Nganyalenu kuVyuma Natulongesela Yehova
“Ami Yehova yami Kalunga kenu, Ou eji kuminangulanga mangana munganyale.”—ISAYA 48:17.
MYASO: 117, 114
1, 2. (a) Vinjiho jaYehova vamona ngachilihi Mbimbiliya? (b) Mikanda muka yamuMbimbiliya yize mwazanga chikuma?
ETU Vinjiho jaYehova twazanga Mbimbiliya. Yeji kutuvendejekanga, nakutuhana lutalililo, nakutuhana jindongi jamwaza. (Wavaka-Loma 15:4) Mbimbiliya kayapwa mukanda wavatuko, oloze yapwa “himazu aKalunga.”—Wavaka-Tesolonyika 1, 2:13.
2 Tuvosena pamo tukwechi mikanda yamuMbimbiliya yize twazanga chikuma. Vamwe vazanga Mikanda yaMujimbu Wamwaza mwomwo yasolola vilinga vyamwaza vyaYehova vize asolwele Yesu. (Yowano 14:9) Veka nawa vazanga mikanda yaupolofweto yakufwana nge Kusoloka, yize yavuluka ‘vyuma vize navilingiwa kalinwaha.’ (Kusoloka 1:1) Vakwavo veji kuvavendejekanga hakutanga mukanda waJisamu, kaha vamwe nawa veji kulivwisanga kuwaha kutanga jindongi jakuvakafwa jamumukanda waVishimo. Chapundu vene, Mbimbiliya yapwa himukanda wavatu vosena.
3, 4. (a) Uno twamona ngachilihi mikanda yetu? (b) Mikanda muka yimwe vasonekela vatu vamwe?
3 Hakuwana nge twazanga Mbimbiliya, ngocho twazanga namikanda yetu mwomwo yahanjika vyamuMazu aKalunga. Mikanda yosena tweji kutambulanga yakufwana nge jimbuloshuwa, WaChituse 2:2.
najimangazini, navinoma vyeka vyeji kufumanga kuli Yehova. Kaha vyeji kutukafwanga tupandame kuli ikiye nakuzamisa lufwelelo lwetu.—4 Mikanda yetu yayivulu vayisonekela Vinjiho jaYehova vosena. Oloze kuli mikanda yimwe yize vasonekela vakweze navisemi. Vihande vyavivulu najivindiyo vahaka hakeyala yetu yahaInternet vavisonekela chikumanyi vatu vaze kavapwa Vinjiho jaYehovako. Evi vyuma vyakushipilitu vyakulisezaseza vyasolola nge Yehova nalame lushiko lwenyi lwakuhana vatu vosena jindongi jajivulu.—Isaya 25:6.
5. Vyuma muka vize Yehova eji kwivwilanga kuwaha?
5 Etu vavavulu twasaka kuwana lwola lwaluvulu lwakutanga Mbimbiliya namikanda yetu. Kaha nawa lwola tweji kuzachisanga hakutanga mukanda umwe lunahase kuliseza nalwola natuzachisa hakutanga mukanda ukwavo. Oloze tunahase kutachikiza chikupu ngwenyi Yehova eji kwivwanga kuwaha omu tweji kuzachisanga kanawa lwola lwetu hakutanga Mbimbiliya namikanda yahanjika haMbimbiliya. (Wavaka-Efwesu 5:15, 16) Chipwe ngocho, kuli vyuma vimwe vize twatela kulihendako. Vyuma muka vene ovyo?
6. Tato muka yinahase kutulingisa tuhone kunganyala kuvyuma atuwahishila Yehova?
6 Nge katwazangamineko, tunahase kuputuka kushinganyeka ngwetu mikanda yimwe yamuMbimbiliya chipwe mikanda yetu kayeshi kuhasa kuzata kuli etuko. Chakutalilaho, ngachilihi nge tunamono ngwetu mikanda yimwe yamuMbimbiliya kayeshi kutukafwako? Nyi ngachilihi nge chihande kana kacheshi nakuhanjika vyayetuko? Kutala tweji kuvitanganga washiwashi chipwe kuhona kuvitanga tahi? Nge mukiko tweji kulinganga, kaha tutachikizenu ngwetu vihande vimwe vyavilemu vyeji kutuhitanga. Natuhonesa ngachilihi ukalu kanou? Twatela kwanuka ngwetu vihande vyamumikanda yosena tweji kutambulanga vyeji kufumanga kuli Yehova. Mbimbiliya yamba ngwayo: “Ami Yehova yami Kalunga kenu, Ou eji kuminangulanga mangana munganyale.” (Isaya 48:17) Muchihande chino, natushimutwila vyuma vitatu vize navitukafwa tunganyale kuvyuma vyosena vize eji kutuhananga Yehova.
