1. Chuma muka pamo chasolokele halwola lwatete omu mwambulilile vatu muchano wamuMbimbiliya?

KUTALA munakwanuka lwola luze mwatachikijile ngwenu munawane muchano tahi? Mwaputukile jino kwivwishisa vyuma yanangula Mbimbiliya. Mwashinganyekele ngwenu vatu vosena navawahilila kulinangula muchano wamuMbimbiliya. Kaha mwakunyukile ngwenu muchano wamuMbimbiliya nauvakafwa valivwise kuwaha kuyoya oholyapwa, nakutalilila vyuma vyamwaza kulutwe. (Samu 119:105) Ngocho mwaputukile kwambulilako masepa jenu navausoko vyuma vize mwalinangwile. Kutala vetavilile tahi? Vavavulu kavetavilileko.

2-3. Vyuma muka valingilenga vatu vavavulu kutalisa kuvyuma vize alingilenga Yesu?

² Katwatela kulikomokela kachi nge vatu navakana kwivwilila kumujimbu wamwazako. Omu Yesu apwile hano hamavu, vatu vavavulu kavamufweleleleko, numba tuhu alingilenga vyuma vyavivulu vyakukomwesa vize vyasolwele nge vapwile nakumukafwa kuli Kalunga. Chakutalilaho, vatu valimwenene nameso omu Yesu asangwile Lazalu. Oloze vatwamina javaYuleya kavamufwelelele ngwavo ikiye Meshiyako. Ngocho vasakile nakujiha Yesu naLazalu.—Yowa. 11:47, 48, 53; 12:9-11.

³ Yesu atachikijile ngwenyi vatu vavavulu kaveshi kumwitavila ngwavo ikiye Meshiyako. (Yowa. 5:39-44) Alwezele tumbaji twaYowano Muka-kumbapachisa ngwenyi: “Awahilila ou ahona kuwana chuma chimwe muli ami chakumuhukanyisa.” (Mateu 11:2, 3, 6) Mwomwo ika vatu vavavulu vahonene kufwelela Yesu?

4. Vyuma muka natushimutwila muchihande chino?

⁴ Muchihande chino nechi nachikavangizaho, natushimutwila havyuma vyalingishile vatu vavavulu mulikulukaji lyamyaka lyakulivanga vahone kufwelela Yesu. Natushimutwila nawa havyuma vinakulingisa vatu vavavulu makumbi ano vakane kwivwilila kumujimbu wamwaza tweji kuvambulilanga. Chuma chachilemu  natushimutwila shina ovyo twatela kupwila nalufwelelo lwakukola mangana tutwaleho lika kufwelela Yesu.

5. Vyuma muka vyalingishile vatu vamwe vashinganyeke ngwavo Yesu kapwile Meshiyako?

⁵ Vatu vavavulu vahonene kufwelela Yesu mwomwo yakuchihela kuze asemukilile. Vetavilile ngwavo Yesu apwile muka-kunangula wakwipangweji, kaha nawa alingilenga vyuma vyakukomwesa. Oloze vashinganyekelenga ngwavo vamusemene kuli muka-kusonga maliva uze apwile wakuhutwa. Kaha nawa vashinganyekelenga ngwavo asemukilile muNazaleta, nganda yize yapwile yamokomoko. Hakavanga, Natanyele uze ejile nakupwa kambaji kaYesu ambile ngwenyi: “Kutala kuNazaleta kunahase kufuma chuma chimwe chamwaza numba?” (Yowa. 1:46) Pamo Natanyele amwenenga nganda yize asemukilile Yesu kupwa yamokomoko. Pamo nawa ashinganyekele haupolofweto wahali Mika 5:2, uze wasolola nge Meshiya mwakasemukila muMbetelema keshi muNazaletako.

