1, 2. (a) Mwomwo ika vaka-Kulishitu vavakweze veji kufungulwilanga vatu vakuhuka? (Talenu muvwimbimbi wakulivanga.) (b) Vyuma muka natushimutwila muchihande chino?

KAPOSETOLO Paulu afwanyishile etu vaka-Kulishitu kuli maswalale vaze veji kuzunganga jijita. Etu tweji kulwanga jita yakushipilitu keshi yakumujimbako. Chipwe ngocho, vaka-kole jetu kuvatwama chikupu. Satana navandemone jenyi vatwama nangolo. Shimbu jimwe tunahase kushinganyeka ngwetu katweshi kuhasa kuvafungululako. Vaka-Kulishitu vavakweze navakiko vanahase kulivwa nge kaveshi vakukingiwako. Kutala navahasa kufungulula vatu vakuhuka vakushipilitu tahi? Chikupu vene, vakweze vanahase kufungulula. Mwomwo ika? Mwomwo veji “[kukwatanga] lika ngolo muli Mwata,” nakuvwala nawa vyuma vyajita. Kaha nawa, ngana mwamaswalale vaze vanangula kanawa, vakweze navakiko veji “[kuvwalanga] vyuma vyajita vyosena vyakuli Kalunga.”—Tangenu Wavaka-Efwesu 6:10-12.

² Paulu hakufwanyisa vaka-Kulishitu kuli maswalale, pamo anukile uvwalo wajita uze vavwalilenga maswalale vamuLoma. (Vili. 28:16) Mwomwo ika chifwanyisa kana chapwila chakutamo? Natushimutwila hali vakweze vamwe vaze vanahanjikanga haukalu nanganyo yatwama hakuvwala vyuma vyajita yakushipilitu vyosena.

3, 4. Uno muchano uze tweji kulinangulanga muMbimbiliya walifwana ngachilihi namuhya uze vavwalilenga maswalale javaLoma?

³ Tangenu Wavaka-Efwesu 6:14. Maswalale javaLoma vavwalilenga muhya wachikungo mujimbunda uze wavakingilenga. Muhya kana vautungile mangana uhase kuvakafwa vahone kwivwa kulema uvwalo wajita uze vavwalilenga. Mihya yimwe yapwile namakulu akukola aze avakafwilenga kumbata jipoko jamikwale. Echi chakafwilenga maswalale kupwa vakumika hakulwa jita.

⁴ Chochimwe nawa, muchano uze tweji kulinangulanga muMazu aKalunga weji kutukafwanga tuhone kuhungumuka navyuma vyamakuli vize veji kunangulanga mumauka akwitava chamakuli. (Yowa. 8:31, 32; Yowa. 1, 4:1) Nge natutwalaho lika kulinangula muchano waKalunga, kaha nachipwa chachashi kuvwala “chipwiko chakukinga hatulo,” kulumbununa kukavangiza jishimbi jaKalunga jakwoloka. (Samu 111:7, 8; Yowa. 1, 5:3) Kaha nawa nge natutachikiza kanawa muchano wamuMazu aKalunga, kaha tunahase kupwa vakumika nakufungulula vaze veji kutufumbukilanga.—Petu. 1, 3:15.

5. Mwomwo ika twatela kuhanjikilanga muchano?

⁵ Kachi nge natwivwishisa kanawa muchano wamuMbimbiliya, kaha natuyoya kweseka navyuma twalinangula nakuhanjikanga nawa muchano lwola lwosena. Mwomwo ika katwatela kuhanjikanga makuliko? Mwomwo Satana ikiye apwa muka-kwonga. Makuli eji kupihisanga lijina lyauze mwawahanjika nauze nawa mwevwilila kumakuli kana. (Yowa. 8:44) Numba tuhu katwakupukako, oloze twatela kuhanjikanga muchano. (Efwe. 4:25) Chipwe ngocho, chuma kana kachapwa chachashiko. Abigail wamyaka yakusemuka 18 ambile ngwenyi: “Kuhanjika muchano kachapwa chachashi lwola lwosenako, chikumanyi nge uli nakusaka kulifumisa muukalu.” Mwomwo ika Abigail eji kuhanjikilanga muchano lwola lwosena? Ambile ngwenyi: “Kuhanjikanga muchano cheji kukafwanga mutu apwenga nachivezu chitoma. Kaha nawa visemi jenyi namasepa jenyi vanahase kumufwelela chikuma.” Victoria wamyaka yakusemuka 23 ambile ngwenyi: “Kuhanjikanga muchano nakuhakwila vyuma wafwelela, chinahase kulingisa vatu vakutoleke. Oloze kuhanjikanga muchano cheji kukafwanga mutu apwenga wakumika, nakupandama kuli Yehova, nakumuvumbika kuli vakwavo.” Ngocho chapwa chachilemu “[kuvwalanga] muhya wamuchano mujimbunda jenu” lwola lwosena.

