HAKUWANA nge tuli nakuyoyela mukaye kakapi, ngocho twatela kuzata nangolo mangana tutwamenga mukuunda. Numba tuhu lwola lumwe tweji kutwamanga mukuunda, oloze kachapwa chachashi lwola lwosenako. Vyuma muka yahanjika Mbimbiliya vize navitukafwa tupwenga nakuunda chamwenemwene? Natukafwa ngachilihi vakwetu mangana navakiko vapwenga nakuunda chamwenemwene?

Hakusaka tulivwise kuwaha kuunda chamwenemwene, twatela kulivwa nge twapwa tuvakukingiwa. Twatela nawa kutunga usepa wakukola navakwetu. Chuma chachilemu nachitukafwa shina kupwa nausepa wamwenemwene naKalunga. Uno natuhasa kulinga ngachilihi ngocho?

Nge natukavangizanga jishimbi najindongi jaYehova jize japwa jakwoloka, kaha natusolola nge twamufwelela, kaha nawa twafwila kutwama mukuunda naikiye. (Yele. 17:7, 8; Yako. 2:22, 23) Nge natulinga ngocho, kaha Yehova mwapandama kuli etu nakutuhana kuunda chamwenemwene. Chisoneka chaIsaya 32:17 chamba ngwacho: “Kwoloka chamwenemwene nachikaneha kuunda. Kwoloka chamwenemwene nachikaneha kuunda namukingo haya myaka yosena.” Tunahase kupwa nakuunda chamwenemwene kachi nge natwononokanga Yehova namichima yetu yosena.—Isa. 48:18, 19.

Shipilitu yajila yaKalunga nawa yeji kutukafwanga tupwenga nakuunda chamwenemwene.—Vili. 9:31.

Kaposetolo Paulu avulukile kuunda kupwa ‘muhako washipilitu’ wamuchitatu. (Ngale. 5:22, 23) Hakuwana nge shipilitu yaKalunga yeji kutukafwanga tupwenga nakuunda chamwenemwene, ngocho twatela kukavangizanga vyuma nayitulweza mangana tupwenga nakuunda kana. Tushimutwilenu hajijila jivali jize shipilitu yaKalunga yinahase kutukafwa tupwenga vakuunda.

 Chatete, kutanganga Mbimbiliya lwola lwosena cheji kutukafwanga tupwenga nakuunda chamwenemwene. (Samu 1:2, 3) Nge natushinganyekanga havyuma natutanga muMbimbiliya, kaha shipilitu yaKalunga nayitukafwa tumone vyuma nganomu avimona Yehova. Chakutalilaho, natutachikiza vyuma vyamulingisa apwenga wakuunda novyo kuunda chapwila chachilemu kuli ikiye. Nge natuzachisanga vishina kanevi vyamuMazu aKalunga, kaha natupwa nakuunda chamwenemwene mukuyoya chetu chosena.—Vishi. 3:1, 2.

Chamuchivali, twatela kulombanga shipilitu yajila yaKalunga yitukafwe. (Luka 11:13) Yehova atufwelelesa ngwenyi nge natumulombanga atukafwe, “kaha kuunda chaKalunga chize chahambakana kunangakana chosena nachikinga michima [yetu] navishinganyeka [vyetu] kuhichila muli Kulishitu Yesu.” (Fwili. 4:6, 7) Nge natupendaminanga hashipilitu yaYehova, kaha mwatuhana kuunda chize chatela vaze vatwama nausoko wakukola naikiye.—Loma 15:13.

Vatu vamwe vanakavangiza ngachilihi vishina kanevi, kaha vinavakafwe ngachilihi vapwenga nakuunda chamwenemwene naYehova, navakwavo vatu?

Makumbi ano, muvikungulwilo vyavaka-Kulishitu muli vandumbwetu vamwe vaze “[vakwachilenga] washi matoto” kunyima, oloze oholyapwa jino vanapu valikoji, namuchima wakutalilila chikoki, kaha nawa vatwama mukuunda navakwavo. * (Vishi. 29:22) Tuchitalenu havyakutalilaho vyavaka-kwambulula vavali vaze vakafwile mangana vahonese matoto nakufwila kutwama mukuunda navakwavo.

David apwile navilinga vyavipi vize vyamulingishile apwenga nahanjikiso yakasautu. Shimbu kanda alihane kuli Kalunga, kalivwasanyinenga navakwavoko, kaha nawa ahanjikilenga navaka-tanga yenyi mujila yautenu. Mukuhita chalwola, David amwene ngwenyi atelelele kwalumunako vilinga vyenyi mangana ahase kutwama mukuunda navakwavo. Vyuma muka vyamukafwile? Ambile ngwenyi: “Ngwaputukile kukavangiza vyuma ngwalinangwilenga muMbimbiliya, kaha mukuhita chalwola ngwaputukile jino kuvumbika vaka-tanga yami.”