6. Chuma muka chatelele kukafwa vatu vatachikize ngwavo Yesu ikiye Meshiya?

⁶ Vyuma muka yahanjika Mbimbiliya? Kapolofweto Isaya ahanjikilile chimweza ngwenyi vaka-kole jaYesu navakahona kuhaka muchima kumujimbu ‘wakuyoya chaMeshiya.’ (Isa. 53:8, kwinyikila chamwishi) Mijimbu yayivulu yakutalisa kuli Yesu vayipolofwetelele chimweza. Kachi nge vaka-kole jaYesu vakekesele kanawa mijimbu yosena yakutalisa kuli Yesu, kachi vatachikijile ngwavo Yesu asemukilile muMbetelema, kaha nawa afumine kutanga yaMwangana Ndavichi. (Luka 2:4-7) Shikaho, chihela asemukilile Yesu chikiko vene chize vahanjikilile chimweza hali Mika 5:2. Jino chuma muka chavalingishile vahone kutachikiza mijimbu kana? Vatu vakukulwilenga washi chakuhona kukekesa kanawa mijimbu. Echi chikiko chalingishile vatu vahone kufwelela Yesu.

7. Vyuma muka vyeji kulingisanga vatu vavavulu vakane kupwa Vinjiho jaYehova?

⁷ Kutala omu mukiko chili namakumbi ano tahi? Eyo. Hakuwana nge vatu jaYehova vavavulu vapwa vakuhutwa, kaha nawa kavapwa vavalemu muchitungiloko, ngocho vatu vavavulu vavamona kupwa hivatu “vakuzeneka kulinangula kaha nawa hivatu vanganavene.” (Vili. 4:13) Vatu vamwe vashinganyeka ngwavo, Vinjiho jaYehova kavatela kunangula vakwavo Mbimbiliyako mwomwo kavaya kumashikola amanene amukwitavako. Kaha vatu veka veji kwambanga ngwavo liuka lyaVinjiho jaYehova lyapwa liuka lyamuAmerica, oloze Vinjiho jaYehova vavavulu kavatwama muAmericako. Kaha vatu vakwavo veji kuvalwezanga ngwavo Vinjiho kavafwelela Yesuko. Kaha nawa hamyaka yayivulu, Vinjiho jaYehova vanavavulukanga ngwavo ‘Vaka-kulikanga kufulumende,’ kaha nawa ‘vaka-kuhungumwisa vatu.’ Ngocho vatu vavavulu kavasaka kupwa Vinjiho jaYehovako mwomwo yakwivwa mijimbu kaneyi yamakuli.

8. Kweseka naVilinga 17:11, vyuma muka vatela kulinga vatu kachi nge vali nakusaka kutachikiza vangamba jaKalunga makumbi ano?

⁸ Chuma muka nachikafwa vatu vatwaleho lika kufwelela Yesu? Vatu vatela kukekesanga vawane unjiho wamuchano. Omu mukiko alingile naLuka, uze asonekele mukanda waMujimbu Wamwaza. Azachile nangolo mangana ahehwojole “kanawa mwaya vyuma vyosena kufuma kuze vyaputukilile.” Alingile ngocho mangana akafwe vatu vatachikize “kanawa shindakanyi yavyumovyo” vevwile kutalisa kuli Yesu. (Luka 1:1-4) VaYuleya vaze vapwile nakutwama muMbeleya, valingile ngana muze alingile Luka. Omu vavambulilile mujimbu wamwaza wakutalisa kuli Yesu, vesekesele vyuma vavalwezele kuvyuma vyahanjika Visoneka vyachiHepeleu, mangana vatachikize numba nge vyuma vize vavalwezele vyapwile vyamuchano nyi chiku. (Tangenu Vilinga 17:11.) Chochimwe nawa, namakumbi ano vatu vatela  kukekesanga vawane unjiho wamuchano. Vatela kukekesanga Visoneka mangana vamone numba nge vyuma vanakuvanangulanga kuli vangamba jaYehova vyamuchano nyi chiku. Vatela nawa kutachikiza vyuma vanakulinga vangamba jaYehova makumbi ano. Nge navalinga ngocho, kaha kaveshi kwechelela vyuma vyamakuli navahanjika vatu vivahungumwiseko.

9. Chuma muka chasolokele omu Yesu akanyine kulinga chinjikizo chakufuma mwilu?

⁹ Vatu vamwe vasakile Yesu avalingile vyuma vikwavo keshi kuvanangula kahako. Vamulombele alinge “chinjikizo chakufuma mwilu,” chize nachisolola nge ikiye Meshiya. (Mateu 16:1) Pamo vamulombele alinge chuma kana mwomwo yakuhona kwivwishisa mazu vatangile hali Ndanyele 7:13, 14. Oloze kalwapwile lwola lwakutamo Yehova kutesamo upolofweto kanako. Vyuma vize anangwilenga Yesu vyatelemo kuvakunyula vetavile ngwavo ikiye Meshiya. Oloze omu Yesu akanyine kuvalingila chinjikizo chize vamulombele, vechele kumufwelela.—Mateu 16:4.

