Ndumbwetu wapwevo Sara * ahanjikile ngwenyi: “Sonyi yami yapwa yakusemuka nayo, kaha nawa kangwalimona nge ngunahase kulinga vyuma vyakulumbunukako. Shikaho kangwapwa nguwakukasunukako nge nguli navatu vahanjikiso yautenu. Oloze muchima wami weji kuundanga nge nguli namutu wamuvwovu, wakulinyisa. Ngweji kupwanga nguwakukasunuka kulweza mutu kana omwo nguli nakwivwa naukalu nguli nawo. Vatu vakufwana ngana vakiko vapwa masepa jami.”

Mazu ahanjikile Sara asolola hatoma nge vakwetu navatuzanga kachi nge natupwa vakuvova. Kupwa vakuvova cheji kwivwisanga nawa Yehova kuwaha. Mazu enyi atulweza ngwawo: “Vwalenu . . . kuvova.” (Kolo. 3:12) Uno kuvova chapwa chika? Yesu asolwele ngachilihi muchima wakuvova? Kaha kupwa vakuvova nachitulingisa ngachilihi tupwenga vakuwahilila?

Kuvova chapwa kuliunjika. Mutu wamuvwovu eji kutwamanga navakwavo mukuunda, kaha nawa kevwa washi matotoko numba nge vanamulingi mwamupi.

Numba tuhu vatu veji kumonanga mutu wakuvova nge wakuhehela, oloze keshi mukikoko. Lizu lyachiHelase valumuna ngwavo “kuvova” valizachishilenga kukavalu wakukikama uze vanafwomona. Ou kavalu eji kupwanga lika nangolo, oloze vanamunangula mwakuzachishila kanawa ngolo jenyi. Nayetu nawa, nge natusolola muchima wauvwovu, kaha natufwomona muchima wetu waukalu, nakutwama jino kanawa navakwetu.

Pamo tunahase kushinganyeka ngwetu, ‘Aminyi kangwapwa nguwamuvwovuko mwane.’ Tuli nakuyoyela mukaye muze munazale navatu vakuhanjika nautenu, vamichima yakuhona kutalilila vakwavo chikoki. (Loma 7:19) Shikaho, twatela kuzata nangolo numba tupwenga vakuvova, kaha Yehova mwatukafwa nashipilitu yenyi yajila mangana tuhase kutesamo chuma kana. (Ngale. 5:22, 23) Mwomwo ika twatela kukilikita mangana tupwenga vakuvova?

Vatu vasaka kupwa navatu vakuvova. Ngana muze ahanjikile Sara uze twavulukanga hakavanga, tweji kwivwanga kuwaha kutwama hamwe namutu wamuchima wauvwovu. Yesu apwile namuchima wauvwovu nalikoji. (Koli. 2, 10:1) Navanyike vasakilenga kupwa nenyi numba tuhu kavamutachikijileko.—Mako 10:13-16.

Kuvova cheji kutukinganga nakukinga nawa vakwetu. Nge twatwama namuchima wauvwovu, kaha katweshi kukwatanga washi matotoko. (Vishi. 16:32)  Echi nachitukafwa tuhone kulusuka kuhanjika mazu amapi chikumanyi kumutu twazanga, nakuliveya hamazu kana. Kaha nawa kupwa namuchima wauvwovu nachilingisa vakwetu vahone kwivwa chikela mwomwo yamuchima wetu waupi.

Numba tuhu Yesu apwilenga namilimo yayivulu, oloze asolwelenga nawa muchima wauvwovu kuvatu vosena. Vatu vavavulu vapwilenga naukalu wauvulu, ngocho vasakiwilenga mutu wakuvahizumuna. Shikaho vasuulukile omu Yesu avalwezele ngwenyi: “Twayenu kuli ami . . . mwomwo ami ngumuvwovu, nguwakulikehesa mumuchima.”—Mateu 11:28, 29.

Uno natuhasa ngachilihi kupwa namuchima wauvwovu ngana uze apwile nawo Yesu? Twatela kulinangula Mazu aKalunga nakutachikiza omu Yesu atwaminenga navatu navyuma alingilenga nge kunasoloka ukalu. Kaha nge kunasoloka ukalu, natusolola muchima wauvwovu ngana muze alingilenga Yesu. (Petu. 1, 2:21) Talenu havyuma vitatu vyakafwile Yesu apwenga namuchima wauvwovu.

