1. Yehova alwezele Alama naEve vyuma muka kutalisa kuli muka-kole wetu?

HAKUWANA nge Alama atachikijile ngwenyi manoka kavahanjikako, ngocho, pamo ashinganyekele ngwenyi mutu wakushipilitu ikiye ahanjikile kuli Eve kuhichila muli linoka. (Kupu. 3:1-6) Alama naEve kavatachikijile chuma numba chimwe hali ou mutu wakushipilituko. Chipwe ngocho, Alama asakwile kulikanga kuli Ise wamwilu wazangi, nakulinunga nayou muka-kulikanga kuli Kalunga. (Chimo. 1, 2:14) Nakushimbula chiku, Yehova aputukile kulumbunwina Alama naEve ngwenyi ou muka-kole avahungumwishile mwakamunongesa kulutwe. Yehova avalwezele nawa ngwenyi ou mutu wakushipilitu uze ahanjikile kuhichila muli linoka mwakafumbukila vaze vazanga Kalunga.—Kupu. 3:15.

2, 3. Mwomwo ika Yehova azenekele kulumbunwina vatu vyavivulu hali Satana, shimbu kanda Meshiya ezenga?

² Yehova katulweza lijina livene lyayou kangelo wakulikangako. * Kaha nawa kufuma vene haze Alama naEve valikangile, mwahichile myaka 2,500 numba jino Kalunga aputuke cheka kuhanjika hali ou  muka-kole (Yopa 1:6) Mikanda yitatu kaha yachiHepeleu yikiko yahanjika hali Satana. Lijina kana lyalumbununa “Muka-kulikanga.” Mikanda kana shina Mijimbu 1, naYopa, naZekaliya. Mwomwo ika Yehova ahonenene kulumbununa vyavivulu hali ou muka-kole wetu shimbu kanda Meshiya ezenga?

³ Chasoloka nge Yehova kasakile kulumbununa vyavivulu hali Satana muVisoneka vyachiHepeleuko mwomwo echi kachi chalingishile Satana alivwimbe. Chuma chachinene chalingishile Yehova asoneke Visoneka VyachiHepeleu shina asakile kulweza vatu vyakwiza chaMeshiya nakuvapandamisa kuli ikiye. (Luka 24:44; Ngale. 3:24) Omu vyuma kana vyateselemo hakwiza chaMeshiya, Yehova azachishile Yesu natumbaji twenyi mangana valumbunune vyavivulu hali Satana navangelo vaze vamukundwijile. * Kalunga alingile chuma chakwoloka hakuzachisa Yesu natumbaji twenyi mwomwo vakiko mwakazachisa hakunongesa Satana navaka-kumukavangiza.—Loma 16:20; Kuso. 17:14; 20:10.

4. Mwomwo ika katwatela kwivwa woma Satanako?

⁴ Kaposetolo Petulu alumbunwine Satana ngwenyi apwa “ndumba wakutahwoka,” kaha Yowano amuvuluka ngwenyi apwa ikiye “linoka” kaha nawa ikiye “chazangombe.” (Petu. 1, 5:8; Kuso. 12:9) Chipwe ngocho, etu katwatela kwivwa woma Liyavoloko mwomwo ngolo jenyi japwa jakukuminamo. (Tangenu WaYakova 4:7.) Yehova, naYesu, navangelo vakushishika veji kutukafwanga tufungulule ou muka-kole wetu. Tushimutwilenu mwakukumbulwila vihula vino vitatu: Satana akwechi ngolo jakulinga vyuma muka? Satana eji kulinganga ika hakusaka kuhungumwisa vatu? Vyuma muka vize kahasa kulinga Satanako? Omu natushimutwila vihula kana natumona nawa vyuma natulinangulako.

5, 6. Mwomwo ika jifulumende javatu jahonena kulingila vatu vyuma vize vyasakiwa chikuma?

⁵ Vangelo vamwe vakundwijile Satana omu alikangile. Shimbu kanda Livaji, Satana ahungumwishile vangelo vamwe valinge ujila navana vavatu. Mazu kana apwa amuchano mwomwo Mbimbiliya yahanjika ngwayo ou chazangombe akokele chimbwa chimwe chakusokesa muvimbwa vitatu chavatanganyika vamwilu. (Kupu. 6:1-4; Yuta 6; Kuso. 12:3, 4) Vangelo vaze vahandukile mutanga yaKalunga, vaputukile kukundwiza Satana nakumulingisa kupwa muka-kuvatwaminyina. Ava vaka-kulikanga kavapwa nge vaka-kuneha kaha liwayangako, oloze vavahana nawa ngolo jakuhungumwisa vatu. Satana alilingishile ivene kupwa mwangana. Kaha nawa alingisa vandemone jenyi kupwa jifulumende nakuvahana ngolo jakuyula.—Efwe. 6:12.

