1. Uno Mazu aKalunga eji kutunangulanga vyuma muka?

TUNAHASE kuwana jila yize nayitukafwa tumike mukala ukalu mwomwo Yehova ikiye Muka-kunangula Wamunene. (Isa. 30:20, 21) Mazu enyi eji kutunangulanga ‘tupwenga vakutamo mwosena,’ kaha nawa ‘vakulizanga mwosena kuzata milimo yamwaza yosena.’ (Chimo. 2, 3:17) Kachi nge natuyoya kweseka namwaya Mazu aKalunga, kaha natupwa vakunangakana kuhambakana vatu vaze veji kukundwizanga “mangana akaye kano.”—Koli. 1, 3:19; Samu 119:97-100.

2. Vyuma muka natulinangula muchihande chino?

² Nganomu natumona muchihande chino, mangana akaye eji kusolokanga kupwa amwaza kuvatu. Shikaho chinahase kutukaluhwila kuhonesa vishinganyeka navilinga vyamukaye kano. Evi vikiko Mbimbiliya yahanjikila ngwayo: “Zangamenu kuchina nakupwa mutu umwe mwamitwala muundungo namangana autu, nakutangisa chamokomoko nge omu mwaya visemwa vyavatu.” (Kolo. 2:8) Muchihande chino, natulinangula omu vatu vaputukile kufwelela vyuma vivali vyamakuli vize azanga Satana. Natumona nawa omu mangana akaye apwila uleya nomu mangana amuMazu aKalunga ahambakana kala vyuma vyamuno mukaye.

3-4. Uno vishinganyeka vyavatu muUnited States vyalumukile ngachilihi mulikulukaji lyamyaka lyakusokesa 20?

³ Kumaputukilo alikulukaji lyamyaka lyakusokesa 20, vatu muUnited States valumwine vishinganyeka vyakwoloka vapwilenga navyo hachihande chakulisavala. Kunyima vatu vavavulu vamwene ngwavo, kulisavala chapwile kaha chavatu vavali vaze valimbata, kaha nawa vachimwene kupwa chakuhenga kuhanjika chihande chakulisavala hakachi kavatu. Oloze kutwala muze  vishinganyeka kanevi vavileunwine, ngocho vilinga vyavipi vyalisalile chikuma.

⁴ Mumyaka yamuji 1920 nakuheta muji 1929, vatu vandupukilile chikuma muviseke namuujila. Muka-kuhehwojola umwe ambile ngwenyi, “vyuma kanevi vyavipi vavisolwelenga chikuma mujivindiyo, namumikanda, nakuvimba mumyaso namujijila jeka jajivulu.” Mumyaka kaneyi, vwaliso yavatu najila vakinyinyinengamo vyakundwijilenga ujila. Ngana muze yahanjikile Mbimbiliya ngwayo mumakumbi akukuminyina vatu ‘navakazanga chikuma viseke.’—Chimo. 2, 3:4.

5. Ukalu muka unasoloka mukaye omu vatu vanalinginga vyuma vyavipi kufuma vene muji 1960?

⁵ Muji 1960 vihande vyakufwana nge vatu kutwama hamwe chakuzeneka kulimbata, nakulisavala chavatu vausonyi woumwe nakulilukulula vyalisalile chikuma. Kuhemahema chachivulu chakundwijilenga chikuma ujila. Ukalu muka unafumu hakulinga vilinga kanevi vyaunyengwe? Muka-kusoneka mijimbu umwe ambile ngwenyi, “kuhona kukavangiza vilinga vyakwoloka” chinalingisa malo amavulu mukaye afwenga, nakulingisa vana vavalele kuli chisemi umwe, nakupwa natato yakutalanga mivwimbimbi yauselesele, nakulingisa vatu vahombe nakumona ukalu weka. Kulisala chamisongo yakulitambwisa muujila yakufwana nge AIDS, yinasolola hatoma nge mangana amuno mukaye apwa uleya.—Petu. 2, 2:19.

