1. Chuma muka cheji kwalumunanga vilinga vyetu?

 NUMBA nge vanatumbapachisa kalinwaha chipwe vatumbapachishile lyehi, tuvosena twatela kufwila kupwa navilinga vize azanga Yehova. Hakusaka tupwenga navilinga kana, twatela kupwa navishinganyeka vyamwaza. Mwomwo ika? Mwomwo vyuma tweji kushinganyekanga vikiko tweji kulinganga. Kachi nge shimbu yosena natushinganyekanga havyuma yafwila michima yetu , kaha natuhanjikanga nakulinga vyuma vyavipi. (Efwe. 4:17-19) Oloze nge natushinganyekanga havyuma vyamwaza, kaha nachitulingisa tuhanjikenga nakulinga vyuma vize navivwisa Setu Yehova kuwaha.—Ngale. 5:16.

2. Vihula muka natushimutwila muchihande chino?

² Ngana muze twashimutwilanga muchihande chinafumuho, katweshi kuhasa kuhonesa vishinganyeka vyavipi vyosenako. Oloze tunahase kusakula kuhona kulinga vyuma natushinganyeka. Shimbu kanda vachitumbapachise twatela kulitwamina kuhanjika chipwe kulinga vyuma vize ahunga Yehova. Echi chikiko chuma chatete kaha nawa chachilemu twatela kulinga mangana tuzule mutu wamwaka. Hakusaka twivwise Yehova kuwaha, twatela nawa kukavangiza lushimbi lwakwamba ngwavo: “Vwalenu mutu wamuhya.” (Kolo. 3:10) Muchihande chino, natukumbulula vihula vino: Uno “mutu wamuhya” alumbununa ika? Tunahase ngachilihi kutwalaho kuvwala mutu wamuhya nakuhona kumuzula?

3. Kweseka naWavaka-Ngalesha 5:22, 23, uno mutu wamuhya alumbununa ika, kaha tunahase kumuvwala ngachilihi?

³ “Mutu wamuhya” alumbununa kupwa navishinganyeka nakulinga vyuma vize navisolola vilinga vyaYehova. Mutu eji kuvwalanga  mutu wamuhya hakupwa namihako yashipilitu yaKalunga. Eji kwitavisanga shipilitu yajila yalumune vishinganyeka vyenyi navilinga vyenyi. (Tangenu Wavaka-Ngalesha 5:22, 23.) Chakutalilaho, mutu kana azanga Yehova navatu jenyi. (Mateu 22:36-39) Kaha eji kupwanga wakuwahilila numba tuhu ali nakuhita muvyeseko. (Yako. 1:2-4) Apwa muka-kuneha kuunda. (Mateu 5:9) Eji kutalililanga vakwavo chikoki nakuvasolwela likoji. (Kolo. 3:13) Azanga vyuma vyamwaza nakuvilinga. (Luka 6:35) Vilinga vyenyi vyeji kumusololanga nge afwelela chikuma Yehova. (Yako. 2:18) Eji kutwalangaho lika kupwa wakuunda nge vanamwivwisa kupihya. Kaha nawa eji kusololanga muchima wakulikanyisa nge ali mucheseko.—Koli. 1, 9:25, 27; Chitu. 3:2.

4. Hakusaka tuvwale mutu wamuhya, kutala chasakiwa kupwa namihako yosena yize vavuluka hali Wavaka-Ngalesha 5:22, 23 tahi? Lumbununenu.

⁴ Hakusaka tuvwale mutu wamuhya, twatela kupwa namihako yosena yize vavuluka hali Wavaka-Ngalesha 5:22, 23, nayize vavuluka mumikanda yeka yamuMbimbiliya. * Eyi mihako kayapwa nge uvwalo uze natuvwala lelo, nakuzula nakuvwala weka likumbi likwavoko. Kaha nawa mihako kana tunahase kuyimwena muvilinga vyeka nawa. Chakutalilaho kachi nge mwazanga chikupu mukwenu, kaha munahase kumutalilila chikoki nakumusolwela likoji. Hakusaka musolole ngwenu mwazanga vakwenu, mwatela kupwa vavavwovu namuchima wakulikanyisa.

