1. Chakutalilaho muka chamwaza chize Yesu ahanyine tumbaji twenyi, kaha vakwileko ngachilihi? (Talenu muvwimbimbi wahalipapilo lyahelu.)

YESU atwalileho kwambulula mujimbu wamwaza chakuzeneka kulitwamina. Kaha asaka navaka-kumukavangiza vatwaleho lika kwambulula mujimbu. (Yowa 4:35, 36) Omu Yesu apwilenga hamwe natumbaji twenyi, tumbaji vambulwilenga mujimbu wamwaza natwima. (Luka 10:1, 5-11, 17) Oloze omu Yesu vamukashile nakumujiha, tumbaji twenyi kavatwalileho kwambulula mujimbu natwimako. (Yowa. 16:32) Oloze omu Yesu vamusangwile, akolezezele tumbaji twenyi vatwaleho kwambulula mujimbu. Kahomu ayile mwilu, tumbaji vambulwilenga mujimbu wamwaza natwima. Kahechi chalingishile vaka-kole javo vambenga ngwavo: “Talenu! Munazalisa Yelusalema yosena nakunangula chenu.”—Vili. 5:28.

2. Uno Yehova nakisulanga ngachilihi mulimo wakwambulula?

² Yesu atwaminyinyine mulimo wakwambulula mulikulukaji lyamyaka lyakulivanga, kaha Yehova akiswile mulimo kana. Chakutalilaho, haPendekoseta 33 C.E., vatu kafwe 3,000 vavambapachishile. (Vili. 2:41) Kaha tumbaji vapwilenga lika nakuvulilako. (Vili. 6:7) Chipwe ngocho, Yesu ahanjikilile chimweza ngwenyi hamakumbi akukuminyina vatu vavavulu navaketavila mujimbu wamwaza.—Yowa. 14:12; Vili. 1:8.

3-4. Mwomwo ika vandumbwetu vamwe cheji kuvakaluhwilanga kwambulula mujimbu wamwaza, kaha vyuma muka natushimutwila muchihande chino?

³ Tuvosena tweji kufwilanga kwambulula mujimbu wamwaza chakuzeneka kulitwamina. Kujingalila jimwe, vandumbwetu veji kulivwisanga kuwaha kwambulula mujimbu. Mwomwo ika? Mwomwo vatu vavavulu vasaka kuvanangula Mbimbiliya, ngocho vamwe veji kuvalwezanga vavandamineko numba vakavanangule. Oloze kujingalila jikwavo nawa, vaka-kwambulula veji kuchiwananga  kupwa chachikalu kwambulula mujimbu wamwaza mwomwo kavawana vatu vavavulu hamemboko, kaha nawa vatu vaze veji kuwananga hamembo kavazanga kulinangula Mbimbiliyako.

⁴ Kachi nge mwatwama kungalila kuze chapwa chachikalu kwambulula mujimbu, kaha vyuma natushimutwila muchihande chino navimikafwa. Natushimutwila havyuma vanakulinganga vandumbwetu vamwe mangana vambulile vatu vavavulu. Natushimutwila nawa havyuma vyatela kutulingisa tutwaleho lika kwambulula mujimbu numba nge vatu navetava chipwe chiku.

5. Ukalu muka veji kumonanga vaka-kwambulula vavavulu?

⁵ Vandumbwetu vavavulu veji kuchiwananga kupwa chachikalu kwambulila vatu hamembo avo, mwomwo mujingalila vatwama kujizuvo jimwe kavetavisa kuyako, kaha kujizuvo jikwavo vajingilikako vipato. Kujizuvo kana kweji kupwanga vaka-kulama vaze kaveshi kwitavisa kala mutu kwingila mukachi chakuzeneka lisesa kufuma kuli venyazuvoko. Kaha kujingalila jeka, vandumbwetu veji kuyanga nakwambulula kuzuvo hizuvo chakuzeneka ukalu, oloze kavawana vatu vavavulu hamemboko. Kaha vandumbwetu vakwavo veji kwambulwilanga kujingalila jakumembo kuze kwatwama vatu vavandende kaha. Vaka-kwambulula veji kutambukanga tunda yayisuku mangana vayenga nakwambulila vatu, oloze shimbu jimwe kavavawana hamembo avoko. Nge tweji kwambulwilanga mujingalila jakufwana ngana, kaha katwatela kuzeyako. Vyuma muka twatela kulinga tuhonese ukalu kanou mangana twambulilenga vatu vavavulu?