 Rachel naikiye apwilenga namuchima wamatoto mwomwo yajila vamulelelelemo. Ambile ngwenyi: “Noholyapwa ngweji kulipikanga namuchima wamatoto mwomwo yakukolela mutanga muze kamwapwilenga kuundako.” Vyuma muka vyamukafwile numba apwenga wakuunda? Ambile ngwenyi, “Kulomba kuli Yehova lwola lwosena chikiko changukafwile.”

Chakutalilaho chaDavid naRachel, vinatukafwe tutachikize ngwetu kukavangiza jindongi jamuVisoneka nakupendamina hashipilitu yaKalunga yitukafwe, navitulingisa tupwenga nakuunda chamwenemwene. Chikupu vene, numba tuhu tuli nakuyoyela mukaye kano kanazale navilinga vyavipi, oloze tunahase kupwa nakuunda chamwenemwene chize nachitulingisa tutwame kanawa najitanga jetu navakwetu vaka-Kulishitu. Kaha nawa Yehova atukolezeza ‘tutwamenga mukuunda navatu vosena.’ (Loma 12:18) Kutala chapwa chachashi kutwama mukuunda navatu vosena tahi? Nganyo muka yatwamamo kachi nge natufwila kutwamanga navakwetu mukuunda?

Mulimo wakwambulula weji kukafwanga vatu vatachikize vyuma vyamwaza naukalinga Wangana waKalunga. (Isa. 9:6, 7; Mateu 24:14) Hakuwana nge vatu vavavulu vali nakwakula kanawa kumujimbu kana, ngocho kaveshi cheka nakwivwa woma chipwe matoto havyuma vili nakusoloka mukayeko. Echi chili nakuvalingisa vatalilile vyuma vyamwaza kulutwe nakuvalingisa ‘vatonde kuunda, nakuchikavangiza.”—Samu 34:14.

Vatu vamwe vanahase kukana kwivwilila kumujimbu wamwaza natuvambulila halwola lwatete. (Yowa. 3:19) Chipwe ngocho, shipilitu yaKalunga yeji kutukafwanga twambulile vatu kana mujila yakuunda kaha nawa yakavumbi. Kwambulula mujila kaneyi cheji kusololanga nge tuli nakukavangiza mazu aYesu aze ahanjikile kutalisa kumulimo wakwambulula hali Mateu 10:11-13 ngwenyi: “Omu namwingila muzuvo, menekenu vatu vakuzuvo kana. Kachi nge vatu vakuzuvo kana vatela, kaha kuunda chenu namuvavulukila chipwenga hali vakiko. Oloze nge kavatelako, kaha kuunda chenu chikinduluke cheka kuli enu vavene.” Kukavangiza mazu aYesu, nachitukafwa tuseze mutu kana mukuunda nakutalilila kulutwe omu mwaketavila muchano.

Tunahase nawa kutwama mukuunda kachi nge natuhanjikanga mukavumbi navilolo jafulumende kuhakilako vene navatu vaze vahunga mulimo wetu. Chakutalilaho, lifuchi limwe lyamuno muAfrica lyakanyishile mulimo wakutunga jiZuvo jaWangana. Shikaho hakusaka kukumisa chihande kana mujila yakuunda, ndumbwetu umwe uze azachililileko mulimo waumishonali mulifuchi kana vamulwezele kuya nakumona chilolo wafulumende yalifuchi kana muLondon, England. Ayile nakulweza uze chilolo vyamilimo yaVinjiho jaYehova. Vyuma muka vyafuminemo?

Ambile ngwenyi: “Omu ngwahetele kuze apwile nakuzachila uze chilolo, ngwawanyine mwana pwevo umwe uze avwalile ngana mwavatu vaze vahanjikilenga lilimi lize ngwalinangwile. Shikaho, ngwamumenekele mulilimi lyenyi, kaha alikomokelele nakunguhulisa ngwenyi, ‘Unakatukila ika kuno?’ Ngwamukumbulwile mujila yayivwovu ngwami, nguli nakusaka kuhanjika namukulwane wove wamilimo. Ngocho atuminyine shinga uze chilolo, kaha ejile nakungumbata, angumenekele mulilimi lyenyi. Kahomu akumishile, ngwaputukile jino kumulumbunwina milimo veji kuzatanga Vinjiho jaYehova.”

Jila ahanjikilililemo ou ndumbwetu yalingishile uze chilolo avwovuwise muchima wenyi nakumona nge chapwile chakuhenga kukanyisa mulimo wetu. Ngocho, mukuhita chalwola fulumende yalifuchi kana yatwitavishile jino kutunga jiZuvo jaWangana.vandumbwetu vevwile kuwaha chikuma hakuvatula chihande kana mujila yakuunda. Kuvumbika vakwetu cheji kunehanga nganyo yayinene nakutulingisa tutwame mukuunda.

Makumbi ano, vangamba jaYehova vavavulu vali nakulivwisa kuwaha kutwama mupalachise yakushipilitu muze muli kuunda. Namulivwisa kuwaha kuunda kanechi kachi nge namufwila kwima muhako kanou washipilitu mukuyoya chenu. Kupwa vakuunda nachilingisa Yehova amivwile uselewa nakukamihana kuunda chamwenemwene mulifuchi lyalihya.—Petu. 2, 3:13, 14.