1, 2. (a) Mazu ahanjikile Yesu aze atwama hali Mateu 24:12 atalishile chatete kuli veya? (b) Mukanda waVilinga wasolola ngachilihi nge vaka-Kulishitu vakulivanga vavavulu vatwalileho kusolola zangi? (Talenu muvwimbimbi wakulivanga.)

YESU avulukile vinjikizo vize navikasolola nge tuli nakuyoyela ‘muchikukulwishi chakatwamino kamyaka yino.’ Chinjikizo chimwe shina chakuvuluka nge “zangi yavatu vavavulu nayikahola.” (Mateu 24:3, 12) Chatete awa mazu atalishile kuli vaYuleya vamulikulukaji lyamyaka lyakulivanga vaze valivulukile ngwavo vapwa vatu jaKalunga, oloze zangi yavo yakuzanga Kalunga yaholele.

² Oloze vaka-Kulishitu vavavulu halwola kana vatwalileho lika “kwambulula mujimbu wamwaza wakuvuluka Kulishitu,” nakusolola zangi yavo yakuzanga Kalunga, navandumbwavo hamwe kaha navaze kavapwa vaka-kufwelelako. (Vili. 2:44-47; 5:42) Chipwe ngocho, zangi yavaka-kukavangiza Yesu vamwe mulikulukaji lyamyaka lyakulivanga yaholele.

3. Vyuma muka vyalingishile zangi yavaka-Kulishitu vamwe yihole?

³ Yesu Kulishitu ahanjikile hali vaka-Kulishitu vakulivanga vaze vatwaminenga muEfwesu ngwenyi: “Ngunakuwane namulonga  mwomwo unaseze zangi yize wapwile nayo hakavanga.” (Kuso. 2:4) Mwomwo ika ahanjikilile mazu kana? Ava tumbaji twaKulishitu vakulivanga vavahungumwishile kuvatu vamukaye. (Efwe. 2:2, 3) Ngana mwajinganda jamakumbi ano, namuEfwesu mwapwile vilinga vyavipi chikuma. Yapwile nganda yauhando chikuma, kaha vatu vazangilenga viseke nakutwama muuhando. Viseke vyalingishile zangi yavatu vamunganda kana yihole. Kaha nawa vilinga vyakuzunguma naujila vyalisalile chikuma.

4. (a) Mujijila muka zangi yavatu yinaholela makumbi ano? (b) Mujijila muka jitatu vanahase kwesekelamo zangi yetu?

⁴ Upolofweto ahanjikile Yesu ngwenyi zangi nayikahola uli nakutesamo namakumbi ano. Vatu vavavulu makumbi ano kaveshi nazangi yakuzanga Kalungako. Vatu vavavulu vapendamina hamauka avatu akumise ukalu wavo, muchishishisa chakufwelela Kalunga. Shikaho, zangi yavatu vaze kavalemesa Yehova Kalungako yili nakuholelako lika. Chipwe ngocho, ngana muze chapwile kuli vaka-Efwesu, navaka-Kulishitu vamuchano makumbi ano vanahase kuzeya nakwechelela zangi yavo yihole. Shikaho tushimutwilenu omu vanahase kweseka zangi yetu yakuzanga vyuma vino vitatu: (1) Kuzanga Yehova, (2) kuzanga muchano wamuMbimbiliya, (3) kuzanga vandumbwetu.

5. Mwomwo ika twatela kuzangila Kalunga?

⁵ Shimbu kanda Yesu ahuhumune vatu ngwenyi zangi yavatu vamwe nayikahola, avangilile kushindakanya hazangi yize yapwa yayilemu. Ambile ngwenyi: “‘Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.’ Elu lukiko lushimbi lwalulemu kaha nawa lukiko lwatete.” (Mateu 22:37, 38) Chikupu vene, kuzanga Yehova nachitukafwa twononoke jishimbi jenyi nakumika muvyeseko nakuhunga vyuma vyavipi. (Tangenu Samu 97:10.) Chipwe ngocho, Satana nakaye kenyi veji kufulililanga zangi yetu yakuzanga Kalunga.

