1. Kweseka naMateu 24:9, mwomwo ika katwatela kulikomokelako kachi nge vatu mukaye vanatuhungu?

YEHOVA atutenga namuchima wakuzanga vakwetu nakusaka nawa navakiko vatuzange. Ngocho nge vanatuhungu, tweji kwivwanga kupihya nakwivwa kukola kumuchima. Chakutalilaho, ndumbwetu Georgina wakuEurope ambile ngwenyi: “Omu ngwapwile namyaka 14, mama anguhungile mwomwo yakuzachila Yehova. Ngocho ngwevwile kupihya chikuma nakuhomba. Kaha ngwashinganyekele ngwami ngwatwama namuchima waupi.” * Ndumbwetu Danylo asonekele ngwenyi: “Omu maswalale vanguvetele nakunguhenda, nakungulweza ngwavo navangujiha mwomwo yakupwa nguChinjiho chaYehova, ngwevwile chikuma woma, kaha ngwalivwile kupwa nguwamokomoko.” Kachi nge vatu vanatuhungu, tweji kwivwanga kupihya chikuma. Oloze katwalikomokelako, mwomwo Yesu ahanjikilile chimweza ngwenyi navakatuhunga.—Tangenu Mateu 24:9.

2-3. Mwomwo ika vaka-kukavangiza Yesu vavahungila?

² Vatu mukaye vahunga etu vaka-kukavangiza Yesu. Mwomwo ika? Mwomwo katwapwa ‘tuvaka-kayeko’ ngana muze apwile Yesu. (Yowa. 15:17-19) Numba tuhu tweji kwononokanga jifulumende, oloze katweshi kwimba mwaso walifuchi, chipwe kulifukula kulipandeloko. Twafwila kaha kulemesa Yehova namuchima wetu wosena. Kaha nawa tweji kukundwizanga chiyulo chaKalunga chakwoloka, chize Satana “namuka-tanga” yenyi vafumbukila. (Kupu. 3:1-5, 15) Tweji kwambulilanga vatu ngwetu Wangana waKalunga ukiko naukakumisa ukalu wavatu. Kaha kalinwomu nawa Wangana kana unongese vaze vaufumbukila. (Ndanye. 2:44; Kuso. 19:19- 21) Mujimbu kana weji kwivwisanga kuwaha vatu vavavwovu michima, oloze vaka-kuhuka kavauzangako.—Samu 37:10, 11.

³ Kaha nawa vatuhunga, mwomwo yakukavangiza jindongi jaKalunga. Jindongi kana jalihandununa najize javatu vamuno mukaye. Chakutalilaho, Kalunga anongesele vatu muSotome naNgomola mwomwo yakulinga ujila. Oloze vatu vavavulu makumbi ano, kavamona ujila kupwa chuma chakuhengako. (Yuta 7) Hakuwana nge tweji kukavangizanga jindongi jamuMbimbiliya nakulihenda kuujila, ngocho vatu veji kututolekanga nakutumona kupwa tuvakusalila.—Petu. 1, 4:3, 4.

4. Vyuma muka navitujikijisa kachi nge vatu vanatuhungu?

⁴ Vyuma muka navitukafwa tumike kachi nge vatu vanatuhungu kaha nawa vali nakutuhenda? Twatela kufwelela ngwetu Yehova mwatukafwa. Ngana muze lukepwe lweji kukinganga mutu, nalufwelelo lwetu lunahase kutukinga mangana “tujime mivwi yakakahya yosena yayauze wakuhuka.” (Efwe. 6:16) Oloze kuli chuma chikwavo chasakiwa. Chuma kana shina zangi. Mwomwo ika? Mwomwo zangi “kayeshi kukwata washi matotoko.” Yeji kwitavilanga vyuma vyosena, kaha nawa yeji kutukafwanga tukakachile muvyuma vyosena. (Koli. 1, 13:4-7, 13) Tushimutwilenu jino omu kuzanga Yehova, navandumbwetu, kuhakilako vene navaka-kole jetu, chinahase kutukafwa tumike nge vatu vanatuhungu.

