NGAYU navakwavo vaka-Kulishitu mulikulukaji lyamyaka lyakulivanga vamwenenga ukalu wauvulu. Vatu vaze vapwile nakutandakanyisa makuli vasakile kuzeyesa vakwavo nakuneha vihandwa muchikungulwilo. (Yowa. 1, 2:18, 19; Yowa. 2, 7) Ndeyotelefwe apwile nakuhanjika “vyuma vyamakuli” hali kaposetolo Yowano naveka, nakukana kuzumbula vandumbwenyi vaka-Kulishitu, kaha apwile nakuzondola nawa vakwavo vakavangize chakutalilaho chenyi. (Yowa. 3, 9, 10) Ou ukiko ukalu wapwileko halwola Yowano asonekele mukanda kuli Ngayu. Ou mukanda asonekele kaposetolo Yowano kafwe mu 98 C.E., watwama muVisoneka VyachiHelase vyaVaka-Kulishitu vasoneka ngwavo “Mukanda waYowano Wamuchitatu.”

Ngayu atwalileho kuzachila Yehova nakashishi chamokomoko naukalu apwile nakumona. Uno asolwele ngachilihi kushishika chenyi? Mwomwo ika twatela kulondezeza Ngayu makumbi ano? Kaha mukanda asonekele Yowano nautukafwa ngachilihi?

Muka-kusoneka mukanda WaYowano Wamuchitatu alivulukile yivene ngwenyi “ami mukulwane.” Ngocho Ngayu atachikijile chikupu ngwenyi mukanda kana wafumine kuli kaposetolo Yowano uze amunangwile muchano. Yowano asonekele ngwenyi, “ove Ngayu ngwazanga, ove ngwazanga chikuma.” Kaha ahanjikile nawa ngwenyi apwile nakumulombelako mangana atwaleho kupwa wakulikangula kumujimba nakushipilitu. Mazu kana apwile akukokweza chikupu.—Yowa. 3, 1, 2, 4.

Halwola kana pamo Ngayu apwile kalama muchikungulwilo, numba tuhu mukanda kana kawahanjika hatomako. Yowano asangejekele Ngayu hakutambula vandumbwenyi, numba tuhu kavatachikijileko. Yowano amwene ngwenyi zumbu yaNgayu yapwile unjiho wakusolola kushishika chenyi, mwomwo kufuma vene kushikulu vatu jaKalunga vanavatachikijilanga hakuzumbula vangeji.—Kupu. 18:1-8; Chimo. 1, 3:2; Yowa. 3, 5.

Mazu aYowano akusakwilila Ngayu hazumbu yenyi asolola nge vaka-Kulishitu vapwilenga nakutambwojoka kufuma kuchihela apwile nakutwama Yowano nakuya kuze kwapwilenga vikungulwilo. Kaha vatu kana vakiko valwezelenga Yowano vyuma vyamwaza alingilenga Ngayu. Ava vaka-Kulishitu pamo vakiko valwezelenga Yowano omu vyapwile nakuzovoloka vikungulwilo.

Ava vaka-Kulishitu vatambukililenga vikungulwilo vasakilenga kutulila kuli vandumbwavo. Mujizuvo jakusavala vangeji kamwapwile mwamwazako kaha nawa mwapwilenga vilinga vyauvumbi. Shikaho, vangeji  vavavulu vatulililenga kuli masepa javo kaha vaka-Kulishitu vatulililenga kuli vandumbwavo.

Yowano akolezezele Ngayu atwaleho kusololanga zumbu hakumulweza ngwenyi akafwe vaka-Kulishitu vakutambwojoka “vatambuke jila yavo nganomu munawahila kuli Kalunga.” Kukafwa vangeji vatambuke jila yavo chalumbunwine kuvahana vyuma vyosena vyakulikafwa navyo muungeji wavo. Chasoloka nge Ngayu asolwelelenga vangeji zumbu shimbu kanda Yowano amusonekele mukanda, mwomwo vandumbwetu vavangeji valwezele Yowano vyazangi avasolwelelenga nalufwelelo lwenyi.—Yowa. 3, 3, 6.

Ava vangeji pamo vapwile vamishonali, chipwe tulama vakutambwojoka vaze atuminenga Yowano. Vayilenga nakwambulula mujimbu wamwaza. Yowano asonekele ngwenyi: “Vakatukilile kwambulula lijina lyaKalunga.” (Yowa. 3, 7) Shikaho, ava vandumbwetu vasakiwilenga kuvatambula nachisambo, ngana muze asonekele Yowano ngwenyi: “Twatela kutambula vatu kana nachisambo, mangana tupwenga tuvakwavo mutwazachila mumuchano.”—Yowa. 3, 8.

Yowano kasonekelele Ngayu mangana amusangejeke kahako. Oloze asakile nawa kumukafwa haukalu vapwile nawo muchikungulwilo. Ndumbwavo Ndeyotelefwe kasakilenga kusolwelela vandumbwenyi chisamboko. Kaha akanyishilenga navakwavo vaze vasolwelenga chisambo.—Yowa. 3, 9, 10.