6. Uno Satana eji kwivwanga ngachilihi nge vatu kaveshi nakukavangiza jindongi jakwoloka kutalisa kukulisavala?

⁶ Jila yize kaye keji kumwenangamo ujila yeji kwivwisanga Satana kuwaha. Chakuzeneka kuhuhwasana, Satana eji kwivwanga kuwaha nge mwamona vatu kaveshi nakukavangiza jindongi jaKalunga kutalisa kuchihande chakulisavala, nakuhona kuvumbika ulo uze wapwa wana wakufuma kuli Kalunga. (Efwe. 2:2) Kulinga ujila kachavumbika wana wakusema uze atuhana Kalungako, kaha nawa vaze veji kulinganga ujila kaveshi kukapwa nakuyoya chahaya myaka yosenako.—Koli. 1, 6:9, 10.

7-8. Mwomwo ika kukavangiza jindongi jamuMbimbiliya kutalisa kuchihande chakulisavala chapwila chamwaza?

⁷ Vatu vaze veji kukavangizanga mangana amukaye veji kuleununanga jindongi jamuMbimbiliya nakuhanjika ngwavo kajazatako. Vatu kana vanahase kuhulisa ngwavo, ‘Mwomwo ika Kalunga atutengelelele napeha yakusaka kulisavala oloze mwatulweza nawa ngwenyi katwatela kulisavala kachi nge tunasake?’ Vatu kana veji kuhulisanga chihula kana mwomwo yakushinganyeka mujila yakuhenga ngwavo mutu himutu atela kulinga kala vyuma nasake. Oloze  Mbimbiliya kayahanjika ngochoko. Yeji kutunangulanga ngwayo, tukwechi muchima wakulikanyisa etu vavene kutalisa kupeha yakusaka kulisavala. (Kolo. 3:5) Kaha nawa Yehova ahakako ulo mangana lunga napwevo vaze valimbata valivwisenga kuwaha kulisavala. (Koli. 1, 7:8, 9) Kulinga ngocho nachikafwa lunga napwevo valivwise kuwaha kulisavala chakuzeneka kulizakamina haukalu uze weji kwizanga mwomwo yakulinga ujila.

⁸ Kaye keji kunangulanga vatu vyuma vyakuhenga kutalisa kuchihande chakulisavala, oloze Mbimbiliya yatulweza jindongi jakwoloka kutalisa kuchihande kana, kaha kujikavangiza cheji kukinganga vatu kumisongo yize yeji kwizanga mwomwo yakulinga ujila. Yahanjika nawa ngwayo kulisavala cheji kunehanga kuwahilila. (Vis 5:18, 19) Mbimbiliya yahanjika nawa ngwayo: “Mutu himutu atachikize mwakulamina mujimba wenyi ivene mukujila namukavumbi, keshi nachipululu napeha yayipi yakusaka kulisavalako, ngana mwavaka-mafuchi vaze vahona kutachikiza Kalunga.”—Teso. 1, 4:4, 5.

9. (a) Uno vatu jaYehova mulikulukaji lyamyaka lyakusokesa 20, vavakolezezele ngachilihi vakavangize mangana amuMazu aKalunga? (b) Mazu muka akutuhuhumuna atwama hali WaYowano 1, 2:15, 16? (c) Kweseka namazu ahali Wavaka-Loma 1:24-27, vilinga muka vyamajilo vize twatela kulihendako?

⁹ Kumaputukilo alikulukaji lyamyaka lyakusokesa 20, vatu jaYehova kavavahungumwishile nakunangula chamokomoko chavaze vapwile ‘navivezu vyakumbumbulako.’ (Efwe. 4:19) Vafwililile chikuma kulama jindongi jaYehova. Kaposhi Kakutalila waMay 15, 1926 ambile ngwenyi, “lunga chipwe pwevo atela kupwa utoma muvishinganyeka namuvilinga, chikumanyi kuli mutu wausonyi weka.” Chamokomoko navyuma vyapwilenga nakusoloka mukaye halwola kana, vatu jaYehova vakavangijile mangana amuMazu aKalunga. (Tangenu WaYowano 1, 2:15, 16.) Ocho kutokwa kana hakupwa naMazu aKalunga! Twawahilila chikuma hakutuhana kulya chakushipilitu mangana chitukafwe tuhone kukavangiza mangana amukaye kutalisa kukulisavala. *—Tangenu Wavaka-Loma 1:24-27.

