1-2. Vyuma muka ahanjikile muka-kusoneka umwe, kaha vyuma muka natushimutwila muchihande chino?

VATU vavavulu makumbi ano veji kushinganyekanga ngwavo vafwelela Yesu, oloze kavakavangiza vyuma vize anangwilengako. (Chimo. 2, 4:3, 4) Muka-kusoneka mikanda umwe ambile ngwenyi: “Kachi nge makumbi ano kwapwanga Yesu mukwavo uze mwalinga vyuma ngana vize alingilenga Yesu ivene . . . , kutala mutu kana kachi tunamukane ngana muze vakanyine Yesu tahi? . . . Eyo, kachi tunamukane.”

² Omu Yesu apwile hano hamavu, vatu vavavulu vevwilenga vyuma alingile, nakumona vyakukomwesa alingilenga, oloze kavamufweleleleko. Mwomwo ika? Muchihande chinafumuho, twashimutwilanga havyuma viwana vyalingishile vatu vahone kufwelela Yesu. Tushimutwilenu cheka havyuma vikwavo viwana. Natushimutwila nawa havyuma vinakulingisa vatu makumbi ano vahone kwivwilila kumujimbu wamwaza tweji kwambululanga, navyuma vize twatela kulinga mangana tutwaleho lika kuzachila Yehova.

3. Vyuma muka alingilenga Yesu vize vyalingishile vatu vamwe vahone kumufwelela?

³ Omu Yesu apwile hano hamavu, alikachilenga navatu vakulisezaseza. Alilililenga vyakulya hamwe navaka-luheto, navatu vavalemu, oloze kakavulu alikachilenga navatu vakuhutwa navatu vamokomoko, kaha nawa evwilililenga keke vatu vaze vamwenenga ngwavo ‘vaka-shili.’ Vatu vamwe vaze vapwile vakulivwimba, vahonene kufwelela Yesu mwomwo yavyuma apwile nakulinga. Ava vatu vakulivwimba vahulishile tumbaji twaYesu ngwavo: “Mwomwo ika mweji kulilanga nakunwina hamwe navaka-kutambula mitelo navaka-shili?” Yesu avakumbulwile ngwenyi:  “Vatu vavakangule kaveshi kusakiwa chimbukeko, kuvanga vaze vali nakuviza kaha. Ami kangwejile nakusanyika vaka-kwolokako, oloze shina vaka-shili mangana vapihilile nakwalumuka.”—Luka 5:29-32.

4. Kweseka naupolofweto waIsaya, chuma muka vatelele kutachikiza vaYuleya kutalisa kuli Meshiya?

⁴ Vyuma muka yahanjika Mbimbiliya? Shimbu kanda Meshiya ezanga hano hamavu, kapolofweto Isaya ahanjikile ngwenyi, Meshiya kaveshi kukamufwelela kuvatu vavavuluko. Apolofwetele ngwenyi: “Vatu vamulumbilishile, vamuhungile. . . . Chapwile nge nasweke chihanga chenyi mangana tuhone kuchimona. Vamulumbilishile, kaha twamumwene kupwa himutu wamokomoko.” (Isa. 53:3) Ou upolofweto wahanjikile ngwawo, Meshiya navakamuhunga. Ngocho navaYuleya vatelele kutachikiza ngwavo, Meshiya navakamuhunga.

5. Uno vatu vavavulu makumbi ano vamona ngachilihi vangamba jaKalunga vakushishika?

⁵ Kutala omu mukiko chili namakumbi ano tahi? Eyo. Vatwamina vamukwitava vavavulu veji kuwahililanga nge mujichachi javo namwiza vatu vavalemu, navaka-luheto, navatu vakutanga chikuma. Veji kwitavilanga vatu kana vapwenga mujichachi javo numba tuhu veji kulinganga vyuma vyavipi. Ava vatwamina nawa veji kulumbilisanga vangamba jaYehova vakushishika, hakuwana nge vatu vavavulu muno mukaye vavamona kupwa vamokomoko. Paulu ambile ngwenyi, Kalunga asakwile vatu vamokomoko “vaze valumbilisa.” (Koli. 1, 1:26-29) Shikaho, Yehova amona vangamba jenyi vosena vakushishika kupwa vavalemu.

