1. Vyuma muka ahanjikile Yesu kutalisa kuluheto lwamwilu?

KWATWAMA mawana amwe atuhana Kalunga aze katwamonako. Kaha mawana kana akiko apwa amalemu chikuma. Omu Yesu ahanjikile Chihande ChahaPili, avulukile ngwenyi mawana amwilu akiko apwa amalemu chikuma kuhambakana naluheto chipwe jimbongo. Kaha ahanjikile chishina chikwavo chachilemu hakwamba ngwenyi: “Kuze kuli luheto lwove, kukiko vene nakupwanga namuchima wove.” (Mateu 6:19-21) Nge natumona chuma chimwe kupwa chachilemu chikuma mukuyoya chetu, kaha tunahase kukilikita chikuma mangana tupwenga nacho. Tweji kulilunjikilanga “luheto mwilu” hakutunga lijina lyamwaza chipwe kupwa napuho yamwaza kuli Kalunga.

2. (a) Kweseka naWavaka-Kolinde 2, 4:17, 18, Paulu atukolezeza tushishikenga havyuma muka? (b) Vyuma muka natushimutwila muchihande chino?

² Kaposetolo Paulu atukolezeza ‘tushishikenga meso etu havyuma vahona kumona.’ (Tangenu Wavaka-Kolinde 2, 4:17, 18.) Havyuma kana hatwama navyuma vyamwaza vize natukalivwisa kuwaha mukaye kakahya kaze atushika Kalunga. Muchihande chino, natushimutwila chikuma havyuma viwana vize katwamonako vize vinahase kutunganyalisa oholyapwa. Vyuma kana shina, usepa naKalunga, nakulomba, nashipilitu yajila nakutukafwa chakufuma mwilu hakwambulula. Natushimutwila nawa omwo tunahase kusolwelamo ngwetu twasakwilila Yehova havyuma kanevi twahona kumona.

3. Luheto muka luze lwapwa lwakulipwila chikuma, kaha mwomwo ika tunafwelela ngwetu tunahase kupwa naluheto kana?

³ Luheto lumwe luze lwapwa lwakulipwila chikuma shina kupwa nausepa naYehova Kalunga. (Samu 25:14) Uno Kalunga wajila nahase kutunga usepa navatu vakuhona kukupuka tahi? Eyo, mwomwo yandando yakusokola yize ahanyine Yesu ‘yakufumisa shili’ yavatu. (Yowa. 1:29) Yehova atachikijile chikupu ngwenyi vyuma ajinyine kutalisa kukusokola vatu kushili nakukufwa kuhichila muli Yesu navikatesamo. Kahechi chikiko chamulingishile atunge usepa navatu vaze vapwileko shimbu kanda Yesu ezenga nakutufwila.—Loma 3:25.

4. Hanenu vyakutalilaho vyamasepa jaKalunga vaze vapwileko shimbu kanda Yesu ezenga.

⁴ Achitalenu havatu vamwe vaze vapwileko shimbu kanda Yesu ezenga hano hamavu, vaze vapwile masepa jaKalunga. Apalahama apwile lunga walufwelelo. Nomu mwahichile myaka yakuzomboka 1,000 kufuma hakufwa chenyi, Yehova amuvulukile ngwenyi “sepa lyami.” (Isa. 41:8) Shikaho Yehova nahase kutumona lika kupwa tumasepa jenyi numba vene nge tunafu. Yehova amona Apalahama kwijiva nge wamutonyi. (Luka 20:37, 38) Mutu mukwavo shina Yopa. Yehova amusangejekele mwilu kumeso avangelo ngwenyi, apwile ‘mutu wakusungama, wakulonga, muka-kwivwa Kalunga woma, nakulihenda kuvyuma vyavipi.’ (Yopa 1:6-8) Ndanyele nawa azachilile Kalunga nakashishi hamyaka kafwe 80 mulifuchi lyavatu vaze kavalemeselenga Kalungako. Jino Yehova amumwene ngachilihi? Vangelo valwezele uze lunga mapapa katatu ngwavo apwile “mutu wamulemu.” (Ndanye. 9:23; 10:11, 19) Twatela kufwelela ngwetu Yehova afwila kukasangula masepa jenyi vosena vaze vafwa.—Yopa 14:15.