5. Uno kuzanga Yehova chakafwile ngachilihi Yesu?

⁵ Shimbu kanda Yesu vamujihe, alwezele vaka-kumukavangiza vakushishika ngwenyi: “Ami ngwazanga Tata, shikaho nguli nakulinga nge muze angulwezele Tata.” (Yowa. 14:31) Kuzanga Yehova chakafwile Yesu omike muvyeseko vyosena ahichilemo, nayetu nawa kuzanga Yehova nachitukafwa tumike muvyeseko.

6. Kweseka naWavaka-Loma 5:3-5, uno vangamba jaYehova veji kwivwanga ngachilihi nge vatu vanavahungu?

⁶ Kuzanga Yehova chinakafwenga vangamba jenyi vatwaleho lika kumika muluyanjisa. Chakutalilaho, omu vaposetolo vavakanyishile kwambulula mujimbu wamwaza kuli vaka-zango yakulitulaho yakusopa milonga yavaYuleya, kuzanga Yehova chavakafwile vononoke “Kalunga hakupwa ikiye muka-kuyula kuhambakana vatu.” (Vili. 5:29; Yowa. 1, 5:3) Kuzanga Yehova chinakukafwa navandumbwetu makumbi ano vatwaleho kushishika, chamokomoko nakuvafumbukila kujifulumende jangolo. Kachi nge kaye kanatuhungu, tweji kuwahililanga muchishishisa chakupihilila.—Vili. 5:41; tangenu Wavaka-Loma 5:3-5.

7. Vyuma muka twatela kulinga nge vausoko wetu vanatufumbukila?

⁷ Chinahase kupwa cheseko chachinene chikuma nge vausoko wetu navatufumbukila. Kachi nge natuputuka kulinangula muchano, vausoko wetu vamwe vanahase kushinganyeka ngwavo Vinjiho vanakutuhungumwisa. Kaha vamwe vanahase kushinganyeka ngwavo tunazaluka. (Esekesenuko Mako 3:21.) Shikaho vanahase nakutufumbukila, oloze katwatela kulikomokeleko, mwomwo Yesu ambile ngwenyi: “Vaka-kole jamutu navakapwa vaze vakuzuvo yenyi.” (Mateu 10:36) Numba tuhu vausoko wetu navatufumbukila, oloze katwatela kuvamona kupwa hivaka-kole jetuko. Omu natutwalaho lika kuzovoloka nakuzanga Yehova, mukiko nawa natutwalaho lika kuzanga vatu. (Mateu 22:37-39) Chipwe ngocho, katweshi kuhasa kuhokola jishimbi najindongi jamuMbimbiliya, mwomwo yakusaka kaha kwivwisa vatu kuwahako.

8-9. Vyuma muka vyakafwile ndumbwetu Georgina omike halwola vamufumbukilile?

⁸ Ndumbwetu Georgina uze twavulukanga, atwalileho kumika chamokomoko nakumufumbukila kuli naye. Ou ndumbwetu ambile ngwenyi: “Ami namama twaputukile kulinangula Mbimbiliya naVinjiho jaYehova. Jino omu  mwahichile tukweji 6, ngwasakile kuputuka kuya kukukunguluka, oloze mama angukanyishile. Ngwawanyine nge, mama apwile nakulikata navaka-kulikanga kuli Kalunga. Kaha azachishilenga vyuma vahanjikilenga hakungwamba yami. Kaha nawa anguhendelenga, nakungukoka jikambu, nakunguveta, nakumbila mikanda yami yize ngwazachishilenga hakulinangula Mbimbiliya. Numba tuhu anguyanjishilenga, oloze omu ngwapwile namyaka yakusemuka 15, vangumbapachishile. Mama asakile kunguhonesa kuzachila Yehova, hakungutwala kuzuvo kuze valaminyinenga vana vakulikanga kuli visemi javo. Kuze kuzuvo vangutwalile, vanyike vamwe vanwinenga maundu akupendesa, nakwazana muvilinga vyaulyanyi. Chapwa chachikalu kumika muvyeseko, kachi nge vinakufuma kumutu uze wafwelela, uze atelanga kukuzanga nakukuzakama.”