Yesu apwile wakulinyisa. Yesu ambile ngwenyi apwilenga ‘wamuvwovu, wakulikehesa mumuchima.’ (Mateu 11:29) Mbimbiliya yavulukila hamwe evi vilinga vivali mwomwo kuvova chatambukila hamwe nakulinyisa. (Efwe. 4:1-3) Mujila muka?

Kulinyisa cheji kutukafwanga tuhone kupihilila washi nge vakwetu vanatulingi mwamupi. Uno Yesu alingile ika omu vatu vamwambilenga ngwavo “afwa hakulya nahakunwa vinyo”? Vilinga vyenyi vyasolwele nge vamuvangijikilile kaha, ngocho ateselemo mazu enyi akwamba ngwenyi, “mangana eji kulijimbulanga kupwa akwoloka kumilimo yawo.”—Mateu 11:19.

Kachi nge mutu mwahanjika mazu amapi kuli enu mwomwo yachikova chenu chipwe okwo mwafuma, kaha kamwatela kumukumbulula namatotoko. Mukulwane umwe muchikungulwilo chamuSouth Africa walijina lyaPeter ambile ngwenyi: “Nge ngunevu kupihya mwomwo yamazu nahanjika mutu, ngweji kulihulisanga ngwami, ‘Uno nge Yesu ikiye vambanga mazu kana, kachi nalingi ngachilihi?’” Ambile nawa ngwenyi: “Ngunalinangula jino kuhonanga kupihilila washi nge vakwetu vanangulingi mwamupi.”

Yesu atachikijile tutenga twavakwavo. Numba tuhu tumbaji twaYesu vasakilenga kulinga vyuma vyamwaza, oloze kuhona kukupuka chavalingishilenga valimbenje. Chakutalilaho, haufuku wakukokela kukufwa chaYesu, Petulu, naYakova naYowano kavapwile vakutona mangana vavendejeke sepa lyavoko. Yesu ejivile kuhehela chavo, kaha ambile ngwenyi, “shipilitu yinasake vene, oloze mujimba unazeye.” (Mateu 26:40, 41) Shikaho, Yesu kasulakanyine navaposetolo jenyiko, mwomwo atachikijile ukalu wavo.

Ndumbwetu umwe wapwevo walijina lyaMandy apwilenga namuchima waupi wakuhananga vakwavo milonga. Oloze makumbi ano eji kufwilanga kulondezeza muchima waYesu wauvwovu. Ambile ngwenyi: “Ngweji kumonanga ngwami navakwetu kavakupukako, ngocho ngwafwila kutala havilinga vyavo vyamwaza, ngana muze eji kuvamonanga Yehova.” Kutala mweji kwivwilanga vakwenu keke nakuvasolwela muchima wauvwovu, ngana muze alingile Yesu tahi?

Yesu afwelelele Kalunga. Omu Yesu apwile hano hamavu, omikile hakumuyanjisa. Vamuvangijikililenga, nakumuseha nakumuyanjisa. Chipwe ngocho, atwalileho lika kusolola muchima wauvwovu mwomwo “alihanyine mumavoko ayaUze eji kuyulanga mwakwoloka.” (Petu. 1, 2:23) Yesu atachikijile ngwenyi Ise wamwilu mwamuzakama nakukazangamisa vaze vapwilenga nakumulinga mwamupi halwola atongola ivene.

Kachi nge natwivwa matoto nakusaka kwolola vyuma nge vanatulingi mwamupi, kaha vyuma kavyeshi kuwahako. Shikaho, Mbimbiliya yatulweza ngwayo: “Utenu wamutu kaweshi kuneha kwoloka chaKalungako.” (Yako. 1:20) Numba nge chinapu chakutamo kupihilila, oloze twatela kutachikiza ngwetu chuma kana chinahase kuneha ukalu.