5. Vyuma muka atela kulinga mutu numba apwenga sepa lyaYehova?

⁵ Uno vatu vangahi vakuhona kukupuka vaze vapwa masepa jaYehova makumbi ano? Vavavulu chikuma. Tunahanjika ngocho mwomwo kuli vatu vavavulu vaze vatwama navilinga vize vyasolola nge vasaka kupwa masepa jaKalunga. Yehova “apwa sepa lyavaka-kusungama.” (Vishi. 3:32) Vatu kana vatunga usepa naikiye mwomwo yakufwelela mundando yakusokola yaYesu. Kuhichila mundando kana, Yehova atwitavisa tulihane kuli ikiye mangana vatumbapachise. Nge natulinga vyuma kana, kaha natupwa hamukana wavaka-Kulishitu vakumbapachisa vaze vali nakulivwisa kuwaha ‘usepa’ naMutu wamulemu chikuma mwilu nahamavu.

6. Natusolola ngachilihi ngwetu twamona usepa wetu naKalunga kupwa waulemu?

⁶ Natusolola ngachilihi ngwetu twamona usepa wetu naKalunga kupwa waulemu? Twatela kupwa vakushishika ngana muze apwile Apalahama naYopa, chamokomoko nakuvula chamyaka tunazachila Yehova. Kaha nawa twatela kulondezeza Ndanyele hakumonanga usepa wetu naKalunga kupwa waulemu kuhambakana nakuyoya chetu. (Ndanye. 6:7, 10, 16, 22) Yehova mwatukafwa tupwenga nalukakachila hakumona vyeseko mangana tutwaleho lika kupwa masepa jenyi.—Fwili. 4:13.

7. (a) Kweseka naVishimo 15:8, Yehova eji kwivwanga ngachilihi nge tunalombo kuli ikiye? (b) Yehova eji kukumbululanga ngachilihi kulomba chetu?

⁷ Wana ukwavo uze katwamonako shina lisesa lyakulomba. Vasepa namutu veji kulilwezanga vyuma vali nakushinganyeka nomwo vali nakwivwa. Kahomu mukiko twatela kulinga nayetu kuli Yehova. Yehova eji kuhanjikanga kuli etu kuhichila muMazu enyi, kaha mukiko tweji kutachikijilanga vishinganyeka vyenyi nomwo eji kwivwanga havyuma vimwe. Etu  nawa tweji kumulwezanga vishinganyeka vyetu nomwo tuli nakwivwa omu tweji kulombanga kuli ikiye. Kaha eji kwivwanga kuwaha kwivwilila kukulomba chetu. (Tangenu Vishimo 15:8.) Yehova nawa eji kukumbululanga kulomba chetu mwomwo apwa Sepa wamwenemwene. Lwola lumwe eji kukumbululanga washiwashi, oloze lwola lukwavo twatela kulomba nalukakachila. Chipwe ngocho, twatela kufwelela ngwetu mwatukumbulula mujila yamwaza, kaha nawa halwola lwakutamo. Kaha nawa Kalunga nahase kutukumbulula mujila yize katwashinganyekeleko. Chakutalilaho, nge tuli nakuhita muukalu, pamo keshi kufumisako ukalu kanako, oloze mwatuhana mangana nangolo jakuhasa “kumika” muukalu kana.—Koli. 1, 10:13.