6. Uno kuhola chazangi yakuzanga Kalunga chinanehe ukalu muka?

⁶ Vatu mukaye kavatachikiza omu yalumbunukila zangiko. Vatu vapwa “vaka-kulizanga vavene” muchishishisa chakuzanga Kalunga. (Chimo. 2, 3:2) Kano kaye vayula kuli Satana keji kukundwizanga “kufwila chamujimba, nakufwila chameso, nakutembesa vyuma atwama navyo mutu mukuyoya chenyi.” (Yowa. 1, 2:16) Kaposetolo Paulu ahuhumwine vakwavo vaka-Kulishitu vahone kulinganyalisanga vavene, hakwamba ngwenyi: “Kujika vishinganyeka havyuma vyamujimba cheji kunehanga kufwa . . . mwomwo kujika vishinganyeka havyuma vyamujimba cheji kunehanga kole naKalunga.” (Loma 8:6, 7) Chikupu vene, vaze vafwila luheto nakuzanga vilinga vyaujila veji kumonanga ukalu nakuhona kupwa vakusuuluka.—Koli. 1, 6:18; Chimo. 1, 6:9, 10.

7. Ukalu muka veji kumonanga vaka-kukavangiza Kulishitu makumbi ano?

⁷ Mumafuchi amwe, vatu vaze kavafwelela muli Kalungako navaze vafwelela ngwavo vyuma vyalijililile vivene veji kunangulanga vyuma vize vinakulingisa zangi yavatu yakuzanga Kalunga yihole nakuhona kumufwelela. Veji kuhanjikanga ngwavo nge mutu mwafwelela muli Tengi kaha apwa chipumbumwitavila chipwe katwama namanganako. Kaha nawa vatu vali nakuvumbika chikuma vaka-sayasi, nakuvalingisa jino vahone kufwelela Tengi. (Loma 1:25) Kwivwilila kuvyuma kana nachitulingisa tuseze Yehova nakulingisa nawa zangi yetu yihole.—Hepe. 3:12.

8. (a) Ukalu muka weji kuhombesanga vatu jaYehova vavavulu? (b) Mazu ahali Samu 136 atufwelelesa ika?

 ⁸ Nge natuhomba chikuma, kaha lufwelelo lwetu naluzeya nakulingisa zangi yetu yakuzanga Kalunga yihole. Mukaye kano kakuhuka vayula kuli Satana, tuvosena tunahase kuhomba. (Yowa. 1, 5:19) Pamo tuli nakumona ukalu mwomwo yaushinakaji, chipwe kuvizaviza nakuhona jimbongo. Tunahase nawa kuhomba hakulivwa kupwa tuvamokomoko, chipwe kuhona kutesamo vyuma vimwe twasakile kulinga mukuyoya. Chipwe ngocho katwatela kwitavisa ukalu kana utulingise tushinganyeke ngwetu Yehova natusezeko. Oloze twatela kushinganyekanga hamazu aYehova akutufwelelesa ngwenyi atuzanga. Hali Samu 136:23 hatwama mazu akwamba ngwavo: “Atwanukile omu vatwinyishile, mwomwo zangi yenyi yakwilila kuyatwama haya myaka yosena.” Chapundu vene, Yehova eji kusolwelanga vangamba jenyi zangi yakwilila. Shikaho twatela kufwelela ngwetu, eji kutwivwanga omu ‘natumulembelela atukafwe.’—Samu 116:1; 136:24-26.

9. Chuma muka chakafwile Paulu atwaleho lika kuzanga Kalunga?

⁹ Ngana mwamuka-kwimba jisamu, naPaulu vamuvendejekele hakushinganyeka omu Yehova amukafwilenga. Asonekele ngwenyi: “Yehova ikiye muka-kungukafwa, kangweshi kwivwa womako. Mutu mwangulinga ikaze?” (Hepe. 13:6) Kufwelela muli Yehova chakafwile Paulu omike muukalu ahichilemo. Kechelelele ukalu umuhombese chikumako. Nahalwola apwile mukamenga, asonekele mikanda yayivulu yakukolezeza vandumbwenyi. (Efwe. 4:1; Fwili. 1:7; Fwile. 1) Eyo, nahalwola apwile muvyeseko vyavinene, Paulu atwalileho lika kuzanga Kalunga. Chuma muka chamukafwile alinge ngocho? Mwomwo apendaminyine lika hali “Kalunga muka-kuvendejeka chosena, uze eji kutuvendejekanga muvyeseko vyetu vyosena.” (Koli. 2, 1:3, 4) Tunahase kulondezeza ngachilihi chakutalilaho chaPaulu mangana tutwaleho lika kuzanga Yehova?