6, 7. Mwomwo ika kupwa vakwoloka vachifwanyishila kuchipwiko chakukinga hatulo?

⁶ Chipwiko chakukinga hatulo vavwalilenga maswalale javaLoma mulikulukaji lyamyaka lyakulivanga chapwilenga chakutunga navikungo vyakunungasana vyafwelu. Chipwiko kana vachitungile mangana chihase kufwika tulo yamutu. Evi vikungo vyafwelu vatungishile chipwiko kana vavinungasanyinenga natuvikungo tweka twakufumba. Hamahye achipwiko chamaswalale hapwilenga tuvikungo tuze vapachikilenga hauvwalo kana. Uvwalo kana walingishilenga maswalale vahone kutambuka kanawa, kaha nawa wasakiwilenga kuukekesa lwola lwosena vamone numba nge chikungo chinalamuka. Oloze uvwalo kana wavakafwilenga vahone kulilemeka napoko yamukwale yize vambachilenga.

⁷ Chikupu vene, echi chifwanyisa chasolola omu Jishimbi jaYehova jakwoloka jinahase kukinga muchima wetu wachifwanyisa. (Vishi. 4:23) Liswalale keshi kuhasa kuzula chipwiko chakukinga hatulo chakutunga nafwelu nakuvwala chipwiko cheka chakutunga navyuma vyeka vyakuhehelako. Ngocho nayetu katwatela kuseza jishimbi jaYehova nakufwila kulinga vyuma vize twasakako. Vyuma tweji kufwilanga kulinga kavyeshi kuhasa kukinga michima yetuko. (Vishi. 3:5, 6) Shikaho, twatela kumonanga chikupu ngwetu ‘chipwiko chafwelu’ chize atuhana Yehova tunachivwale mumichima yetu.

8. Mwomwo ika chapwila chachilemu kukavangiza jishimbi jaYehova?

 ⁸ Kutala mwamona ngwenu kukavangiza jishimbi jaYehova jakwoloka japwa hichiteli tahi? Daniel wamyaka yakusemuka 21 ambile ngwenyi: “Milongeshi navakwetu vaka-shikola vangusehelenga mwomwo yakufwila kukavangiza vyuma yanangula Mbimbiliya. Halwola kana ngwevwile nge nguwakukuminamo, kaha nawa ngwahombelenga chikuma.” Vyuma muka vyamukafwile? Ambile ngwenyi: “Nakushimbula chiku, ngwamwene nganyo yatwama hakukavangiza jishimbi jaYehova jakwoloka. Masepa jami vamwe vaputukile kunwa maundu akupendesa, kaha veka vechele shikola. Ngwevwile chikuma kupihya hakumona omu chiyoyelo chavo chalumukile. Chikupu vene, Yehova eji kutukinganga.” Madison wamyaka yakusemuka 15 ambile ngwenyi: “Cheji kungukaluhwilanga kukavangiza jishimbi jaYehova oku nawa nguli nakumona vakwetu vali nakulinga vyuma vize vamona ngwavo vyapwa vyamwaza.” Ahonesele ngachilihi cheseko kana? Ambile ngwenyi: “Ngwatachikiza jino ngwami ngweji kuvilikanga lijina lyaYehova, kaha nawa ngwatachikiza ngwami vyeseko vyapwa hijila yimwe yize Satana asaka kunguhoneselamo. Shikaho, nge nangufungulula vyeseko, kaha nangupwa nguwakuwahilila chikuma.”

9-11. (a) Mendelo muka yachifwanyisa veji kuvwalanga vaka-Kulishitu? (b) Vyuma muka vinahase kutukafwa tupwenga vakulizanga kwambulula mujimbu wamwaza?

⁹ Tangenu Wavaka-Efwesu 6:15. Maswalale javaLoma vaze vahonenenga kuvwala Mendelo kavahashilenga kulaha kanawa mujitako. Mendelo kana vajitungile navipapa vyakulunjika vitatu echi chavalingishile vazamike kanawa mahinji hamavu. Mendelo kana japwile nawa jakukola chikuma.

¹⁰ Ngana mwamaswalale javaloma vaze vavwalilenga mendelo hakuya kujita, ngocho navaka-Kulishitu nawa veji kuvwalanga mendelo jachifwanyisa jize jeji kuvakafwanga vambulule kanawa mujimbu wakuvuluka kuunda. (Isa. 52:7; Loma 10:15) Chipwe ngocho, twasakiwa kupwa vakumika hakuzata mulimo kana. Bo wamyaka yakusemuka 20 ambile ngwenyi: “Ngwevwilenga woma kwambulila vakwetu vaka-shikola. Ngweji kuliveyanga hakushinganyeka ngwami ngwalimbenjele. Oloze oholyapwa jino nguli nakulivwisa kuwaha kwambulila vakwetu vakweze.”

