1. Uno Yehova anangwile Apalahama chishina muka chize chatuvendejeka?

 APALAHAMA kavulyamine vyuma vize vashimutwilile nakangeloko. Kalunga alwezele Apalahama kuhichila muli kangelo ngwenyi, mwanongesa jinganda jaSotome naNgomola. Apalahama lunga wakushishika alizakaminyine chikuma. Ahulishile uze kangelo ngwenyi: “Uno naukanongesa vaka-kuhuka navaka-kwoloka hamwe tahi? . . . Kutala Muka-kuyula vaka-mavu vosena mwahona kulinga mwamwaza numba?” Yehova atalililile chikoki ou sepa lyenyi hakumunangula chishina chize cheji kutunganyalisanga tuvosena nakutuvendejeka hakutachikiza ngwetu: Kalunga keshi kukanongesa vatu vakwolokako.—Kupu. 18:​23-33.

2. Vyuma muka vyatulingisa tufwelele ngwetu kusopesa chaYehova chapwa chakwoloka kaha nawa eji kuchilinganga mujila yakutetela?

² Vyuma muka vyatulingisa tufwelele ngwetu kusopesa chaYehova chapwa chakwoloka kaha nawa eji kuchilinganga mujila yakutetela? Mwomwo twatachikiza ngwetu “Yehova eji kutalanga mumuchima” wamutu himutu. (Samwe. 1, 16:7) Kaha nawa atachikiza “muchima wamutu himutu.” (Vamya. 1, 8:39; Miji. 1, 28:9) Ou himuchano wamwaza chikuma. Etu katwatachikiza kanawa kusopesa chaYehovako. Shikaho, kaposetolo Paulu vamuhwiminyinyine ahanjike kutalisa kuli Yehova Kalunga ngwenyi: “Omwo kusopesa chenyi vahona kuchihehula.”—Loma 11:33.

3-4. Uno shimbu jimwe tunahase kulihulisa vihula muka, kaha vyuma muka natushimutwila muchihande chino? (Yowano 5:​28, 29)

³ Chipwe ngocho, shimbu jimwe tunahase kupwa navihula vyakulifwana navize ahulishile Apalahama. Pamo tunahase kuhulisa ngwetu: ‘Uno vatu vaze vasopesele muSotome naNgomola navakasanguka tahi? Kutala vamwe vanahase kukapwa hamukana “[wa]vaka-kuhenga” vaze navakasanguka tahi?’—Vili. 24:15.

 ⁴ Tushimutwilenu havyuma twatachikiza kutalisa kukusanguka. Mukalinwomu ngana, kwapwanga kwalumuka chachihya kutalisa kuvatu vaze “navakasangukila kukuyoya,” navaze “navakasangukila kukuvasopesa.” a (Tangenu Yowano 5:​28, 29.) Echi kwalumuka kana chinalingisa kupwenga nawa kwalumuka cheka, chize natushimutwila muchihande chino nechi nachikavangizaho. Natuvangila kushimutwila havyuma vize katwatachikizako, kaha kufumaho natushimutwila vyuma vize twatachikiza kutalisa kukusopesa chaYehova chakwoloka.

VYUMA VIZE KATWATACHIKIZAKO

5. Uno mikanda yetu yinahanjikanga ngachilihi kutalisa kuvatu vaze vanongesele muSotome naNgomola?

⁵ Kunyima mikanda yetu yinashimutwilanga hachihula chakutalisa kuvyuma navikasoloka kuli vatu vaze Yehova eji kusopesanga kupwa vaka-kuhenga. Tunashimutwilanga havatu vakufwana nge vaze vapwile muSotome naNgomola ngwetu, kavatwama nalutalililo lwakukasangukako. Oloze ndungo wakushishika wakuzangama nahehwojola kanawa nakulomba hachihande kana, ngocho tunamono ngwetu katweshi kuhasa kukukulula mujila kanako. Mwomwo ika?

6. Vyakutalilaho muka vimwe vyasolola kusopesa chaYehova kutalisa kuvatu vakuhenga, kaha vyuma muka vize katwatachikizako?

⁶ Talenu havyakutalilaho vimwe vyamuMbimbiliya kutalisa kuchihande kana. Chakutalilaho, achishinganyekenu hamijimbu yamuMbimbiliya yize yasolola kusopesa chaYehova hali vatu vakuhenga, yakufwana nge kuvula chavatu vaze vasopesele haLivaji chipwe vaze vamumafuchi 7 amuLifuchi lyaLushiko aze Yehova alwezele vatu jenyi vanongese, chipwe maswalale javaAsulya 185,000 vaze vanongesele kuli kangelo kaYehova umwe kaha haufuku wangongo. (Kupu. 7:23; Lushi. 7:​1-3; Isa. 37:​36, 37) Uno Mbimbiliya yatulweza mijimbu yakusolola nge Yehova asakwile kunongesa vatu kana haya myaka nakuhona kukavasangula tahi? Nduma. Mwomwo ika tunambila ngocho?

7. Vyuma muka vize katwatachikizako kutalisa kuvatu vaze vafwile kuLivaji chipwe kuli vaKanane vaze vafungulwile? (Talenu muvwimbimbi wahalipapilo lyahelu.)