8. Uno natusolola ngachilihi ngwetu twasakwilila Yehova hakutuhana lisesa lyakulomba?

⁸ Uno natusolola ngachilihi ngwetu twasakwilila Yehova hakutuhana lisesa lyakulomba? Chuma chimwe twatela kulinga shina kukavangiza mazu atulweza ‘akulombanga shimbu yosena.’ (Teso. 1, 5:17) Yehova katushinjila tumulombengako. Oloze atuhana lisesa lyakulisakwila etu vavene vyakulinga, nakutulweza ‘tulombenga naluzema.’ (Loma 12:12) Ngocho natusolola ngwetu twamusakwilila kachi nge natumulombanga hakumbi hakumbi. Kaha nawa omu natumulombanga, twatela kumusakwilila havyuma atulingila nakumwalisa nawa.—Samu 145:2, 3.

9. Ndumbwetu umwe eji kwivwanga ngachilihi omu eji kulombanga, kaha enu mweji kwivwanga ngachilihi?

⁹ Kuzachila Yehova halwola lwalusuku nakumona nawa omu nakumbululanga kulomba chetu, chinatulingisa tumonenga kulomba kupwa chachilemu chikuma. Chakutalilaho, ndumbwetu Chris uze nazate mulimo washimbu yosena hamyaka 47 ambile ngwenyi: “Ngweji kwivwanga kuwaha kulomba kuli Yehova nge ngunahinduka nachimene. Kulomba kuli Yehova shimbu kuchinaundu cheji kunguhizumunanga. Shikaho ngweji kumusakwililanga hamawana anguhana kuhakilako vene nalisesa lyakulomba. Kaha hanyima yakulomba ufuku nawa, ngweji kwivwanga kuwaha chikuma hakutachikiza ngwami nangusavala nachivezu chitoma.”

10. Mwomwo ika twatela kumona shipilitu yajila yaKalunga kupwa yayilemu?

¹⁰ Wana ukwavo uze katwamona namesoko uze nawa twatela kumona kupwa waulemu shina shipilitu yajila yaKalunga. Yesu atukolezeza tulombenga Yehova atuhane shipilitu yajila. (Luka 11:9, 13) Ngocho Yehova eji kuzachisanga shipilitu yenyi hakutuhana “ngolo jakuhambakana jize javatu.” (Koli. 2, 4:7; Vili. 1:8) Shikaho, shipilitu yaKalunga yinahase kutukafwa tupwenga vakumika hakuhita mukala cheseko.

11. Uno shipilitu yajila yinahase kutukafwa ngachilihi?

¹¹ Shipilitu yajila yinahase kutukafwa tuzate kanawa milimo yaKalunga. Kaha nawa yinahase kuhotola uhashi wetu uze twatwama nawo. Shikaho, Kalunga ikiye eji kutukafwanga nashipilitu yenyi numba tuhase kutesamo milimo yenyi.

12. Kweseka naSamu 139:23, 24, uno kulomba shipilitu yajila nachitukafwa tulinge ika?

¹² Jila yikwavo tunahase kusolwelamo ngwetu twamona shipilitu yajila yaKalunga kupwa yayilemu shina, kulomba Kalunga atuhaneyo yitukafwe tutachikizenga washi kachi nge tunaputuka kushinganyeka vyuma vyavipi. (Tangenu Samu 139:23, 24.) Kachi nge natulomba Yehova mujila kana, kaha nahase kuzachisa shipilitu yenyi yajila mangana tutachikize vishinganyeka vyavipi vize tuli navyo. Kaha nge tunatachikiza lyehi vishinganyeka kana, twatela kulomba Kalunga atuhane shipilitu yenyi mangana yituhane ngolo jakufungulula vishinganyeka vyavipi. Nge natulinga ngocho kaha natusolola hatoma ngwetu tuli nakufwila Yehova atwaleho lika kutukafwa nashipilitu yenyi yajila.—Efwe. 4:30.

