CHIHANDE CHAKULINANGULA 10
Munahase ‘Kuzula Mutu Wamwaka’
“Zulenu mutu wamwaka navilinga vyenyi.”—KOLO. 3:9.
MWASO 29 Etu Vinjiho jaYehova Twatwama naVilinga Vyamwaza
VYUMA NATUSHIMUTWILA *
1. Uno chiyoyelo chenu chapwile ngachilihi shimbu kanda mulinangule Mbimbiliya?
UNO chiyoyelo chenu chapwile ngachilihi shimbu kanda muputuke kulinangula Mbimbiliya naVinjiho jaYehova? Etu vavavulu katweshi kwivwa nakuwaha kwanuka chiyoyelo twapwile nachoko. Vilinga vyavatu vamukaye kano ali nakuyula Satana vyakwachile havilinga vyetu nahajila twamwenenenemo vyuma. Jila vamwenamo vyuma vyakwoloka navyuma vyakuhenga vyakwachile havilinga vyetu najila twamwenenenemo vyuma mukuyoya chetu. Nge mukiko chapwile, kaha ‘katwapwilenga nalutalililoko, kaha nawa katwamutachikijile Kalunga muno mukayeko.’ (Efwe. 2:12) Oloze vyuma twalinangwile muMbimbiliya vyalumwine chiyoyelo chetu.
2. Vyuma muka mwatachikijile omu mwaputukile kulinangula Mbimbiliya?
2 Omu mwaputukile kulinangula Mbimbiliya mwatachikijile jino ngwenu mwatwama naSenu wamwilu uze amizanga chikuma. Mwamwene nawa ngwenu hakusaka mwivwise Yehova kuwaha nakupwa mutanga yenyi yavaka-kumulemesa, mwatelele kwalumunako vyuma vimwe mukuyoya chenu, najila mwamwenenenemo vyuma navishinganyeka vyenu. Mwatelele kulinangula jishimbi jenyi nakujikavangiza mukuyoya chenu.—Efwe. 5:3-5.
3. Kweseka naWavaka-Kolose 3:9, 10, vyuma muka asaka Yehova tulinge, kaha vyuma muka natushimutwila muchihande chino?
3 Hakuwana nge Yehova apwa Tengi yetu, kaha nawa Setu wamwilu, shikaho atwama nalisesa lyakulweza vaka-kumulemesa vyuma vatela kulinga. Kaha nawa asaka ngwenyi shimbu kanda vatumbapachise twatela kuzata nangolo mangana ‘tuzule mutu wamwaka navilinga vyenyi.’ * (Tangenu Wavaka-Kolose 3:9, 10.) Chino chihande nachikafwa vaze vali nakusaka kuvambapachisa vakumbulule vihula vino vitatu: (1) Uno “mutu wamwaka” alumbununa ika? (2) Mwomwo ika Yehova atulwezela tuzule mutu wamwaka? (3) Tunahase kumuzula ngachilihi? Kuli yetu vambapachisa lyehi, chino chihande nachitukafwa tulihende kuvilinga vyamutu wamwaka vize twazula lyehi.
UNO “MUTU WAMWAKA” ALUMBUNUNA IKA?
4. Vyuma muka eji kulinganga mutu nge navwale “mutu wamwaka”?
4 Kachi nge mutu navwale mutu wamwaka eji kushinganyekanga nakulinga vyuma mujila yakuhenga. Mutu kana pamo nahase kulizanga ivene, nakupwa namatoto, nakulivwimba nakuhona kupwa namuchima wakusakwilila. Nahase kwivwa kuwaha kutala mivwimbimbi yavatu vali uselesele chipwe kutala jivindiyo jaulyanyi. Mutu kana nahase kupwa navilinga vyamwaza ngocho nahase kulihana mulonga kachi nge mwahanjika chipwe kulinga vilinga vyavipi. Oloze chinahase kumukaluhwila kwalumuna vishinganyeka navilinga vyenyi vyavipi.—Ngale. 5:19-21; Chimo. 2, 3:2-5.
Kachi nge natuzula “mutu wamwaka,” kaha vilinga vyakumujimba kavyeshi kuhasa kutufungululako (Talenu palangalafu 5) *
5. Kutala tunahase kuzula mutu wamwaka wosena tahi? Lumbununenu. (Vilinga 3:19)
5 Hakuwana nge katwakupukako, kakweshi mutu nahase kushinganyeka chipwe kulinga vyuma vyakwoloka lwola lwosenako. Shimbu jimwe tunahase kulinga chipwe kuhanjika vyuma vize tunahase kuliveya. (Yele. 17:9; Yako. 3:2) Oloze nge natuzula mutu wamwaka, kaha vilinga vyakumujimba kavyeshi kuhasa kutufungululako, ngocho natupwa vatu vavilinga vyamwaza.—Isa. 55:7; tangenu Vilinga 3:19.