5. Uno kupwa “navishinganyeka vyaKulishitu,” chalumbununa ika? Kaha mwomwo ika twatela kulinangwila vyachiyoyelo chaYesu? (Wavaka-Kolinde 1, 2:16)

⁵ Tangenu Wavaka-Kolinde 1, 2:16. Hakusaka tuvwale mutu wamuhya, twatela kupwa “navishinganyeka vyaKulishitu.” Kulumbununa twatela kutachikiza vishinganyeka vyaYesu nakumulondezeza. Yesu asolwelenga mihako yashipilitu yaKalunga mujila yakukupuka. Ngana mwachivanjilo chize kacheshi namajiloko, Yesu eji kusololanga kanawa vilinga vyaKalunga. (Hepe. 1:3) Kachi nge natushinganyekanga ngana muze eji kushinganyekanga Yesu, kaha natulinganga vyuma ngana muze eji kuvilinganga ikiye. Kaha nawa natupwa navilinga ngana vize atwama navyo ikiye.—Fwili. 2:5.

6. Vyuma muka twatela kwanuka omu tuli nakusaka kuvwala mutu wamuhya?

⁶ Kutala tunahase kulondezeza chakutalilaho  chaYesu tahi? Tunahase kushinganyeka ngwetu, Yesu apwa wakukupuka, ngocho kangweshi kuhasa kumulondezezako. Nge mukiko mweji kushinganyekanga, kaha shinganyekenu havyuma vino. Chatete vamitengele mangana mupwenga navilinga ngana vize vyaYehova naYesu. Shikaho, munahase kuvalondezeza numba tuhu keshi mujila yakukupukako. (Kupu. 1:26) Chamuchivali, shipilitu yajila yaKalunga yapwa ngolo jajinene, shikaho yinahase kumikafwa mutesemo vyuma vize kamweshi kuhasa kuzata mungolo jenuko. Chamuchitatu, Yehova kafwila ngwenyi musololenga mihako yashipilitu mujila yakukupuka oholyapwako. Tachikizenu ngwenu Setu wazangi atongola myaka 1,000 muze mwakalingisa vaze vatwama lutalililo lwakukayoyela hano hamavu vakakupuke. (Kuso. 20:1-3) Chuma asaka Yehova kuli etu oholyapwa shina kuzata noho hakumina ngolo jetu nakupendamina hali ikiye atukafwe.

7. Vyuma muka natushimutwila?

⁷ Uno tunahase kulondezeza ngachilihi Yesu? Natushimutwila mihako yiwana yashipilitu yaKalunga. Natulinangula omu Yesu asolwelelemo mihako kaneyi. Natushimutwila havihula vimwe vize navitukafwa tukekese numba nge tunavwale mutu wamuhya.

8. Uno Yesu asolwele ngachilihi zangi?

⁸ Hakuwana nge Yesu azangile chikuma Ise Yehova, alisuwile kulinga vyuma amulwezele nakuhana kuyoya chenyi hali etu. (Yowa. 14:31; 15:13) Yesu asolwele ngwenyi azangile chikuma vatu kuhichila muvilinga asolwele omu apwile hano hamavu. Lwola lwosena asolwele muchima wazangi nakutetela numba nge vanamufumbukila. Jila yakulipwila asolwelelemo ngwenyi azanga vatu shina hakuvanangula vyaWangana waKalunga. (Luka 4:43, 44) Yesu asolwele nawa ngwenyi azanga Kalunga navatu hakulisuula kuyanda nakwechelela vamujihe mujila yayipi kuli vaka-shili. Kufwa chenyi chatulingisa tupwenga nalutalililo lwakukayoya haya myaka yosena.

9. Tunahase kusolola ngachilihi ngwetu twazanga vatu ngana muze alingilenga Yesu?

⁹ Twalihanyine kuli setu wamwilu Yehova nakutumbapachisa mwomwo yakumuzanga. Ngana muze alingile Yesu, natusolola ngwetu twazanga Yehova hakuzanga vatu. Kaposetolo Yowano asonekele ngwenyi: “Ou azeneka kuzanga ndumbwenyi ou amona, keshi kuhasa kuzanga Kalunga uze kamonako.” (Yowa. 1, 4:20) Twatela kulihulisa ngwetu: ‘Uno ngwazanga vatu tahi? Kutala ngweji kutetelanga vakwetu numba nge navangwamba mazu amapi tahi? Uno kuzanga Yehova cheji kungulingisanga nguzachise lwola lwami navikumba vyami ngukafwe vakwetu valinangule vyaikiye tahi? Kutala ngweji kulisuulanga kulinga vyuma kana numba tuhu vatu vavavulu kaveshi kumona kulema chavyuma ngweji kulinganga chipwe nge vanangufumbukila tahi? Kutala ngunahase kuwana jijila jakutohweselamo mulimo wakunangula vatu vapwenga tumbaji tahi?’—Efwe. 5:15, 16.