VYUMA NAVITUKAFWA TUNGANYALE HAKUTANGA MBIMBILIYA
7. Mwomwo ika twatela kutanga Mbimbiliya namuchima wetu wosena?
7 Tangenu namuchima wenu wosena. Mijimbu yimwe yamuMbimbiliya vayisonekelele vatu vamwe chipwe lizavu lyavatu vamwe. Oloze Mbimbiliya yamba ngwayo: “Visoneka vyosena vavihwima kuli Kalunga, kaha vinawahila kunangula.” (WaChimoteu 2, 3:16) Shikaho, twatela kutanganga Mbimbiliya namuchima wetu wosena. Ndumbwetu umwe ambile ngwenyi nahase kulinangula vyuma vyavivulu kumujimbu umwe wamuMbimbiliya. Kutanga namuchima wosena cheji kumukafwanga alinangule vyuma vyavivulu vize kavyapwa vyavyashi kutachikizako. Shimbu kanda tutange Mbimbiliya, twatela kulomba Yehova atukafwe tutange namuchima wetu wosena nakutuhana mangana akwivwishisa vyuma vize anakusaka tulinangule.—Ezela 7:10; tangenu WaYakova 1:5.
Uno mweji kunganyalanga chikuma hakutanga Mbimbiliya tahi? (Talenu palangalafu 7)
8, 9. (a) Vihula muka tunahase kulihulisa nge tuli nakutanga Mbimbiliya? (b) Vyuma vatela kutesamo vakulwane vaka-Kulishitu vyasolola nge Yehova asaka ika?
8 Lihulisenu vihula. Hakutanga Mbimbiliya, mwatela kulihulisa ngwenu: ‘Ou mujimbu uli nakungunangula ika hali Yehova? Uno nanguzachisa ngachilihi mujimbu kana mukuyoya kaha natunganyala chikuma hakutanga Mbimbiliya. Tuchitalenu hachakutalilaho chimwe. Mbimbiliya yalumbununa vyuma vimwe vize vatela kutesamo vakulwane vaka-Kulishitu. (Tangenu WaChimoteu 1, 3:2-7.) Hakuwana nge etu vavavulu katwapwa tutulamako, ngocho tunahase kuputuka kushinganyeka ngwetu mijimbu kaneyi kayeshi kuhasa kutukafwako. Tuzachisenu jino vihula vitatu vize twavulukanga hakavanga mangana tumone vyuma veji kutesangamo tulama vize vinahase kutukafwa tuvosena.
chami?’ Nanguhasa kuzachisa ngachilihi mujimbu kana hakukafwa vakwetu?’ Nge natushinganyeka havihula kanevi,9 “Ou mujimbu uli nakungunangula ika hali Yehova?” Yehova atulweza vyuma vize vatela kutesamo tulama. Atwama najindongi jajilemu jize vatela kukavangiza malunga vaze veji kuzakamanga chikungulwilo. Echi chasolola nge Yehova amona chikungulwilo kupwa chachilemu. Mbimbiliya yamba ngwayo, achilanjile “namanyinga aMwanenyi.” (Vilinga 20:28) Yehova asaka tulama vahane chakutalilaho chamwaza muchikungulwilo, kaha nawa navakalyambulula kuli ikiye mujila veji kulaminangamo vatu muchikungulwilo. Asaka tulama vatukinge. (Isaya 32:1, 2) Nge natutanga vyuma vatela kutesamo tulama, kaha natutachikiza ngwetu Yehova atuzakama chikuma.
Yehova asaka tuvosena twashiwise michima yetu nakupwa vakunangakana
10, 11. (a) Nge natutanga vyuma vize vatela kutesamo tulama, kaha tunahase kuvizachisa ngachilihi mukuyoya chetu? (b) Tunahase kuzachisa ngachilihi vyuma kana tukafwe vakwetu?
WaChimoteu 1, 3:1) Oloze vaka-Kulishitu vosena vanahase kulinangula kuvyuma kanevi. Chakutalilaho, Yehova asaka tuvosena twashiwise michima yetu nakupwa vakunangakana. (Wavaka-Fwilipi 4:5; WaPetulu 1, 4:7) Nge vakulwane navapwa “vakutalilaho kuutanga,” kaha natulinangula kuli vakiko ‘nakulondezeza lufwelelo lwavo.’—WaPetulu 1, 5:3; WavaHepeleu 13:7.
