1-2. Ukalu muka veji kumonanga vandumbwetu vavavulu?

KAPOSETOLO Paulu akolezezele Chimoteu navaka-Kulishitu vosena vatesemo kanawa mulimo wavo wakwambulula. (Chimo. 2, 4:5) Tuvosena tweji kukavangizanga mazu ahanjikile Paulu, numba tuhu shimbu jimwe cheji kupwanga chachikalu kulinga ngocho. Vandumbwetu vavavulu veji kwivwanga woma kwambulula mujimbu wamwaza. (Chimo. 2, 4:2) Chakutalilaho, vandumbwetu vaze vatwama mumafuchi muze vakanyisa mulimo wetu chipwe muze vakanyisako milimo yetu yimwe, veji kwambululanga mujimbu wamwaza numba tuhu vanatachikiza ngwavo vanahase kuvakasa.

² Vatu jaYehova veji kumonanga ukalu wakulisezaseza uze unahase kuvahombesa. Chakutalilaho, vandumbwetu vavavulu veji kukilikitanga mangana vatondele vaka-tanga yavo vyuma vyasakiwa mukuyoya. Kuzata chikuma milimo cheji kuvalingisanga vazeye nakuhona kuzata chikuma mumulimo wakwambulula. Kaha vandumbwetu veka veji kuhonanga kuzachila chikuma Yehova mwomwo yakuviza misongo yakutekeleka, chipwe mwomwo yaushinakaji, chipwe mwomwo yakutwama muluuta. Kaha vakwavo veji kulivwanga nge Yehova kavamona kupwa vavalemuko. Ndumbwetu Mary, * uze atwama kuMiddle East ambile ngwenyi: “Ngweji kuzatanga nangolo mangana nguhonese vishinganyeka vyavipi nge ngunahombo, mwomwo nge ngunahombo cheji kungulingisanga nguhone kupwa natwima yakuzata mulimo wakwambulula.”

3. Vyuma muka natushimutwila muchihande chino?

³ Yehova nahase kutukafwa tumike mukala ukalu natumona nakutwalaho lika kumuzachila kweseka noho hakumina ngolo jetu. Chatete, tushimutwilenu omu Yehova akafwile Paulu naChimoteu vatesemo kanawa mulimo wavo chamokomoko naukalu vamwene. Kaha chamuchivali, natushimutwila hajijila jize Yehova ali nakuzachisa mangana atukafwe.

4. Ukalu muka amwenenga Paulu?

⁴ Paulu amwenenga ukalu wauvulu. Kaha asakiwile kumukolezeza halwola luze vamuvetelenga, nakumwasa malolwa, nakumukasa mutumenga. (Koli. 2, 11:23-25) Paulu ahanjikile hatoma ngwenyi shimbu jimwe ahombelenga. (Loma 7:18, 19, 24) Kaha nawa avijilenga musongo uze wafwanyine nge “mungonga mumujimba” wenyi, uze asakile kachi Kalunga amufumisewo.—Koli. 2, 12:7, 8.

5. Vyuma muka alingilenga Paulu numba tuhu amwenenga ukalu?

⁵ Yehova akafwilenga Paulu atwaleho lika kwambulula mujimbu wamwaza chamokomoko naukalu amwenenga. Chakutalilaho, omu vamukashilile muzuvo yenyi muLoma, ambulililenga vatwamina vavaYuleya, kaha nawa pamo ambulililenga navilolo jafulumende. (Vili. 28:17; Fwili. 4:21, 22) Kaha nawa ambulililenga vaka-kulama Mwangana vavavulu navosena vaze vejilenga nakumutala. (Vili. 28:30, 31; Fwili. 1:13) Halwola kanelu, Paulu asonekele mikanda yize yili nakukafwa navaka-Kulishitu vamuchano makumbi ano. Chakutalilaho chaPaulu chakolezezele vandumbwenyi muLoma. Kahechi chavalingishile vomike “chikuma nakuhanjika mazu aKalunga chakuzeneka woma.” (Fwili. 1:14) Numba tuhu shimbu jimwe Paulu kazachilenga chikuma mulimo wakwambululako, oloze azachile kweseka noho hakuminyinyine ngolo jenyi. Kahechi chalingishile “mujimbu wamwaza uzovoloke.”—Fwili. 1:12.

6. Kweseka nachisoneka chaWavaka-Kolinde 2, 12:9, 10, chuma muka chakafwile Paulu atesemo mulimo wenyi wakwambulula?

⁶ Paulu atachikijile ngwenyi milimo yosena yize azachile, Yehova ikiye amukafwilenga. Atachikijile ngwenyi ngolo jaKalunga “vanajikupwisa mukuhehela” chenyi. (Tangenu Wavaka-Kolinde 2, 12:9, 10.) Yehova azachishile shipilitu yenyi yajila mangana akafwe Paulu atesemo mulimo wenyi wakwambulula chamokomoko nakumuyanjisa, nakumukasa mutumenga naukalu weka.