6. Vyuma muka ahanjikile Yesu hali Mateu 11:25, 26, kaha tunahase kumulondezeza ngachilihi?

⁶ Vyuma muka navitukafwa tutwaleho lika kuzachila Yehova? (Tangenu Mateu 11:25, 26.) Kanda kwechelela vishinganyeka vyamuno mukaye vimilingise mumone vatu jaKalunga kupwa vamokomokoko. Tachikizenu ngwenu Yehova eji kuzachisanga vatu vakulinyisa mangana valinge mwaya muchima wenyi. (Samu 138:6) Kaha nawa shinganyekenunga havyuma vize nalingi Yehova mwomwo yakuzachisa vangamba jenyi vaze vamona muno mukaye ngwavo vamokomoko.

7. Mwomwo ika Yesu apopolwelele vaFwaliseu, kaha chuma muka valingile?

⁷ Yesu apopolwelenga vatwamina vamukwitava mwomwo vanangwilenga vatu vyuma vyamakuli. Chakutalilaho, Yesu apopolwele vaFwaliseu mwomwo vahakile muchima kukulama lushimbi lwakusananga kumavoko muchishishisa chakuzakama visemi javo. (Mateu 15:1-11) Pamo mazu ahanjikile Yesu akomwesele tumbaji twenyi. Ngocho vambile kuli ikiye ngwavo: “Uno unatachikiza ngwove vaFwaliseu vahukananga hamazu ove wahanjikanga nyi?” Ikiye avakumbulwile ngwenyi: “Weshowo mutondo vazenekele kutumba kuli Tata wamwilu navakautukula. Vechenu. Vanapu vatwamina vatupuputa. Kachi nge kapuputa mwatwaminyina mukwavo kapuputa, kaha vosena vavali navaholokela muwina.” (Mateu 15:12-14) Yesu atwalileho lika kuhanjika muchano numba tuhu vatwamina vamukwitava vapihilililenga havyuma ahanjikilenga.

8. Yesu asolwele ngachilihi ngwenyi kunangula chimwe kavachitavila kuli Kalungako?

⁸ Kaha nawa Yesu apopolwele kunangula chamakuli. Ahanjikile ngwenyi kunangula chimwe kavachitavila kuli Kalungako. Kaha nawa ngwenyi, vatu vavavulu navakaya mujila yakuhweka yakutwala kukunonga, oloze vatu vavandende kaha vakiko navakaya mujila yakupalakanya yakutwala kukuyoya. (Mateu 7:13, 14) Ambile nawa ngwenyi, vatu vamwe navakalisolola kumeso avatu ngwavo vali nakuzachila Kalunga kumananyi chiku. Shikaho Yesu ahuhumwinyine vatu ngwenyi: “Zangamenunga navapolofweto vamakuli vaze veji kwizanga kuli enu oku vanalifwiki malambu amikoko, oloze mukachi vapwa tungunge vazala. Kumihako yavo kukiko vene namuvatachikijila kanawa.”—Mateu 7:15-20.

9. Uno Yesu asopolwele kunangula muka chamakuli?

 ⁹ Vyuma muka yahanjika Mbimbiliya? Mbimbiliya yahanjikilile chimweza ngwayo, Meshiya mwakazata natwima milimo yamuzuvo yaYehova. (Samu 69:9; Yowa. 2:14-17) Twima yikiko yalingishile Yesu asopolole kunangula chamakuli navilinga vyavipi valingilenga mukwitava. Chakutalilaho, vaFwaliseu vafwelelele ngwavo mwono kawafwako, oloze Yesu anangwilenga ngwenyi vafu vanasavala tulo. (Yowa. 11:11) VaSatuse kavafwelele mukusangukako, oloze Yesu asangwile sepa lyenyi Lazalu. (Yowa. 11:43, 44; Vili. 23:8) VaFwaliseu vanangwilenga ngwavo, Kalunga ikiye eji kusakwilanga vatu vyuma navakalinga kulutwe navize navikavasolokela, oloze Yesu anangwile ngwenyi vatu vatela kulisakwila vavene kuzachila Kalunga chipwe chiku.—Mateu 11:28.

