1. Vyuma muka vivali twatela kutachikiza?

YEHOVA KALUNGA azanga vangamba jenyi. Navazangenga lika putu vene kushikulu, kaha achili lika nakuvazanga. Kaha nawa azanga chiyulo. (Samu 33:5) Shikaho twatela kutachikiza vyuma vino vivali: (1) Yehova eji kwivwanga kukola kumuchima kachi nge vangamba jenyi vali nakuvayanjisa. (2) Atufwelelesa ngwenyi keshi kukechelela vangamba jenyi vakavayanjisenga likako, kaha nawa mwakazangamisa vaze vali nakuvayanjisa. Muchihande chino chatete, * natulinangula nge Jishimbi jize Kalunga ahanyine vaIsalele kuhichila muli Mose japendaminyine hazangi. Jakafwile vatu vasolole chiyulo kuli vosena, chikumanyi kuli vaze kavapwilenga vakukingiwako. (Lushi. 10:18) Jishimbi kana jasolola chikupu nge Yehova azakama chikuma vangamba jenyi.

2. Vihula muka natushimutwila?

² Kukavangiza Jishimbi vahanyine Mose, chakumine mu 33 C.E. omu chikungulwilo chavaka-Kulishitu chaputukile. Kutala kwapwileko lushimbi lweka luze lwapendaminyine hazangi nakukundwiza chiyulo, luze lwatelelele kunganyalisa vaka-Kulishitu tahi? Eyo. Vaka-Kulishitu vavahanyine lushimbi lwaluhya. Muchihande chino natushimutwila halushimbi kana, kufumaho natukumbulula vihula vino vitatu: Mwomwo ika natwambila ngwetu elu lushimbi lwaluhya lwazama hazangi? Kaha mwomwo ika natwambila ngwetu lushimbi kana lwakundwiza chiyulo? Kweseka nalushimbi kana, uno vaze veji kutwaminyinanga, vatela kutwama ngachilihi nakwavo?

3. Kweseka namukanda Wavaka-Ngalesha 6:2, vyuma muka vyatwama ‘mulushimbi lwaKulishitu’?

³ Tangenu Wavaka-Ngalesha 6:2. Vaka-Kulishitu vavalweza kukavangizanga “lushimbi lwaKulishitu.” Yesu kasonekele mukana wajishimbi jize vatelelele kukavangiza tumbaji twenyiko, oloze avahanyine jindongi najishimbi jize jatelelele kuvatwaminyina. ‘Mulushimbi lwaKulishitu’ mwatwama vyuma vyosena vize anangwilenga Yesu. Mujipalangalafu jinakavangizaho, natushimutwila vyuma vyavivulu halushimbi kana mangana tulutachikize kanawa.

4-5. Uno Yesu anangwilenga ngachilihi vatu, kaha lwola muka avanangwilenga?

⁴ Uno Yesu anangwilenga ngachilihi vatu? Chatete, avanangwilenga kuhichila muvyuma ahanjikilenga. Vyuma ahanjikilenga vyakunywilenga vatu mwomwo ahanjikilenga vyuma vyamuchano hali Kalunga, novyo tweji kuyoyelanga, kaha nawa avulukile ngwenyi Wangana waKalunga ukiko naukafumisako kuyanda chosena. (Luka 24:19) Chamuchivali, Yesu anangwilenga vatu kuhichila muvyuma alingilenga. Vyuma alingilenga mukuyoya chenyi, vyahanyinenga chakutalilaho chamwaza, chize vatelelele kulondezeza vaka-kumukavangiza.—Yowa. 13:15.

⁵ Lwola muka Yesu anangwilenga vatu? Avanangwilenga omu azachilenga mulimo wenyi wakwambulula hano hamavu. (Mateu 4:23) Kaha nawa anangwilenga vaka-kumukavangiza hanyima yakumusangula. Chakutalilaho, asolokele kuli tumbaji twenyi vakuhambakana 500, kaha avahanyine lushimbi ‘lwakunangula vatu vapwenga tumbaji.’ (Mateu 28:19, 20; Koli. 1, 15:6) Omu Yesu akindulukile mwilu, atwalileho lika kunangula tumbaji twenyi mwomwo ikiye mutwe wachikungulwilo. Chakutalilaho, kafwe mu 96 C.E., Kulishitu alwezele kaposetolo Yowano akolezeze vaka-Kulishitu vawavisa nakuvakafwa.—Kolo. 1:18; Kuso. 1:1.