10. Uno Yesu ateselemo ngachilihi vyuma apolofwetele Isaya kutalisa kuli Meshiya?

¹⁰ Vyuma muka yahanjika Mbimbiliya? Kapolofweto Isaya ahanjikile kutalisa kuli Meshiya ngwenyi: “Keshi kukateta miteto chipwe kukatambakanako, kaha lizu lyenyi kalyeshi kukevwakana mujilako.” (Isa. 42:1, 2) Yesu azachilenga mulimo wenyi wakwambulula chakuzeneka kulitukwojola. Katungilenga jitembeleko, kaha nawa kavwalilenga uvwalo wamukwitava wakulipwilako, chipwe kulweza vatu vamusanyike majina amalemu amukwitavako. Nahalwola luze kuyoya chenyi chapwile muponde, Yesu kalingile chuma chakukomwesa mangana evwise kuwaha Mwangana Heloteko. (Luka 23:8-11) Numba tuhu Yesu alingilenga vyuma vyakukomwesa, oloze ahakile chikuma mangana kumulimo wakwambulula. Alwezele tumbaji twenyi ngwenyi: “Echi chikiko ngwejililile.”—Mako 1:38.

11. Vishinganyeka muka vyakuhenga vatwama navyo vatu vamwe makumbi ano?

¹¹ Kutala omu mukiko chili namakumbi ano tahi? Eyo. Vatu vavavulu makumbi ano veji kulikomokelanga hakumona jichachi jajinene jaulangaji, kaha nawa veji kuvumbikanga vakulwane  vajichachi vaze vatwama namajina aulemu. Veji kwazananga muvilika vize vyafuma kukwitava chamakuli. Vatu vaze veji kuyanga kujichachi kana kavalinangula vyuma vyamuchano hali Kalunga navyuma ajinako. Oloze vaze veji kuyanga kukukunguluka chetu, veji kulinangulanga vyuma vize Kalunga asaka tulinge, navyuma twatela kulinga mangana tulinge mwaya muchima wenyi. JiZuvo jetu jaWangana japwa jaunyoji kaha nawa jamweseke. Vandumbwetu vaze veji kutwaminyinanga kavavwala uvwalo wakulipwilako, kaha nawa kavavavuluka majina aulemuko. Vyuma vize tweji kunangulanga navize twafwelela vyeji kufumanga muMbimbiliya. Chipwe ngocho, vatu vavavulu makumbi ano veji kukananga kwivwilila kuvyuma tweji kunangulanga mwomwo vashinganyeka ngwavo mukwitava chetu kamwatwama vilika vize navivahizumunako. Kaha nawa veji kukananga mwomwo ngwavo vyuma tweji kunangulanga vyalimbalaka navyuma vize vatachikiza.

12. Kweseka nomu vanalumbununa hali WavaHepeleu 11:1, 6, lufwelelo lwetu lwatela kuzama havyuma muka?

¹² Chuma muka nachitukafwa tutwaleho lika kufwelela Yesu? Kaposetolo Paulu alwezele vaka-Kulishitu vamuLoma ngwenyi: “Lufwelelo lweji kwizanga havyuma nevu mutu. Kaha mutu eji kwivwanga vyuma kuhichila mumazu akuvuluka Kulishitu.” (Loma 10:17) Tweji kupwanga nalufwelelo lwakukola hakulinangula Mbimbiliya, keshi hakwazana muvilika vyamukwitava vize vyalimbalaka naMbimbiliya numba tuhu vilika kana vinahase kusoloka kupwa vyamwaza kuli etuko. Twatela kupwa nalufwelelo lwakukola luze lwapendamina hachinyingi chakwoloka, mwomwo “chakuzeneka lufwelelo, chachikalu kumwivwisa Kalunga kuwaha.” (Tangenu WavaHepeleu 11:1, 6.) Katwatela kufwila kumona chinjikizo chakufuma mwilu numba tufwelele ngwetu tunawane muchanoko. Oloze kulinangula mijimbu yamuMbimbiliya yize nayizamisa lufwelelo lwetu, chikiko nachitukafwa tumone ngwetu tunawane muchano nakuhona kuhuhwasana.