10. Mwomwo ika vatu vavavulu veji kukanyinanga kwivwilila kumujimbu tweji kwambululanga?

¹⁰ Kutala omu mukiko chili namakumbi ano tahi? Eyo. Vatu vavavulu makumbi ano veji kukananga kwivwilila kumujimbu wamwaza tweji kwambululanga, mwomwo vyuma vyamuMbimbiliya tweji kunangulanga vyalimbalaka navyuma vafwelela. Chakutalilaho, vatwamina vamukwitava veji kunangulanga vatu javo ngwavo Kalunga eji kuzangamisanga vatu muNgehena. Veji kunangulanga mujila kana mangana vahonese vatu kufuma mujichachi javo. Oloze hakuwana nge etu tweji kuzachilanga Yehova, Kalunga wazangi, ngocho tweji kukafwanga vatu vatachikize ngwavo kunangula kana chapwa chamakuli. Vatwamina vamukwitava nawa veji kunangulanga ngwavo mwono kawafwako. Tweji kusololanga ngwetu kunangula kana kachafuma muMbimbiliyako, mwomwo nge mwono kawafwako, kaha nakusanguka vene kacheshi kukapwakoko. Numba tuhu mauka amavulu eji kunangulanga ngwawo, Kalunga ikiye eji kusakwilanga vatu vyuma navakalinga kulutwe, chipwe vize navikavasolokela, oloze etu tweji kunangulanga ngwetu, Yehova ahana vatu lisesa lyakusakula kumuzachila chipwe chiku. Vyuma muka veji kulinganga vatwamina vamukwitava hakwivwa mazu kana? Veji kupihililanga chikuma.

11. Kweseka namazu aYesu atwama hali Yowano 8:45-47, Kalunga asaka vyuma muka kuli vatu jenyi?

¹¹ Vyuma muka navitukafwa tutwaleho lika kuzachila Yehova? Nge twazanga muchano,  kaha twatela kufwelela Mazu aKalunga. (Tangenu Yowano 8:45-47.) Etu twazama mumuchano, mwomwo katwapwa ngana muze apwa Satana Liyavoloko. Katwalinga vyuma vize vyalimbalaka navyuma twafwelelako. (Yowa. 8:44) Kalunga asaka vatu jenyi ‘vahungenga vyuma vyavipi, nakukakachilanga kuvyuma vyamwaza,’ ngana muze alingile Yesu.—Loma 12:9; Hepe. 1:9.

12. Mwomwo ika jila afwilililemo Yesu yalingishile vaYuleya vavavulu vahone kumufwelela?

¹² Chuma muka chikwavo chalingishile vaYuleya vahone kufwelela Yesu? Paulu ambile ngwenyi: “Etu tweji kwambululanga Kulishitu uze vasukikile hachitondo, kaha kuli vaYuleya chuma kana cheji kuvahukanyisanga.” (Koli. 1, 1:23) Mwomwo ika jila afwilililemo Yesu yalingishile vaYuleya vavavulu vahone kumufwelela? Mwomwo vashinganyekele ngwavo hakuwana nge Yesu vamusukikile hachitondo, ngocho apwile chihwanga, kaha nawa muka-shili keshi Meshiyako.—Lushi. 21:22, 23.

13. Vyuma muka vahonene kutachikiza vatu vaze vahonene kufwelela Yesu?

¹³ VaYuleya vamwe vaze vahonene kufwelela Yesu mwomwo yajila vamujihilililemo, vahonene kutachikiza ngwavo Yesu vamujihile chakuzeneka mulonga kaha nawa vamuyanjishile mujila yayipi. Vatu vaze vapwile nakusopesa Yesu, kavayulile kweseka nachiyuloko. Zango yakulitulaho yakusopa milonga yavaYuleya, yahanyine Yesu mulonga mwomwo kayakavangijile jishimbi jahakusopako. (Luka 22:54; Yowa. 18:24) Vaka-kuyula kavayulile kanawako, mwomwo omu vevwile vatu navahana Yesu mulonga, vakiko vaputukile kutondatonda “unjiho wamakuli wakuvangijikila Yesu mangana vamujihe.” Omu vahonene kuwana mulonga wakumujihilaho, kapilishitu wakulitulaho ashinyinyikile Yesu mangana ahanjike vyuma vize navimulingisa vamuwane namulonga. Chuma alingile ou kapilishitu chalimbalakile najishimbi. (Mateu 26:59; Mako 14:55-64) Omu Yesu asangukile, vaze vaka-kuyula vahanyine maswalale javaLoma vaze vapwile nakulama kuchimbumbe chaYesu “jimbongo japalata jajivulu” mangana vahanjike vyuma vyamakuli kutalisa kukusanguka chaYesu.—Mateu 28:11-15.