6. Uno mulimo wakwambulula walifwana ngachilihi namulimo wakuta vaishi?

⁶ Yesu afwanyishile mulimo wakwambulula kumulimo wakuta vaishi. (Mako 1:17) Vaka-kuta vaishi vamwe veji kufulyangilanga hamakumbi amavulu chakuzeneka kuwana vaishi. Chipwe ngocho, kavalitwaminako. Veji kwalumunangako lwola, nakunungulukila kuchihela cheka chipwe kuzachisa jijila jeka jakujihilamo vaishi. Nayetu nawa tunahase kukavangiza chakutalilaho chavo hakwambulula mujimbu. Shikaho tushimutwilenu jino hajijila jize tunahase kuvalondezezelamo.

7. Vyuma muka vinahase kusoloka nge natwambululanga halwola lwakulisezaseza?

⁷ Esekenu kutambukilanga vatu halwola lwakulisezaseza. Nge natutambukilanga vatu halwola luze navapwa hamembo avo, kaha natushimutwilanga navatu vavavulu. Tachikizenu ngwenu numba tuhu vatu navafuma hamembo, oloze kweji kupwanga lwola veji kukindulukanga hamembo avo. Shikaho, vandumbwetu vavavulu vazanga kwambulila vatu namusana chipwe nachingoloshi, mwomwo halwola kana hakiko vatu veji kuvawananga chikuma hamembo avo. Kaha nawa vatu veji kwitavilanga kuvambulila mwomwo halwola kana kaveshi namilimo yayivulu yakuzatako. Kaha nawa chakutalilaho chandumbwetu David chinahase kumikafwa. Ahanjikile ngwenyi, nge vanambulula ola yimwe chipwe jivali, veji kukindulukilanga hamembo aze kavawananga vatuko. Ambile ngwenyi, “Ngweji kulikomokelanga omu ngweji kukindulukilanga hamembo kana mwomwo ngweji kuwanangaho vatu vavavulu.” *

8. Tunahase kuzachisa ngachilihi chisoneka chaMuka-kwambulula 11:6 kumulimo wakwambulula?

⁸ Twatela kuzata nangolo mangana tuwanenga vatu hamembo. Omu mukiko chinatukolezeza chisoneka chamutwe wachihande. (Tangenu Muka-Kwambulula 11:6.) Ndumbwetu David atwalileho lika kukindulukila kuvatu vaze kawanyinenga hamemboko. Chakutalilaho, hazuvo  yimwe akindulukililengaho mapapa kakavulu numba jino awaneho mutu. Mutu kana apwile wakuwahilila, kaha ambile ngwenyi, “Munahichi jino myaka kafwe 8 kufuma halwola ngwalukilile hano hazuvo. Oloze kanda vangutambukilengaho lyehi kuli Vinjiho jaYehova.” David ambile ngwenyi, “Nge munawane vatu vaze kavavula kutwama hemboko, kakavulu vatu kana veji kwivwililanga kumujimbu wamwaza.”

9. Uno vaka-kwambulula vamwe vanalingi ngachilihi mangana vambulile vatu vaze vatwama kujizuvo jize kavetavisa kuyako?

⁹ Esekenu kuzachila kuchihela cheka. Vaka-kwambulula vamwe veji kuyanga nakwambulwila kuvihela vyeka mangana vawane vatu vaze kavawana hamembo avoko. Chakutalilaho, veji kwambulwilanga mumikwakwa, nakuzachisa tumatemba twakushindumuna mangana vambulile vatu vaze vatwama kujizuvo jize kavetavisa kuyako. Kaha nawa vaka-kwambulula vavavulu vawana nge vatu veji kwitavilanga kushimutwila navo chipwe kwitavila mikanda yetu nge vali kuvihela vyakuhemena, nakuvilanjilo nakuvihela vyeka vyasanga. Ndumbwetu Floiran wamulifuchi lyaBolivia, uze apwa kalama wakujinguluka ambile ngwenyi: “Tweji kuyanga kuvilanjilo nakuvihela vyasanga kafwe nalwola lwa 13:00 chipwe na 15:00 halwola luze vaka-kulanjisa veji kulihehwanga. Tweji kulivwisanga kuwaha kushimutwila navo nakuputuka vilongesa vyaMbimbiliya.”