7. Ukalu muka amwenenga Chimoteu uze kachi wamulingishile ahone kutesamo mulimo wenyi wakwambulula?

⁷ Chimoteu uze azachililenga hamwe naPaulu, naikiye ateselengamo mulimo wenyi wakwambulula mwomwo yakumukafwa kuli Kalunga. Paulu ayilenga hamwe naChimoteu mumulimo waumishonali. Kaha nawa Paulu atuminenga Chimoteu kuya nakutambukila vikungulwilo nakuvikolezeza. (Koli. 1, 4:17) Pamo Chimoteu alivwilenga ngwenyi katelemo kuzata mulimo kanako. Pamo chikiko chalingishile Paulu amulweze  ngwenyi: “Kanda nakupwa mutu numba umwe mwalumbilisa ukweze woveko.” (Chimo. 1, 4:12) Kaha nawa halwola kana, Chimoteu “avijilenga kakavulu.” (Chimo. 1, 5:23) Chipwe ngocho, Chimoteu atachikijile ngwenyi shipilitu yajila nayimukafwa atwaleho lika kwambulula mujimbu wamwaza nakuzachila vandumbwenyi.—Chimo. 2, 1:7.

8. Uno Yehova ali nakukafwa ngachilihi vangamba jenyi makumbi ano?

⁸ Makumbi ano, Yehova eji kuhananga vangamba jenyi “ngolo jakuhambakana jize javatu” mangana vatwaleho lika kumuzachila nakashishi. (Koli. 2, 4:7) Tushimutwilenu jino hajijila jiwana jize Yehova eji kuzachisanga mangana atukafwe tutwaleho lika kupwa vakushishika kuli ikiye. Jijila kana shina kulomba, naMbimbiliya, navandumbwetu, namulimo wakwambulula.

9. Uno kulomba chinahase kutukafwa ngachilihi?

⁹ Eji kutukafwanga kuhichila mukulomba. Nganomu vasoneka hali Wavaka-Efwesu 6:18, Paulu atukolezeza tulombenga kuli Kalunga “lwola lwosena.” Kalunga eji kukumbululanga kulomba chetu hakutukafwa nge tuli muukalu. Chakutalilaho, ndumbwetu Jonnie uze atwama mulifuchi lyaBolivia, amwene omu Yehova amukafwile halwola apwile nakuhita muukalu wakulisezaseza. Visemi jenyi hamwe kaha napuwenyi, vavijile chikuma misongo yayinene halwola lwolumwe. Ngocho ndumbwetu Jonnie chamukaluhwilile kuzakama ava vaveji vosena. Chaluvinda, naye afwile. Kahomu hahichile tando yayisuku, puwenyi naise vayoyele. Omu ndumbwetu Jonnie eji kwanukanga ukalu ahichilemo eji kwambanga ngwenyi, “Omu ngwalizakaminyinenga, chuma changukafwilenga shina kulomba Yehova nakumulweza hatoma ukalu wami.” Chikupu vene, Yehova akafwile ndumbwetu Jonnie omike muukalu wenyi. Ndumbwetu Ronald wamulifuchi lyaBolivia uze apwa kalama, vamulwezele ngwavo naye ali nakuviza musongo wakasa. Kahomu mwahichile kakweji umwe, naye afwile. Chuma muka chamukafwile omike? Ambile ngwenyi: “Nge ngunakulomba kuli Yehova, ngweji kumulwezanga ukalu wami wosena. Ngocho ngwatachikiza ngwami Yehova angutachikiza kanawa kuhambakana kala mutu, chipwe nomu ngwalitachikiza ami ivene.” Shimbu jimwe tunahase kulivwa nge katweshi kuhasa kumika muukalu wetuko, kaha nawa katweshi kuhasa kutachikiza navyuma vize natulomba kuli Yehovako. Oloze Yehova atulweza tulombenga kuli ikiye numba tuhu nachitukaluhwila kumulweza ukalu wetu.—Loma 8:26, 27.

10. Kweseka naWavaHepeleu 4:12, mwomwo ika chapwila chachilemu kutanganga Mbimbiliya nakushinganyeka havyuma natutanga?

¹⁰ Eji kutukafwanga kuhichila muMbimbiliya. Twatela kupendaminanga haVisoneka mangana vitukafwe nakutuvendejeka ngana muze alingilenga Paulu. (Loma 15:4) Omu natutanganga Mazu aKalunga nakushinganyekaho, Yehova mwatukafwa nashipilitu yenyi yajila mangana twivwishise vyuma tunakulinangula, nakuvizachisa kweseka naukalu tuli nawo. (Tangenu WavaHepeleu 4:12.) Ndumbwetu Ronald uze twavulukanga hakavanga ambile ngwenyi: “Ngwawahilila chikuma mwomwo ngwalitomena kutanga Mbimbiliya hakumbi hakumbi naufuku. Ngweji kushinganyekanga chikuma havilinga vyaYehova, nomu eji kuzakamanga vangamba jenyi. Echi cheji kungukafwanga ngumike muukalu wami.”