⁹ Vyuma muka vyakafwile ndumbwetu Georgina omike omu vamufumbukilile? Ambile ngwenyi: “Likumbi aputukile mama kungufumbukila, likiko ngwakumishile kutanga Mbimbiliya yosena yamuundu. Vyuma ngwatangile vyangukunywile ngwami ngunawane muchano. Kaha ngwapandamine chikuma kuli Yehova. Ngwalombelenga chikuma kuli ikiye, kaha akumbulwilenga kulomba chami. Omu ngwapwile kuzuvo kuze angutwalile mama, ndumbwetu umwe angusanyikile kuzuvo yenyi. Kaha twakatangililile hamwe Mbimbiliya. Halwola kana vandumbwetu vangukolezezele chikuma. Vangukafwile ngupwenga wakukasunuka. Ngocho ngwamwene ngwami Yehova atwama nangolo kuhambakana vaka-kole jetu.”

10. Uno Yehova mwatwalaho kutulingila vyuma muka?

¹⁰ Kaposetolo Paulu asonekele ngwenyi, kakweshi chuma chinahase “kutuhandununa kuzangi yaKalunga eyi yili muli Kulishitu Yesu Mwata wetuko.” (Loma 8:38, 39) Numba tuhu natumona ukalu, oloze twatela kutachikiza ngwetu, Yehova mwatwalaho lika kutuvendejeka nakutujikijisa. Kaha chakutalilaho chaGeorgina chinasolola nge, Yehova nahase kutukafwa kuhichila muli vandumbwetu.

11. Zangi yize ahanjikile Yesu hali Yowano 15:12, 13, yakafwile ngachilihi tumbaji? Hanenu chakutalilaho.

¹¹ Shimbu kanda Yesu afwenga, alwezele tumbaji twenyi ngwenyi vazangenga vakwavo. (Tangenu Yowano 15:12, 13.) Atachikijile ngwenyi nge navalizanga, kaha navalinunga hamwe, nakumika kachi nge kaye kanavahungu. Tushimutwilenu havyuma vyasolokele kuchikungulwilo chamuTesolonyika. Kufuma vene halwola  vachitungile, vatu vamuchikungulwilo kana vavafumbukililenga. Chipwe ngocho, ava vandumbwetu vatwalileho lika kumika nakusolola zangi. (Teso. 1, 1:3, 6, 7) Paulu akolezezele ava vandumbwenyi vatwaleho lika kusolola zangi, ‘nakutwalaho lika kulinga ngocho.’ (Teso. 1, 4:9, 10) Zangi yatelelele kuvakafwa vavendejeke vatu vakuhehela navaze vahombele. (Teso. 1, 5:14) Ava vaka-Kulishitu vasolwelelele vakwavo zangi ngana muze avalwezele Paulu. Kafwe omu mwahichile mwaka umwe, Paulu avasonekelele mukanda wamuchivali nakuvalweza ngwenyi: “Zangi yenu muvosena yakulizanga navakwenu, yili nakutohwelako.” (Teso. 2, 1:3-5) Zangi kana yavakafwile vomike halwola vapwile muvihuli.