10. Jijila muka mwatela kuzachisa mangana mwambulile vatu vosena?

¹⁰ Esekenu kuzachisa jila yeka. Ngachilihi nge munesejeka kutambukila mutu umwe halwola lwakulisezaseza oloze kamwamuwana hemboko? Kutala kuliko jijila jeka munahase kuzachisa mangana mumuwane tahi? Ndumbwetu Katarína ambile ngwenyi, “Ngweji kusonekelanga  mikanda vatu vaze kangwawana hemboko, nakuvalumbunwina vyuma vize ngwafwila kuhanjika navo.” Chuma muka natulinangula kuli ou ndumbwetu? Esekenu kuzachisa jijila jakulisezaseza mangana mwambulile vatu vosena mungalila yenu yakwambulwila.

11. Mwomwo ika vatu vamwe veji kukanyinanga kwivwilila kumujimbu tweji kwambululanga?

¹¹ Vatu vamwe kavasaka kwivwilila kumujimbu tweji kwambululangako, mwomwo kavasaka kutachikiza Kalunga chipwe vyuma yanangula Mbimbiliyako. Kavafwelela Kalungako mwomwo yakuvula chaukalu uli mukaye. Kaha nawa veji kukananga vyuma yanangula Mbimbiliya mwomwo yakumona vilinga vyavipi veji kulinganga vatwamina vamukwitava. Kaha veka nawa veji kukananga kwivwilila kumujimbu mwomwo yakuzakama milimo yavo, najitanga javo chipwe kala ukalu veji kumonanga mukuyoya chavo, ngocho veji kumonanga ngwavo Mbimbiliya kayeshi kuhasa kuvakafwako. Tunahase kutwalaho ngachilihi kulivwisa kuwaha mulimo wakwambulula numba tuhu vatu kaveshi kuumona kupwa waulemu chikumako?

12. Uno mazu atwama hali Wavaka-Fwilipi 2:4 nawatukafwa ngachilihi mumulimo wakwambulula?

¹² Zakamenunga vatu. Mukuhita chalwola vatu vaze vakanyinenga mujimbu wamwaza, veji kwitavilanga jino kuvambulila mwomwo yakumona ngwavo twavazakama. (Tangenu Wavaka-Fwilipi 2:4.) Chakutalilaho, ndumbwetu David uze twavulukanga hakavanga ambile ngwenyi, “Kachi nge mutu mwamba ngwenyi keshi nakusaka kwivwilila kumujimbu wamwazako, kaha ngweji kutumbikanga Mbimbiliya chipwe mikanda nakwamba ngwami: ‘Ngunakusaka ngutachikize ovyo unakanyina.’” Vatu veji kumonanga numba nge twavazakama nyi chiku. Vatu vanahase kuvulyama vyuma twahanjikile oloze kaveshi kuvulyama muchima wamwaza twavasolweleleko. Numba tuhu vatu navakana kwivwilila kumujimbu natwambulula, oloze vilinga vyetu navisolola nge twavazakama.