13. Vyuma muka vyalingishile vatu vavavulu vakane Yesu?

¹³ Omu Yesu apwile hano hamavu, tumbaji twaYowano Muka-kumbapachisa valikomokelele hakumona tumbaji twaYesu kaveshi  nakulijilika kulyako. Yesu avalumbunwinyine ngwenyi tumbaji twami kaveshi nachuma chakuvalingisa valijilike kulyako mwomwo vachili nayami hamwe. (Mateu 9:14-17) Chipwe ngocho, vaFwaliseu navatu veka vaze vahungile Yesu vamuhanyine mulonga mwomwo yakuhona kukavangiza visemwa. Kaha nawa vapihililile omu vamwene Yesu mwoka vaveji halikumbi lyaSambata. (Mako 3:1-6; Yowa. 9:16) Numba tuhu vatwamina vamukwitava valimwenenga vavene nge vavumbikilenga likumbi lyaSambata, oloze vasekasanyinyinenga mutembele. Ngocho vapihililile chikuma omu Yesu avahanyine mulonga hachuma kana. (Mateu 21:12, 13, 15) Omu Yesu apwile nakunangula musunangonga yamuNazaleta, vatu vapihililile chikuma hakwivwa mwazachisa vyakutalilaho vize vyasolwele nge kavapwile nalufweleloko, kaha nawa vapwile namuchima walifwi. (Luka 4:16, 25-30) Vatu vavavulu vakanyine Yesu mwomwo yakuhona kulinga vyuma vize vasakile alinge.—Mateu 11:16-19.

14. Mwomwo ika Yesu apopolwelele visemwa vyavatu vize kavyalitombwele najishimbi jamuMbimbiliyako?

¹⁴ Vyuma muka yahanjika Mbimbiliya? Yehova ahanjikile kuhichila muli kapolofweto Isaya ngwenyi: “Vatu kana ava veji kupandamanga kuli ami namazu amutunwa twavo, veji kunguvumbikanga kaha namivumbo yavo, oloze michima yavo yili kwakusuku nayami. Jishimbi javatu jize veji kuvanangulanga jikiko jeji kuvalingisanga vangwivwe woma.” (Isa. 29:13) Chapwile chakutamo kuli Yesu kupopolola visemwa vyavatu vize kavyalitombwele najishimbi jamuMbimbiliyako, mwomwo vatu vaze vamwenenga jishimbi javatu navisemwa kupwa vyavilemu kuhambakana Mbimbiliya vakanyine Yehova naMeshiya.

15. Mwomwo ika vatu vavavulu makumbi ano veji kupihililanga naVinjiho jaYehova?

¹⁵ Kutala omu mukiko chili namakumbi ano tahi? Eyo. Vatu vavavulu veji kupihililanga hakumona Vinjiho jaYehova navahona kwazana muvisemwa vize vyalimbalaka naMbimbiliya, vyakufwana nge kwanuka makumbi akusemuka naKulisimasi. Veka nawa veji kupihililanga omu Vinjiho jaYehova veji kuhonanga kwazana mumakumbi akunoka vahakako mulifuchi lyavo, navilika vyahavipeji vize vyalimbalaka naMbimbiliya. Vatu vaze veji kupihililanga navyuma veji kulinganga Vinjiho, veji kushinganyekanga ngwavo vali nakulemesa Kalunga mujila etavila. Oloze kaveshi kuhasa kwivwisa Yehova Kalunga kuwahako kachi nge navazana muvilika vyamukaye vize vyalimbalaka nakunangula chamuMbimbiliya.—Mako 7:7-9.

16. Kweseka naSamu 119:97, 113, 163-165, vyuma muka vize twatela kulinga, navize katwatela kulingako?

¹⁶ Chuma muka nachitukafwa tutwaleho lika kufwelela Yesu? Twatela kuzanga chikuma jindongi jaYehova najishimbi jenyi. (Tangenu Samu 119:97, 113, 163-165.) Kachi nge twazanga Yehova, kaha katweshi kwazana muvisemwa vize navimwivwisa kupihyako. Katwatela kwechelela kala chuma chituhonese kuzanga Yehovako.

