Upolofweto umwe naumwe vanavuluka muchati yino unatesangamo halwola lwolumwe. Kaha wosena wasolola nge tuli nakuyoyela ‘mumakumbi akukuminyina.’—Ndanye. 12:4.

• Visoneka Kuso. 11:7; 12:13, 17; 13:1-8, 12

  Upolofweto “Chisuma” nahitangananga hamavu hamyaka yayivulu. Kaha hamakumbi akukuminyina, mutwe wenyi wakusokesa 7 vaulemekele. Kutwala muze, uze mutwe vaukile, kaha “vaka-mavu vosena” vanamukavangizanga. Satana eji kuzachisanga ou chisuma ‘hakulwa jita navaze vasalaho.’

  Kutesamo chaupolofweto Kufuma haLivaji lyamumakumbi aNowa, kunapunga jifulumende jize jinafumbukilanga Yehova. Kaha halwola lwaJita yaKaye yatete, chiyulo chaBritain chazeyele. Oloze chakwachile ngolo omu valifutwile naUnited States. Mumakumbi ano akukuminyina, Satana ali nakuzachisa chikuma vaka-mapolitiki mangana vayanjise vatu jaKalunga.

• Chisoneka Ndanye. 11:25-45

  Upolofweto Mwangana wakunote namwangana wakusulo vanalikokojwesanga mumakumbi ano akukuminyina.

  Kutesamo chaupolofweto Chiyulo chaGermany chazungishile chiyulo chaAnglo-America. Kaha chiyulo chaSoviet Union navaka-kuchikundwiza vakiko vapwile mwangana wakunote kuputuka mu 1945. Chiyulo kana chakumine mu 1991, kaha oholyapwa lifuchi naRussia navaka-kulikundwiza vakiko vanapu jino mwangana wakunote.

• Visoneka Isa. 61:1; Mala. 3:1; Luka 4:18

  Upolofweto Yehova atumine “muluwa” wenyi mangana ‘awahise jila’ shimbu kana vahakeko Wangana wauMeshiya. Ou muluwa aputukile “[kuvilika] mujimbu wamwaza kuvatu vavavwovu.”

  Kutesamo chaupolofweto Kufuma vene muji 1870, C. T. Russell namasepa jenyi vazachile nangolo mangana valumbunune muchano wamuMbimbiliya. Kaha muji 1880 vaputukile kukolezeza vangamba jaKalunga vambulule chikuma mujimbu. Vasonekele vihande vyakufwana nge “Wanted 1,000 Preachers” “[na]Anointed to Preach.”

• Chisoneka Mateu 13:24-30, 36-43

  Upolofweto Muka-kole akuvile mwila mutiliku, kaha ou mwila vawechele ukolele hamwe natiliku kuheta nakulwola lwakwaha. Kufumaho vauhandunwine kutiliku.

  Kutesamo chaupolofweto Kufuma mu 1870, vaka-Kulishitu vamuchano vaputukile kulihandula kuli vaka-Kulishitu vamakuli. Kaha mumakumbi akukuminyina, vaka-Kulishitu vavahakile muchikungulwilo ngocho vasolokele hatoma nge valihandununa navaka-Kulishitu vamakuli.

• Chisoneka Ndanye. 2:31-33, 41-43

  Upolofweto Vilyachilo vyafwelu naunonga vyapwa vyachifwanyisa chize vatungishile vikungo vyakulisezaseza.

  Kutesamo chaupolofweto Unonga wemanyinako vatu vamuchivulu vaze vayula kuChiyulo chaNgolo chaKaye chaAnglo-America, vaze veji kulikanganga kuchiyulo kana. Echi chalingisa chiyulo kana chihone kupwa ngana mwafwelu yize yatwama nangolo.

• Chisoneka Mateu 13:30; 24:14, 45; 28:19, 20

  Upolofweto “Tiliku” vayikungulwilile “muchisete,” kaha “ndungo wakushishika wakuzangama” vamutongwele alame “vaka-kuzata kuzuvo.” “Mujimbu wamwaza waWangana” vaputukile kuwambulula “hamavu hosena.”

  Kutesamo chaupolofweto Ndungo wakushishika vamutongwele mu 1919 azakamenga vatu jaKalunga. Kufuma vene haze, Vaka-Kulinangula Mbimbiliya vaputukile kuzata chikuma mulimo wakwambulula. Kaha makumbi ano Vinjiho jaYehova vali nakwambulula mujimbu mumafuchi akuzomboka 200 nakulovola mikanda mumalimi akuzomboka 1,000.

