1. Mwomwo ika Yesu alombele Yehova alame tumbaji twenyi?

SHIMBU kanda Yesu afwenga, apwile nakushinganyeka haukalu uze navakamona tumbaji twenyi. Hakuwana nge azangile tumbaji twenyi, ngocho Yesu alombele Ise ngwenyi “uvalame mwomwo yayauze wakuhuka.” (Yowa. 17:14, 15) Yesu atachikijile ngwenyi omu mwakakinduluka mwilu, Satana Liyavolo mwakayanjisanga vatu vaze navakasaka kuzachila Yehova. Chikupu vene vatu jaYehova vasakiwile kuvakinga.

2. Uno twatachikiza ngachilihi ngwetu Yehova mwakumbulula kulomba chetu?

² Yehova akumbulwile kulomba chaYesu mwomwo amuzanga chikuma. Nge natuzata nangolo mangana twivwise Yehova kuwaha, kaha nayetu mwatuzanga, nakutukumbulula omu natumulomba ngwetu atukafwe nakutukinga. Hakuwana nge Yehova apwa chisemi wazangi, ngocho mwatwalaho lika kuzakama vana venyi. Mwomwo nge keshi kulinga ngochoko, kaha lijina lyenyi navalisaula.

3. Mwomwo ika makumbi ano tuli nakusakiwa chikuma kutukinga kuli Yehova?

³ Makumbi ano, tuli nakusakiwa chikuma kutukinga kuli Yehova, mwomwo Satana vamumbila lyehi hano hamavu, kaha “ali namatoto amanene.” (Kuso. 12:12) Nahungumwisa vatu vaze veji kutuyanjisanga vashinganyeke ngwavo, “vali nakuzata mulimo wajila kuli Kalunga.” (Yowa. 16:2) Vatu veka nawa vaze kavafwelela muli Kalungako veji kutuyanjisanga, mwomwo vilinga vyetu kavyalifwana navilinga vyavoko. Chamokomoko nakutuyanjisa, etu katwalizakaminako. Mwomwo Mazu aKalunga amba ngwawo: “Mwata apwa wakushishika, kaha mwamijikijisanga nakumikinganga  kuli uze wakuhuka.” (Teso. 2, 3:3) Uno Yehova eji kutukinganga ngachilihi? Tushimutwilenu hajijila jivali eji kutukingilangamo.

4. Kweseka naWavaka-Efwesu 6:13-17, vyuma muka atuhana Yehova vize vinahase kutukinga?

⁴ Yehova atuhana vyuma vyosena vyajita mangana vitukinge kutufuta twaSatana. (Tangenu Wavaka-Efwesu 6:13-17.) Evi vyuma vyosena vyajita vyakushipilitu, vyapwa vyangolo kaha nawa vinahase kutukinga. Oloze twatela kuvivwalanga lwola lwosena numba vitukinge. Uno chuma hichuma chajita chemanyinako ika? Tuwanenu ovyo chuma hichuma chemanyinako.

5. Uno muhya wamuchano wemanyinako ika, kaha mwomwo ika twatela kuuvwalila?

⁵ Muhya wamuchano wemanyinako muchano uze watwama muMbimbiliya. Mwomwo ika twatela kuvwalila muhya kana? Mwomwo muchano wamuMbimbiliya weji kutukinganga kumakuli aSatana uze apwa “ise yamakuli.” (Yowa. 8:44) Nahanjikanga makuli hamyaka yayivulu, nakuhungumwisa “vatu vosena hamavu.” (Kuso. 12:9) Uno tweji kuvwalanga ngachilihi ou muhya wachifwanyisa? Tweji kulinganga ngocho hakulinangula muchano waYehova, nahakumulemesa “mushipilitu namumuchano,” nahakupwa vakashishi muvyuma vyosena.—Yowa. 4:24; Efwe. 4:25; Hepe. 13:18.