10-11. Vyuma muka vize Mbimbiliya yahanjikile chimweza ngwayo navikasoloka hamakumbi akukuminyina?

¹⁰ Mbimbiliya yahanjikile chimweza ngwayo, hamakumbi akukuminyina vatu “navakapwa vaka-kulizanga vavene.” (Chimo. 2, 3:1, 2) Echi chikiko chinakulingisa vatu mukaye vapwenga namuchima wakulizanga vavene. Muji 1970 mukanda umwe wambile ngwawo, “halwola kana kwapwile mikanda yize yapwile nakukafwa vatu mangana vafukile mukuyoya chavo. Mikanda yimwe yakolezezele vaze vapwile nakuyitanga valimone vavene kupwa vatu vavalemu nakuhona kwitavila kala mutu avalweze valumuneko jila veji kulingilangamo vyuma vimwe. Chakutalilaho, mukanda umwe wahanjikile ngwawo: “Watela kulizanga chikuma yove yavene nakulimona kupwa uwamwaza kaha nawa uwamulemu chikuma havatu vosena vaze vayoyaho lyehi hano hamavu.” Mukanda kana wahanjikile nawa ngwawo, “mutu atela kulisakwila ivene jila atela kulingilamo vyuma, nakulinga vyuma vize mwamona ivene ngwenyi vyakwoloka vize nawa mwatesamo.”

¹¹ Uno nayenu mwevwaho lyehi mazu akufwana ngana tahi? Satana alwezele Eve apwenga navishinganyeka kana. Amulwezele ngwenyi, ‘mwapwa nge Kalunga, kaha mwatachikiza kuwaha nakupihya.’ (Kupu. 3:5) Makumbi ano, vatu vavavulu vali namuchima wakulimona vavene kupwa vavalemu chikuma, kaha kavasaka mutu weka chipwe vene Kalunga kuvalweza vyakulingako. Muchima kana unasoloka hatoma chikumanyi omu vatu vanakumwenamo ulo.

12. Uno vatu mukaye vamona ngachilihi jishiko jaulo?

 ¹² Mbimbiliya yalweza vosena vaze vali mumalo valivumbikenga navaka-mahyavo, nakumona jishiko jaulo kupwa jajilemu. Yakolezeza lunga napwevo vaze valimbata vatwaleho lika kulama ulo wavo. Yahanjika nawa ngwayo: “Lunga mwakaseza ise nanaye nakukalipanjika napwevo lyenyi, kaha navakapwanga mujimba umwe.” (Kupu. 2:24) Oloze vatu vaze veji kukavangizanga mangana akaye vamona ulo mujila yeka. Vatu kana vamba ngwavo mutu himutu muulo atela kuzakama vyuma vize afwila yavene. Mukanda uze wahanjika hakulilukulula wamba ngwawo: “Lushiko luze veji kulishikanga vatu hakulimbata lwakwamba ngwavo, ‘natutwamanga hamwe mukuyoya chetu chosena,’ valushishisa nalushiko lwakwamba ngwavo, ‘natutwamanga hamwe kachi nge natutwalaho lika kulizanga nge pimbi kaha twatela kulilukulula.’” Kumona ulo mujila yangana, chinalingisa malo amavulu kufwa nakuseza nawa jitanga muukalu waunene. Chikupu vene, vatu mukaye valelesa chikuma jishiko jaulo.