6. Mwomwo ika Yehova atulwezela tuseze vishinganyeka najitato jamutu wamwaka?
6 Yehova atulweza tumbile vishinganyeka vyavipi najitato jajipi mwomwo atuzanga chikuma, kaha asaka tulivwise kuwaha kuyoya. (Isa. 48:17, 18) Atachikiza ngwenyi vatu vaze veji kuhonanga kumbila vilinga vyavipi veji kulinehelanga ukalu nakunehela nawa vakwavo ukalu. Eji kwivwanga kupihya chikuma kachi nge vyuma kana navisoloka.
7. Kweseka namazu ahali Wavaka-Loma 12:1, 2, lisesa muka twatwama nalyo?
7 Masepa jetu vamwe navausoko wetu vamwe vanahase kututoleka mwomwo yakwalumunako vilinga vyetu. (Petu. 1, 4:3, 4) Vanahase kuhanjika ngwavo tukwechi lisesa lyakulilingila kala vyuma tunasake kaha nawa katwatela kwechelela mutu atulweze vyakulingako. Oloze echi kachalumbununa nge vatu vaze veji kukananga jindongi jaYehova valiyula chikupu vaveneko. Veji kwechelelanga kaye vali nakuyula kuli Satana kavalumune. (Tangenu Wavaka-Loma 12:1, 2.) Tuvosena tukwechi lisesa lyakulisakwila vyakulinga, tunahase kusakula kutwalaho lika kuvwala mutu wamwaka uze vakundwiza kushili nakukaye kaSatana chipwe kwitavila Yehova atwalumune mangana tupwenga tuvatu vamwenemwene.—Isa. 64:8.
TUNAHASE KUZULA NGACHILIHI “MUTU WAMWAKA”?
8. Vyuma muka vinahase kutukafwa tuhonese vishinganyeka vyavipi najitato jajipi?
8 Yehova atachikiza ngwenyi chinahase kumbata lwola kaha nawa chasakiwa kukilikita numba tuhonese vishinganyeka vyavipi najitato jajipi. (Samu 103:13, 14) Hakusaka tuhonese vyuma kanevi, Yehova eji kutukafwanga hakutuhana mangana, nangolo kuhichila muMazu enyi nashipilitu yenyi namuliuka lyenyi. Shikaho, mwatela kufwelela ngwenu mwamikafwa. Tushimutwilenu jino havyuma vimwe vize mwatela kulinga mangana muzule mutu wamwaka nakutamo kumimbapachisa.
9. Uno Mazu aKalunga nawamikafwa mulinge ika?
9 Likekesenu enu vavene hakuzachisa Mbimbiliya. Mazu aKalunga afwana nge chitalilo, anahase kumikafwa mutachikize vishinganyeka vyenu, nahanjikiso yenu navilinga vyenu. (Yako. 1:22-25) Muka-kuminangula Mbimbiliya navaka-Kulishitu veka vakuhya kushipilitu vanahase kumikafwa. Chakutalilaho, vanahase kuzachisa Visoneka mangana vamikafwe mutachikize vyuma vize munahase kulinga navize kamweshi kuhasa kulingako. Vanahase kuminangula mwakuwanyina jindongi jamuMbimbiliya jize najimikafwa muhonese jitato jajipi. Tachikizenu nawa ngwenu Yehova mwamikafwa lwola lwosena. Ikiye atamo kumikafwa mwomwo atachikiza vili mumuchima wenu. (Vishi. 14:10; 15:11) Shikaho mwatela kulombanga kuli ikiye nakulinangulanga Mazu enyi hakumbi hakumbi.