⁶ Satana eji kuzachisanga liuka lyenyi lyakushipilitu mangana ahungumwise jifulumende javatu. Evi vikiko alwekeselele Yesu “mawangana osena ahamavu,” nakumulweza ngwenyi: “Nangukuhana ngolo jakuyula mawangana osena awa naupahu wawo, mwomwo vanguhanajo ami, kaha ngweji kujihananga kuli weshowo nangusaka.” (Luka 4:5, 6) Numba tuhu Liyavolo ikiye ali nakuhungumwisa, oloze jifulumende jajivulu jeji kulingilangako vatu javo vyuma vimwe vyamwaza. Kaha nawa vatwamina vamwe vatwama namichima yamwaza. Chipwe ngocho, kakweshi fulumende yavatu yize nayihasa kulingila vatu vyuma vize vyasakiwa chikumako.—Samu 146:3, 4; Kuso. 12:12.

7. Satana eji kuzachisanga jifulumende nakwitava chamakuli navaka-kusekasana hakusaka kulinga ika? (Talenu muvwimbimbi wakulivanga.)

⁷ Satana navandemone jenyi veji kuzachisanga jifulumende, nakwitava chamakuli namauka avaka-kusekasana mangana vahungumwise “vatu vosena hamavu.” (Kuso. 12:9) Satana  eji kuzachisanga kwitava chamakuli mangana anangule vatu vyuma vyamakuli hali Yehova. Kaha nawa Liyavolo afwila kuhungumwisa vatu vavavulu mangana vavulyame lijina lyaYehova. (Yele. 23:26, 27) Echi cheji kulingisanga vatu vamwe vashinganyeke ngwavo vali nakulemesa Kalunga kumana vali nakulemesa vandemone. (Koli. 1, 10:20; Koli. 2, 11:13-15) Satana nawa eji kuhungumwisanga vatu kuzachisa mauka avaka-kusekasana. Chakutalilaho, vaka-kusekasana veji kwambanga ngwavo mutu kupwa nachiyoyelo chamwaza kuvanga ali najimbongo navikumba vyavivulu. (Vishi. 18:11) Vaze vafwelela evi vishinganyeka vyamakuli veji kuzachilanga “Luheto” muchishishisa chakuzachila Kalunga. (Mateu 6:24) Ngocho mukuhita chalwola, kuzanga luheto cheji kulingisanga zangi yavo yakuzanga Kalunga yihole.—Mateu 13:22; Yowa. 1, 2:15, 16.

8, 9. (a) Vyuma muka vivali tunalinangula kumujimbu waAlama naEve, navangelo vakulikanga? (b) Uno kutachikiza vyuma eji kulinganga Satana nachitukafwa ngachilihi?

⁸ Mujimbu waAlama naEve navangelo vakulikanga unatunangula vishina vivali vyavilemu. Chatete, kwatwama kaha vamyata vavali, ngocho twatela kusakulaho umwe. Chili kuli etu kusakula kupwa tuvakushishika kuli Yehova chipwe kukundwiza Satana. (Mateu 7:13) Chamuchivali, vaze veji kukavangizanga Satana kaveshi kuwana nganyo yamwenemweneko. Chakutalilaho, omu Alama naEve valikangile, vapwile nalisesa lyakulisakwila vavene kulinga vyuma vyamwaza chipwe vyavipi. Kaha nawa vandemone vatwama nangolo jakuyula jifulumende javatu. (Kupu. 3:22) Chipwe ngocho, kwatwama ukalu wauvulu uze weji kwizanga mwomwo yakulikanga kuhambakana nganyo yize Satana eji kuhananga vatu.—Yopa 21:7-17; Ngale. 6:7, 8.

⁹ Uno kutachikiza vyuma eji kulinganga Satana nachitukafwa ngachilihi? Cheji kutukafwanga tuhane vaka-kuyula kavumbi kaze katela nakutukafwa nawa tuzate mulimo wakwambulula natwima. Twatachikiza ngwetu Yehova asaka tuvumbikenga vaka-kuyula. (Petu. 1, 2:17) Atulweza nawa twononokenga jishimbi javaka-kuyula chikalu kaha nge kajalimbalakile najishimbi jenyiko. (Loma 13:1-4) Twatachikiza nawa ngwetu katwatela kwazana muvihande vyamafuchi nachiyulo chipwe kuhakwila liuka limwe lyavaka-mapolitikiko. (Yowa. 17:15, 16; 18:36) Hakuwana nge twatachikiza ngwetu Satana afwila kupihisa lijina lyaYehova, ngocho twasaka kunangula vatu muchano waKalunga ketu. Tweji kwivwanga kuwaha chikuma hakutuvulukila lijina lyenyi mwomwo twatachikiza ngwetu kuzanga Kalunga chikiko chachilemu kuhambakana kuzanga jimbongo chipwe luheto.—Isa. 43:10; Chimo. 1, 6:6-10.