12. Vandumbwetu vasolwele ngachilihi zangi omu mulifuchi lyavo mwepukile jita?

¹² Tutalenu chakutalilaho chandumbwetu Danylo, uze twavulukanga hakavanga napuwenyi. Omu jita yepukile mumbaka vapwile nakutwama, vakiko vatwalileho lika kukunguluka, nakuya muwande, nakulila hamwe navandumbwavo kala vyakulya vapwilenga navyo. Kaha likumbi limwe, Danylo vamulukukile kumaswalale. Danylo ambile ngwenyi: “Maswalale vangulwezele ngukane lufwelelo lwami. Oloze kangwetavileko, kaha vanguvetele nakuloza mata mupeho mangana vangwivwise woma ngwavo navangujiha. Ngocho vangusezele. Oloze shimbu kanda vayenga, vahanjikile ngwavo navakinduluka mangana vapike puwami. Kaha vandumbwetu vejile nakutulweza tunyine masuhwa tuchinyine kumbaka yeka. Kangweshi kukavulyama zangi vatusolwelelele vaze vandumbwetuko. Kahomu twahetele kuze twachinyinyine, vandumbwetu vatuhanyine vyakulya, nakungukafwa nawa nguwane milimo nazuvo. Echi chatulingishile nayetu tukafwe vandumbwetu vaze vachinyinyinenga mumbaka kana mwomwo yajita.” Vyakutalilaho kanevi vyasolola nge, kuzanga vandumbwetu chinahase kutukafwa tumike kachi nge vatu mukaye vanatuhungu.

13. Shipilitu yajila yeji kutukafwanga ngachilihi tumike hakuzachila Yehova chamokomoko nakutuhunga?

¹³ Yesu alwezele vaka-kumukavangiza vazangenga vaka-kole javo. (Mateu 5:44, 45) Oloze echi kachapwa chachashiko. Chipwe ngocho, shipilitu yajila yinahase kutukafwa tuvazange, mwomwo mihako yashipilitu yapwa zangi, nakutalilila chikiko, nalikoji, nakuvova, namuchima wakulikanyisa. (Ngale. 5:22, 23) Mihako kaneyi nayitukafwa tumike nge vanatuhungu. Vaka-kole jetu vamwe vaneche kutufumbukila mwomwo muka-mahyavo, chipwe mwanavo, chipwe mutu  muvatungila uze apwa Chinjiho asolwele mihako kana. Vatu vavavulu vaze vapwile vaka-kole jetu, vanapu jino hivandumbwetu. Mwatela kulomba Yehova amihane shipilitu yajila kachi nge munakuchiwana kupwa chachikalu kuzanga vaka-kole jenu. (Luka11:13) Tachikizenu ngwenu kwononoka Yehova chikiko chuma chachilemu chikuma.—Vishi. 3:5-7.

14-15. Uno mazu atwama hali Wavaka-Loma 12:17-21, akafwile ngachilihi ndumbwetu Yasmeen atwaleho lika kuzanga lunga lyenyi?

¹⁴ Tushimutwilenu hali ndumbwetu Yasmeen, uze atwama kuMiddle East. Omu alinangwile muchano nakupwa Chinjiho chaYehova, lunga lyenyi ashinganyekele ngwenyi vanamuhungumwisa. Ngocho aputukile kumukanyisa kuzachila Kalunga. Kaha nawa amuhendelenga nakulweza vausoko wavo, namukulwane wamuchachi, nachimbanda mangana vamwivwise woma, nakumuvangijikila ngwenyi nahandununa tanga. Lwola lumwe, ou lunga lyenyi akasawile vandumbwetu halwola vapwile nakukunguluka. Ngocho ndumbwetu Yasmeen alililenga, mwomwo vamuyanjishilenga chikuma.

¹⁵ Omu ndumbwetu Yasmeen ayilenga kuZuvo yaWangana, vandumbwetu vamuvendejekelenga nakumujikijisa. Tulama vamukolezezele akavangize mazu atwama hali Wavaka-Loma 12:17-21. (Tangenu.) Ou ndumbwetu ambile ngwenyi: “Chapwile chachikalu kukavangiza mazu kana, oloze ngwalombelenga Yehova angukafwe mangana ngukavangize vyuma yahanjika Mbimbiliya. Ngocho omu lunga lyami amwangililenga majilo mukapete kakuwahishila vyakulya, ami ngwayilenga kaha nakuwahisa, nakuliholela kwami kulu. Omu angusawilenga, ami ngwamukumbulwilenga nalizu lyalivwovu. Kaha nge naviji, ngwamuzakaminenga chikuma.”

16-17. Vyuma muka munalinangula kuli ndumbwetu Yasmeen?