6. Uno chipwiko chakukinga hatulo chakwoloka chemanyinako ika, kaha mwomwo ika twatela kuchivwalila?

⁶ Chipwiko chakukinga hatulo chakwoloka chemanyinako jishimbi jaYehova jakwoloka. Mwomwo ika twatela kuvwalila chipwiko chakukinga hatulo? Ngana muze chipwiko cheji kukinganga muchima waliswalale, nachipwiko chakukinga hatulo chakwoloka cheji kukinganga muchima wetu wachifwanyisa, chipwe ngwetu mutu wetu wamukachi, kukala vyuma vyamukaye vize vinahase kutuhungumwisa. (Vishi. 4:23) Yehova asaka tumuzange nakumuzachila namuchima wetu wosena. (Mateu 22:36, 37) Satana kasaka tuzachile Yehova namuchima wetu wosenako. Eji kulinganga ngocho hakutukunyula tuzange vyuma vyamukaye vize ahunga Yehova. (Yako. 4:4; Yowa. 1, 2:15, 16) Nge nahono kutukunyula tuzange vyuma vyamuno mukaye, kaha eji kutuyanjisanga mangana tulinge vyuma vize ahunga Yehova.

7. Uno tweji kuvwalanga ngachilihi chipwiko chakukinga hatulo chakwoloka?

⁷ Tweji kuvwalanga chipwiko chakukinga hatulo chakwoloka, hakwitavila jishimbi jaYehova jakulisakwila vyuma vyamwaza nevi vyavipi. (Samu 97:10) Veka vanahase kushinganyeka ngwavo jishimbi jaYehova japwa jajikalu kukavangiza. Oloze nge katweshi kukavangiza jishimbi kanako, kaha natulifwana naliswalale uze mwazula chipwiko chakukinga hatulo yenyi halwola vali nakwasa jita, mwomwo ngwenyi chachilemu. Kulinga chuma kana nachihaka kuyoya chamutu muponde. Vaze vazanga Yehova kavamona jishimbi jenyi “kupwa nge hichiteliko,” oloze jeji kuyovolanga myono yavo.—Yowa. 1, 5:3.

8. Uno kuvwala mendelo kumahinji etu mangana tulizange kuvilika mujimbu wamwaza chalumbununa ika?

⁸ Paulu nawa atukolezeza tuvwale mendelo kumahinji etu mangana tulizange kuvilika mujimbu wamwaza wakuvuluka kuunda. Mujila yikwavo apwile nakulumbununa ngwenyi, twatela kulizanga kwambulula mujimbu wamwaza. Kachi nge natwambulila vatu mujimbu kana, kaha nachizamisa lufwelelo lwetu. Tweji kwivwanga kuwaha hakumona Vinjiho jaYehova mukaye kosena, vali nakuzachisa jijila jakulisezaseza mangana vambulile vatu mujimbu wamwaza. Chakutalilaho, veji kwambulilanga vatu kumilimo, nakumashikola, nakuvihela vyasanga, nakuzuvo hizuvo, nakuvitanda, kaha nawa veji kwambulilanga masepa javo navausoko wavo vaze kavapwa Vinjihoko. Veji kwambululanga numba vene nge vali muluuta. Nge natulitwamina kwambulula mwomwo yawoma, kaha natulifwana naliswalale uze mwazula mendelo halwola ali kujita, mwomwo  kulinga ngocho mwalemana. Kaha nawa kuzula mendelo nachimukaluhwila kulikinga kachi nge vaka-kole vanavalukuka, nakuhona nawa kukavangiza jindongi mwavalweza kapitau kavo.

9. Mwomwo ika twatela kumbachila kepwe yayinene yalufwelelo?

⁹ Kepwe yayinene yalufwelelo yemanyinako lufwelelo twatwama nalwo. Twafwelela ngwetu Yehova mwakatesamo jishiko jenyi josena. Lufwelelo nalutukafwa “kujimisa mivwi yakakahya yosena yayauze wakuhuka.” Mwomwo ika twatela kumbachila eyi kepwe yayinene? Mwomwo nayitukinga kukunangula chavatu vaze valikanga kuli Kalunga. Nayitukafwa nawa tuhone kwivwa woma nge vatu navahanjika vyuma vyavipi kutalisa kuvyuma twafwelela. Nge katweshi kupwa nalufweleloko, kaha nachitukaluhwila kumika nge vatu vanakutushinjila tulinge vyuma vize vyalimbalaka najindongi jaYehova. Kala lwola natukana kulinga vyuma vize vyalimbalaka najindongi jaYehova kumilimo, chipwe kushikola, nachisolola nge tunambate kepwe yayinene yalufwelelo. (Petu. 1, 3:15) Kaha nawa nge natukana kuzata milimo yakukaye yajimbongo jajivulu, yize nayitutangula kuzata milimo yaYehova, kaha nachisolola nge tunambate kepwe kana. (Hepe. 13:5, 6) Kaha nawa nge natutwalaho kuzachila Yehova chamokomoko nakutufumbukila, nachisolola  nge vali nakutukinga kukepwe yayinene yalufwelelo.—Teso. 1, 2:2.

