Yehova alwezelele chimweza Paulu ngwenyi navamuyanjisa hakupwa muka-Kulishitu. Ngocho atela kaha kumika. (Vili. 21:11-13) Uno Yehova akafwile ngachilihi Paulu? Yehova akumbulwile kulomba chaPaulu nakumuhana ngolo. (Chimo. 2, 4:17) Afwelelesele Paulu ngwenyi mwakamufweta hamilimo azachilenga. Kaha nawa azachishile masepa jaPaulu vakushishika mangana vakafwe Paulu.

20. Kweseka naWavaka-Loma 8:38, 39, tunahase kulondezeza ngachilihi Paulu?

²⁰ (4) Kukavangiza. Lihulisenu ngwenu, ‘Ngunahase kulondezeza ngachilihi Paulu?’ Ngana mwaPaulu, nayetu twatela kutachikiza ngwetu navatuyanjisanga mwomwo yakuzachila Yehova. (Mako 10:29, 30) Hakusaka tupwenga lika vakushishika kuli Yehova nge tuli muukalu, twatela kulombanga shimbu yosena, nakulinangulanga Mazu enyi lwola lwosena. Kaha nawa twatela kwanukanga ngwetu, chuma chachilemu twatela kulinga shina kutohwesanga Yehova.  Twafwelela chikupu ngwetu Yehova keshi kukatusezako, kaha nawa kakweshi chuma chinahase kumulingisa echenga kutuzangako.—Tangenu Wavaka-Loma 8:38, 39; Hepe. 13:5, 6.

21. Vyuma muka vyakafwile ndumbwetu Aya, nandumbwetu Hector vahonese ukalu wavo?

²¹ Mijimbu yamuMbimbiliya yinahase kutukafwa tumike mukala ukalu. Chakutalilaho, ndumbwetu Aya wamuJapan, uze apwa payiniya ambile ngwenyi, mujimbu waYona wamukafwile ahone kwivwanga woma kwambulwila kuvihela vyasanga. Kaha nawa ndumbwetu wamukweze Hector, wamuIndonesia uze visemi jenyi kavapwa Vinjihoko ambile ngwenyi, mujimbu waLute wamukafwile alinangule hali Yehova, nakufwila kumuzachila.

22. Vyuma muka mwatela kulinga mangana munganyale kuvimweso vyamuMbimbiliya, chipwe hakutanga vihande vili haInternet vyakwamba ngwavo “Londezezenunga Lufwelelo Lwavo”?

²² Kulihi munahase kuwana mijimbu yamuMbimbiliya yize yinahase kumijikijisa? Munahase kuyiwana mujivindiyo jetu, namuvimweso vyamuMbimbiliya vyakutanga, nahavihande vili haInternet vyakwamba ngwavo “Londezezenunga Lufwelelo Lwavo.” * Vyuma kana vinahase kumikafwa mwivwishise mijimbu yamuMbimbiliya. Shikaho shimbu kanda mutale vindiyo, chipwe kwivwilila kuchimweso, chipwe kutanga vihande vili haInternet, mwatela kulomba Yehova amikafwe muwane vishina vize navimikafwa. Kaha nawa mwatela kuhumikiza nge enu yenu mutu vanavuluka mumujimbu. Shinganyekenu havyuma valingile vangamba jaYehova vanavuluka mumujimbu, nomu Yehova avakafwile vahonese ukalu kana. Kaha kavangizenu vyuma munalinangula kweseka naukalu muli nawo. Musakwililenu Yehova havyuma vyamwaza namilingila. Kaha sololenu kusakwilila chenu hakuwana jijila munahase kukolezezelamo vakwenu nakuvakafwa.

23. Kweseka naIsaya 41:10, 13, Yehova atufwelelesa vyuma muka?

²³ Hakuwana nge Satana ikiye ali nakuyula kano kaye, ngocho chiyoyelo chinahase kukaluhwa chikuma, kaha shimbu jimwe tunahase kuhona kutachikiza vyuma vyakulinga. (Chimo. 2, 3:1) Oloze katwatela kulizakamina chipwe kwivwa womako, mwomwo Yehova natachikiza ukalu tuli nakumona. Kachi nge tuli muukalu, Yehova atufwelelesa ngwenyi mwatukwachilila nalivoko lyenyi lyachilyo lyangolo. (Tangenu Isaya 41:10, 13.) Chikupu vene tunafwelela ngwetu Yehova mwatuhananga ngolo, kaha nawa Mbimbiliya nayitukafwa tumike kala ukalu.