VISEMI jami vafumine kuTbilisi, Georgia muji 1910 nakuya nakutwama muPelly Saskatchewan muCanada. Ngwasemukile mu 1928, kaha twasemukile tuva 6, ami yami muchinyikila. Tata afwile tukweji 6 kunyima shimbu kanda ngusemuke. Mama nawa afwile halwola ngwapwile namwaka umwe. Yayami wapwevo Lucy uze apwile twatwa, afwile halwola apwile namyaka 17. Ngocho natu Nick angumbachile navayaya jami tukatwame nenyi.

Likumbi limwe omu ngwapwile namyaka yivali, tanga yami yangumwene nguli nakukoka kumukila wakavalu. Valizakaminyine ngwavo mwanguvulumuna, ngocho vaputukile kutambakana mangana ngwechenga kuze kumukila. Oloze yami ngwatwalileho lika kumukoka, mwomwo kangwapwile nakuvevwako. Kutokwa uze kavalu kanguvulumwineko, oloze halikumbi kana hakiko tanga yami yatachikijile ngwavo ngwapwile ngukaveveve.

Sepa lyanatu uze apwile jino nge kausoko ketu, ambile ngwenyi, vatela kungutwala kushikola yatuveveve. Kaha natu Nick angusonekesele kushikola yatuveveve yakuSaskatoon, Saskatchewan. Ngwatwaminenga jino kwakusuku natanga yami, ngocho ngwevwilenga woma hakuwana nge halwola kana ngwapwile kaha namyaka 5. Ngwayilenga kaha kwimbo hatukweji vakunoka kushikola. Mukuhita chalwola, ngwejivile jino lilimi lyatuveveve, kaha twahemenenga jino navakwetu vanyike.

Mu 1939, yayami wapwevo Marion asombokele kuli Bill Danylchuck, kaha vatumbachile hamwe nayayami Frances tutwamenga navo. Yayami nalunga lyenyi vakiko vapwile vatete mutanga yetu kulinangula muchano naVinjiho jaYehova. Omu ngwayilenga kwimbo mungonde yakunoka kushikola, vangulwezelenga vyuma vize valinangwilenga muMbimbiliya. Chatukaluhwililenga kushimutwila kanawa mwomwo kavatachikijile lilimi lyatuveveveko. Oloze vamwene ngwavo ngwazangile vyuma  vangunangwilenga. Ngwamwene ngwami vakavangijilenga vyuma vize valinangwilenga muMbimbiliya, ngocho ngwayilenga navo nakwambulula. Nakushimbula chiku, ngwasakile kungumbapachisa, kaha kuheta haSeptember 5, 1941, nyali Bill angumbapachishile mulilonga lyalinene muze vaswichilile meya amulishima. Meya kana atuchile chikuma.

Omu ngwayile kwimbo mu 1946 hakunoka kushikola, twayile kukukunguluka changalila muCleveland, Ohio, U.S.A. Halikumbi lyatete kukukunguluka kana, vayaya jami vangusonekelelenga vishina mangana nguhase kukavangiza vyuma twapwile nakulinangula. Oloze halikumbi lyamuchivali ngwawahililile chikuma mwomwo twejivile jino nge kwapwile lizavu lyapwile nakulumbununa mulilimi lyatuveveve. Ngocho ngwalivwishile kuwaha kukunguluka, kaha ngwevwishishile jino kanawa muchano wamuMbimbiliya.

Halwola kana Jita yaKaye yamuchivali yinakumu lyehi, oloze jino kwapwile nawa kulitala hamiyachi. Ngocho omu ngwafumine kukukunguluka, ngwafwililile kulama kulonga chami kushikola. Kaha ngwechele kulifukula kulipandelo nakwimba mwaso walifuchi. Ngwechele nawa kuya kuchachi nakwazana muvilika vyamakumbi akunoka. Milongeshi kavawahililileko ngocho vahanjikilenga vyuma vyamakuli mangana vangwivwise woma. Vyuma vyosenevi vyalingishile vakwetu vaka-shikola valikomokele chikuma, oloze chasokolwele jila yakuvambulilamo. Vakwetu vaka-shikola vakufwana nge Larry Androsoff, naNorman Dittrick, naEmil Schneider, vetavilile muchano ngocho noholyapwa vachili nakuzachila Yehova nakashishi.

Nge ngunayi kujingalila jeka, ngweji kufwilanga kwambulwila tuveveve. Chakutalilaho, omu ngwayile kuMontreal kushikola yatuveveve, ngwambulilile Eddie Tager, uze apwile hashikola kana. Eddie napunga muchikungulwilo chize chazachisa lilimi lyatuveveve muLaval, Quebec palanga nomu afwanga mwakawali. Kaha nawa ngwanangwilenga Juan Ardanez uze afwilililenga kukekesa muMbimbiliya ngana muze valingilenga vaka-Mbeleya. (Vili. 17:10, 11) Nayikiye alinangwile muchano, kaha apwile mukulwane muchikungulwilo chaOttawa, muOntario palanga nomu afwile.

Kuheta mu 1950, ngwayile nakutwama kuVancouver. Numba tuhu ngwazanga kwambulwila tuveveve, oloze likumbi limwe ngwambulilile pwevo umwe mujila uze kapwile kaveveveko. Lijina lyenyi ikiye Chris Spicer. Etavilile kulisonekesa mangana vamutuminenga jimangazini, kaha asakile ngukanangule nalunga lyenyi Gary. Ngocho ngwayile hembo lyavo, kaha twashimutwilile hatondo yayisuku, numba tuhu twalingilenga ngocho hakusoneka mazu hamapapilo, mwomwo kavejivile lilimi lyatuveveveko. Kufuma vene haze, mwahichile myaka katwalimwene chekako swi nomu twaliwanyine kukukunguluka  changalila muToronto, Ontario. Halikumbi kana hakiko vambapachishile Gary. Chakutalilaho kana changunangula nge chapwa chachilemu kutwalaho lika kwambulula, mwomwo muchano unahase kuheta kumuchima wakala mutu halwola luze katwejivileko.