10. Vyuma muka munalinangula kuli Elie?
10 Mwatela kukunyuka ngwenu jindongi jaYehova jeji kunganyalisanga. Vyuma vyosena vize eji kutulwezanga Yehova kulinga vinahase kutunganyalisa. Vaze veji kukavangizanga jindongi jenyi veji kuvavumbikanga, nakupwa vakusuuluka mukuyoya nakupwa nawa vakuwahilila. (Samu 19:7-11) Oloze vaze veji kuhonanga kukavangiza jindongi jaYehova veji kumonanga ukalu uze weji kwizanga mwomwo yakupwa navilinga vyakumujimba. Ivwenu vyuma ahanjikile lunga umwe walijina lyaElie kutalisa kukukana kukavangiza jindongi jaKalunga. Vamulelele kuli visemi vaze vazanga Yehova, oloze omu apwile nakukola aputukile kulikata namasepa vavapi. Aputukile kuzachisa maundu akupendesa, nakulinga ujila nakwiva. Ambile ngwenyi, lwola lwosena apwile mutu wamatoto kaha nawa waukenya. Ambile nawa ngwenyi: “Ngwalingilenga vyuma vize katela kulinga muka-Kulishituko.” Chipwe ngocho, Elie kavulyamine vyuma vize alinangwile omu apwile kanyikeko. Kutwala muze aputukile cheka kulinangula Mbimbiliya. Azachile chikuma nangolo nakumbila jitato jenyi jajipi, kaha kuheta mu 2,000 vamumbapachishile. Uno kukavangiza jindongi jaYehova chinamunganyalisa ngachilihi? Elie ambile ngwenyi: “Oholyapwa jino ngwapwa nguwakuunda muchima, nakupwa nachivezu chitoma.” * Chakutalilaho chaElie chinasolola nge vatu vaze veji kukananga kukavangiza jindongi jaYehova veji kulinehelanga ukalu. Chipwe ngocho, Yehova afwila kuvakafwa valumuke.
11. Vyuma muka ahunga Yehova?
11 Hungenu vyuma ahunga Yehova. (Samu 97:10) Mbimbiliya yatulweza ngwayo, Yehova ahunga “meso akatangalakaji, nalilimi lyakwonga, namavoko akumwanga manyinga amutu wakuzeneka mulonga.” (Vishi. 6:16, 17) Kaha nawa “evwila unyengwe vaka-ulyanyi navaka-kutangisa.” (Samu 5:6) Yehova ahunga chikuma vilinga kanevi vyavipi. Shikaho anongeselele vatu vakuhuka vosena mumakumbi aNowa mwomwo vazalishile hamavu naulyanyi. (Kupu. 6:13) Tutalenu chakutalilaho chikwavo. Yehova ahanjikile kuhichila muli kapolofweto Malaki ngwenyi, ahunga vosena vaze veji kulukululanga mapwevo javo chakuzeneka mulonga. Kalunga ketavila kumulemesa kuvatu kanako, kaha nawa mwakavasopesa havilinga vyavo.—Mala. 2:13-16; Hepe. 13:4.
Ngana muze natwivwa kuzemba kumuchima nge vanatulweze tulyenga vyakulya vyakupola, mukiko twatela kumona navyuma vize Yehova atulweza ngwenyi vyavipi (Talenu palangalafu 11-12)
12. Uno ‘kuhunga vyuma vyavipi’ chalumbununa ika?
12 Yehova asaka ‘tuhungenga vyuma vyavipi.’ (Loma 12:9) Lizu ‘kuhunga’ lyalumbununa kuhona kulinga vyuma vyavipi. Achishinganyekenu omwo munahase kwivwa nge vanamilweze mulyenga vyakulya vize vinapolo. Kushinganyeka kaha havyakulya kana chinahase kumilingisa mwivwenga kuzemba kumuchima. Chochimwe nawa twatela kwivwa kupihya chikuma kachi nge vyuma vyavipi ahunga Yehova naviza muvishinganyeka vyetu.
13. Mwomwo ika twatela kulihendela kuvishinganyeka vyavipi?
13 Lihendenu kuvishinganyeka vyavipi. Vyuma tweji kushinganyekanga vikiko tweji kulinganga. Echi chikiko chalingishile Yesu atunangule ngwenyi, kanenu vishinganyeka vize vinahase kumilingisa mulinge shili yayinene. (Mateu 5:21, 22, 28, 29) Twasaka kwivwisa Setu wamwilu kuwaha. Shikaho chapwa chachilemu kuhonesa washiwashi kala vyuma vyavipi naviza muvishinganyeka vyetu.