17. Vyuma muka vyalingishile vatu vavavulu vahone kufwelela Yesu?

¹⁷ Omu Yesu apwile hano hamavu, vatu vamwe vasakile kupwenga fulumende yayihya. Vatu vashinganyekele ngwavo Meshiya mwavasokola kuchiyulo chachipi chavaLoma. Oloze omu vasakile kutongola Yesu kupwa mwangana wavo, ikiye akanyine. (Yowa. 6:14, 15) Vapilishitu navatu veka valizakaminyine ngwavo Yesu mwalumuna fulumende, kaha nge mwalinga ngocho, vaLoma navatambula ngolo nawata vize vahana vapilishitu. Echi chikiko chalingishile vaYuleya vavavulu vakane kufwelela Yesu.

18. Upolofweto muka wamuMbimbiliya uze wahanjika hali Meshiya vahonene kuhaka mangana vatu vavavulu?

¹⁸ Vyuma muka yahanjika Mbimbiliya? Numba tuhu upolofweto wauvulu wahanjikilile chimweza ngwawo Meshiya mwakafungulula vaka-kole, oloze upolofweto ukwavo wahanjikile ngwawo  atela chatete kukatufwila hajishili jetu. (Isa. 53:9, 12) Kaha mwomwo ika vaYuleya vapwile navishinganyeka vyakuhenga hali Meshiya? Vatu vavavulu mumakumbi aYesu kavapwile nakuhaka mangana kuupolofweto uze wapwile nakuhanjika havyuma vize navikasoloka kulutweko.—Yowa. 6:26, 27.

19. Vyuma muka vyeji kulingisanga vatu vavavulu vakane kwivwilila kumujimbu tweji kwambululanga?

¹⁹ Kutala omu mukiko chili namakumbi ano tahi? Eyo. Vatu vavavulu makumbi ano, veji kukananga kwivwilila kumujimbu tweji kwambululanga mwomwo ngwavo katwazana muvihande vyalifuchi nachiyuloko. Vasaka ngwavo nayetu tuvwotenga. Oloze nge natusakula mutu mangana atuyule, kaha nachisolola nge tunakane Yehova kupwa muka-kutuyula. (Samwe. 1, 8:4-7) Vatu vamwe veji kushinganyekanga ngwavo twatela kutunga mashikola, navipatela, navyuma vyeka vize navinganyalisa vatu muchitungilo. Veji kukananga kwivwilila kumujimbu tweji kwambululanga mwomwo ngwavo katwahaka mangana kukukumisa ukalu wamuno mukayeko.

20. Kweseka namazu ahanjikile Yesu atwama hali Mateu 7:21-23, chuma muka chachilemu twatela kulinga?

²⁰ Chuma muka nachitukafwa tutwaleho lika kufwelela Yesu? (Tangenu Mateu 7:21-23.) Chuma chachinene twafwila kulinga shina kuzata mulimo uze atuselelele Yesu. (Mateu 28:19, 20) Katwatela kwechelela vihande vyalifuchi nachiyulo vitutanguleko. Twazanga kukafwa vatu nge vali muukalu, oloze twatachikiza ngwetu jila yamwaza yakuvakafwilamo shina kuvanangula vyaWangana waKalunga, nakuvakafwa vapwenga nausepa wakukola naYehova.

21. Vyuma muka twatela kufwila kulinga?

²¹ Muchihande chino, tunashimutwila havyuma viwana vize vyalingishile vatu vavavulu mulikulukaji lyamyaka lyakulivanga vakane kukavangiza Yesu, navyuma vize vinakulingisa vatu vavavulu makumbi ano vakane kwitavila mujimbu tweji kuvambulilanga. Uno evi vikiko kaha vinahase kuvahonesa kwivwilila kumujimbu wamwaza tahi? Nduma. Muchihande nachikavangizaho, natushimutwila havyuma vyeka viwana vize vyalingishile vatu vakane kwivwilila kuli Yesu, navize nawa vinakulingisa vatu vahone kwivwilila kumujimbu tweji kwambululanga. Shikaho, tufwilenu kutwalaho lika kukavangiza Yesu nakupwa nalufwelelo lwakukola.