14. Mbimbiliya yahanjikilile chimweza vyuma muka kutalisa kukufwa chaMeshiya?

 ¹⁴ Vyuma muka yahanjika Mbimbiliya? Numba tuhu vaYuleya vavavulu vashinganyekele ngwavo Meshiya katela kufwako, oloze Mbimbiliya yahanjikilile chimweza ngwayo: “Afwile nakuhana kuyoya chenyi, vamulavililile hali vaka-kuzombwojoka jishimbi. Ambachile shili yavatu vavavulu, ahakwililile vaka-kuzombwojoka jishimbi.” (Isa. 53:12) Shikaho vaYuleya vatelele lika kutwalaho kufwelela Yesu, numba tuhu vamujihile ngana muze vajihilenga vaka-shili.

15. Vyuma muka vili nakulingisa vatu vamwe vahone kwivwilila kumujimbu wamwaza vanakwambululanga Vinjiho jaYehova?

¹⁵ Kutala omu mukiko chili namakumbi ano tahi? Eyo. Yesu vamuvangijikilile nakumuhana mulonga wamakuli, kaha omu mukiko chili nakuli Vinjiho jaYehova makumbi ano. Chakutalilaho, mumwaka wa 1930 nakuheta mumwaka wa 1950 mulifuchi lyaUnited States, vandumbwetu vavatwalilenga kujizango jakusopela mwomwo yalufwelelo lwavo. Vaka-kuyula vamwe vasopelanga vihande vyetu mujila yakuhenga. Kaha mungalila yaQuebec, yamulifuchi lyaCanada, Chachi yimwe yazachililile hamwe naFulumende mangana vafumbukile Vinjiho jaYehova. Vandumbwetu vavavulu vavatwalilenga mutumenga, mwomwo yakwambulila vakwavo mujimbu wamwaza waWangana waKalunga. Kaha muchiyulo chaNazi mulifuchi lyaGermany, vandumbwetu vavavulu vavakweze vakushishika vavajihile. Kaha mumyaka yakalinwomu, vandumbwetu vavavulu muRussia, vanavatwalenga kujizango jakusopela nakuvahana milonga, nakuvatwala mutumenga mwomwo yakuzachisa Mbimbiliya yize vamona ngwavo yili nakuhungumwisa vatu. Vanakanyisa nawa Mbimbiliya yaVisoneka vyaKaye Kakahya yamulilimi lyaRussia, mwomwo ngwavo mwatwama lijina lyaYehova.

16. Kweseka naChisoneka chaWaYowano 1, 4:1, mwomwo ika katwatela kwechelela mijimbu yamakuli veji kuhanjika hali Vinjiho jaYehova yituhungumwiseko?

¹⁶ Vyuma muka navitukafwa tutwaleho lika kuzachila Yehova? Kekesenu muwane unjiho wakwoloka. Omu Yesu apwile nakuhanjika Chihande ChahaPili, alwezele vaka-kumwivwilila ngwenyi, ‘navakavavangijikila vyuma vyavipi vyeka navyeka vyosena.’ (Mateu 5:11) Satana ikiye eji kulingisanga vavangijikile vaka-kukavangiza Yesu. Eji kuzachisanga vaka-kole jetu mangana vatandakanyise makuli hali etu. (Kuso. 12:9, 10) Katwatela kwivwililanga kuvyuma vyamakuli navahanjika vaka-kole jetuko. Shikaho, katwatela kwechelela makuli kana atwivwise woma kuzachila Kalunga, chipwe azeyese lufwelelo lwetuko.—Tangenu WaYowano 1, 4:1.