13. Vyuma muka twatela kulinga mangana vatu vevwilile kumujimbu tweji kwambululanga?

¹³ Natusolola ngwetu twazama vatu tweji kwambulilanga kachi nge natushimutwilanga navo vyuma vize vasaka vize navivaheta kumuchima. Chakutalilaho, kekesenu mumone nge atwama navana. Visemi vanahase kuzanga kwivwilila vyuma yahanjika Mbimbiliya kutalisa kukulela vana, chipwe vyuma yahanjika Mbimbiliya vize navivakafwa vapwenga vakuwahilila mutanga yavo. Kekesenu mumone nge kuzuvo yavo kwatwama vikulukulu. Nge kuvili, kaha tunahase kushimutwila navo haukalu uze vanalizakamina muno mukaye wakufwana nge uhwanga. Echi chinahase kuvalingisa vafwile kutachikiza chuma chize nachikakumisa ukalu kana. Kala lwola namuwana vatu vakuwahilila, fwilenunga  kuzachisa Mbimbiliya vamone omu yinahase kuvakafwa. Katarína, uze twavulukanga hakavanga ambile ngwenyi, “Ngweji kushinganyekanga omu muchano walumwine kuyoya chami.” Echi cheji kumulingisanga ahanjike nakukunyuka, kaha vatu vaze eji kushimutwilanga navo vatachikiza ngwavo akunyuka navyuma afwelela.

14. Kweseka naVishimo 27:17, vyuma muka twatela kulinga nandumbwetu uze natuzata nenyi muwande?

¹⁴ Zachilenunga hamwe navandumbwenu muwande. Mulikulukaji lyamyaka lyakulivanga, Paulu anangwileko Chimoteu jijila jakwambulilamo, kaha amukolezezele mangana ananguleko vandumbwenyi jijila kana. (Koli. 1, 4:17) Ngana muze chapwile kuli Chimoteu, nayetu tunahase kulinangula kuli vandumbwetu vakulindunuka muchikungulwilo. (Tangenu Vishimo 27:17.) Tutalenu hachakutalilaho chandumbwetu Shawn. Kunyima ou ndumbwetu azachilenga upayiniya mungalila yakumembo, muze vatu vavavulu vazangile vyuma vavanangwilenga mukwitava chavo. Vyuma muka vyamukafwile atwaleho lika kulivwisa kuwaha mulimo wakwambulula? Ambile ngwenyi: “Kakavulu ngwayilenga nandumbwami muwande. Omu twapwilenga muwande twashimutwililenga hajijila jize najitukafwa tuhotole uhashi wetu wakunangula. Chakutalilaho, nge tunambulila mutu, kaha twashimutwililenga havyuma ahanjikilenga nomu twamukumbulwile. Kufumaho twashimutwilile hajila yamwaza tunahase kukumbulwilamo kachi nge tunawane mutu uze mwatuhulisa vyuma vyovimwe.”

15. Mwomwo ika kulomba chapwila chachilemu omu natuzatanga mulimo wakwambulula?

¹⁵ Lombenu Yehova amikafwe. Kala lwola namuya muwande mwatela kulomba Yehova amitwaminyine. Chakuzeneka shipilitu yajila katweshi kuhasa kutesamo mulimo wetu wakwambululako. (Samu 127:1; Luka 11:13) Nge munakulomba Yehova amikafwe, mulwezenu hatoma vyuma munakusaka. Chakutalilaho, mulombenu amikafwe muwane mutu wamuchima wamwaza uze mwevwilila kumujimbu namumwambulila. Kufumaho ambulilenu kala mutu namuwana.

16. Uno kupwa nachilongesa chauka nachitukafwa ngachilihi tuzate kanawa mulimo wakwambulula?

¹⁶ Pwenunga nachilongesa chauka. Mbimbiliya yamba ngwayo tachikizenu “kanawa mwaya muchima waKalunga, ngwenu mwamwaza, mukiko vetavila, kaha mwakukupuka.” (Loma 12:2) Kulinangula Mbimbiliya nachitukafwa tutachikize kanawa Kalunga. Kahomu natwambulilako vakwetu, navamona chikupu ngwavo twakunyuka navyuma twafwelela. Katarína uze twavulukanga hakavanga ambile ngwenyi: “Ngwatachikijile ngwami, ngwatelele kufwelela chikuma kunangula chimwe chamaputukilo chamuMbimbiliya. Ngocho ngwalinangwile nguwane unjiho wakusolola nge kwatwama Tengi, Mbimbiliya yapwa himazu aKalunga, kaha nawa Kalunga atwama naliuka lyenyi hano hamavu.” Katarína ambile ngwenyi kupwa nachilongesa chauka chazamishile lufwelelo lwenyi nakumukafwa ambulule mujimba wamwaza natwima.