6-7. (a) Uno vyuma anangwilenga Yesu vavisoneka kulihi? (b) Tweji kukavangizanga ngachilihi lushimbi lwaKulishitu?

⁶ Uno vyuma anangwilenga Yesu vavisoneka kulihi? Vyuma vyavivulu vize Yesu ahanjikilenga navize alingilenga omu apwile hano hamavu, vavisoneka muMikanda yiwana yaMujimbu Wamwaza. Kaha mikanda yikwavo yaVisoneka VyachiHelase vyaVaka-Kulishitu yize vasonekele kuli malunga vaze vahwiminyinyine nashipilitu yajila, vaze nawa vapwile “navishinganyeka vyaKulishitu,” yatukafwa tutachikize omwo Yesu amwenamo vyuma.—Koli. 1, 2:16.

 ⁷ Vishina natulinangulako: Vyuma anangwilenga Yesu vyeji kutukafwanga muvyuma vyosena tweji kulinganga mukuyoya. Shikaho lushimbi lwaKulishitu lweji kutukafwanga muvyuma tweji kulinganga hamembo etu, nakumilimo, nakushikola namuchikungulwilo. Tweji kulinangulanga lushimbi kana kuhichila mukutanga Visoneka VyachiHelase vyaVaka-Kulishitu nakushinganyekanga havyuma natutanga. Kaha tweji kukavangizanga jindongi najishimbi jize jatwama muli evi visoneka, kulinga ngocho nachisolola nge twakavangiza lushimbi kana. Shikaho nge natukavangizanga lushimbi lwaKulishitu, kaha tuli nakwononoka Kalunga ketu wazangi Yehova, uze apwa mwenya vyuma vyosena vize anangwilenga Yesu.—Yowa. 8:28.

8. Uno lushimbi lwaKulishitu lwapendamina haka?

⁸ Kachi nge zuvo vanayitungila hachihela chakukola, yeji kulingisanga vatu vaze navatwamamo valivwe kupwa vakukingiwa. Chochimwe nawa, nalushimbi luze lwazama hachuma chakukola, lweji kulingisanga vatu vaze navalukavangiza valivwe kupwa vakukingiwa. Lushimbi lwaKulishitu lwapendamina hazangi mwomwo yikiko yapwa yayilemu chikuma. Mwomwo ika tunahanjikila ngocho?

9-10. Vyakutalilaho muka vyasolola nge Yesu alingilenga vyuma mwomwo yazangi, kaha tunahase kumulondezeza ngachilihi?

⁹ Chatete, vyuma vize alingilenga Yesu, avilingilenga mwomwo yazangi. Zangi yikiko yeji kulingisanga mutu apwenga namuchima wakeke chipwe wakutetela. Keke yikiko yalingishilenga Yesu anangule makombakaji avatu, nakuka vaveji, nakulisa vaze vapwile nazala, nakusangula vafu. (Mateu 14:14; 15:32-38; Mako 6:34; Luka 7:11-15) Numba tuhu kulinga vyuma kana chasakiwile lwola lwaluvulu nangolo, oloze Yesu alisuwile kuhaka vyuma vasakilenga vakwavo kulutwe kuhambakana vize asakilenga ivene. Jila yakulipwila asolwelelemo zangi yayinene shina, kwecha mwono wenyi hali vakwavo.—Yowa. 15:13.

¹⁰ Vishina natulinangulako: Tunahase kulondezeza Yesu hakuhaka vyuma vasaka vakwetu kulutwe kuhambakana vize twasaka etu vavene. Tunahase nawa kumulondezeza hakwivwila keke vatu vaze tweji kwambulilanga mungalila yetu. Kachi nge muchima kanou wakeke nautulingisa tufwile kwambulula mujimbu wamwaza nakunangula vatu, kaha natusolola ngwetu tuli nakukavangiza lushimbi lwaKulishitu.

11-12. (a) Vyuma muka vyasolola nge Yehova atuzakama chikuma? (b) Tunahase kulondezeza ngachilihi Yehova hamuchima wenyi wazangi?