¹⁶ Ndumbwetu Yasmeen vamukiswile hakutwalaho lika kuzanga lunga lyenyi. Ambile ngwenyi: “Lunga lyami aputukile kungufwelela mwomwo ngwahanjikilenga muchano lwola lwosena. Aputukile kungwivwilila kanawa nge tuli nakushimutwila vyuma vyakutalisa kukwitava. Kaha etavilile tutwame mukuunda. Makumbi ano jino eji kungukolezezanga nguyenganga kukukunguluka. Kaha nawa tuli nakutwama kanawa, nakupwa vakuunda mutanga yetu. Kaha nguli nakulomba ngwami, likumbi limwe lunga lyami mwaketavila muchano mangana tukazachilenga hamwe Yehova.”

¹⁷ Vyuma ahichilemo ndumbwetu Yasmeen vyasolola nge, zangi “yeji kufwikanga vyuma vyosena, . . . nakutalilila vyuma vyosena, nakukakachila muvyuma vyosena.” (Koli. 1, 13:4, 7)  Zangi yatwama nangolo chikuma kuhambakana chijindo, mwomwo yeji kufungululanga upi. Kaha nawa Yehova eji kwivwanga kuwaha nge natutwalaho lika kuzanga vaka-kole jetu. Numba tuhu vaka-kole jetu navatwalaho lika kutuhunga, oloze tunahase kutwalaho lika kupwa vakuwahilila. Mujila muka?

18. Mwomwo ika twatela kuwahilila nge vanatuhungu?

¹⁸ Yesu ambile ngwenyi: “Mwawahilila enu omu navamihunga kuli vatu.” (Luka 6:22) Katwasaka vatu vatuhungeko, kaha nawa katwawahilila nge vanatufumbukila mwomwo yalufwelelo lwetuko. Kaha mwomwo ika twatela kuwahilila nge vatu vanatuhungu? Mwomwo yavyuma vino vitatu. Chatete, Kalunga eji kutwivwilanga uselewa. (Petu. 1, 4:13, 14) Chamuchivali, lufwelelo lwetu lweji kuzamanga mbe. (Petu. 1, 1:7) Chamuchitatu, navakatuhana kuyoya chahaya myaka yosena.—Loma 2:6, 7.

19. Mwomwo ika vaposetolo vawahililile omu vavavetele?

¹⁹ Omu alingile Yesu nasanguka lyehi, vaposetolo vawahililile numba tuhu vavahungile. Omu valingile vanavavete lyehi, nakuvalweza ngwavo valitwamine kwambulula, vakiko vawahililile. Mwomwo ika? “Mwomwo chapwile chakutamo kuvasawila halijina lyaYesu.” (Vili. 5:40-42) Kuzanga chikuma Yesu chavakafwile vahone kwivwa woma vaka-kole javo. Kaha vasolwele zangi kana ‘hakuhona kulitwamina’ kwambulula mujimbu wamwaza. Vandumbwetu vavavulu makumbi ano vanakutwalaho lika kupwa vakushishika kuli Kalunga chamokomoko naukalu vanakuhitamo. Mwomwo vatachikiza ngwavo keshi kukavulyama milimo yavo, nazangi vanasolola yakuzanga lijina lyenyiko.—Hepe. 6:10.

20. Vyuma muka natushimutwila muchihande chinakavangizaho?

²⁰ Mumakumbi ano akukuminyina, kaye nakatwalaho lika kutuhunga. (Yowa. 15:19) Oloze katwatela kwivwa womako. Nganomu natumona muchihande chinakavangizaho, Yehova mwatwalaho ‘kujikijisa nakukinga vangamba” jenyi vakushishika. (Teso. 2, 3:3) Shikaho, tutwalenuho lika kuzanga Yehova, navandumbwetu, kuhakilako vene navaka-kole jetu. Nge natukavangiza vyuma tunashimutwila muchihande chino, kaha natupwa vakulinunga, nakuzamisa lufwelelo lwetu, nakutohwesa Yehova. Kaha natusolola hatoma ngwetu zangi yatwama nangolo kuhambakana chijindo.