10. Litepa lyakukola lyaulwilo lyemanyinako ika, kaha mwomwo ika twatela kulivwalila?

¹⁰ Litepa lyakukola lyaulwilo lyemanyinako lutalililo atuhana Yehova. Lutalililo kana lwasolola nge Yehova mwakafweta vosena vaze veji kulinganga mwaya muchima wenyi, kaha nawa numba nge navafwa, mwakavasangula. (Teso. 1, 5:8; Chimo. 1, 4:10; Chitu. 1:1, 2) Ngana muze litepa lyakukola lyeji kukinganga mutwe waliswalale, nalutalililo nawa lweji kukinganga uhashi wetu wakushinganyeka kanawa. Mujila muka? Lweji kutukafwanga tushinganyeke havyuma atushika Kalunga. Lweji kutukafwanga nawa tuhone kuhomba chikuma nge tunakumona ukalu. Uno tweji kuvwalanga ngachilihi eli litepa lyakukola? Tweji kulinganga ngocho hakushinganyeka ngana muze eji kushinganyekanga Kalunga. Chakutalilaho, lutalililo lwetu lwazama hali Kalunga keshi haluheto lwamuno mukayeko.—Samu 26:2; 104:34; Chimo. 1, 6:17.

11. Uno poko yamukwale yashipilitu yemanyinako ika, kaha mwomwo ika twatela kuyizachishila?

¹¹ Poko yamukwale yashipilitu yemanyinako Mazu aKalunga, Mbimbiliya. Eyi poko yamukwale yeji kusololanga hatoma makuli aSatana, nakusokola vatu kukunangula chamakuli nakuvilinga vyavipi. (Koli. 2, 10:4, 5; Chimo. 2, 3:16, 17; Hepe. 4:12) Tweji kulinangulanga mwakuzachishila poko kana hachilongesa chauka, nomu veji kutunangulanga kuliuka lyaYehova. (Chimo. 2, 2:15) Yehova atuhana nawa vyuma vikwavo vyeji kutukinganga. Vyuma muka vene ovyo?

12. Vyuma vyeka muka vyatela kutukafwa, kaha mwomwo ika?

¹² Liswalale wakwipangweji atachikiza ngwenyi, keshi kuhasa kufungulula lizavu lyavaka-kwasa jita ukawenyiko, atela kuzachila hamwe navakwavo maswalale. Nayetu nawa katweshi kuhasa kufungulula Satana, navaze veji kumukavangizanga ukawetuko, twasakiwa kutukafwa kuli vandumbwetu. Yehova atuhana “vandumbwetu” vamukaye kosena, vaze vatela kutukafwa kufungulula Satana Liyavolo, navaze veji kumukundwizanga.—Petu. 1, 2:17.

13. Kweseka naWavaHepeleu 10:24, 25, kukunguluka cheji kutukafwanga ngachilihi?

¹³ Vandumbwetu veji kutukafwanga kuhichila mukukunguluka. (Tangenu WavaHepeleu 10:24, 25.) Kachi nge tunahombo, kuya kukukunguluka nachitukafwa tuwahilile. Vishina veji kukumbululanga vandumbwetu kukukunguluka, navihande vyaMbimbiliya veji kuhanjikanga, navimweso vyeji kutukolezezanga tutwaleho lika kuzachila Yehova. Kaha nawa kushimutwila navandumbwetu shimbu kanda kukunguluka, nahanyima yakukunguluka, cheji kutukolezezanga chikuma. (Teso. 1, 5:14) Kukunguluka nawa cheji kutulingisanga tukafwe vakwetu, kaha tweji kuwahililanga. (Vili. 20:35; Loma 1:11, 12) Kukunguluka cheji kutukafwanga nawa tuhotole uhashi wetu wakwambulula nakunangula. Chakutalilaho, tweji kulinangulanga mwakuzachishila kanawa Vinoma Vyakuzachisa haKunangula. Shikaho mwatela kuliwahisanga kanawa, shimbu kanda muyenga kukukunguluka. Mwatela kwivwililanga kanawa halwola muli nakukunguluka. Kufumaho, mwatela kukavangiza vyuma munalinangula. Nge namulinga ngocho, kaha namupwa ‘mumaswalale vamwenemwene vaKulishitu Yesu.’—Chimo. 2, 2:3.