10-12. (a) Ndulo muka pamo yize azachishile Satana hakuhungumwisa vakwavo vangelo? (b) Vyuma muka natulinangula kumujimbu wavangelo vaze valikangile?

¹⁰ Satana eji kuzachisanga tufuta twakulisezaseza mangana ahungumwise vatu. Chakutalilaho, eji kuzachisanga ndulo mangana ozenga vatu. Kaha nawa eji kwivwisanga vatu woma mangana valinge vyuma asaka.

¹¹ Achishinganyekenu ndulo azachishile Satana hakuhungumwisa vakwavo vangelo. Chasoloka nge atachikijile kanawa vilinga vyavo shimbu kanda avahungumwise mangana vamukundwize. Omu vangelo vamwe valile yize ndulo nakulinga ujila navana vavatu, vasemene vana vakutaluka vaze vayanjishilenga vatu hano hamavu. (Kupu. 6:1-4) Satana esekele vakwavo vangelo kuzachisa kafuta kakulinga ujila. Oloze pamo avafwelelesele nawa ngwenyi mwakavahana ngolo jakuyula vatu. Chasoloka nge asakile kuhonesa kwiza ‘chamuka-tanga wapwevo.’ (Kupu. 3:15) Oloze Yehova ahonesele vishinganyeka vyaSatana navyavangelo vakulikanga hakuneha Livaji.

¹² Vyuma muka natulinangula kumujimbu kanou? Satana eji kuzachisanga ujila namuchima wakulivwimba hakusaka kuhungumwisa vatu. Vangelo vaze vazachilile Kalunga hamyaka yayivulu, vaputukile kukundwiza Satana. Chamokomoko nakutwama mwilu, oloze michima yavo yaputukile kufwila vyuma vyavipi. Chochimwe nawa, numba tuhu tunazachilanga Kalunga hamyaka yayivulu muchihanda chaliuka lyenyi chahano hamavu, oloze michima yetu yinahase kuputuka kufwila vyuma vyavipi. (Koli. 1, 10:12) Shikaho twatela kulikekesanga mumichima yetu, nakukana vishinganyeka vyakufwila kulinga ujila, nakuhonesa muchima wakulivwimba.—Ngale. 5:26; tangenu Wavaka-Kolose 3:5.

13. Ndulo muka yikwavo yize eji kuzachisanga Satana, kaha natuhasa kulihendako ngachilihi?

¹³ Ndulo yikwavo eji kuzachisanga Satana shina kupanda. Makumbi ano, Satana eji kulingisanga vatu vakundwize vandemone kuhichila mukwitava chamakuli najivindiyo navyuma vyeka vize vyeji kusololanga vyakupanda. Chuma muka nachitukafwa tuhone kufwa mumuheto kana? Katwatela kushinganyeka ngwetu liuka lyaKalunga nalitulweza vyuma vyosena twatela kuzachisa hakulihizumuna nevi katwatela kuzachisako. Mutu himutu atela kunangula chivezu chenyi mangana akavangizenga jishimbi jaKalunga. (Hepe. 5:14) Kaha nawa twatela kukavangiza mazu akaposetolo Paulu akwamba ngwenyi zangi yetu yakuzanga Kalunga yatela kupwa “yakuzeneka kulyonga.” (Loma 12:9) Echi nachitukafwa tusakulenga kanawa vyuma vyakulihizumuna. Twatela kulihulisa ngwetu: ‘Kutala vyuma nangusakula kutalisa kukulihizumuna navingusolola nge ngumuka-kulyonga tahi? Nge chilongesa chami chipwe vatu vaze ngwashikile kukindulukilako navamona vyuma ngweji kulihizumunanga,  kutala navashinganyeka ngwavo ngweji kulinganga vyuma ngweji kuvanangulanga tahi?’ Nge natulinganga vyuma tweji kunangulanga, kaha nachitukafwa tuhone kufwa mumiheto yaSatana.—Yowa. 1, 3:18.

