Vatu vamwe vaze veji kutanganga ou mujimbu chakuzeneka kuukekesa kanawa, veji kuhulisanga chihula kana. Oloze mumujimbu kana vavulukamo vaMefwivoshete vavali, kaha tunahase kulinangula vyavivulu hakukekesa vyuma vyasolokele.

Mwangana wavaIsalele Saulu apwile navana vamalunga 7 navamapwevo vavali. MwanaSaulu walunga watwatwa apwile Yonatane. Kufumaho, mwangana apwile cheka namwana walunga uze alukile ngwenyi, Mefwivoshete wakusema nakalumbu kalisano Lijipa. Kaha Yonatane nawa apwile namwana walunga walijina lyaMefwivoshete. Shikaho Mwangana Saulu apwile namwana walijina lyaMefwivoshete namuzukulu walijina lyolimwe.

Lwola lumwe, Mwangana Saulu alukukile vatu vakuNgiveyone vaze vapwile nakutwama muli vaIsalele nakusaka kuvanongesa. Chasoloka nge vatu vavavulu vavajihile. Kulinga chuma kana chapwile chakuhenga. Mwomwo ika? Mwomwo mumakumbi aYoshuwa, vamyata javaIsalele valikashile chivwasano chakuunda navatu vakuNgiveyone.—Yoshu. 9:3-27.

Chivwasano kana chapwile lika nakuzata namulwola lwaMwangana Saulu. Chamokomoko nachivwasano kana, mwangana asakile kunongesa vatu vakuNgiveyone. Kulinga chuma kana chanehele mulonga wamanyinga hali “Saulu navaze vakuzuvo yenyi.” (Samwe. 2, 21:1) Kutwala muze, Ndavichi apwile mwangana. Vatu vakuNgiveyone vaze vayovokele valwezele mwangana Ndavichi chuma chachipi chize alingile Saulu. Ndavichi avahulishile vamulweze chuma chakufwika hashili atelele kuvalingila hachuma chachipi alingile Saulu mangana Yehova akisule lifuchi. Muchishishisa chakulomba jimbongo, vatu vakuNgiveyone valombele vavahane vana vamalunga vaSaulu 7 vaze ‘vasakile kuvalalisa’ mangana vavajihe. (Kula. 35:30, 31) Ndavichi etavilile chuma valombele.—Samwe. 2, 21:2-6.

Halwola kana, Saulu naYonatane vafwile kujita, oloze mwanaYonatane Mefwivoshete apwile wamutonyi. Apwile chitonji kufuma kuunyike wenyi, ngocho kazanyine hamwe nakaka yenyi hakulukuka vatu vakuNgiveyoneko. Ndavichi naYonatane valikwachile usepa, ngocho usepa kana wanganyalishile vaka-tanga yaYonatane kuhakilako vene namwanenyi Mefwivoshete. (Samwe. 1, 18:1; 20:42) Mbimbiliya yamba ngwayo: “Mwangana [Ndavichi] evwililile keke Mefwivoshete mwanaYonatane, Yonatane mwanaSaulu, mwomwo yalushingo luze . . . valishingile kumeso aYehova.”—Samwe. 2, 21:7.

Chipwe ngocho, Ndavichi apwile lika nakushinganyeka havyuma vamulombele vatu vakuNgiveyone. Ngocho avahanyine vana vamalunga vaSaulu vavali, umwe apwile Mefwivoshete nakuvahana nawa vazukulu jaSaulu vatanu. (Samwe. 2, 21:8, 9) Chuma alingile Ndavichi chafumishile mulonga wamanyinga halifuchi.

Mujimbu kana wapwa wamuchano. Lushimbi lwaKalunga lwambile ngwalwo: “Vana nawa kanda vakavajihila hamilonga yavisemi javoko.” (Lushi. 24:16) Yehova kachi ketavilile vana vaSaulu vavali navazukulu jenyi vatanu kuvajiha, nge kavapwile namulongako. Lushimbi kana lwahanjikile nawa ngwalwo: “Mutu himutu vakamujihile hashili yenyi.” Chasoloka nge vaze vana vaSaulu vavali navazukulu jenyi vatanu vajihile vakundwijile Saulu hakulukuka vatu vakuNgiveyone. Ngocho vavajihile mwomwo yakulinga chuma kana.

Mujimbu kana unasolola nge, kachi nge mutu nalingi vyuma vyavipi, katela kulihakwila nakwamba ngwenyi kangwapihishileko mwomwo chuma ngunalingi ngwachilinganga kweseka najindongi vangulwezanga. Mbimbiliya yamba ngwayo: “Salamisa jila yakutambukamo mahinji ove, kaha jijila jove josena najisungama.”—Vishi. 4:24-27; Efwe. 5:15.