13. Mwomwo ika Yehova amwena vatu vakulivwimba kupwa vaunyengwe?

¹³ Mbimbiliya yamba ngwayo: “Mutu wamuchima wakulivwimba napu waunyengwe kumeso aYehova.” (Vishi. 16:5) Mwomwo ika Yehova amwena vatu vakulivwimba kupwa vaunyengwe? Mwomwo vaka-kulivwimba veji kukundwizanga vishinganyeka vyaSatana. Achishinganyekenu kazamuzamu apwile nako Satana hakulweza Yesu uze vazachishile kuli Kalunga hakutenga vyuma vyosena ngwenyi, lifukule kuli ami. (Mateu 4:8, 9; Kolo. 1:15, 16) Numba tuhu vatu vakulivwimba veji kulimonanga vavene nge vatwama namangana, oloze Yehova avamona kupwa vileya.

14. Uno mazu ahali Wavaka-Loma 12:3 atukafwa ngachilihi?

¹⁴ Mbimbiliya kayatulweza tulihunge etu vaveneko, oloze yatulweza tulizange nakuzanga vakwetu. Chakutalilaho, Yesu ambile ngwenyi: “Zangenunga vakwenu nganomu mwalizanga enu vavene.” Mazu kana asolola nge chapwa  chakutamo mutu kulizanga yavene mujila yakutamo. (Mateu 19:19) Chipwe ngocho, Mbimbiliya yatuhuhumuna ngwayo katwatela kulimona kupwa tuvavalemu chikuma kuhambakana vakwetuko. Yahanjika ngwayo: “Kanda kulinga chuma numba chimwe namuchima wakulikindukilako, chipwe namuchima wakulitohwesa chamokomokoko, oloze linyisenunga nakumona vakwenu ngwenu vamihambakana enu.”—Fwili. 2:3; tangenu Wavaka-Loma 12:3.

15. Vyuma muka vize vinamilingisa mwitavile ngwenu kukavangiza mangana amuMbimbiliya chapwa chachilemu chikuma?

¹⁵ Vatu vavavulu vaze valimona kupwa vavalemu kuhambakana vakwavo, veji kumonanga vyuma yahuhumuna Mbimbiliya kupwa vyauleya. Mwomwo veji kwambanga ngwavo, kachi nge mumona vakwenu kupwa vavalemu chikuma kukuhambakana yove, kaha vakiko navakumona kupwa uwakusalila chikuma. Uno ukalu muka unafumu hakukavangiza vishinganyeka vyavatu vamukaye kaSatana? Vyuma muka vize munalimwena nameso enu kapu? Uno vatu vaze valimona kupwa vavalemu chikuma vapwa vakuwahilila tahi? Kutala vatu kana vakwechi jitanga jakuwahilila tahi? Uno vakwechi masepa vamwenemwene tahi? Kutala vatwama nausoko wakukola naKalunga tahi? Uno chuma muka cheji kulingisanga mutu apwenga wakuwahilila, kukavangiza mangana amuMazu aKalunga tahi nyi kukavangiza mangana akaye kaSatana?

16-17. Vyuma muka vyatulingisa tuwahilile, kaha mwomwo ika?

¹⁶ Vatu vaze veji kukavangizanga mangana akaye vanafwane nge mutu uze najimbala, kaha mwahulisa mukwavo nawa uze najimbala amulweze kuchihela atela kuya. Yesu alwezele vatu vaze valimwene kupwa vaka-mangana ngwenyi: “Vanapu vatwamina vatupuputa. Kachi nge kapuputa mwatwaminyina mukwavo kapuputa, kaha vosena vavali navaholokela muwina.” (Mateu 15:14) Chikupu vene, Kalunga amona mangana akaye kupwa uleya.

¹⁷ Mazu vasoneka muMbimbiliya, ‘awahila kunangula, nakuhanjikila, nakusungamisa vyuma, nakuzangamisa mukwoloka.’ (Chimo. 2, 3:16, kwinyikila chamwishi.) Twawahilila chikuma omu Yehova naliuka lyenyi vyeji kutukinganga kumangana akano akaye kaSatana. (Efwe. 4:14) Kalunga eji kutuhananga kulya chakushipilitu chize cheji kutukafwanga tuzange chikuma jindongi jamuMazu enyi. Muchano vene, twatokwa chikuma hakututwaminyina kumangana amuMazu aKalunga.