14. Vyuma muka eji kulinganga Satana hakusaka kutwivwisa woma, kaha natuhonesa ngachilihi ukalu kana?

¹⁴ Lwola lumwe nawa Satana eji kwivwisanga vatu woma mangana vahone kupwa vakushishika kuli Yehova. Chakutalilaho, nahase kuzachisa vaka-fulumende mangana vatukanyise kuzata mulimo wetu wakwambulula. Kaha nawa nahase kuzachisa vakwetu vaka-milimo chipwe vaka-shikola mangana vatutoleke mwomwo yakukavangiza jishimbi jamuMbimbiliya. (Petu. 1, 4:4) Halwola lukwavo nawa nahase kuzachisa vaka-tanga yetu mangana vatukanyise kuya nakukunguluka. (Mateu 10:36) Natuhasa kuhonesa ngachilihi ukalu kana? Chatete, twatela kutachikiza ngwetu Satana afwila kutufungulula. (Kuso. 2:10; 12:17) Chamuchivali, Satana eji kwambanga ngwenyi tweji kuzachilanga Kalunga kachi nge katweshi nakumona ukaluko, oloze nge tuli muukalu, kaha natulitwamina kuzachila Kalunga. (Yopa 1:9-11; 2:4, 5) Chamakumishilo, twatela kupendamina hali Yehova mangana atuhane ngolo tufungulule muka-kole wetu. Anukenu ngwenu Yehova atufwelelesa ngwenyi keshi kukatusezako.—Hepe. 13:5.

15. Kutala Satana nahase kutushinjila mangana tulinge vyuma vize katwasakile kulingako tahi? Lumbununenu.

¹⁵ Satana keshi kuhasa kushinjila vatu mangana valinge vyuma vize kavazangile kulingako. (Yako. 1:14) Vatu vavavulu veji kulinganga vyuma asaka Satana mwomwo yakuzeneka kuchitachikiza. Oloze nge vanalinangula lyehi muchano, kaha mutu himutu eji kusakulanga jino owo atela kuzachila. (Vili. 3:17; 17:30) Kachi nge natufwila kulinga mwaya muchima waKalunga, kaha Satana keshi kuhasa kulinga chuma numba chimwe mangana ahokole kulonga chetuko.—Yopa 2:3; 27:5.

16, 17. (a) Vyuma vyeka muka vize Satana navandemone jenyi kavahasa kulingako? (b) Mwomwo ika katwatela kwivwa woma kulombela helu kuli Yehovako?

¹⁶ Kuli vyuma vikwavo vize Satana navandemone jenyi kavahasa kulingako. Chakutalilaho, Visoneka kavyasolola ngwavyo Satana eji kutalanga mumichima yavatuko. Yehova naYesu kaha vakiko vatwama nauhashi kana. (Samwe. 1, 16:7; Mako 2:8) Nyi ngachilihi kuhanjika chipwe kulombela helu? Kutala twatela kwivwa woma ngwetu nge natulombela helu kaha Liyavolo navandemone jenyi navevwako nakututangula tahi? Nduma. Mwomwo ika? Etu katwevwa woma kulinga vyuma vyakwoloka kumeso aYehova mwomwo yakushinganyeka ngwetu Liyavolo mwatumonako. Chochimwe nawa, katwatela kwivwa woma kulombela helu mwomwo yakushinganyeka ngwetu Liyavolo mwatwivwako. MuMbimbiliya mwatwama vyakutalilaho vyavivulu vyavangamba jaKalunga vaze valombelenga helu, kaha nawa nahamwe hauchi vasoneka ngwavo vatu kana vevwilenga woma Liyavolo. (Vamya. 1, 8:22, 23; Yowa. 11:41, 42; Vili. 4:23, 24) Nge natukilikita nangolo mangana tuhanjikenga hali Yehova nakulinga mwaya muchima wenyi, kaha natufwelela ngwetu Yehova keshi kwechelela Liyavolo alinge chuma numba chimwe chachipi kuli etuko.—Tangenu Samu 34:7.

¹⁷ Numba tuhu twatela kutachikiza kanawa muka-kole wetu, oloze katwatela kumwivwa womako. Yehova mwatukafwa mangana tufungulule Satana chamokomoko nakuhona kupwa tuvakukupuka. (Yowa. 1, 2:14) Shikaho nge natumwimanyina nakole, kaha mwatuchina. (Yako. 4:7; Petu. 1, 5:9) Chasoloka nge vatu asaka chikuma kuhungumwisa Satana shina vakweze. Jino vyuma muka vatela kulinga mangana vahase kwimanyina Liyavolo? Chihula kana navachikumbulula muchihande nachikavangizaho.