17. Mwomwo ika Yesu atwalileho kwambulula mujimbu?

¹⁷ Yesu atwalileho lika kwambulula mujimbu numba tuhu vatu vamwe vakanyinenga kwivwilila. Mwomwo ika? Atachikijile ngwenyi vatu vasakile kulinangula muchano, ngocho asakile kukafwa vatu vavavulu valinangule muchano. Atachikijile nawa ngwenyi vatu vaze vakanyinenga vanahase kuketavila kulutwe. Chakutalilaho, omu Yesu apwile nakuzata mulimo wenyi hano hamavu hamyaka yitatu nachimbwa, kakwapwile kausoko kenyi umwe uze apwile kambajiko. (Yowa. 7:5) Oloze vausoko wenyi vejile nakupwa vaka-Kulishitu, omu alingile hanasanguka lyehi.—Vili. 1:14.

18. Mwomwo ika twatela kutwalaho lika kwambulula?

¹⁸ Twatela kutwalaho lika kwambulula hakuwana nge katwatachikijile vatu vaze navakula  kanawa kumujimbu wamwazako, mwomwo vatu vamwe veji kumbatanga lwola numba vakule kanawa kumujimbu. Navatu vaze veji kukananga kwivwilila kumujimbu wamwaza tweji kwambululanga vanahase “kutohwesa Kalunga” nge navamona vilinga vyetu vyamwaza.—Petu. 1, 2:12.

19. Kweseka namukanda Wavaka-Kolinde 1, 3:6, 7, chuma muka twatela kutachikiza?

¹⁹ Numba tuhu etu yetu tweji kutumbanga nakutukumwina, oloze twatela kutachikiza ngwetu Kalunga ikiye eji kusokesanga. (Tangenu Wavaka-Kolinde 1, 3:6, 7.) Ndumbwetu Getahun uze atwama muEthiopia, ambile ngwenyi: “Hamyaka yakuzomboka 20, yami kaha ngwapwile Chinjiho mungalila yize kavambulwila chikumako. Oholyapwa jino, tunahete vaka-kwambulula 14. Ava vakwetu 13, vavambapachishile halwola lwolumwe, hapwile napuwami navana vetu vatatu. Kakavulu, tweji kukungulukanga vatu 32.” Ndumbwetu Getahun apwa wakuwahilila hakuwana nge atwalileho kwambulula nakuvandamina Yehova akoke vatu vamichima yamwaza vezenga muliuka lyenyi.—Yowa. 6:44.

20. Uno mulimo wetu wakwambulula walifwana ngachilihi namulimo wakuyovola vatu?

²⁰ Yehova amona vatu vosena kupwa vavalemu. Atuhana mulimo wakuzachila hamwe naMwanenyi mangana tukungulule vatu vakufuma kumafuchi osena shimbu kanda kukuma chizenga. (Hangai 2:7) Mulimo wetu wakwambulula tunahase kuufwanyisa kumulimo wakuyovola vatu vali muponde. Kaha etu vaka-kwambulula, tunafwane nge vatu vaze navatuma kuya nakuyovola vatu vaze vanandilikila mumungochi. Numba tuhu navayovolako vatu vavandende vaze navawana vavatonyi, oloze mulimo vanazate waulemu. Omu mukiko chapwa nakumulimo wakwambulula. Katwatachikijile vatu vangahi navakayovoka mukaye kano kaSatanako. Oloze Yehova nahase kuzachisa kala ndumbwetu mangana akafwe vatu kana vakayovoke. Ndumbwetu Andreas uze atwama mulifuchi lyaBolivia, ambile ngwenyi, “Ngunatachikiza ngwami nge mutu mwalinangula muchano nakumumbapachisa, kaha ngweji kukukululanga ngwami vandumbwetu vazachilanga hamwe mangana vamukafwe.” Shikaho tutwalenuho kwambulula mujimbu wamwaza natwima. Nge natulinga ngocho, kaha Yehova mwatukisula, nakulivwisa kuwaha kuzata mulimo wakwambulula.