14. Vyuma vyeka muka atuhana Yehova vyakutukafwa?

¹⁴ Vangelo veji kutukafwanga, kaha nawa vapwa vangolo chikuma. Tachikizenu ngwenu kangelo umwe akwechi ngolo jakulinga vyuma vyakukomwesa. (Isa. 37:36) Jino achishinganyekenu vyuma linahase kulinga lizavu lyavangelo vangolo chikuma. Kakweshi mutu chipwe ndemone nahase kweseka hamwe ngolo nalizavu lyavangelo jaYehovako. Hakuwana  nge Yehova atwama nangolo chikuma, ngocho numba tuhu vaka-kole jetu navavula, kaveshi kuhasa kutufungululako. (Kuyu. 6:16) Mazu kana apwa amuchano. Mwatela kwanuka vyuma kana nge mukwenu mumwazachila, chipwe mukwenu muka-shikola, chipwe kausoko kenu uze kapwa Chinjihoko, mwalinga vyuma chipwe mwahanjika mazu aze nawamivwisa woma. Tachikizenu ngwenu kamweshi nakulwa jita ukawenuko. Nge namukavangiza jindongi jaYehova, kaha mwamikafwa.

15. Kweseka namukanda waIsaya 54:15, 17, mwomwo ika natwambila ngwetu kakweshi chuma nachihonesa vangamba jaYehova kwambululako?

¹⁵ Kuli vyuma vyavivulu vyalingisa vatu mukaye kaSatana vatuhunge. Etu vatu jaYehova katwazana muvihande vyalifuchi nachiyuloko, kaha nawa katwazunga jitako. Tweji kuvilikanga lijina lyaKalunga, nakukundwiza Wangana wenyi uze naukaneha kuunda hamavu. Tweji kukavangizanga jishimbi jenyi jakwoloka nakusolola hatoma ngwetu muka-kuyula kano kaye apwa muka-makuli, kaha nawa muka-kujiha vatu. (Yowa. 8:44) Kaha nawa tweji kulwezanga vatu ngwetu, kaye kaSatana kalinwaha vakanongese. Satana navaze veji kumukundwizanga, kaveshi kuhasa kutuhonesa kwambululako. Oloze natutwalaho lika kwalisa Yehova kweseka noho hakumina ngolo jetu. Numba tuhu Satana atwama nangolo, oloze kahashile kuhonesa mujimbu wamwaza kuheta kuvatu mukaye kosenako. Mulimo kana uli nakutesamo mwomwo yakutukafwa kuli Yehova.—Tangenu Isaya 54:15, 17.

16. Uno Yehova mwakatukinga ngachilihi haluyando lwalunene?

¹⁶ Vyuma muka tuli nakutalilila kulutwe? Haluyando lwalunene, Yehova mwakatukinga etu vangamba jenyi vakushishika mujijila jivali. Chatete, mwakatukinga omu mwakalingisa vamyangana vahano hamavu vakanongese Mbavilone Yayinene, yize yapwa kwitava chamakuli chamukaye kosena. (Kuso. 17:16-18; 18:2, 4) Chamuchivali, mwakatukinga hajita yaAlamangetone omu mwakanongesa vatu jaSatana vaze navakapwako halwola kana.—Kuso. 7:9, 10; 16:14, 16.

17. Uno tunahase kunganyala ngachilihi nge natutwalaho lika kupandama kuli Yehova?

¹⁷ Nge natutwalaho lika kupandama kuli Yehova, kaha kakweshi chuma mwalinga Satana chize nachitunongesako. Oloze twatachikiza ngwetu ikiye navakamunongesa. (Loma 16:20) Shikaho, twalenuho lika kuvwala vyuma vyosena vyajita. Kanda kuzunga eyi jita yakushipilitu ukawenuko. Oloze mwatela kulikafwa navandumbwenu, nakukavangiza jindongi jaYehova. Nge namulinga ngocho, kaha Senu wamwilu mwamijikijisa nakumikinga.—Isa. 41:10.