CHIHANDE CHAKULINANGULA 22
Alumunenuko Jila Mweji Kulinangwilangamo Mangana Munganyale
Kekesenu “mumone vyuma vyavilemu.”—FWILI. 1:10.
MWASO 35 ‘Kekesenu Mumone Vyuma Vyavilemu’
VYUMA NATUSHIMUTWILA *
1. Mwomwo ika vatu vamwe cheji kuvakaluhwilanga kulinangula?
MAKUMBI ano vatu vali nakuzata chikuma nangolo mangana vawane mwakuyoyela. Vandumbwetu vavavulu vali nakuzata jola jajivulu numba vawane vyakulikafwa navyo mukuyoya. Kaha nawa vatu vavavulu veji kutambukanga jola jajivulu hakuya kumilimo nakukinduluka kumembwavo. Veka nawa veji kuzakamanga jitanga javo hakuzata milimo yayikalu chikuma. Hakukinduluka kujizuvo, veji kuzeyanga chikuma, ngocho cheji kuvakaluhwilanga kulinangula.
2. Lwola muka lwamwaza mweji kulinangulanga?
2 Numba tuhu tweji kuzeyanga, oloze twatela kuzata nangolo tuwanengako lwola twatela kulinangula Mazu aKalunga namikanda yetu. Usoko wetu naYehova nakuyoya chahaya myaka yosena chapendamina hakulinangula. (Chimo. 1, 4:15) Vandumbwetu vamwe veji kuhindukanga chimenemene mangana valinangule mwomwo halwola kana kakweshi vyuma vyakuvatangulako. Kaha veka nawa veji kuwananga lwola kuchingoloshi lwakulinangula nakushinganyeka havyuma navatanga.
3-4. Vyuma muka vanalumunako kutalisa kuvyuma vyakushipilitu vize veji kutuhananga, kaha mwomwo ika?
3 Nayenu munahase kwitavila ngwenu chapwa chamwaza kuwanangako lwola lwakulinangula. Uno vyuma muka twatela kulinangula? Munahase kwamba ngwenu ‘tuli navyuma vyavivulu twatela kulinangula, shikaho chinahase kutukaluhwila kutanga vyuma vyosena.’ Vandumbwetu vamwe veji kulinangulanga vyuma vyosena eji kutuhananga ndungo wakushishika, oloze veka cheji kuvakaluhwilanga kuwana lwola lwakulinangula vyuma vyosena. Lizavu Lyakutwaminyina lyatachikiza ukalu kanou vali nakuhitamo vandumbwetu. Evi vikiko vinalingisa numba vakeheseko mikanda yakupulita neyi yahamakina.
Fwili. 1:10) Tushimutwilenu jino omu tunahase chatete kulinga vyuma vyavilemu nomu tunahase nawa kunganyala hakupwa naChilongesa chauka.
4 Chakutalilaho, katweshi nakupulita jino mukanda waYearbook of Jehovah’s Witnesses, mwomwo mijimbu yayivulu tuli nakuyiwana hakeyala yetu ya jw.org® najipolongalamu ja JW Broadcasting® jize jinakulovokanga kakweji hikakweji. Mangazini yaKaposhi Kakutalila yavatu vosena naTonenu! jili jino nakulovokanga katatu mumwaka. Kwalumuka kanechi nachitukafwa tuwane lwola lwakulinangula keshi lwakuhungukila kaha kumilimo yetuko. Oloze mangana tuhake “vyuma vyavilemu” chikuma kulutwe. (VANGILENU KULINGA VYUMA VYAVILEMU
5-6. Vyuma muka vize twatela kutanganga lwola lwosena?
5 Vyuma muka vyavilemu chikuma twatela kulinga? Twatela kuwanangako lwola lwakutanganga Mbimbiliya hakumbi hakumbi. Jivesi jamuMbimbiliya jize veji kunonekanga hakutanga Mbimbiliya chalumingo hichalumingo vanajikehesa mangana tupwenga nalwola lwaluvulu lwakushinganyeka havyuma natutanga nakuhehwojola vishina vimwe. Shikaho, katwatela kufwila kukumisa kaha kutanga jivesi kanako, oloze twatela kufwila kumona ngwetu mazu aKalunga tunakutanga ali nakutuheta kumichima mangana tupandame kuli Yehova.—Samu 19:14.