10. Uno Yesu apwile ngachilihi muka-kuneha kuunda?

¹⁰ Yesu apwile muka-kuneha kuunda. Chakutalilaho, omu vatu vamulingilenga mwamupi, ikiye kavalingilenga mwamupiko. Kaha nawa afwililile kutwama mukuunda navakwavo nakukolezeza vatu vakumisenga vikokojola navakwavo. Chakutalilaho, avanangwile ngwenyi vatela kutwamanga mukuunda navakwavo numba Yehova etavilenga kulemesa chavo. (Mateu 5:9, 23, 24) Kaha nawa akafwile vaposetolo jenyi valitwamine kulipula jipami hachihande chakufwila kutachikiza owo apwile wamulemu chikuma.—Luka 9:46-48; 22:24-27.

11. Ngunahase kupwa ngachilihi muka-kuneha kuunda?

¹¹ Kupwa muka-kuneha kuunda chasakiwa vyuma vyavivulu, keshi kulihenda kaha kuvikokojolako. Twatela kufwila kutwama mukunda navakwetu nakulweza vandumbwetu nawa vakumisenga vikokojola vyavo navakwavo. (Fwili. 4:2, 3; Yako. 3:17, 18) Twatela kulihulisa vihula vino: ‘Vyuma muka ngwatela kulisuula kulinga  mangana ngutwame mukuunda navakwetu? Kachi nge ndumbwami nangulingi mwamupi, kutala ngweji kumulaminanga koko tahi? Kutala ngweji kuvandaminanga mutu kana ezenga kuli ami nakulikonekela tahi, nyi ngweji kuyanga kuli mutu kana nakulikonekela numba tuhu ikiye apihisanga? Kutala ngweji kukolezezanga vandumbwami vanalikokojwesa vafwile kutwama mukuunda tahi?’

12. Uno Yesu asolwelenga ngachilihi likoji?

¹² Yesu apwile walikoji. (Mateu 11:28-30) Asolwele muchima wakulinyisa hakupwa wamuvwovu, nakulikehesa nahalwola apwilenga muukalu. Chakutalilaho, omu pwevo wakuFwenyisha alembelelele Yesu amukile mwanenyi, hakavanga akanyine, oloze omu amwene lufwelelo lwakukola lwayou pwevo, okile mwanenyi. (Mateu 15:22-28) Numba tuhu Yesu apwile walikoji oloze akafwilenga mutu kachi nge nalimbenje. Shimbu jimwe nawa asolwelenga likoji hakukafwa vatu vaze azangilenga kachi nge vanalimbenje chakuzeneka kuvahita mutenga. Chakutalilaho, omu Petulu asakile kukanyisa Yesu kulinga mwayile muchima waYehova, ikiye amutenukilile hakachi vavakwavo tumbaji. (Mako 8:32, 33) Kalingile ngocho mangana evwise sonyi Petuluko oloze mangana amunangule hamwe kaha navakwavo tumbaji valihende kumuchima wakazamuzamu. Twatachikiza ngwetu Petulu evwile sonyi oloze anganyalile nawa hakumukafwa mujila kaneyi.

13. Uno tunahase kusolwela ngachilihi vakwetu likoji lyamwenemwene?

¹³ Hakusaka musolole ngwenu mwatwama nalikoji, shimbu jimwe mwatela kulwezanga vakwenu chakuzeneka kuhita mutenga nge vanalimbenje. Hakusaka mukafwenga vakwenu mujila kana, mwatela kulondezeza Yesu hakupendaminanga hajindongi jamuMbimbiliya. Pwenunga vavavwovu. Fwelelenu chikupu ngwenu vaze vazanga Yehova nayenu navetavila vyuma namuvakafwa. Lihulisenu vihula vino: ‘Uno ngweji kuhamukanga nakuhanjika kachi nge ngunamono mutu uze ngwazanga anakulinga vyuma vyavipi tahi? Nge nguli nakukafwa mukwetu uno ngweji kuhanjikanga nalikoji tahi nyi nautenu? Chuma muka chinakungulingisa ngumukafwe? Uno nguli nakumukafwa mwomwo nangwivwisa kupihya tahi nyi ngunakusaka alinge vyuma vyakwoloka?’