10 “Nanguhasa kuzachisa ngachilihi mujimbu kana mukuyoya chami?” Nge mwapwa lyehi muvakulwane muchikungulwilo, mwatela kuhitulukanga muvyuma vize mwatela kutesamo nakulingako vyuma vimwe mangana muzovoloke. Nge muli “nakusaka kupwa kalama,” kaha mwatela kuzata nangolo mangana mutesemo vyuma kanevi. (11 “Vishina muka vili mumujimbu kana vize nanguzachisa hakukafwa vakwetu?” Tunahase kuzachisa vyuma veji kutesamo vakulwane muchikungulwilo omu natukafwa vilongesa vyetu vyaMbimbiliya mangana vatachikize chihandwa chatwama hali tulama muchikungulwilo chetu, navatwamina vamukwitava chamakuli. Vyuma kana vinahase kutukafwa tutachikize milimo veji kukilikitanga tulama muvikungulwilo vyetu. Echi nachitukafwa tuvumbikenga ava vandumbwetu. (Wavaka-Tesolonyika 1, 5:12) Nge natuvavumbikanga, kaha navazatanga mulimo wavo mukuwahilila.—WavaHepeleu 13:17.
12, 13. (a) Tunahase kuhehwojola ngachilihi kuzachisa mikanda yetu? (b) Hanenu chakutalilaho chakusolola nge mijimbu yeka yinahase kutukafwa twivwishise kanawa mijimbu tuli nakutanga yize kavasoneka hatomako?
12 Hehwojolenunga. Omu natulinangula Mbimbiliya, twatela kutondatonda muvakumbulwila vihula vino:
-
Iya asonekele mujimbu kanou wamuMbimbiliya?
-
Kulihi vasonekelele mujimbu kana, kaha lwola muka vausonekele?
-
Vyuma muka vyavilemu vyasolokele halwola vasonekele mukanda kana?
Vihula vyangana vinahase kutukafwa tutachikize vyuma vyavivulu vize kavyapwa vyavyashi kutachikizako.
13 Chakutalilaho, mukanda waEzekele 14:13, 14 wamba ngwawo: “Kachi nge lifuchi nalilinga shili kuli ami hakuhona kushishika, nangukolola livoko lyami nakuzangamisa lifuchi kana, kaha nangukakehesa vyakulya vyamuze mulifuchi. Nangukatuma zala yakalombolombo mulifuchi kana nakunongesa vatu natunyama. Mwata Wakulitulaho Yehova nambe ngwenyi, ‘Numba nge ava malunga vatatu, Nowa, naNdanyele, naYopa, vapwanga mulifuchi kana, kachi vanayovola myono yavo kaha, mwomwo yakwoloka chavo.’” Nge natuhehwojola kanawa, kaha natuwana nge Ezekele asonekele mazu kana kafwe myaka 612 shimbu kanda Kulishitu asoloke. Yehova anukilenga lika kushishika chaNowa naYopa numba tuhu mwahichile myaka yayivulu kufuma haze vafwile. Oloze halwola kanelu, Ndanyele apwile wamutonyi. Kaha chasoloka nge Ndanyele apwile namyaka yakusemuka kafwe 20 omu Yehova amulwezele ngwenyi apwile Samu 148:12-14.
wakwoloka ngana mwaNowa naYopa. Vyuma muka natulinangulaho? Yehova eji kumonanga vangamba jenyi vakushishika vosena kupwa vavalemu, kuhakilako vene navanyike.—NGANYALENU HAKUZACHISA MIKANDA YAKULISEZASEZA
14. Uno mikanda vasonekela vakweze yinahase kuvakafwa ngachilihi, kaha yinahase kunganyalisa ngachilihi naveka? (Talenu muvwimbimbi wakulivanga.)
14 Mikanda yavakweze. Tunalinangula ngwetu tunahase kunganyala hakutanga mikanda yosena yamuMbimbiliya. Chochimwe nawa, tunahase kunganyala hakutanga mikanda yetu yosena. Tuchishimutwilenu havyakutalilaho vimwe. Mumyaka yakalinwomu, Yehova natuwahishilanga vihande vyavivulu vyakukafwa vakweze. [1][1] (palangalafu 14) Mijimbu kana vayisoneka mumukanda (Talenu chinyikilo chakusongo.) Mijimbu kana yeji kuvakafwanga vahonese ukalu veji kumonanga kushikola nauze veji kumonanga omu vali nakukola. Uno tuvosena tunahase kunganyala kumijimbu kaneyi tahi? Nge natuyitanganga kaha natutachikiza ukalu veji kumonanga vakweze, nomu tunahase kuvakafwa nakuvakolezeza.
Vaka-Kulishitu vavakulwane navakivo vatela kutanganga mijimbu yize vasonekela vakweze
15. Mwomwo ika vandumbwetu vavakulwane vatela kutanganga vihande vize vasonekela vakweze?
15 Vaka-Kulishitu vavakulwane navakivo vatela kutanganga mijimbu kaneyi vasonekela vakweze. Ukalu wauvulu vasonekamo wakwata nahali vaka-Kulishitu vosena. Chakutalilaho, tuvosena twatela kuhakwila vyuma twafwelela, nakulama vishinganyeka vyetu, nakukana vyuma vyavipi vize navatushinjila kuli vakwetu, nakulihenda kuvatu vavapi, nakusakula kanawa vyuma vyakulihizumuna navyo. Numba tuhu eyi mikanda vayisonekela vakweze, oloze vihande vyatwamamo vyafuma muMbimbiliya, kaha vaka-Kulishitu vosena vanahase kunganyala.