6 Vyuma vyeka muka twatela kulinangula? Twatela kuhitulukanga kanawa muchilongesa chaKaposhi Kakutalila, naChilongesa chaMbimbiliya chaChikungulwilo, navihande vyeka vyahakukunguluka chamukachi kachalumingo. Kaha nawa twatela kutanganga mangazini yaKaposhi Kakutalila yavatu vosena naTonenu!
7. Kutala twatela kwivwa kupihya kachi nge katweshi nakuhasa kutanga vyuma vyosena vali nakutuhakila hakeyala yetu chipwe ha JW Broadcasting tahi?
7 Tuyokutuyoku nawa, munahase kwamba ngwenu kuli vyuma vyavivulu chikuma vize vili hakeyala yetu ya jw.org, naha JW Broadcasting. Mukiko vene. Oloze achishinganyekenu hachakutalilaho chino, kachi nge vanamihakila vyakulya vyavivulu chikuma vyakulisezaseza hamesa. Kutala munahase kulya havyakulya vyosena vanamihane tahi? Nduma. Namulya kaha vize namuhasa. Chochimwe nawa, nge kamweshi nakuhasa kutanga vyuma vyosena vanakutuhana hamakinako, kaha kamwatela kwivwa kupihyako. Tangenu chipwe talenu kaha vyuma vize namuhasa. Tushimutwilenu jino vyuma vyasakiwa hakulinangula, nomu tunahase kunganyala chikuma kuvyuma natulinangula.
KULINANGULA KACHAPWA CHACHASHIKO
8. Vyuma muka tunahase kulinga nge tunakutanga Kaposhi Kakutalila, kaha kulinga vyuma kana nachiminganyalisa ngachilihi?
8 Kulinangula chasakiwa kutanga nakushinganyeka mangana mwivwishise kanawa, keshi nge kutanga lumbushi nakufunjejeka havyuma namukasaka kukumbulula kahako. Chakutalilaho, nge muli nakuhituluka muKaposhi Kakutalila Wakulinangula, mwatela kuvangila kutanga haze vanasoneka ngwavo, ‘Vyuma natushimutwila’ kumaputukilo achihande. Kufumaho, shinganyekenu hamutwe wachihande, nahatumitwe twatundende nahavihula vyakuhitulukamo. Kaha tangenu chihande chosena nakuchivwishisa kanawa. Kakavulu mukuku watete mupalangalafu weji kutukafwanga tutachikize chishina vanakulumbununa mupalangalafu. Mukuku kana naumikafwa mwivwishise ovyo vali nakushindakanya. Hakutanga chihande chosena, shinganyekenu omu palangalafu hipalangalafu yili nakukundwiza tumitwe twatundende nachihande chivene muli nakulinangula. Sonekenu mazu aze namuhona kwivwishisa navishina vimwe munevu vize namusaka mukahehwojoleho kanawa.
9. Mwomwo ika twatela kushinganyeka kanawa havisoneka nge tuli nakutanga Kaposhi Kakutalila, kaha mujila muka? (b) Kweseka namazu ahali Yoshuwa 1:8, vyuma muka twatela kulinga nge tunakutanga visoneka?
9 Anukenu ngwenu tweji kulinangulanga Mbimbiliya kuzachisa Kaposhi Kakutalila Wakulinangula. Mwatela kushinganyeka kanawa havisoneka vyosena chikumanyi vize vanasoneka ngwavo tangenu. Kekesenu mazu namikuku yili muchisoneka nomu yinakundwiza chishina chachinene mupalangalafu. Mwatela kushinganyeka havisoneka vize namutanga, nakuwana omu namuvizachishila mukuyoya chenu.—TangenuEnu visemi nangulenu vana venu mwakulinangwila (Talenu palangalafu 10) *
10. Kweseka namazu ahali WavaHepeleu 5:14, mwomwo ika visemi vatela kulongesela vana vavo mwakulinangwila nakuhehwojola hakulemesa Kalunga mwatanga?