¹¹ Chamuchivali, Yesu asolwele hatoma muchima wazangi atwama nawo Ise. Vyuma alingilenga Yesu omu azachilenga mulimo wenyi wakwambulula hano hamavu, vyasolwele chikupu nge Yehova azakama vaka-kumulemesa. Yesu alingilenga vyuma vyavivulu. Chakutalilaho, anangwilenga ngwenyi Setu wamwilu, atumona kupwa tuvavalemu. (Mateu 10:31) Yehova afwila kukonekela mukoko wakujimbala uze mwapihilila nakwalumuka nakukinduluka kuchikungulwilo. (Luka 15:7, 10) Yehova asolwele ngwenyi atuzanga hakutuhana Mwanenyi kupwa ndando yakutusokola.—Yowa. 3:16.

¹² Vishina natulinangulako: Uno tunahase kulondezeza ngachilihi Yehova hamuchima wenyi wazangi? (Efwe. 5:1, 2) Tweji kulinganga ngocho hakumonanga vandumbwetu vosena kupwa vavalemu, nakusambilila “mukoko wakujimbala” uze nakinduluka kuli Yehova. (Samu 119:176) Tweji kusololanga hatoma ngwetu twazanga vandumbwetu hakulisuula kuvakafwa nge vali muukalu. (Yowa. 1, 3:17) Kachi nge natuzakamanga vakwetu kaha natusolola hatoma ngwetu tuli nakukavangiza lushimbi lwaKulishitu.

13-14. (a) Kweseka nachisoneka chaYowano 13:34, 35, Yesu alwezele vaka-kumukavangiza valingenga ika, kaha mwomwo ika vyuma kana vyapwila lushimbi lwaluhya? (b) Uno tweji kukavangizanga ngachilihi lushimbi lwaluhya?

¹³ Chamuchitatu, Yesu alwezele vaka-kumukavangiza vazangenga vakwavo ngana muze atuzanga ikiye. (Tangenu Yowano 13:34, 35.) Elu lushimbi ahanyine Yesu, lwapwa lwaluhya mwomwo lwatulweza tusololenga zangi mujila yakulipwila, yize yalihandununa naLushimbi luze Kalunga ahanyine vaIsalele. Lushimbi kanelu, lwatulweza tuzangenga  vandumbwetu ngana muze atuzanga Yesu. Ngocho, twatela kuvazanga chikuma ngana muze atuzanga ikiye. * Kaha zangi kana, yatela kutulingisa tuzange chikuma vakwetu kuhambakana nomu twalizanga etu vavene. Twatela kuvazanga chikuma kuheta nakuseteko yakuvafwila ngana muze alingile Yesu.

¹⁴ Vishina natulinangulako: Uno tunahase kukavangiza ngachilihi lushimbi lwaluhya? Tunahase kulinga ngocho hakulisuula kukafwa vandumbwetu. Tweji kulisuulanga kulinga vyuma vyavinene vyakufwana nge, kuhaka kuyoya chetu muponde mangana tuvakinge, nakuvakafwa nawa muvyuma vyavindende. Chakutalilaho, tunahase kumbatangako ndumbwetu wakashinakaji nakuya nenyi kukukunguluka, chipwe kulitwamina kulinga vyuma vimwe mangana twivwise vandumbwetu kuwaha, chipwe kulombako lwola kumilimo mangana tuyenga nakukafwa vandumbwetu vali muukalu wakulijila. Kulinga vyuma kana nachisolola nge tuli nakukavangiza lushimbi lwaKulishitu. Kaha nawa nachikafwa vandumbwetu muchikungulwilo valivwe kupwa vakukingiwa.

15-17. (a) Uno vyuma alingilenga Yesu vyasolwele ngachilihi nge apwile wachiyulo? (b) Tunahase kulondezeza ngachilihi Yesu?

¹⁵ Kweseka naMbimbiliya, lizu “chiyulo” lyalumbununa kulinga vyuma vize amona Kalunga kupwa vyakwoloka chakuzeneka kutala vatu kumeso. Mwomwo ika natwambila ngwetu lushimbi lwaKulishitu lwakundwiza chiyulo?