Kufumaho ngwakindulukile kuSaskatoon. Kuheta kuze, ngwaliwanyine napwevo umwe uze apwile navana venyi vavapasa vavali vamapwevo vaJean naJoan Rothenberger, vaze vapwile nakutangila hashikola yize ngwatangililenga nayami. Ou pwevo angulombele ngunangulenga ava vana venyi Mbimbiliya. Nakushimbula chiku, ava vanyike valwezelenga vakwavo vaka-shikola vyuma valinangwilenga. Mukuhita chalwola, vakwavo vaka-shikola vatanu vetavilile muchano nakupwa jino Vinjiho jaYehova. Umwe apwile ikiye Eunice Colin. Eunice ngwamutachikijile halwola ngwapwile hashikola kana. Ngunakwanuka lwola lumwe anguhanyine vyakulya nakwamba ngwenyi tupwenga masepa.

Omu naye yaEunice evwile ngwavo mwanenyi ali nakulinangula Mbimbiliya, apihililile chikuma, kaha alwezele mukulwane washikola amukanyise. Amutambwile namikanda apwile nakuzachisa hakulinangula Mbimbiliya. Oloze Eunice afwililile lika kuhaka Yehova kulutwe mukuyoya chenyi. Omu apwile nakutonda kumumbapachisa, visemi jenyi vamulwezele ngwavo, “Nge naupwa uChinjiho chaYehova natukuhanga hano hembo.” Ngocho afumine hembo omu apwile namyaka 17, kaha vandumbwetu vamwe vamumbachile nakutwama nenyi. Atwalileho lika kulinangula, kaha vamumbapachishile. Kutwala muze Eunice apwile jino muka-mahyami. Omu twalimbachile mu 1960, visemi jenyi kavejile kuchilika chawenga wetuko. Oloze mukuhita chalwola, vatuvumbikilenga jino mwomwo yavyuma twafwelelele nakumona omu twalelelenga vana vetu mujila yamwaza.

Twasemene vana 7 vamalunga kaha, oloze vakiko kavapwa tuveveveko. Chapwile chachikalu kuvalela mwomwo katwahashilenga kulivwasana navo kanawako. Ngocho twavanangwile lilimi lyatuveveve mangana tuhase kulivwasananga navo nakuvanangula muchano. Vandumbwetu muchikungulwilo vatukafwilenga chikuma. Chakutalilaho, chisemi umwe atusonekelele mukanda nakutulweza ngwenyi mwanetu umwe apwile nakuhanjika mazu amapi muZuvo yaWangana. Ngocho twamukafwile. Vana vami vawana, James, Jerry, Nicholas, naSteven vanakuzachila Yehova nakashishi najitanga javo. Kaha vosena vawana vapwa vakulwane muchikungulwilo. Nicholas napuwenyi Deborah vapwa vaka-kwalumuna mikanda mulilimi lyatuveveve hamutango wakuBritain, kaha Steven napuwenyi Shannan vapwa vaka-kwalumuna mikanda mulilimi lyatuveveve hamutango wakuUnited States.

Eunice afwile namusongo wakasa omu kwasalile kakweji umwe mangana tuhetese myaka 40 muulo wetu. Atwalileho kumika halwola apwile nakuviza, mwomwo afwelelele ngwenyi numba nge nafu mwakasanguka. Ngunakutalilila kukamumona cheka.

Kuheta muFebruary 2012, ngwaholokele nakuhokoka mutungi, kaha ngwapwile nakusakiwa kungukafwa. Shikaho ngwayile nakutwama namwanami. Kaha twatwama muchikungulwilo chaCalgary chize chazachisa lilimi lyatuveveve muze ngunakutwalililaho kuzata mwamukulwane. Elu lukiko lwola lwatete kupwa muchikungulwilo chazachisa lilimi lyatuveveve. Achishinganyekenu hachuma kana. Kufuma mu 1946, ngunapunga lika muchikungulwilo chize chazachisa Chingeleshi. Uno vyuma muka vyangukafwile nguzovoloke kushipilitu? Yehova natwalengaho lika kutesamo lushiko lwenyi lwakuzakama vanginga. (Samu 10:14) Ngweji kusakwililanga vosena vaze vanalisuulanga kungusonekela vishina, nakulinangula lilimi lyatuveveve mangana vangulumbunwinenga.

Kuhanjika muchano, shimbu jimwe ngwafutukilenga kumuchima nakusaka kulitwamina kukunguluka mwomwo kangwevwishishilenga vyuma vanangwilengako, kaha nawa ngwami tuveveve kavavazakaminengako. Oloze halwola kana ngwashinganyekelenga hamazu ahanjikile Petulu kuli Yesu ngwenyi: “Ove Mwata, natuya kuli iyaze? Ove uli namazu akuyoya chahaya myaka yosena.” (Yowa. 6:66-68) Ngana mwavandumbwami veka vatuveveve, ngwalinangula kupwa namuchima wakutalilila chikoki. Ngunalinangula kutalilila Yehova naliuka lyenyi, ngocho ngunanganyala chikuma. Oholyapwa jino kulya chakushipilitu chinalisale mulilimi lyami, kaha ngweji kwivwanga kuwaha kulikata navandumbwami kukukunguluka chachikungulwilo nachangalila muLilimi lyaTuveveve LyakuAmerica. Ngunalivwisanga kuwaha kuzachila Yehova Kalunga ketu wakulitulaho mukuyoya chami.