Chapundu vene, vaka-Kulishitu vakushishika kavasakilenga kutulila kuzuvo yaNdeyotelefweko. Asakilenga ulemu muchikungulwilo, ketavililenga vyuma ahanjikilenga Yowano nakuvimona kupwa vyavilemuko, kaha apwile nakutanjisa vyuma vyamakuli hali Yowano navandumbwenyi veka. Numba tuhu Yowano kavulukile Ndeyotelefwe kupwa muka-kunangula wamakuliko, oloze ketavililenga vyuma avalwezelenga ou kaposetoloko. Muchima wenyi wakufwila ulemu nakuhona kuzanga vandumbwenyi walingishile vakwavo vakakasane lufwelelo lwenyi. Mujimbu waNdeyotelefwe wasolola ponde yinahase kusoloka makumbi ano muchikungulwilo nge muli vatu vakulivwimba. Ngocho Yowano alwezele Ngayu mazu aze twatela kukavangiza nayetu ngwenyi: “Kanda naulondezezanga vyuma vyavipiko.”—Yowa. 3, 11.

Yowano avulukile Ndemetelyu ngwenyi apwile muka-Kulishitu wavilinga vyamwaza. Asonekele ngwenyi: “Vatu vosena vanambulula ngwavo Ndemetelyu akwechi puho yamwaza . . . Nayetu nawa tuli nakumuvulukilanga unjiho wamwaza, kaha nayove unatachikiza ngwove unjiho tweji kumuvulukilanga unapu wamuchano.” (Yowa. 3, 12) Chasoloka nge Ndemetelyu asakiwile kumukafwa kuli Ngayu, kaha mukanda WaYowano Wamuchitatu, uze asonekele ou kaposetolo, ukiko wamujimbwile. Chasoloka nge Ndemetelyu ikiye atwalile ou mukanda kuli Ngayu. Ndemetelyu pamo apwile temesa yaYowano chipwe kalama wakutambwojoka uze akalumbunwinyine Ngayu vyuma asonekele Yowano.

Mwomwo ika Yowano alwezelele Ngayu atwaleho lika kusolola muchima wazumbu okunyi apwile lyehi nazumbu? Kutala Yowano amwene ngwenyi atelelele kukolezeza Ngayu tahi? Uno alizakaminyine ngwenyi Ngayu keshi kwivwilila mazu enyiko mwomwo Ndeyotelefwe apwile nakuhanga vatu muchikungulwilo vaze vasolwelenga chisambo tahi? Kala vyuma vyamulingishile, Yowano afwelelesele Ngayu ngwenyi: “Ou eji kulinganga mwamwaza napu wakuli Kalunga.” (Yowa. 3, 11) Echi chikiko chatela kulingisa mutu alinge vyuma vyamwaza.

Uno uze mukanda asonekele Yowano kuli Ngayu wamukolezezele atwaleho namuchima wazumbu tahi? Hakuwana nge Mukanda  waYowano Wamuchitatu vausoneka muMbimbiliya nakuulama mangana ukolezeze vatu veka ‘valondezezenga vyuma vyamwaza,’ chasoloka nge wamukolezezele vene.

Kakweshi vyuma vyavivulu twatachikiza hali Ngayuko. Chipwe ngocho, tunahase kulinangula vyuma vyavivulu hali evi vyavindende twatachikiza.

Chatete, twalinangwile muchano kuli vatu vakushishika vaze valisuwile kwiza mangana vatwambulile. Vaka-Kulishitu makumbi ano kaveshi kuya vosena kuvihela vyakwakusuku nakwambulula mujimbuko. Chipwe ngocho, tunahase kulondezeza Ngayu hakukundwiza nakukolezeza vandumbwetu veji kutambwojokanga vakufwana nge tulama vakujinguluka namapwevo javo. Tunahase nawa kukafwa vandumbwetu vaze veji kuyanga kuvihela vyeka chipwe kumafuchi eka kuze kuli nakusakiwa chikuma vaka-kwambulula Wangana. Shikaho, ‘tusololenunga chisambo.’—Loma 12:13; Chimo. 1, 5:9, 10.

Chamuchivali, kanda natulikomokelako nge vatu vamwe muchikungulwilo navalikanga kuli vaze vali nakutetekela. Vyuma ahanjikilenga Yowano kavavitavililenga kuli vosenako, kahomu mukiko chapwile nakuli kaposetolo Paulu. (Koli. 2, 10:7-12; 12:11-13) Uno vyuma muka twatela kulinga nge tuli nakumona ukalu kana muchikungulwilo? Paulu alwezele Chimoteu ngwenyi: “Ndungo yaMwata katela kuzungako, oloze atela kupwa wamuvwovu kuli vosena, wakutamo kunangula vakwavo, wakuliunjika nge vanamulingi mwamupi, anangulenga vaze veji kulikanganga nakuvolola namuchima wauvwovu.” Nge natupwa vakuliunjika halwola navatulinga mwamupi, kaha vaze vanalikange vanahase kwalumuna vilinga vyavo. Ngocho Yehova “nahase kuvalingisa vapihilile nakwalumuka nakupwa nachinyingi chakwoloka chakutachikiza muchano.”—Chimo. 2, 2:24, 25.

Chamuchitatu, twatela kusangejekanga vakwetu vaka-Kulishitu vaze vali nakuzachila Yehova nakashishi chamokomoko nakuvafumbukila. Kaposetolo Yowano akolezezele Ngayu nakumulweza ngwenyi apwile nakulinga vyuma vyakwoloka. Chochimwe nawa, vakulwane makumbi ano vatela kulondezeza chakutalilaho chaYowano hakukolezezanga vandumbwavo kuchina ‘ngolo najivakuma.’—Isa. 40:31; Teso. 1, 5:11.

Ou mukanda asonekele kaposetolo Yowano kuli Ngayu ukiko mukanda watwama namazu amandende muMbimbiliya. MuchiHelase watwama kaha namazu 219.Chipwe ngocho, wapwa waulemu chikuma kuli vaka-Kulishitu makumbi ano.