10. Chuma muka nachitukafwa tutwaleho kuzanga Yehova?

¹⁰ Paulu avulukile jila tunahase kuzamishilamo zangi yetu yakuzanga Yehova. Asonekelele vandumbwenyi ngwenyi: “Lombenunga shimbu yosena.” Kufumaho asonekele nawa ngwenyi: “Lombenunga naluzema.” (Teso. 1, 5:17; Loma 12:12) Kulomba chikiko cheji kukafwanga mutu aputuke kutunga usoko naKalunga. (Samu 86:3) Nge natunonekangako lwola lwakulombanga kuli Yehova nakumulweza vyuma vili mumuchima wetu nomu tuli nakwivwa, kaha natupandama chikuma kuli Setu wamwilu uze apwa, “Muka-kwivwilila kukulomba.” (Samu 65:2) Kaha nawa nge natutachikiza ngwetu Yehova eji kukumbululanga kulomba chetu, zangi yetu yakumuzanga nayitohwa, mwomwo tunejive ngwetu “Yehova atwama hakamwihi navosena vaze veji kumusanyikanga.” (Samu 145:18) Kufwelela ngwetu Yehova mwatukafwa, nachitulingisa tumike muvyeseko vinahase kwiza kulutwe.

11, 12. Chuma muka nachitukafwa tuzangenga chikuma muchano wamuMbimbiliya?

¹¹ Etu vaka-Kulishitu twamona muchano kupwa waulemu nakuwitavila. Muchano kana watwama muMazu aKalunga. Yesu alombele kuli Ise ngwenyi: “Mazu ove apwa muchano.” (Yowa. 17:17) Shikaho, kuzanga muchano chaputukila hakupwa nachinyingi chamuMazu aKalunga. (Kolo. 1:10) Oloze kuli vyuma vyeka vyasakiwa keshi kupwa kaha nachinyingiko. Muka-kusoneka Samu 119 atukafwa  twivwishise omu chapwa kuzanga muchano wamuMbimbiliya. (Tangenu Samu 119:97-100.) Uno tweji kuhunanananga havyuma tweji kutanganga muVisoneka mapapa kakavulu halikumbi tahi? Nge natushinganyeka havyuma tunakunganyala hakukavangiza vyuma tweji kutanganga, kaha natuzanga chikuma muchano wamuMbimbiliya.

¹² Muka-kwimba jisamu atwalileho ngwenyi: “Mazu ove omwo ayema mundakwila yami! Ayema kuhambakana uchi mukanwa kami.” (Samu 119:103) Chochimwe nawa, nayetu tunahase kumakila kulya chakushipilitu chamuMbimbiliya chiyema chize veji kutuhananga kuliuka lyaKalunga. Tunahase kuhaka Mazu aKalunga mundakwila, kulumbununa kuwashinganyekanga mangana twanukenga “mazu amwaza” amuchano nakuwazachisa hakukafwa vakwetu.—Kwambu. 12:10.

13. Chuma muka chakafwile Yelemiya azange muchano wamuVisoneka, kaha evwile ngachilihi?

¹³ Kapolofweto Yelemiya azangile muchano wamuVisoneka. Mazu aKalunga amuhetele hamuchima, ambile ngwenyi: “Ngwawanyine mazu ove, kaha ngwawalile. Mazu ove angulingishile ngulisambe nakuwahilila mumuchima wami. Ove Yehova Kalunga wamayongomena, ami vanguvulukila lijina lyove.” (Yele. 15:16) Yelemiya alile Mazu aKalunga muchifwanyisa hakuwashinganyekanga. Ngocho awahililile chikuma hakumuvulukila lijina lyaKalunga. Kutala kuzanga muchano wamuMbimbiliya chinatulingisa tuwahilile hakutuvulukila lijina lyaKalunga nakuvilika Wangana wenyi mulwola luno lwakusongo tahi?