• Visoneka Ndanye. 12:11; Kuso. 13:11, 14, 15

  Upolofweto Chisuma wajimbinga jivali aputukile kutunga ‘chifwanyisa chenyi’ nakuchifutumwina “kuhwima chakuyoya.”

  Kutesamo chaupolofweto Chiyulo chaNgolo chaKaye chaAnglo-America chatungile liuka lyaLeague of Nations. Liuka kana valikundwijilenga nakumafuchi eka. Kutwala muze, mwangana wakunote nayikiye akundwijile liuka kana kuputuka mu 1926 nakuheta mu 1933. Kaha vatu valishilenga liuka kana, ngana muze vali nakwalisa liuka lyaUnited Nations (UN), muchishishisa chakwalisa Wangana waKalunga.

• Chisoneka Ndanye. 8:23, 24

  Upolofweto Mwangana wakwivwisa woma “[mwanongesa] vyuma mujila yakukomwesa.”

  Kutesamo chaupolofweto Chiyulo chaNgolo chaKaye chaAnglo-America chinenyeka vatu vavavulu navyuma vyavivulu chikuma. Chakutalilaho, halwola lwaJita yaKaye yamuchivali, lifuchi lyaUnited States lyenyekele vatu navyuma vyavivulu omu lyashile tupata vavali vavanene halifuchi lyavaka-kole javo.

• Visoneka Ndanye. 11:31; Kuso. 17:3, 7-11

  Upolofweto “Chisuma uchila” wajimbinga likumi afumine muwina wakuzeneka kukuma, kaha apwa mwangana wakusokesa 8. Mukanda waNdanyele wavuluka ou mwangana kupwa “chuma chakwivwisa unyengwe chakuneha kunongesa.”

  Kutesamo chaupolofweto Liuka lyaLeague of Nations lyakumine halwola lwaJita yaKaye yamuchivali. Kahomu jita yakumine, ‘vahakileko’ liuka lya UN. Muchishishisa chakwalisa Wangana waKalunga, vatu vali nakwalisa liuka lya UN, ngana muze valishilenga liuka lyaLeague of Nations. Liuka lya UN nalikafumbukila mauka akwitava.

• Visoneka Teso. 1, 5:3; Kuso. 17:16

  Upolofweto Vaka-mafuchi navakavilika mutambi ‘wakuunda namukingo,’ kaha “jimbinga 10” ‘nachisuma’ navakafumbukila “pwevo muka-ujila” nakumunongesa. Kufumaho, vaka-mafuchi navakavanongesa.

  Kutesamo chaupolofweto Vaka-mafuchi navakashinganyeka ngwavo vananehe kuunda namukingo mukaye. Kaha vaka-mafuchi vaze veji kukundwizanga liuka lya UN navakanongesa jino mauka akwitava chamakuli. Aha hakiko nahakaputukila luyando lwalunene. Kaha luyando kana nalukakuma omu navakanongesa kaye kakuhuka kosena haAlamangetone.

• Visoneka Ezeke. 38:11, 14-17; Mateu 24:31

  Upolofweto Ngonge mwakalukuka vatu jaKalunga. Kufumaho, vangelo navakakungulula “vatu asakula” Kalunga.

  Kutesamo chaupolofweto Mwangana wakunote mwakazachila hamwe najifulumende jamukaye kosena nakufumbukila vatu jaKalunga. Omu nahakahita lwola lwalundende, vawavisa vaze navakapwa hano hamavu navakavakungulwila mwilu.

• Visoneka Ezeke. 38:18-23; Ndanye. 2:34, 35, 44, 45; Kuso. 6:2; 16:14, 16; 17:14; 19:20

  Upolofweto ‘Uze atwamine hakavalu utoma’ mwakakumisa “kufungulula chenyi” omu mwakanongesa Ngonge namaswalale jenyi. Kufumaho uze “chisuma” navakamumbila “muchijiva chakakahya” kaha chize chifwanyisa chachinene navakachichika.

  Kutesamo chaupolofweto Yesu uze apwa Mwangana waWangana waKalunga mwakayovola vatu jaKalunga. Mwakazachila hamwe navangelo navaze 144,000 vaze mwakayula navo hakunongesa chiyulo chaSatana chamapolitiki mukaye kosena chize nachikafumbukila vatu jaKalunga.