¹⁶ Chatete, tuchitalenu havyuma alingilenga Yesu mangana tumone omu asolwele chiyulo. Vatwamina vamukwitava chavaYuleya vamumakumbi aYesu, vahungilenga vatu vaze kavapwile vaYuleyako, nakulumbilisa vaYuleya vakuhona kutanga, nakuhona kuvumbika mapwevo. Oloze, Yesu amwenenga vatu vosena kupwa vavalemu. Etavililenga navaze kavapwile vaYuleyako kupwa vaka-kumukavangiza mwomwo yakumufwelela. (Mateu 8:5-10, 13) Ambulililenga vatu vosena kuhakilako navihutu navaka-luheto. (Mateu 11:5; Luka 19:2, 9) Yesu kayanjishilenga mapwevo chipwe kuvatenukilako, oloze avavumbikilenga nakuvasolwela likoji kuhakilako vene navaze vamwenenga kuvatu kupwa vamokomoko.—Luka 7:37-39, 44-50.

¹⁷ Vishina natulinangulako: Tunahase kulondezeza Yesu hakuhona kutalanga vatu kumeso nakwambulila vosena vaze navasaka kwivwilila chamokomoko nachiyoyelo chavo chipwe kwitava chavo. Vaka-Kulishitu vamalunga veji kulondezezanga chakutalilaho chaYesu hakuvumbikanga mapwevo. Kachi nge natulinganga vyuma kana, kaha tuli nakukavangiza lushimbi lwaKulishitu.

18-19. Vyuma muka anangwilenga Yesu kutalisa kuchiyulo, kaha natulinangulako ika?

¹⁸ Chamuchivali, tuchitalenu havyuma anangwilenga Yesu kutalisa kuchiyulo. Anangwilenga vaka-kumukavangiza jindongi jize javakafwilenga valingenga vyuma vyamwaza kuli vakwavo. Chakutalilaho, achishinganyekenu haLushimbi Lwalulemu. (Mateu 7:12) Tuvosena twasaka vakwetu valingenga vyuma vyamwaza kuli etu, shikaho nayetu twatela kulinganga mwamwaza kuli vakwetu. Kachi nge natulinga ngocho kaha nachivalingisa navakiko vatulingile vyuma vyamwaza. Jino vyuma muka twatela kulinga kachi nge vali nakutuyanjisa? Yesu anangwile nawa vaka-kumukavangiza vatachikize ngwavo, Yehova mwakalinga “mwaya chiyulo chakwoloka kuvatu jenyi asakula vaze veji kumulililanga musana naufuku.” (Luka 18:6, 7) Mazu kana apwa hilushiko luze Kalunga ketu atushika. Ngocho twatela kutachikiza ngwetu Kalunga ketu wachiyulo atachikiza vyeseko vyosena vize tuli nakumona mumakumbi ano akukuminyina, kaha mwakalinga mwachiyulo kuli etu halwola atongola.—Teso. 2, 1:6.

¹⁹ Vishina natulinangulako: Kachi nge natukavangizanga jindongi jize anangwilenga Yesu, kaha katweshi kulinganga vyuma vyavipi kuli vakwetuko. Kaha nawa kachi nge vali nakutuyanjisa muno  mukaye kaSatana, kaha chuma nachituvendejeka shina kutachikiza ngwetu Yehova mwakafumisako kuyanda chosena.

20-21. (a) Uno vaze veji kutwaminyinanga, vatela kutwama ngachilihi nakwavo? (b) Uno lunga nahase kusolwela ngachilihi puwenyi zangi yamwenemwene, kaha atela kutwama ngachilihi navana venyi?

²⁰ Kweseka nalushimbi lwaKulishitu, uno vaze veji kutwaminyinanga vakwavo vatela kutwama ngachilihi navakwavo? Hakuwana nge lushimbi kana lwazama hazangi, ngocho vaze veji kutwaminyinanga vakwavo vatela kuvumbikanga vakwavo nakuvazakama. Vatela kutachikiza nawa ngwavo Kulishitu asaka tulingenga vyuma vyosena muzangi.