14. Tunahase kuzamisa ngachilihi zangi yakuzanga muchano wamuMbimbiliya?

¹⁴ Vyuma vyeka muka navitukafwa tuzange muchano wamuMbimbiliya? Tunahase kuzamisa zangi yetu yakuzanga muchano wamuMbimbiliya hakupwanga kukukunguluka lwola lwosena. Tweji kulinangulanga Mbimbiliya chalumingo hichalumingo kuzachisa Kaposhi Kakutalila. Hakusaka tunganyale kuchilongesa kana, twatela kuhitulukilanga chimweza chihande kana. Tunahase kulinga ngocho hakutanga Visoneka vyosena vanenyikilako. Makumbi ano, vatu vanahase kututulula Kaposhi  Kakutalila hakeyala ya jw.org chipwe hachisete cha JW Library mumalimi amavulu. Hamakina amwe munahase kuwana washi visoneka viliho. Chamokomoko nakala jila natuzachisa, kutanga visoneka vyosena nakuhunananaho nachitukafwa tuzange muchano wamuMbimbiliya.—Tangenu Samu 1:2.

15, 16. (a) Kweseka nachisoneka chaYowano 13:34, 35, mulimo muka twatwama nawo? (b) Uno kuzanga vandumbwetu chatambukila ngachilihi hamwe nakuzanga Kalunga naMbimbiliya?

¹⁵ Yesu alwezele tumbaji twenyi haufuku wamakumishilo mukuyoya chenyi hano hamavu ngwenyi: “Nguli nakumihana lushimbi lwaluhya ngwami mulizangenga navakwenu. Kaha nganomu ngunamizangenga enu, nayenu nawa lizangenunga navakwenu. Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.”—Yowa. 13:34, 35.

¹⁶ Kuzanga vandumbwetu chatambukila hamwe nakuzanga Yehova. Katweshi kuhasa kuzanga Yehovako nge twahunga vandumbwetu. Kaposetolo Yowano asonekele ngwenyi: “Ou azeneka kuzanga ndumbwenyi ou amona, keshi kuhasa kuzanga Kalunga uze kamonako.” (Yowa. 1, 4:20) Kaha nawa kuzanga Yehova navandumbwetu chatambukila hamwe nakuzanga Mbimbiliya. Mwomwo ika? Mwomwo kuzanga muchano wamuMbimbiliya, cheji kutulingisanga twononoke lushimbi lwamuVisoneka lwakuzanga Kalunga navandumbwetu.—Petu. 1, 1:22; Yowa. 1, 4:21.

17. Jijila muka tunahase kusolwelamo zangi?

¹⁷ Tangenu Wavaka-Tesolonyika 1, 4:9, 10. Jijila jimwe muka tunahase kusolwelamo zangi kuli vandumbwetu muchikungulwilo? Tunahase kukafwa vandumbwetu vatushinakaji hakuvatwala kukukunguluka. Tunahase nawa kukafwa ndumbwetu watuliwe hakumuwahishilako hembo. (Yako. 1:27) Twatela nawa kuvendejeka nakukolezeza vandumbwetu vosena vaze vanahombo, navaze vanakumona ukalu weka. (Vishi. 12:25; Kolo. 4:11) Nge natuhanjikanga mazu amwaza kuli “vaze twalikata navo mulufwelelo” nakuvasolwelanga vilinga vyamwaza, kaha natusolola ngwetu twavazanga chikuma.—Ngale. 6:10.

18. Vyuma muka navitukafwa tukumisenga vikokojola navandumbwetu?

¹⁸ Mbimbiliya yahanjikilile chimweza ngwayo, “hamakumbi akukuminyina” akatwamino kamyaka yino, vatu navakapwa nalifwi nalizangamina. (Chimo. 2, 3:1, 2) Shikaho etu vaka-Kulishitu twatela kukilikita mangana tutwaleho kuzanga Kalunga namuchano wamuMbimbiliya navandumbwetu. Chipwe ngocho, shimbu jimwe tunahase kulimbalaka navandumbwetu. Oloze zangi yeji kutukafwanga tulikonekele navandumbwetu. (Efwe. 4:32; Kolo. 3:14) Ngocho katwatela kwechelela zangi yetu yiholeko. Oloze twatwela kutwalaho lika kuzanga Yehova naMazu enyi navandumbwetu.