13. Chuma muka nachitukafwa tusakwililenga chikuma Yehova hakutuhana shipilitu yajila?

¹³ Nge natushinganyekanga havyuma vize yili nakulinga shipilitu yajila makumbi ano, kaha nachitukafwa tusakwilile chikuma Yehova hawana kanou. Shimbu kanda Yesu ayenga mwilu, alwezele tumbaji twenyi ngwenyi: “Namukatambula ngolo omu shipilitu yajila nayikeza hali enu, kaha namukapwanga muvinjiho jami . . . kuvihela vyakwakusuku vyahamavu.” (Vili. 1:8) Mazu kana ali nakutesamo makumbi  ano. Shipilitu yajila yikiko yinalingisa vatu vakuheta kujimiliyoni 8 nachimbwa vakufuma kumafuchi osena vapwenga vaka-kulemesa Yehova. Kaha nawa tweji kulivwisanga kuwaha kutwama mupalachise yakushipilitu mwomwo shipilitu yajila yeji kutukafwanga tupwenga navilinga vyamwaza vyakufwana nge, zangi, nakuwahilila, nakuunda, nakutalilila chikoki, nalikoji, nakuwaha, nalufwelelo, nakuvova namuchima wakulikanyisa. Kaha vilinga kana vyapwa “mihako yashipilitu.” (Ngale. 5:22, 23) Chikupu vene shipilitu yajila yapwa wana wakulipwila chikuma.

14. Omu tweji kwambululanga mujimbu, veya veji kutukafwanga vaze katwamonako?

¹⁴ Twatwama nawa nakutokwa ‘chakuzachila hamwe’ naYehova naYesu navangelo. (Koli. 2, 6:1) Tweji kuzatanga navo hamwe hakuzata mulimo wakunangula vatu vapwenga tumbaji. Paulu ambile ngwenyi ikiye navaze veji kuzatanga ou mulimo vapwa “vaka-kuzachila hamwe naKalunga.” (Koli. 1, 3:9) Kaha nawa nge natwazana mumulimo wavaka-Kulishitu, kaha tuli nakuzachila hamwe naYesu. Anukenu ngwenu, omu Yesu alwezele vaka-kumukavangiza “[vanangulenga] vatu vakumafuchi osena [vapwenga] tumbaji,” ambile nawa ngwenyi: “Ami nangupwanga nayenu.” (Mateu 28:19, 20) Uno tweji kuzachilanga ngachilihi hamwe navangelo? Veji kututwaminyinanga omu tweji kwambululanga “mujimbu wamwaza wahaya myaka yosena . . . [kuli] vaze vatwama hamavu.”—Kuso. 14:6.

15. Hanenu chakutalilaho chamuMbimbiliya chakusolola mulimo waulemu eji kuzatanga Yehova omu tweji kuyanga nakwambulula.

¹⁵ Uno vyuma muka tuli nakutesamo mwomwo yakutukafwa chakufuma mwilu? Omu tweji kutumbanga mbuto jaWangana, jimwe jeji kuholokelanga hamavu amwaza nakusoka. (Mateu 13:18, 23) Uno iya eji kukolesanga mbuto kana mangana jimenga? Yesu ahanjikile ngwenyi, mutu nahase kupwa muka-kumukavangiza “kuvanga vanamukoko kuli [Ise].” (Yowa. 6:44) Kaha Mbimbiliya yatuhana chakutalilaho. Omu Paulu ambulilile mapwevo vamwe kuweluka wanganda yaFwilipi, Mbimbiliya ngwayo: “Yehova asokolwele mumuchima [wapwevo umwe walijina lyaLuchiya] mangana evwilile kanawa kuvyuma vize ahanjikilenga Paulu.” (Vili. 16:13-15) Ngana mwaLuchiya, navatu vavavulu makumbi ano vali nakuvakoka kuli Yehova.