10 Visemi vasaka vana vavo valivwise kuwaha chilongesa chaKulemesa Kalunga mwaTanga. Numba tuhu visemi vatela kuwahisa vyuma navalinangula hachilongesa chaKulemesa Kalunga mwaTanga, oloze kavatela kushinganyeka ngwavo lwola lwosena vatela kuwahisa vyuma vyakulipwila chalumingo hichalumingoko. Numba tuhu haKulemesa Kalunga mwaTanga tunahase kutala polongalamu ya JW Broadcasting, chipwe kuwahisa vyuma vyakufwana nge, mwakutungila wato waNowa navyuma vyeka, oloze chapwa nawa chachilemu kunangula vana vetu vatachikize mwakulinangwila kanawa. Vatela kutachikiza mwakuwahishila vihande vyakukukunguluka. Chakutalilaho, vatela kutachikiza mwakuhehwojwela vihula vanahase kuvahulisa kushikola. (Tangenu WavaHepeleu 5:14.) Kachi nge vana navalijilisa kulinangwilanga kuzuvo, kaha nachivakafwa vevwililenga kuvihande hakukunguluka kuZuvo yaWangana, nakukukunguluka chachihanda nakukukunguluka changalila kuze pamo kakweshi kupwa jivindiyoko. Tando navambata yakulinangula yinapendamina hachinyingi chavo namyaka vali nayo.
11. Mwomwo ika twatela kulongesela vilongesa vyetu vyaMbimbiliya mwakulinangwila?
11 Vilongesa vyetu vyaMbimbiliya navakiko vatela kutachikiza mwakulinangwila. Kachi nge vachili nakuputuka kulinangula, tweji kwivwanga kuwaha nge natumona vanafunjejeka lyehi vyuma navakakumbulula hachilongesa chipwe kukukunguluka. Oloze twatela kunangula vilongesa vyetu vyaMbimbiliya mwakuhehwojwela namwakulinangwila mangana vanganyale. Kulinga ngocho, nachivakafwa vahonenga kulahila kuli vakwavo muchikungulwilo mangana vavakafwe nge vali muukalu, oloze navatachikiza mwakuhehwojwela mumikanda yetu nakuwana vishina navivakafwa.
TACHIKIZENU OVYO MULI NAKULINANGWILA
12. Tweji kufwilanga vyuma muka hakulinangula?
12 Nge kamwasaka kulinangulako, kaha munahase kuhuhwasana numba nge munahase kulivwisa
kuwaha kulinangula nyi chiku. Oloze tachikizenu ngwenu munahase kulivwisa kuwaha. Putukenu kulinangula hakatando kakandende, kaha mukuhita chalwola namulinangula hatondo yayisuku. Fwilenu kutachikiza ovyo muli nakulinangwila. Chuma chachilemu twafwila tuvosena hakulinangula, shina kupandama kuli Yehova. Kaha nawa chuma chikwavo twafwila, shina tukahase kukakumbulula chihula vatuhulishile chipwe kuhehwojola haukalu umwe tuli nakuhitamo.13. (a) Lumbununenu vyuma atela kulinga muka-shikola mangana ahakwile vyuma afwelela? (b) Munahase kukavangiza ngachilihi mazu atwama hali Wavaka-Kolose 4:6?
13 Chakutalilaho, kutala muchili muvanyike, kaha nawa mwatwama kushikola tahi? Vakwenu vaka-shikola vavavulu vanahase kwazana muvilika vyamakumbi akusemuka. Munahase kuvalumbunwina kuzachisa Mbimbiliya ovyo mwakanyina kwazana muvilika kana. Oloze munahase kushinganyeka nawa ngwenu kamwatelemoko. Echi chatela kumilingisa muhehwojole hachihande kana. Vyuma mwatela kufwila shina: (1) mangana mwitavile ngwenu viwanyino vyamakumbi akusemuka vyeji kwivwisanga Kalunga kupihya, (2) mangana mupwenga nauhashi wakulumbununa kanawa muchano. (Mateu 14:6-11; Petu. 1, 3:15) Munahase kulihulisa ngwenu, ‘Mwomwo ika vakwetu vaka-shikola veji kwazanyinanga muvilika vyamakumbi akusemuka?’ Hehwojolenu mumikanda yetu hachihande kana. Tachikizenu ngwenu kuhakwila vyuma mwafwelela kachapwa chachikaluko. Vatu vamwe veji kulinga viwanyino vyamakumbi akusemuka, mwomwo yakushinganyeka ngwavo vatu vavavulu veji kulinganga vilika kana. Kachi nge namuwana chishina chimwe chipwe vivali, kaha munahase kukakumbulula kanawa mutu uze ali nakusaka kutachikiza muchano.—Tangenu Wavaka-Kolose 4:6.
TWALENUHO KUPWA NAMUCHIMA WAKUFWILA KULINANGULA
14-16. (a) Vyuma muka mwatela kulinga mangana mutachikize kanawa upolofweto uze kamwatachikiza kanawako? (b) Munahase kuzachisa ngachilihi visoneka vanenyikilako mangana mulumbunune mukanda waAmose? (Talenu nawa lipwata lyakwamba ngwavo, “Fwilenunga Kutachikiza Vatu Vavuluka muMbimbiliya.”)