14. Uno Yesu asolwelenga ngachilihi muchima wamwaza?

¹⁴ Yesu katachikiza kaha vyuma vyamwazako oloze eji kuvilinganga. Yesu azanga ise shikaho lwola lwosena eji kulinganga vyuma vyakwoloka namuchima wenyi wosena. Muchima wamwaza weji kusolokanga hatoma, kweseka najila natutwaminamo navakwetu. Tunahase kusolola ngwetu twatwama namuchima wamwaza hakukafwa vakwetu. Katwatela kukumina kaha hakulinga vyuma vyakwolokako oloze twatela kuvilinga namuchima wetu wosena. Vatu vamwe vanahase kulihulisa ngwavo, ‘Kutala mutu nahase kulinga vyuma vyakwoloka namuchima wenyi wosena tahi?’ Eyo. Chakutalilaho, Yesu ahanjikile hali vatu vaze vakafwilenga vaka-kuhutwa nakulingisa vatu vatachikize vyuma vize valingilenga. Kulisolola kuvatu mujila kana chalingishile Yehova ahone kumona vyuma valingilenga kupwa vyavilemu.—Mateu 6:1-4.

15. Tunahase kupwa ngachilihi namuchima wamwaza?

¹⁵ Tunahase kusolola ngwetu tukwechi muchima wamwaza kachi nge natulinga vyuma vyakwoloka chakuzeneka kufwila kulinganyalisa etu vavene. Munahase kulihulisa ngwenu: ‘Uno ngweji kutachikizanga vyuma vyakwoloka nakufwila kuvikavangiza nakuvilinga tahi? Chuma muka chili nakungulingisa ngulinge vyuma vyamwaza?’

16. Vyuma muka twatela kusolola hakumbi hakumbi, kaha mwomwo ika?

¹⁶ Katwatela kukukulula ngwetu mulimo wakuvwala mutu wamuhya weji kukuminanga halumbapachisoko. Twatela kutwalaho lika kulama mutu wetu wamuhya mujila yamwaza. Hakusaka tulinge ngocho, twatela kuwanangako jijila jakusolwelamo mihako yashipilitu yaKalunga hakumbi hakumbi. Mwomwo ika? Mwomwo Yehova eji kuzachisanga shipilitu yenyi mangana atesemo vyuma vimwe. (Kupu. 1:2) Shikaho kala mihako yashipilitu natupwa nayo yinahase kutukafwa tulinge vyuma vimwe. Chakutalilaho, kambaji Yakova asonekele ngwenyi: “Lufwelelo lwakuzeneka vilinga nawa lunapu lwakufwa.” (Yako. 2:26) Omu mukiko chinahase kupwa nakumihako yashipilitu yaKalunga yosena. Shikaho, kala lwola natusolola mihako kana, tweji kuhananga unjiho wakusolola nge shipilitu yaKalunga yili nakuzata muli etu.

17. Vyuma muka vize katwatela kulingako kachi nge tunahono kusolola mihako yashipilitu?

¹⁷ Shimbu jimwe navaka-Kulishitu vaze vambapachishile lyehi, chinahase kuvakaluhwila kusolola mihako yashipilitu. Oloze chuma chachilemu shina, kavatela kuzeyako. Tutalenu chakutalilaho, kachi nge chikovelo chenu chize mwazanga chinapulika kutala namuchimbila hahaze vene tahi? Nduma. Munahase kuchitonga kachi nge chinahase. Kufumaho, namuchilama kanawa kuchina nachipulika cheka. Chochimwe nawa, kachi nge shimbu jimwe namuhona kusolwela mukwenu likoji nakumutalilila chikoki, chipwe kumuzanga, kaha kamwatela kuhombako. Kulikonekela namuchima wenu wosena chinahase kumikafwa mutwame cheka mukuunda namutu kana. Kufumaho fwilenu kulinganga vyuma vyamwaza shimbu yosena.

18. Chuma muka twatela kutachikiza?

¹⁸ Twasakwilila chikuma Yesu hakutusela chakutalilaho chamwaza. Kulondezeza vishinganyeka vyenyi navilinga vyenyi nachitukafwa tulinge vyuma ngana muze avilingilenga. Kutwalaho lika kulinga vyuma ngana muze alingilenga Yesu, nachitukafwa tutwaleho lika kuvwala mutu wamuhya. Muchihande chino, tunashimutwila kaha hamihako yashipilitu yaKalunga yiwana. Shikaho, wanenungako lwola lwakushinganyeka hamihako yeka yashipilitu, nakushinganyeka omu munahase kuyisolola. Munahase kuwana vihande vinahanjika hamihako yashipilitu muChinoma Chakukafwa Vinjiho jaYehova Kuhehwojola hamutwe wakwamba ngwavo: “Chiyoyelo chavaka-Kulishitu.” Kaha namuya hakamutwe kakwamba ngwavo: “Mihako yashipilitu.” Tachikizenu ngwenu nge namuzata noho hakumina ngolo jenu, kaha Yehova mwamikafwa muvwale mutu wamuhya nakuhona kumuzula.