²¹ Mutanga. Lunga atela kuzanga puwenyi “nganomu Kulishitu nawa eji kulinganga nachikungulwilo.” (Efwe. 5:25, 28, 29) Lunga atela kulondezeza Kulishitu hamuchima wenyi wazangi. Nahase kulinga ngocho hakuhakanga vyuma asaka puwenyi kulutwe kuhambakana vize asaka ivene. Malunga vamwe chinahase kuvakaluhwila kupwa nazangi kana, pamo mwomwo yakukolela kungalila kuze vatu kavazakama vakwavoko. Numba tuhu chinahase kuvakaluhwila kumbila muchima kana, oloze vatela kuumbila mangana vasolole ngwavo vali nakukavangiza lushimbi lwaKulishitu. Nge lunga mwasolwela muka-mahyenyi zangi yamwenemwene, kaha nachilingisa muka-mahyenyi amuvumbikenga chikuma. Kaha nawa chisemi walunga uze azanga vana venyi keshi kuhanjika mazu amapi chipwe kulinga vyuma vize navivevwisa kupihyako. (Efwe. 4:31) Oloze eji kusololanga zangi mujila yize nayilingisa vana venyi valivwe kupwa vakukingiwa. Chikupu vene, chisemi wakufwana ngana, veji kumuzanganga chikuma kuli vana venyi nakumufwelela.

22. Kweseka nachisoneka chaWaPetulu 1, 5:1-3, iya apwa mwenya mikoko, kaha tulama vatela kulinganga ika?

²² Muchikungulwilo. Tulama vatela kwanukanga ngwavo “mikoko” kavapwa vavoko. (Yowa. 10:16; tangenu WaPetulu 1, 5:1-3.) Mazu akwamba  ngwavo “utanga waKalunga,” “kumeso aKalunga,” “uswana waKalunga,” eji kukafwanga tulama vatachikize ngwavo, mikoko vapwa vambala vaYehova. Shikaho asaka mikoko jenyi vavazakamenga kanawa. (Teso. 1, 2:7, 8) Yehova eji kwivwilanga uselewa tulama vaze veji kuzakamanga kanawa mikoko. Tulama kana veji kuvazanganga nakuvavumbika chikuma kuli vandumbwavo.

23-24. (a) Uno mulimo muka vatwama nawo tulama kachi nge ndumbwavo navulumuna mulonga washili waunene? (b) Vyuma muka vatela kwanuka tulama nge vali nakusopa mulonga washili?

²³ Uno mulimo muka vatwama nawo tulama hakusopa milonga yashili yayinene? Tulama kavatwama namulimo ngana uze vapwilenga nawo vaka-kuyula navakulwane vaze vakavangijilenga Jishimbi jize Kalunga ahanyine vaIsaleleko. Kweseka naJishimbi kana, vaka-kuyula navakulwane vatalilenga havihande vyakushipilitu navihande vyamuchitungilo nevi vyauhwanga. Oloze kweseka nalushimbi lwaKulishitu, tulama veji kutalanga kaha hamilonga yashili yavandumbwavo muchikungulwilo. Tulama kaveshi kusopa milonga yamuchitungiloko, mwomwo vatachikiza ngwavo Kalunga etavisa jifulumende jitalenga hamilonga kaneyi. Echi chalumbununa nge jifulumende jikiko jikwechi ngolo jakuhana mutu mulonga chipwe kumukasa.—Loma 13:1-4.

²⁴ Uno tulama veji kulinganga ngachilihi kachi nge mutu umwe muchikungulwilo navulumuna mulonga washili waunene? Veji kuzachisanga Visoneka nakukekesa mulonga kana mangana vawane mwakulingila. Kaha nawa veji kwanukanga ngwavo, lushimbi lwaKulishitu lwazama hazangi. Zangi yeji kuvalingisanga vakekese havyuma vatela kulinga mangana vakafwe ndumbwavo muchikungulwilo uze navulumuna mulonga washili. Kaha nawa yeji kuvalingisanga vawane nge mutu kana napihilila nakwalumuka, nakuwana jino mwakumukafwila mangana apwenga cheka nausoko wakukola naYehova.

25. Chihula muka natushimutwila muchihande nachikavangizaho?

²⁵ Twawahilila chikuma hakuwana nge twatwama mulushimbi lwaKulishitu. Kachi nge tuvosena natukavangizanga lushimbi kana, kaha vandumbwetu muchikungulwilo navamona ngwavo twavazanga, nakuvamona kupwa vavalemu, kaha nawa vakukingiwa. Chipwe ngocho, tuli nakuyoyela mukaye muze muli “vatu vakuhuka” vaze vali nakuya “nakupihilako lika.” (Chimo. 2, 3:13) Shikaho twatela kupwa lika vakutona. Uno chikungulwilo chavaka-Kulishitu cheji kusololanga ngachilihi chiyulo chaKalunga hachihande chakusavala vanyike? Chihande chinakavangizaho nachikumbulula chihula kana.