16. Vyuma muka vikwavo vize vakweze veji kunganyalanga hakutanga mikanda yetu?
16 Nge vakweze navatanganga mikanda yize vavasonekela, kaha navazamisa usepa wavo naYehova. (Tangenu Muka-kwambulula 12:1, 13.) Vakulwane navakiko vanahase kunganyala nge navayitanganga. Chakutalilaho, Tonenu! yaJuly 2009 yahanjikile hachihande chakwamba ngwavo, “Vakweze Veji Kuhulisa Ngwavo . . . Vyuma Muka Ngwatela Kulinga Numba Ngulivwise Kuwaha Kutanga Mbimbiliya?” Echi chihande chapwile navishina vyavivulu nalipwata lize vanahase kuvatula nakulilama mangana valizachise hakulinangula. Uno vakulwane vanganyalile kuchihande kanechi tahi? Pwevo umwe wakusomboka, uze nawa apwa chisemi, ambile ngwenyi achiwanyinenga kupwa chachikalu kutanganga Mbimbiliya. Oloze azachishile vishina vyapwile muchihande kana, kaha oholili eji kulivwisanga kuwaha kutanga Mbimbiliya nakumona omu mikanda yamuMbimbiliya yalitombola, nakumulingisa ashinganyeke havyuma ali nakutanga. Ambile nawa ngwenyi: “Oholyapwa jino ngweji kufwilanga kutanga Mbimbiliya,” kaha nawa ngwenyi, “Ngweji kulivwisanga chikuma kuwaha kutanga Mbimbiliya kuhambakana muze chapwilenga hakavanga.”
17, 18. Tunahase kunganyala ngachilihi hakutanga mikanda yize tweji kuhananga mumulimo wamuwande? Hanenu chakutalilaho.
17 Mikanda yize tweji kuhananga vatu vamuchivulu. Kufuma vene mu 2008, tunalivwisanga kuwaha kulinangula Kaposhi Kakutalila wakulinangula. Ou kaposhi vamusonekela chikumanyi Vinjiho jaYehova, oloze tukwechi nawa jimangazini jakuhana vatu muwande. Uno tunahase kunganyala ngachilihi kujimangazini kaneji tweji kuhananga vatu muwande? Chakutalilaho, nge munasanyika mutu ezenga kukukunguluka kuZuvo yaWangana, mweji kwivwanga kuwaha nge mutu kana neza. Omu ndumbwetu mwahanjika chihande, mweji kushinganyekanga hali mutu uze munasanyika. Mweji kushinganyekanga omu ali nakwivwa havyuma vize vali nakuhanjika, nomu vyuma kana vinahase kwalumuna kuyoya chenyi. Kutwala muze, mweji kwivwanga chikuma kuwaha kumuchima, nakuwahilila hachihande kana.
18 Chochimwe nawa, tunahase kwivwa kuwaha chikuma nge natutanga mikanda yize vasonekela vatu vamuchivulu. Chakutalilaho, mangazini yaKaposhi Kakutalila yize tweji kuhananga muwande navihande vyaha jw.org vyalumbununa Mbimbiliya mujila yayashi kwivwishisa. Nge natutanga mijimbu kana, kaha natutachikiza kanawa muchano wamuMbimbiliya nakuuzanga chikuma. Cheka nawa, tunahase kulinangula jijila jajihya jakulumbunwinamo vyuma twafwelela mumulimo wamuwande. Chochimwe nawa, mangazini yaTonenu! yeji kutukafwanga tufwelele chikupu ngwetu Tengi kwatwama. Yeji kutukafwanga nawa tuhakwile vyuma twafwelela.—Tangenu WaPetulu 1, 3:15.
19. Tunahase kusolola ngachilihi ngwetu twasakwilila Yehova havyuma eji kutuhananga?
19 Chikupu vene, Yehova atuhana jindongi jajivulu jize jeji kutunganyalisanga. (Mateu 5:3) Tutwalenuho lika kutanga nakuzachisa mikanda yosena vatuwahishila. Nge natulinga ngocho, kaha natunganyala chikuma nakusolola ngwetu twasakwilila Yehova havyuma vyosena alongesa.—Isaya 48:17.
^ waQuestions Young People Ask—Answers That Work, Volumes 1 na 2, navihande vyakwamba ngwavo, “Young People Ask,” vize vili hakeyala yetu yahaInternet.