11. Uno Mbimbiliya yakafwile ngachilihi ndumbwetu wapwevo uze apwile nakulishona?

¹¹ Kushinganyekanga haMazu aKalunga nachitukafwa tuhone kuhomba chikuma nge tuli muukalu. Tutalenu omu Mbimbiliya yakafwile ndumbwetu watuliwe uze apwile nakulishona. Kalama umwe akolezezele ou ndumbwetu atange mukanda waYopa mangana alinanguleko vishina vimwe vize navimukafwa muukalu wenyi. Omu atangile mukanda kana, amwene ngwenyi Yopa apwile navishinganyeka vyakuhenga.  Ngocho aputukile kuhumikiza kwijiva nge ali nakuhumuna Yopa ngwenyi: “Ove Yopa! Kanda kushinganyeka kaha haukalu woveko.” Oloze amwene jino ngwenyi vishinganyeka vyenyi vyalifwanyine navize vyaYopa. Echi chamukafwile alumune vishinganyeka vyenyi, nakumika muukalu apwilemo wakufwisa lunga lyenyi.

12. Uno Yehova eji kuzachisanga ngachilihi vandumbwetu mangana vatukafwe?

¹² Eji kutukafwanga kuhichila muli vandumbwetu. Jila yikwavo yize Yehova eji kutukafwilangamo shina kuhichila muli vandumbwetu. Paulu asonekele ngwenyi apwile nakufwila kuliwana navandumbwenyi mangana ‘valikolezeze.’ (Loma 1:11, 12) Ndumbwetu Mary uze twavulukanga hakavanga, azanga kupwa hamwe navandumbwenyi. Ambile ngwenyi: “Yehova nazachisanga vandumbwami vaze kavatachikijile ukalu wamiko mangana vangukafwe. Vahanjikilenga mazu akungukolezeza chipwe kungusonekela mukanda. Kahechi changukafwilenga nguhanjike navandumbwami vamapwevo vaze vahichile muukalu ngana uze ngwamwenenga yami. Chakutalilaho chavo changukafwile. Kaha nawa tulama vangukafwile ngutachikize ngwami vandumbwami vosena muchikungulwilo vanguzanga.”

13. Tunahase kulikolezeza ngachilihi navandumbwetu nge tuli kukukunguluka?

¹³ Kukukunguluka kukiko kuze tunahase kulikolezeza kanawa navandumbwetu. Nge muli kukukunguluka, munahase kukolezeza vandumbwenu hakuvalweza ngwenu mwavazanga, nakuvasakwilila havyuma veji kulinganga. Chakutalilaho, shimbu kanda kukunguluka, ndumbwetu Peter uze apwa kalama alwezele ndumbwetu wapwevo uze asomboka kuli lunga uze kapwa Chinjihoko ngwenyi: “Weji kutukolezezanga chikuma omu weji kwizanga kukukunguluka. Lwola lwosena weji kwizanga navana vove 6 kukukunguluka, kaha nawa veji kuhanjikangaho.” Ou ndumbwetu wapwevo awahililile chikuma kaha ahanjikile ngwenyi: “Vyuma unahanjika vinangukolezeza chikuma.”

14. Uno kuzata mulimo wakwambulula cheji kutukafwanga ngachilihi?

¹⁴ Eji kutukafwanga kuhichila mumulimo wakwambulula. Tweji kwivwanga kuwaha omu tweji kwambulilanga vatu mujimbu wamwaza numba vakulako kanawa chipwe chiku. (Vishi. 11:25) Chakutalilaho, ndumbwetu wapwevo Stacy amwene omu mulimo wakwambulula wamukafwile. Ou ndumbwetu evwilenga chikuma kupihya omu kausoko kenyi umwe vamufumishile muchikungulwilo. Kaha alihulishilenga ngwenyi, ‘Kutala ngwatelelele kulingako vyuma vimwe ngumukafwe mangana vahone kumufumisa muchikungulwilo tahi?’ Ashinganyekelenga lika haukalu kanou. Uno chuma muka chamukafwile omike muukalu kana? Chuma chamukafwile shina mulimo wakwambulula. Kuzata mulimo wakwambulula chamukafwile ashinganyekenga havatu vamungalila yenyi muchishishisa chakushinganyeka haukalu wenyi. Ou ndumbwetu ambile ngwenyi: “Halwola kanelu, Yehova angukafwile nguwane chilongesa chaMbimbiliya uze apwile nakuzovoloka washi. Kahechi changukolezezele chikuma. Chikupu vene kuzata mulimo wakwambulula chikiko chinangukafwe chikuma.”