14. Uno hanjikiso yetu yeji kutusololanga kupwa tuvatu vakufwana ngachilihi, kaha vihula muka twatela kukumbulula?
14 Pwenunga nahanjikiso yamwaza. Yesu ambile ngwenyi: “Vyuma vyeji kulovokanga mukanwa vyeji kufumanga mumuchima.” (Mateu 15:18) Shikaho hanjikiso yetu yeji kutusololanga omwo twapwa. Lihulisenu ngwenu: ‘Uno ngweji kulihendanga kukulyonga numba ngunatachikiza ngwami kuhanjika muchano chinahase kungunehela ukalu tahi? Hakuwana nge ngwatwama muulo, uno ngweji kulihendanga kukusapula navatu vausonyi weka tahi? Kutala ngwalihenda kuhanjikiso yauvumbi tahi? Uno ngweji kukumbululanga mujila yakuunda kachi nge mutu umwe nangwivwisa kupihya kumuchima tahi?’ Kulihulisa vihula kanevi nachimikafwa chikuma. Hanjikiso yenu tunahase kuyifwanyisa kujimbutau jili hachikovelo. Kachi nge namupatununa jimbutau, kaha nachimyashiwila kuzula chikovelo. Chochimwe nawa nge namuzata nangolo mangana mulihende kumakuli, nakuhanjikiso yauvumbi, nayakasautu, kaha namuchiwana kupwa chachashi kuzula mutu wamwaka.
15. Uno kupapalila mutu wetu wamwaka “hachitondo” chalumbununa ika?
15 Fwilenu kulinga vyuma vize namuhasa. Kaposetolo Paulu azachishile chakutalilaho chize chatunangula ovyo chapwila chachilemu kwalumuna vilinga vyetu. Asonekele ngwenyi twatela kupapalila mutu wetu wamwaka “hachitondo.” (Loma 6:6) Mujila ikwavo tunahase kwamba ngwetu, twatela kukavangiza chakutalilaho chaKulishitu. Twatela kumbila vilinga vize ahunga Yehova. Twatela kuzata nangolo tulihende kuvyuma kanevi mangana tupwenga nachivezu chitoma nakupwa nalutalililo lwakukalivwisa kuwaha kuyoya chahaya myaka yosena. (Yowa. 17:3; Petu. 1, 3:21) Tachikizenu ngwenu Yehova keshi kuhasa kwalumuna jindongi jenyi mwomwo yakusaka kutwivwisa kuwahako. Oloze yetu twatela kwalumuna vilinga vyetu mangana tukavangizenga jindongi jenyi.—Isa. 1:16-18; 55:9.
16. Mwomwo ika twatela kutwalaho kulihenda kuvilinga vyavipi?
16 Twalenuho kulihenda kuvilinga vyavipi. Mwatela kutwalaho lika kulihenda kuvilinga vyavipi numba nge vanamimbapachisa. Tuchitalenu hachakutalilaho chalunga umwe walijina lyaMaurício. Omu apwile kanyike apwile natato yakulisavala navakwavo malunga. Kutwala muze aliwanyine naVinjiho jaYehova nakuputuka kulinangula Mbimbiliya. Ngocho alumwine jino vilinga vyenyi, kaha kuheta mu 2002 vamumbapachishile. Numba tuhu Maurício nazachila Yehova hamyaka yayivulu oloze ambile ngwenyi: “Shimbu jimwe ngwachiwanyinenga kupwa chachikalu kupwa navilinga vyamwaza.” Oloze kechelelele vyuma kana vimuzeyeseko. Ambile ngwenyi: “Kutachikiza ngwami ngwatela kutwalaho lika kulihenda kuvilinga vyavipi nachivwisa Yehova kuwaha.” *