17. Vyuma muka vyalingishile vatu vamwe vahone kufwelela Yesu?

¹⁷ Shimbu kanda Yesu vamujihe, kaposetolo kenyi umwe amusolwele kuli vaka-kole. Kaha nawa kaposetolo mukwavo akanyine Yesu mapapa katatu, kaha haufuku uze vamukwachile vaposetolo jenyi vosena vamusezele. (Mateu 26:14-16, 47, 56, 75) Yesu kalikomokeleleko mwomwo ahanjikilile chimweza ngwenyi vyuma kana navikasoloka. (Yowa. 6:64; 13:21, 26, 38; 16:32) Omu vyuma kana vyasolokele, vatu vamwe vashinganyekele ngwavo kaveshi kuhasa kupwa vaka-kukavangiza Yesuko. Pamo vashinganyekele ngwavo, ‘Kangweshi kuhasa kupwa ngukambaji kaYesuko, mwomwo vaposetolo jenyi vanamusolola kuli vaka-kole nakumuseza.’

18. Upolofweto muka wakutalisa kuli Yesu wateselemo shimbu kanda vamujihe?

¹⁸ Vyuma muka yahanjika Mbimbiliya? Kushikulu, Yehova ahanjikilile chimweza kuhichila muli kapolofweto kenyi Zekaliya ngwenyi, Meshiya navakamulanjisa najimbongo japalata 30. (Zeka. 11:12, 13) Kaha mutu uze mwakamusolola  mwakapwa sepa lyenyi uze afwelela chikuma. (Samu 41:9) Kapolofweto Zekaliya asonekele nawa ngwenyi: “Veta kafunga, mangana utanga wamikoko ulimwange.” (Zeka. 13:7) Vyuma kanevi vyasolokele kavyatelele kulingisa vatu vamichima yamwaza vahone kufwelela Yesuko, oloze vatelele kuzamisa lufwelelo lwavo hakumona upolofweto kanou wakuvuluka Yesu nautesamo.

19. Chuma muka vatachikiza vatu vamichima yamwaza?

¹⁹ Kutala omu mukiko chili namakumbi ano tahi? Eyo. Makumbi ano Vinjiho jaYehova vamwe vanaseze muchano nakupwa vaka-kulikanga kuli Kalunga, nakufwila kuhungumwisa vakwavo. Vali nakutandakanyisa mijimbu yamakuli hali Vinjiho jaYehova kuzachisa mapapilo amijimbu, naInternet, navisaji. Oloze mijimbu kaneyi yamakuli kayeshi nakulingisa vatu vamichima yamwaza valitwamine kuzachila Kalungako. Vatachikiza ngwavo Mbimbiliya yahanjikilile chimweza ngwayo vyuma kana navikasoloka.—Mateu 24:24; Petu. 2, 2:18-22.

20. Vyuma muka navitukafwa vahone kutuhungumwisa kuvatu vaze vanaseze muchano? (WaChimoteu 2, 4:4, 5)

²⁰ Vyuma muka navitukafwa tutwaleho lika kuzachila Yehova? Twatela kuzamisa lufwelelo lwetu hakulinangulanga Mbimbiliya hakumbi hakumbi, nakulombanga lwola lwosena, nakwazana mumilimo yize atuhana Yehova. (Tangenu WaChimoteu 2, 4:4, 5.) Kachi nge natupwa nalufwelelo lwakukola, kaha katweshi kwivwa woma hamijimbu yamakuli yize navahanjika hali Vinjiho jaYehovako. (Isa. 28:16) Kuzanga Yehova, naMbimbiliya, navandumbwetu nachitukafwa vahone kutuhungumwisa kuvatu vaze vanaseze muchano.

21. Numba tuhu vatu vavavulu vanakukana kwivwilila kumujimbu wamwaza tweji kwambululanga, oloze vatu vamwe vali nakwakulako ngachilihi?

²¹ Omu Yesu apwile hano hamavu vatu vavavulu kavamufweleleleko. Chipwe ngocho, vatu vavavulu nawa vamufwelelele. Hali vatu vaze vamufwelelele hapwile nachilolo wamulemu wamuSunendeline yavaYuleya, ‘naliyongomena lyalinene lyavapilishitu.’ (Vili. 6:7; Mateu 27:57-60; Mako 15:43) Namakumbi ano, vatu vavavulu vali nakwivwilila kumujimbu wamwaza tweji kwambululanga. Mwomwo ika? Mwomwo vatachikiza muchano wamuMbimbiliya nakuuzanga. Mbimbiliya yamba ngwayo: “Vaze vazanga jishimbi jove vatwama mukuunda, kakweshi chuma numba chimwe nachivahukanyisako.”—Samu 119:165.