¹¹ Vakweze vavavulu vanatachikiza jino ngwavo nge navaliwahishilanga chimweza, kaha navapwa vakulizanga kwambulula mujimbu wamwaza. Vyuma muka twatela kulinga numba tupwenga vakulizanga? Julia wamyaka yakusemuka 16 ambile ngwenyi: “Ngweji kuhakanga mikanda yetu mungonga yami yakushikola, kaha nakwivwilila vyuma navahanjika vakwetu vaka-shikola vize vafwelela. Echi cheji kungulingisanga ngushinganyeke havyuma vize navihasa kuvakafwa nakuvanganyalisa.” Makenzie wamyaka yakusemuka 23 ambile ngwenyi: “Nge namupwanga muvavavwovu, kaha nawa muvaka-kwivwilila vamwenemwene, kaha munahase kwivwishisa vyuma navahanjika vakwenu. Kutanga mikanda yetu yize yahanjika hali vakweze cheji kungukafwanga ngulwezeko vakwetu vakweze vyuma yahanjika Mbimbiliya chipwe kuvalweza vayenga hakeyala yetu ya jw.org mangana vanganyale.” Nganomu tunevu muvyakutalilaho kanevi kuliwahishila chimweza shimbu kanda muyenga muwande, chinafwane nge kuvwala “mendelo” jize munate kanawa.

12, 13. “Mivwi yakakahya” muka yize eji kuzachisanga Satana?

¹² Tangenu Wavaka-Efwesu 6:16. “Kepwe yayinene” yize vambachilenga maswalale javaLoma yapwilenga yayisuku, kaha yavafwikilenga kumahye swi nakumambuli. Yavakingilenga nawa kumivwi navitwa vyeka vize vavashilenga kuli vaka-kole javo.

¹³ “Mivwi yakakahya” yimwe yize nahase kuzachisa Satana shina kuvangijikila Yehova ngwenyi  katuzakamako kaha nawa katuzangako. Ida, wamyaka yakusemuka 19 eji kulivwanga kupwa wakukuminamo. Ambile ngwenyi: “Kakavulu ngweji kushinganyekanga ngwami Yehova katwama hakamwihi nayamiko kaha nawa kasaka kupwa Sepa lyamiko.” Uno chuma muka chamukafwile ahonese vishinganyeka kana? Ambile ngwenyi: “Kupwa kukukunguluka cheji kungukafwanga chikuma. Hakavanga kangwazanyinengamoko mwomwo ngwashinganyekelenga ngwami vandumbwami kaveshi kunganyala kuvyuma nanguhanjikako. Oloze oholyapwa jino ngweji kuliwahishilanga chimweza vyakukunguluka nakukumbululaho. Numba tuhu chapwa chachikalu oloze ngweji kwivwanga kuwaha kulinga vyuma kana. Vandumbwami muchikungulwilo veji kungukolezezanga chikuma. Shikaho, ngunatachikiza jino ngwami Yehova anguzanga chikuma.”

14. Vishina muka vyavilemu tunalinangula kuli Ida?

¹⁴ Vyuma ahanjikile Ida vyatunangula vishina vyavilemu chikuma. Kepwe yize vambachilenga maswalale yapwilenga yakweseka hamwe, oloze kepwe yalufwelelo yize tweji kumbatanga yinahase kupwa yayinene chipwe yayindende. Echi chapendamina hali etu vavene. (Mateu 14:31; Teso. 2, 1:3) Chikupu vene twatela kupwa nalufwelelo lwakukola.

15, 16. Uno lutalililo lwalifwana ngachilihi nalitepa?

¹⁵ Tangenu Wavaka-Efwesu 6:17. Matepa vavwalililenga maswalale javaLoma vawatungile mangana ahase kuchitula mivwi yize vavashilenga kumutwe, chipwe kushingo, chipwe kumeso. Matepa amwe apwilenga namuhya uze walingishilenga liswalale ahase kulimbata kulivoko.

¹⁶ Shikaho ngana muze litepa lyeji kukinganga  mutwe waliswalale, ‘lutalililo lwetu lwaulwilo’ nayetu lunahase kukinga uhashi wetu wakushinganyeka. (Teso. 1, 5:8; Vishi. 3:21) Lutalililo lweji kutukafwanga tutalilile vyuma atushika Kalunga kukatulingila kulutwe nakuhona kulizakamina chikuma haukalu tuli nakumona. (Samu 27:1, 14; Vili. 24:15) Shikaho, hakusaka tumone ngwetu “litepa” lyetu lili nakuzata twatela kulivwalanga kumutwe keshi kulimbatanga kumavokoko.