17. Uno chakutalilaho chaNabiha chinamikolezeza ngachilihi?
17 Lombenu Yehova amikafwe nakupendamina hashipilitu yenyi keshi hangolo jenuko. (Ngale. 5:22; Fwili. 4:6) Twatela kuzata nangolo numba tuzule mutu wamwaka. Tutalenu hachakutalilaho chapwevo umwe walijina lyaNabiha. Ou ndumbwetu vamusezele kuli ise omu apwile namyaka yakusemuka 6. Ambile ngwenyi: “Chuma kana changwivwishilenga kukola kumuchima.” Shikaho omu Nabiha apwile nakukola apwilenga namuchima wamatoto chikuma. Aputukile kulanjisa maundu akupendesa, kaha kutwala muze vamukashile mukamenga. Kaha lwola lumwe omu Vinjiho vayile nakwambulwila mukamenga muze apwile, etavilile kulinangula Mbimbiliya. Shikaho Nabiha aputukile kupwa navilinga vyamwaza. Ambile ngwenyi: “Chapwile chachashi kumbila jitato jimwe jize ngwapwilenga najo, oloze changukaluhwilile chikuma kwecha kunwa makanya.” Nabiha alipikilenga naukalu kana hamwaka umwe nakuzombokaho, kaha kutwala muze alitwaminyine kunwa makanya. Uno vyuma muka vyamukafwile. Ambile ngwenyi: “Chuma chachinene changukafwile ngulitwamine kunwa makanya shina kulomba kuli Yehova lwola lwosena.” Oholyapwa jino eji kukolezezanga vakwavo ngwenyi: “Nge yami ngunahase kwalumuna vilinga vyami mangana ngwivwise Yehova kuwaha, kaha ngunafwelela chikupu ngwami kala mutu nahase kulinga mwomumwe.” *
MUNAHASE KUTAMO KUMIMBAPACHISA
18. Kweseka namazu ahali Wavaka-Kolinde 1, 6:9-11, vyuma muka vanalingi vangamba jaKalunga vavavulu?
18 Mulikulukaji lyamyaka lyakulivanga, malunga namapwevo vamwe vaze Yehova asakwile mangana vakayule hamwe naYesu, navakiko lwola lumwe valingilenga vyuma vyavipi. Chakutalilaho, vamwe vapwile vaka-ujila, veka vapwile vaka-kulisavala navatu vausonyi woumwe, kaha veka vapwile veji. Oloze shipilitu yajila yaKalunga yavakafwile vaseze vilinga vyavo vyavipi. (Tangenu Wavaka-Kolinde 1, 6:9-11.) Chochimwe namakumbi ano Mbimbiliya yinakafwe mayevuyevu avatu mangana vaseze vilinga vyavo vyavipi. * Vatu kana vanalitwamina kulinga vyuma vyavipi vize vyapwile vyavikalu kulitwamina kulinga. Shikaho vyakutalilaho vyavo vinasolola chikupu hatoma nge nayenu munahase kwalumuna vilinga vyenu nakumbila jitato jenu jajipi nakutamo kumimbapachisa.
19. Vyuma muka natushimutwila muchihande chinakavangizaho?
19 Vosena vaze vali nakusaka kuvambapachisa, vatela kuzata nangolo vazule mutu wamwaka nakuvwala mutu wamuhya. Shikaho muchihande chinakavangizaho natushimutwila omwo tunahase kuvwala mutu wamuhya nomu vandumbwetu vanahase kutukafwa.
MWASO 41 Ivwa Kulomba Chami
^ par. 5 Hakusaka tutengamo kutumbapachisa, twatela kufwila kwalumunako vilinga vyetu. Chihande chino nachitukafwa tutachikize omwo apwa mutu wamwaka, novyo twatela kumuzulila nomwo tunahase kulinga ngocho. Muchihande nachikavangizaho natushimutwila omwo tunahase kutwalaho lika kuvwala mutu wamuhya nahanyima yakutumbapachisa.
^ par. 3 MAZU VANALUMBUNUNA: Kuzula “mutu wamwaka” chalumbununa kumbila vilinga vyavipi vize vyeji kwivwisanga Yehova kupihya. Kaha twatela kuputuka kumbila vilinga kana shimbu kanda vatumbapachise.—Efwe. 4:22.
^ par. 10 Nge muli nakusaka kwijiva vyavivulu, kaha talenu chihande chakwamba ngwavo: “Mbimbiliya Yeji Kwalumunanga Kuyoya chaVatu—‘Ngwatelelele Kukinduluka Kuli Yehova’” muKaposhi Kakutalila waApril 1, 2012.
^ par. 16 Nge muli nakusaka kwijiva vyavivulu kaha talenu chihande chakwamba ngwavo, “The Bible Changes Lives—‘They Were Very Kind to Me,’” muKaposhi Kakutalila waChingeleshi waMay 1, 2012.
^ par. 17 Nge muli nakusaka kwijiva vyavivulu, kaha talenu chihande chakwamba ngwavo “The Bible Changes Lives—‘I Became an Angry, Aggressive Young Woman,’” muKaposhi Kakutalila waOctober 1, 2012.
^ par. 18 Talenu lipwata lyakwamba ngwavo “ Mbimbiliya Yeji Kwalumunanga Kuyoya chaVatu.”
^ par. 64 MAZU AKULUMBUNUNA MUVWIMBIMBI: Kuseza vilinga vyavipi chinafwane nge mutu ali nakuzula uvwalo wamwaka.
