MUSEPTEMBER 1922 kwapwile kukunguluka chachinene, kaha lyaChitanu muchihela chakukungulukila mwazumine chikuma, mwomwo mwapwile vatu vavavulu chikuma vakuheta ku 8,000. Cheyamani wakukunguluka avilikile ngwenyi halwola lwachihande chachilemu vatu vanahase tuhu kuya haweluka oloze kavatela kwingila chekako.

Hanyima yakwimba myaso, ndumbwetu Joseph F. Rutherford ejile hautenda. Vatu vavavulu kavejivile vyuma navisolokako. Kaha nawa vatu vapwile nakutukajala mwomwo yakuzuma chikuma. Muka-kuhanjika chihande alwezele vatu vatwame muvitwamo vyavo. Omu chihande chaputukile, vatu kavamwene lize lihina vajingile nakukashilila kwiluko.

Ndumbu Rutherford ahanjikile chihande chapwile namutwe wakwamba ngwavo, “Wangana wamwilu unakuyula.” Ahanjikile chihande chenyi haola yamuundu nachimbwa nalizu lyangolo lize lyevwakanyine kanawa nakulumbununa omu vapolofweto vavilikile vyakupwako chaWangana chakuhona woma. Omu chihande chahetele hatwitwi, ambile ngwenyi, “Uno mwafwelela ngwenu Mwangana waupahu naputuka kuyula tahi?” Vatu mulizavu vetavile namazu akukanguka ngwavo: “Emwane!”

Ndumbu Rutherford ahanjikile nalizu lyakukanguka ngwenyi: “Shikaho enu vana vaKalunga wakulitulaho, kindulukenu nakwambulula! Talenu, Mwangana ali nakuyula! Enu munapu muvaluwa jenyi vaka-kwambulula. Shikaho ambululenu, ambululenu, ambululenu Mwangana nawangana wenyi.”

Halwola kana lize lihina vakashilile kwilu valivungunwine, kaha hapwile mazu akwamba ngwavo “Ambululenu Mwangana naWangana Wenyi.”

Ndumbwetu Ray Bopp ambile ngwenyi, “Vatu mulizavu vevwile kuwaha chikuma.” Anna Gardner ambile ngwenyi, “zuvo yalinyikile mwomwo yajikushi javatu.” Kaha Fred Twarosh ambile ngwenyi: “Vatu vosena mulizavu vakatukile.” Evangelos Scouffas nayikiye ambile ngwenyi: “Chapwile kwijiva nge vanatukatula kuli mutu wangolo chikuma, kaha tuvosena twakatukilile hamwe oku namasoji makamaka hameso.”

Vatu vavavulu vaze vejile kukukunguluka kana vapwilenga vaka-kwambulula mujimbu wamwaza waWangana. Oloze vavakolezezele vambulule mujimbu natwima. Ethel Bennecoff ambile ngwenyi, Vaka-Kulinangula Mbimbiliya vapwile “jino natwima nazangi chikuma kuhambakana hakavanga.” Odessa Tuck uze apwile namyaka yakusemuka 18 halwola luze ambile ngwenyi, omu afumine kukukunguluka afwililile chikuma kuya kweshokwo navamutuma. Ambile ngwenyi: “Kangwejivile kwakuya nakwambulwila, chipwe mujimbu wakwambulula, chipwe mwakwambulwilako. Oloze ngwasakile kulondezeza muchima waIsaya uze ambile ngwenyi: ‘Yami uno. Ngutume.’” (Isa. 6:8) Ralph Leffler ambile ngwenyi: “Likumbi kana lyapwile chikupu maputukilo akwambulula Wangana waKalunga uze vanakuvilika kumavu kwosena makumbi ano.”

 Shikaho, kukunguluka chapwileko mu 1922 Cedar Point, Ohio chikiko chakulipwila chikuma muliuka lyavatu jaKalunga. Ndumbwetu George Gangas ambile ngwenyi, “Kukunguluka kana changukunywile nguyenganga kukukunguluka chosena tweji kupwanga nacho.” Kahomu mukiko nalinginga mukuyoya chenyi chosena. Julia Wilcox asonekele ngwenyi: “Lwola lwosena ngweji kwivwanga kuwaha nge nanguwana mumikanda yetu vanasonekamo vyakukunguluka chize chapwileko muCedar Point mu 1922. Ngweji kwambanga ngwami, ‘Ove Yehova, ngweji kukusakwililanga hakungwitavisa ngupwenga kukukunguluka kana.’”

Nayetu nawa pamo tweji kwanukanga kukunguluka chimwe chize chatwivwishile kuwaha chikuma, nakutulingisa tuzange chikuma Kalunga ketu naMwangana wenyi. Hakwanuka kukunguluka kana, nayetu nawa tweji kwambanga ngwetu, “Ove Yehova, ngweji kukusakwililanga hakungwitavisa ngupwenga kukukunguluka kana.”