Ndumbwetu wapwevo wakuGermany walijina lyaCathy ashinganyekelenga ngwenyi, mutu atela kulihakwila ivene, nge chiku kakweshi kupwa mutu mwamuhakwilako. Oloze kufwelela Yehova chamukafwile alumune vishinganyeka vyenyi. Ambile ngwenyi: “Kangweshi kufwila kulihakwilangako. Nguli jino namuchima wauvwovu, mwomwo ngwatachikiza ngwami Yehova mwakawahisa vyuma halwola atongola.” Shikaho, nge vakwenu vamilingaho lyehi mwamupi, kaha kavangizenu chakutalilaho chaYesu nakufwelela  ngwenu Kalunga mwamikafwa mupwenga namuchima wauvwovu.

Yesu ahanjikile ngwenyi kupwa namuchima wauvwovu cheji kunehanga kuwahilila. Ambile ngwenyi: “Vawahilila vaze vavavwovu michima.” (Mateu 5:5) Uno kuvova chinahase kutukafwa ngachilihi?

Kuvova cheji kulingisanga mumalo mupwenga kuunda. Ndumbwetu Robert wakuAustralia ambile ngwenyi: “Kakavulu ngwalusukilenga kuhanjika mazu amapi kuli puwami nakumwivwisa kupihya. Kaha nge unahanjika lyehi mazu amapi, kaweshi kuhasa kuwakindulwisa mukanwako. Shikaho ngwevwilenga kupihya omu ngwamwenenga puwami nahombo.”

“Tuvosena tweji kuhukananga kakavulu” muhanjikiso, kaha echi cheji kulingisanga muulo mupwenga vikokojola. (Yako. 3:2) Nge chuma kana chinasoloka, kaha muchima wauvwovu nautukafwa tuunjise matoto nakuhona kuhanjika vyuma vyavipi kuli muka-zuvo yetu.—Vishi. 17:27.

Ndumbwetu Robert azachile nangolo mangana apwenga jino namuchima wauvwovu nakutalilila vakwavo chikoki. Kuwaha muka chinafumumo? Ambile ngwenyi: “Makumbi ano nge tunalikokojwesa, ngweji kumwivwililanga kanawa, nakuhanjika namuchima wauvwovu, nakuhona kupihilila chikuma. Kaha tuli nakutwama jino kanawa napuwami.”

Kuvova cheji kutulingisanga tutwame mukuunda navakwetu. Vatu vaze veji kusulakananga washi kavatwama namasepa vavavuluko. Oloze kuvova cheji kutulingisanga ‘tulame kulinunga chetu chize cheji kutununganga hamwe mukuunda.’ (Efwe. 4:2, 3) Cathy uze twavulukanga ambile ngwenyi: “Kuvova chinangulingisa nguhase kushimutwilanga kanawa navakwetu, numba tuhu chapwa chachikalu kushimutwila navatu vamwe.”

Kuvova cheji kutulingisanga tuunde michima. Mbimbiliya yapandamisa kuvova nakuunda “[ku]mangana akufuma mwilu.” (Yako. 3:13, 17) Kaha mutu wamuvwovu atwama ‘namuchima wakuunda.’ (Vishi. 14:30) Martin uze nakilikitanga apwenga namuchima kanou wauvwovu ambile ngwenyi: “Ngwapwa jino nguwamwashi kuhanjikisa, kaha nawa kangwahanjika cheka nautenuko. Ngocho ngwaunda muchima nakupwa nguwakuwahilila.”

Chikupu vene, twatela kukilikita chikuma numba tupwenga namuchima wauvwovu. Ndumbwetu umwe ambile ngwenyi: “Kuhanjika muchano, namakumbi ano cheji kungukaluhwilanga kuunjisa matoto, ngocho ngweji kusavanga mutulo.” Chipwe ngocho, Yehova uze atulweza tupwenga namuchima wauvwovu mwatukafwa. (Isa. 41:10; Chimo. 1, 6:11) ‘Mwakumisa kutulongesa kaha mwatujikijisa.’ (Petu. 1, 5:10) Kutwala muze, natusolola ‘muchima wauvwovu waKulishitu nalikoji lyenyi,’ ngana muze alingile kaposetolo Paulu.—Koli. 2, 10:1.