14 Chakutalilaho, achishinganyekenu nge vanatulweze ngwavo chalumingo nachizaho natukashimutwila hamukanda umwe waupolofweto uze kawapwa wausuku chikuma, pamo upolofweto wamumukanda uze natukashimutwila katwawivwishisa kanawako. Chuma twatela kulinga shina kufwila kutachikiza upolofweto wamumukanda kana. Munahase kulinga ngachilihi ngocho?
15 Chatete, lihulisenu ngwenu: ‘Uno vyuma muka ngwatachikiza hali kapolofweto uze asonekele mukanda kanou? Uno kapolofweto kana lijina lyenyi ikiye iya, atwaminenga kulihi, kaha milimo muka azachilenga?’ Kutachikiza chiyoyelo chenyi nachitukafwa tutachikize ovyo azachishilile mazu amwe navifwanyisa vimwe. Shikaho omu namutanga Mbimbiliya, fwilenu kuwana mikuku yize nayimikafwa mutachikize kanawa kapolofweto kana.
16 Chamuchivali, tachikizenu lwola vasonekele mukanda. Munahase kulinga ngocho hakutala “Kunoneka chaMikanda YamuMbimbiliya” kunyima yaMbimbiliya yaVisoneka vyaKaye Kakahya. Kaha munahase nawa kutala chati yavapolofweto navamyangana yatwama haVihande Vyakuhakilako A6. Kachi nge mukanda wamuMbimbiliya munakulinangula waupolofweto, kaha mwatela kukekesa mumone vyuma vyasolokele halwola vasonekele mukanda kana. Vyuma muka vyavipi vize valingilenga vatu numba Kalunga atume kapolofweto akavahuhumune? Uno veya vaze vayoyelelele halwola apwileko uze kapolofweto? Mwatela kuhehwojola mumikanda yeka yamuMbimbiliya mangana mwivwishise kanawa mujimbu kana. Chakutalilaho, nge munakusaka mwivwishise vyuma vyapwile nakusoloka halwola ayoyele kapolofweto Amose, kaha mwatela kukekesa mukanda waVamyangana 2, naMijimbu 2, yize yatwama havisoneka vyakwinyikilako mumukanda waAmose 1:1. Kaha nawa munahase kutanga mukanda waHozeya uze pamo ayoyelele hamwe naAmose. Kuzachisa jijila kaneji nachimikafwa mutachikize lwola apwileko Amose.—Vamya. 2, 14:25-28; Miji. 2, 26:1-15; Hoze. 1:1-11; Amo. 1:1.
WANENU MASHINA NAMASONGO
17-18. Kweseka navyakutalilaho vili mujipalangalafu, chipwe chakutalilaho chenu, lumbununenu omu kushinganyeka chikuma hamazu namutanga chinahase kumilingisa mulivwise kuwaha kulinangula Mbimbiliya?
17 Kachi nge muli nakulinangula Mbimbiliya, kaha fwilenu kutachikiza vyavivulu hamujimbu muli nakutanga. Shinganyekenu muli nakutanga upolofweto wamukanda waZekaliya kapetulu 12, uze wahanjika hakufwa chaMeshiya. (Zeka. 12:10) Jino omu namuheta muvesi 12, namuwana mazu akwamba ngwavo, “vaze vakuzuvo yaNatane” navakalila chikuma hakufwa chaMeshiya. Muchishishisa chakutanga kaha nakuseza mazu kana, mwatela kulihulisa ngwenu: ‘Mwomwo ika vaze vakuzuvo yaNatane navalilila kufwa chaMeshiya? Uno kuliko mijimbu yikwavo nayimikafwa mwivwishise mujimbu kana tahi?’ Chuma nachimikafwa shina kuhehwojola. Chisoneka chakwinyikilako nachimitwala hali Samwele 2, 5:13, 14, haze namuwana nge Natane apwile mwana Mwangana Ndavichi. Chisoneka chikwavo chakwinyikilako shina chaLuka 3:23, 31, chize chasolola nge Yesu apwile wakuchisemunwino chaNatane kuhichila muli Maliya. (Talenu Kaposhi Kakutalila No 3, 2016, li. 9 hamutwe wakwamba ngwavo “Uno Mwatachikiza Tahi?”) Namwivwa kuwaha hakutachikiza ngwenu upolofweto wahanjikilile chimweza ngwawo Yesu mwakasemukila kuchisaka chaNdavichi. (Mateu 22:42) Oloze Ndavichi apwile navana vakuhambakana 20. Namumona jino ngwenu chapwile chakutamo kuli Zekaliya kuvuluka ngwenyi vaze vakuzuvo yaNatane navakalila hakufwa chaYesu.