16. Iya twatela kwalisa nge tuli nakufukila mumulimo wakwambulula?

¹⁶ Iya eji kutulingisanga tufukile mumulimo wakwambulula? Paulu akumbulwile chihula kana omu asonekelele chikungulwilo chamuKolinde ngwenyi: “Ami ngwatumbile, Apolo atukumwinyine meya, oloze Kalunga ikiye akoleselenga, mangana ou mwatumba, chipwe ou mwatukumwina meya vazeneke kumwalisa, shina Kalunga uze eji kukolesanga.” (Koli. 1, 3:6, 7) Nayetu nawa twatela kulondezeza Paulu hakwalisanga Yehova nge tuli nakufukila mumulimo wakwambulula.

17. Uno natusolola ngachilihi ngwetu twasakwilila Yehova hakutwitavisa ‘tuzachile nenyi hamwe,’ nakuzachila hamwe naKulishitu navangelo?

¹⁷ Natusolola ngachilihi ngwetu twasakwilila Yehova hakutwitavisa ‘tuzachile nenyi hamwe,’ nakuzachila hamwe naKulishitu navangelo? Natulinga ngocho hakukilikita mangana twambulule mujimbu wamwaza natwima. Kaha tunahase kulinga ngocho mujijila jajivulu. Jila yimwe shina kwambulwila “kumeso avatu vosena nakuzuvo hizuvoko.” (Vili. 20:20) Vandumbwetu vavavulu nawa vasaka kwambulula mukutulukila. Nge vanawane mutu uze kavejivako, veji kuvangilanga kumumeneka nachisambo nakuputuka kushimutwila  nenyi. Kachi nge mutu kana nawahilila, kaha veji kuputukanga kushimutwila nenyi hamujimbu waWangana.

18-19. (a) Tweji kutukumwinanga ngachilihi mbuto jamuchano? (b) Hanenu chakutalilaho chakusoloka omwo Yehova akafwile chilongesa chaMbimbiliya.

¹⁸ Hakupwa “tuvaka-kuzachila hamwe naKalunga,” katwatela kaha kukumina hakutumba mbuto jamuchano waWanganako, oloze twatela nawa kujitukumwinanga. Shikaho, nge mutu tunambulila nawahilila, kaha twatela kukilikita tukindulukile kumutu kana chipwe kulweza ndumbwetu weka alinge ngocho, mangana tuputuke chilongesa chaMbimbiliya. Kahomu mwaputuka kuzovoloka, natuwahilila hakumona omu Yehova ali nakumukafwa mangana aputuke kwalumuna chiyoyelo chenyi.

¹⁹ Tuchitalenu chakutalilaho chaRaphalalani wakuSouth Africa uze apwile chimbanda. Numba tuhu azangile vyuma apwile nakulinangula muMbimbiliya, oloze chamukaluhwilile kwitavila vyuma yahanjika Mbimbiliya hachihande chakulivwasana navandemone. (Lushi. 18:10-12) Mukuhita chalwola, etavilile Kalunga alumune vishinganyeka vyenyi. Ngocho echele mulimo wenyi waumbanda, numba tuhu hakiko ayoyelelenga. Oholyapwa Raphalalani ali namyaka yakusemuka 60, kaha ambile ngwenyi: “Ngwavasakwilila chikuma Vinjiho jaYehova hakungukafwa mujijila jajivulu, kuhakilako vene nakungukafwa kuwana milimo. Chachinenenyi, ngwamusakwilila Yehova, hakungukafwa ngupwenga nachiyoyelo chitoma, mangana nayami ngupwenga jino nguChinjiho wakumbapachisa.”

20. Chuma muka muli nakufwila kulinga?

²⁰ Muchihande chino, tunashimutwila hamawana awana aze katwamona namesoko. Kaha wana waulemu chikuma hamawana kana shina kupwa masepa jaYehova. Echi cheji kutulingisanga tuchiwane kupwa chachashi kulomba kuli ikiye, nakumona omu shipilitu yenyi yajila yili nakutukafwanga, nakumona nawa omu ali nakutukafwa hakwambulula. Shikaho tufwilenu kusakwililanga Kalunga hamawana atuhana aze katwamona namesoko, nakumusakwilila nawa hakutwitavila tupwenga tumasepa jenyi.