17, 18. (a) Uno Satana nahase kutulingisa ngachilihi tuzule litepa lyetu? (b) Natusolola ngachilihi ngwetu kaveshi nakutuhungumwisa kuli Satanako?

¹⁷ Uno Satana nahase kutulingisa ngachilihi tuzule litepa lyetu? Achishinganyekenu jila azachishile hakweseka Yesu. Satana atachikijile chikupu ngwenyi Yesu apwile nalutalililo lwakukayula vatu. Chipwe ngocho, Yesu atelelele kuvandamina lwola luze Yehova mwakamutongola kupwa Mwangana. Kaha nawa atelelele kuyanda nakufwa. Echi chalingishile Satana eseke Yesu mangana atesemo lutalililo lwenyi muwashiwashi. Satana alwezele Yesu ngwenyi, kachi nge mwalifukula kuli ikiye, kaha mwamuhana ngolo jakuyula vatu. (Luka 4:5-7) Satana atachikiza nawa ngwenyi Yehova mwakatuhana vyuma vyamwaza mulifuchi lyalihya. Oloze twatela kuvandamina lwola vatongola, kaha nawa tunahase kumona vihuli oholyapwa. Shikaho, Satana eji kutwesekanga tufwile kulivwisa kuwaha kuyoya chamwenemwene oholyapwa. Asaka chatete tulilunjikile luheto muchishishisa chakuhaka Wangana waKalunga kulutwe.—Mateu 6:31-33.

¹⁸ Kiana wamyaka yakusemuka 20 eji kumonanga ukalu vali nakumonanga vakwavo vakweze vavavulu. Ambile ngwenyi: “Wangana waKalunga ukiko kaha unahase kukumisa ukalu wami.” Uno lutalililo kana lweji kumukafwanga alinge vyuma muka? Ambile ngwenyi: “Kushinganyeka omu kuyoya nachikapwa muPalachise cheji kungukafwanga ngushinganyeke havyuma vize ngweji kulitomenanga kulinga. Kaha nawa kangwasaka kuzachisa uhashi wami muvyuma vyakuhemahemako. Oloze ngweji kuzachisanga lwola lwami nangolo jami kuvyuma vyakushipilitu.”

19, 20. Natuhasa kuhotola ngachilihi uhashi wetu wakuzachisa Mazu aKalunga?

¹⁹ Poko yamukwale yize vazachishilenga maswalale javaLoma yapwile yayisuku jisendimita kafwe 50, kaha vayizachishilenga hakuzunga jijita. Maswalale kana vafungulwilenga mwomwo lwola lwosena valilongeselenga mwakuzachishila jipoko.

²⁰ Paulu afwanyishile Mazu aKalunga kupoko yamukwale yize atuhana Yehova. Shikaho, twatela kulinangula mwakuyizachishila kanawa hakuhakwila vyuma twafwelela chipwe hakusaka kupwa nachinyingi chamwenemwene. (Koli. 2, 10:4, 5; Chimo. 2, 2:15) Natuhasa kuhotola ngachilihi uhashi wetu? Sebastian wamyaka yakusemuka 21 ambile ngwenyi: “Omu ngweji kutanganga Mbimbiliya ngweji kusonekanga jivesi ngwazanga jamutupetulu vaze ngweji kutanganga. Echi cheji kungukafwanga ngumone vyuma nganomu avimona Yehova.” Daniel uze twavulukanga hakavanga ambile ngwenyi: “Omu ngweji kutanganga Mbimbiliya ngweji kusakulanga jivesi jize najikafwa vatu vaze nanguwana muwande. Shikaho, vatu vavavulu veji kwakulanga kanawa hakuvambulila kachi nge vanamono ngwavo twatachikiza kanawa Mbimbiliya kaha nawa tuli nakufwila kuvakafwa.”

21. Mwomwo ika katwatela kwivwa woma Satana navandemone jenyiko?

²¹ Nganomu tunevu muchihande chino, katwatela kwivwa woma Satana navandemone jenyiko. Numba tuhu vatwama nangolo, oloze kaveshi kuhasa kutufungululako kaha nawa kavatwama namwono wakuzeneka kufwako. Kalinwomu Satana vamukase muChiyulo chaKulishitu chaMyaka Likombakaji, kaha kufumaho jino navakamunongesa. (Kuso. 20:1-3, 7-10) Hakuwana nge tunatachikiza jino kanawa ou muka-kole wetu, natufuta eji kuzachisanga, navyuma afwila kulinga, Yehova nahase kutukafwa tufungulule Satana.