15. Chuma muka munalinangula kuli ndumbwetu Mary?

¹⁵ Mwomwo yaukalu, vandumbwetu vamwe vanahase kushinganyeka ngwavo kaveshi kuhasa kuzata chikuma mulimo wakwambululako. Nge omu mukiko mweji kushinganyekanga, kaha tachikizenu ngwenu Yehova eji kwivwanga kuwaha kachi nge namumuzachila noho hakumina ngolo jenu. Tutalenu hachakutalilaho chandumbwetu Mary uze twavulukanga hakavanga. Omu alukilile kuchihela kuze vazachisa lilimi lyeka, alivwile kupwa nge wamokomoko. Ambile ngwenyi, “Hakavanga omu ngwapwilenga kukukunguluka, ngwakumbulwilenga kaha vihula vyavyashi, chipwe kutanga kaha chisoneka. Kaha mumulimo wamuwande, ngwahanyinenga kaha talakiti.” Ashinganyekele ngwenyi nevi apwile nakulinga vene vyauchi hakulyesekesa kuli vakwavo vaze  vahanjikilenga kanawa lilimi. Chipwe ngocho, alumwineko vishinganyeka vyenyi. Atachikijile jino ngwenyi Yehova nahase kumuzachisa chamokomoko nakuhona kutachikiza kanawa lilimi. Ambile cheka ngwenyi, “Muchano wamuMbimbiliya wawashi, shikaho numba tuhu kawatachikiza kanawa lilimiko, oloze vyuma munangula navikafwa vatu valumune chiyoyelo chavo.”

16. Vyuma muka navikafwa vandumbwetu vaze kavaya nakwambulula mujimbuko mwomwo yakutwama muluuta?

¹⁶ Yehova atachikiza ngwenyi etu vamwe twafwila kuya mumujimbu numba tuhu twatwama muluuta. Ngocho nahase kutukafwa twambulile vatu vaze veji kutulamanga chipwe vandotolo navanase. Tunahase kuhomba kachi nge natwesekesa milimo tuli nakuzata oholyapwa, nayize twazachilenga kunyima. Nge natutachikiza jila yize Yehova ali nakutukafwilamo oholyapwa, kaha nachitukafwa tuwahilile nakumika mukala ukalu natumona.

17. Kweseka namukanda waMuka-kwambulula 11:6, mwomwo ika twatela kutwalaho lika kwambulula numba tuhu natumona ngwetu vatu kaveshi nakwakulako kanawako?

¹⁷ Hajimbuto jamuchano jize natutumba, katwatachikijile eji najikolako. (Tangenu Muka-kwambulula 11:6.) Chakutalilaho, ndumbwetu Barbara wamumyaka yamuji 80, eji kwambululanga mujimbu wamwaza lwola lwosena kuzachisa shinga nakutumina vatu mikanda. Mumukanda umwe, ahakilemo Kaposhi Kakutalila waMarch 15, 2014, uze apwile namutwe wakwamba ngwavo, “Vyuma Vize Amilingila Kalunga.” Ou ndumbwetu kashinganyekele ngwenyi mukanda kana nauya kuli lunga napuwenyi vaze vafumisa muchikungulwiloko. Ou lunga napuwenyi vatangilenga eyi mangazini lwola lwosena. Hakutanga mangazini kana, lunga evwile kwijiva nge Yehova ali nakuhanjika kuli ikiye. Ou lunga napuwenyi vatwamine myaka yakuhambakana 27, kufuma haze vavafumishile muchikungulwilo. Jino omu vatambwile eyi mangazini, vaputukile cheka kukunguluka nakupwa Vinjiho vatwima. Ndumbwetu Barbara awahililile chikuma hakutachikiza ngwenyi mukanda uze asonekele wakafwile ou lunga napuwenyi vakinduluke kuli Yehova.

18. Vyuma muka twatela kulinga numba Kalunga atukafwe?

¹⁸ Yehova eji kutukafwanga mujijila jakulisezaseza. Eji kutukafwanga kuhichila muli vandumbwetu, namukulomba, namuMbimbiliya, namumulimo wakwambulula. Nge natupendamina havyuma kanevi, kaha natusolola ngwetu twapendamina hali Yehova atukafwe. Shikaho tutwalenuho lika kufwelela Setu wamwilu, uze asaka kusolola “ngolo jenyi jakukafwa vaze veji kumuzachilanga namuchima wavo wosena.”—Miji. 2, 16:9.