Luka 1:32, 33) Pamo tunahase kutala kaha hamazu aze ahanjikile Ngavalyele hali Yesu ngwenyi, mwakapwa “Mwana wayou Wakulitulaho Chikuma.” Oloze Ngavalyele ahanjikile cheka ngwenyi, Yesu “mwakapwanga Mwangana.” Shikaho tunahase kushinganyeka omwo evwile Maliya hamazu vamulwezele kuli Ngavalyele. Uno Maliya ashinganyekele ngwenyi Yesu mwakashisa Mwangana Helote, chipwe kukashisa vaze navakaswana Helote mangana akayule muIsalele tahi? Kachi nge Yesu ashishile hawangana, kaha Maliya kachi apwile naye yamwangana, kaha tanga yenyi kachi yapwilenga kunganda. Oloze kakwatwama mujimbu uze wasolola nge Maliya ahulishile vihula kana uze kangeloko. Kaha nawa kakwatwama mujimbu wasolola nge Maliya alombele chihela muWangana ngana muze valingile tumbaji twaYesu vavaliko. (Mateu 20:20-23) Mujimbu kana wasolola muchima wakulinyisa apwile nawo Maliya.
18 Tutalenu chakutalilaho chikwavo. Mukapetulu watete mumukanda waLuka tweji kuwanangamo mujimbu wakwamba ngwavo, kangelo Ngavalyele ayile kuli Maliya nakumulweza vyamwana walunga mwakasema, ngwenyi: “Ou mwana mwakapwanga wamulemu, kaha navakamuvulukanga ngwavo, Mwana wayou Wakulitulaho Chikuma. Yehova Kalunga mwakamuhana litanda lyakakuluka yenyi Ndavichi. Mwakapwanga Mwangana wavava vakuzuvo yaYakova haya myaka yosena.” (19-20. Kweseka nomu vahanjika hali WaYakova 1:22-25; na 4:8, vyuma muka twatela kufwila kachi nge tuli nakulinangula?
19 Twatela kutachikiza nge tweji kulinangulanga Mbimbiliya namikanda yetu mangana tupandame chikuma kuli Yehova. Kaha nawa twafwila kutachikiza kanawa omwo tweji ‘kusolokanga’ navilinga twatela kwalumunako mukuyoya chetu mangana twivwise Kalunga kuwaha. (Tangenu WaYakova 1:22-25; 4:8.) Shikaho kala lwola natuputuka kulinangula, twatela kulombanga Yehova atuhane shipilitu yenyi yajila. Twatela kumulembelela atukafwe mangana tunganyale kuvyuma tunakulinangula nakumona vyuma twatela kwalumunako mukuyoya chetu.
20 Tuvosena tufwilenu kupwa ngana mwangamba yaKalunga wakushishika uze vavuluka kuli muka-kwimba jisamu ngwenyi: “Evwila kuwaha jishimbi jaYehova, kaha eji kutanganga jishimbi jenyi nakujishinganyekanga musana naufuku. . . . Vyosena mwalinganga navifukilanga.”—Samu 1:2, 3.
MWASO 88 Ngulweze Jijila Jove
^ par. 5 Yehova eji kutuhananga vyuma vyavivulu vyakushipilitu vyakufwana nge mikanda, najivindiyo najimangazini mangana tulinangule. Chihande chino nachimikafwa mutachikize mwakulinangwila mangana munganyale chikuma halwola namulinangula.
^ par. 61 MAZU AKULUMBUNUNA MUVWIMBIMBI: Visemi vali nakunangula vana vavo mwakuhitulukila Kaposhi Kakutalila Wakulinangula.
^ par. 63 MAZU AKULUMBUNUNA MUVWIMBIMBI: Ndumbwetu walunga ali nakuhehwojola awane mujimbu waAmose. Eyi mivwimbimbi, yinakusolola vyuma ali nakuhumikiza ndumbwetu omu ali nakutanga nakushinganyeka hamujimbu wamuMbimbiliya.