⁷ Katwatachikiza omwo Yehova asopesele mutu himutu chipwe kutachikiza numba nge vaze vajihile, vapwile nakutokwa chakulinangula hali Yehova nakupwa namuchima wakupihilila nakwalumukako. Mbimbiliya yahanjika kutalisa kulwola lwaLivaji ngwayo, Nowa apwile “muka-kwambulula kwoloka.” (Petu. 2, 2:5) Chipwe ngocho, kayahanjika ngwayo omu Nowa apwile nakusonga wato waunene, ayile nakwambulila mutu himutu hamavu hosenako. Chochimwe, nakumafuchi avaKanane nawa katwatachikijileko numba nge vatu vosena vakuhuka vapwile nakutokwa chakulinangula hali Yehova nakwalumuna jijila javoko.

8. Vyuma muka vize katwatachikizako kutalisa kuli vatu vamuSotome naNgomola?

⁸ Nyi ngachilihi vatu vamuSotome naNgomola? Lote lunga wakwoloka ayoyelenga navatu kana. Kutala twatachikiza numba nge Lote avambulilile vosena tahi? Nduma. Vatu kana vapwile vakuhuka chikupu. Oloze kutala chikupu vatachikijile vyuma vyakwoloka nevi vyakuhenga tahi? Anukenu ngwenu lizavu lyamalunga vamunganda kana vasakile kulisavala navangeji jaLote. Mbimbiliya yahanjika ngwayo lizavu lyamalunga kana lyapwile ‘lyavanyike navakulwane.’ (Kupu. 19:4; Petu. 2, 2:7) Uno twatachikiza numba nge Yehova Kalunga wakeke anongesele vatu kana nakuhona kuvahana lutalililo lwakukasanguka tahi? Yehova afwelelesele Apalahama ngwenyi, munganda kana kamwapwile malunga vakuheta numba 10 vaze vapwile vakwolokako. (Kupu. 18:32) Vatu kana vapwile vaka-kuhenga, kaha Yehova alingile mwakwoloka kuvanongesa mwomwo yavilinga vyavo. Kutala tunahase kukukulula ngwetu kakweshi kukapwa mutu ‘mwakasangukila . . . kukusopesa’ tahi? Nduma, katweshi kukukulula ngochoko.

9. Vyuma muka vize katwatachikizako kutalisa kuli Solomone?

 ⁹ Tweji kutanganga nawa muMbimbiliya ngwavo kwapwile nawa vatu vakwoloka vaze valumukile nakupwa vaka-kuhenga. Mutu umwe shina Mwangana Solomone. Numba tuhu vamunangwile kanawa jijila jaKalunga nakumukisula kuli Yehova, oloze mukuhita chalwola, aputukile kulemesa tulunga vamakuli. Jishili jenyi jalingishile Yehova apihilile nakuneha ukalu uze vamwenenga vatu hamyaka yayivulu. Kaha Mbimbiliya yatulweza ngwayo, “Solomone atokele ngana mwavakakuluka jenyi,” kuhakilako vene naMwangana Ndavichi, lunga wakushishika. (Vamya. 1, 11:​5-9, 43; Vamya. 2, 23:13) Oloze kutala jila vamufunjilililemo yahana unjiho wakusolola nge navakamusangula tahi? Mbimbiliya kayahanjikahoko. Vamwe vanahase kushinganyeka ngwavo, Solomone mwakasanguka mwomwo Mbimbiliya yamba ngwayo, nge mutu “nafu lyehi, nasambe lyehi kushili yenyi.” (Loma 6:7) Chipwe ngocho, echi kachalumbununa nge vosena vaze vafwa navakasangukako, mwomwo nge mutu nafu kacheshi nakulumbununa nge ali jino nakutokwa chakukayoya chekako. Kusanguka chapwa wana wakufuma kuli Kalunga wazangi. Oloze eji kuchihananga kuli vaze asaka ngwenyi vakapwe nakutokwa chakumuzachila haya myaka. (Yopa 14:​13, 14; Yowa. 6:44) Kutala Solomone mwakatambula wana kana tahi? Yehova ikiye atachikiza mwakukumbulwila kanawa chihula kana. Etu katwatachikizako. Twatachikiza kaha ngwetu Yehova mwakalinga vyuma vyakwoloka.

VYUMA VIZE TWATACHIKIZA

10. Uno Yehova eji kwivwanga ngachilihi hakunongesa vatu? (Ezekele 33:11) (Talenu nawa muvwimbimbi.)

¹⁰ Tangenu Ezekele 33:11. Yehova atulweza omwo eji kwivwanga kutalisa kujila eji kusopeselangamo vatu. Kaposetolo Petulu vamuhwiminyinyine asoneke vyuma vize asonekele kapolofweto Ezekele, ambile ngwenyi “Yehova . . . kazanga mutu numba umwe akanongeko.” (Petu. 2, 3:9) Shikaho, kushinganyeka hamuchano kanou, chatukafwa tutachikize ngwetu Yehova keshi kunongesa vatu hahaze vene kaha nawa haya myakako. Yehova azala nakeke kaha nawa eji kusololanga keke kana kala heshoho nasakila.

11. Veya vaze kaveshi kukasangukako, kaha tunatachikiza ngachilihi ngocho?

¹¹ Vyuma muka vize twatachikiza kutalisa kuvatu vaze kaveshi kukasangukako? Mbimbiliya yatulweza vyavindende kaha. b Yesu asolwele hatoma ngwenyi Yuta Isakalyote kaveshi kukamusangulako. (Mako 14:21; talenu nawa Yowano 17:12 nachishina chakulinangula muMbimbiliya yakulinangula yaChingeleshi.) Yuta alikangile kuli Yehova nakuli Yesu, chakufuma kumuchima. (Talenu Mako 3:29 navishina vyakulinangula muMbimbiliya yakulinangula yaChingeleshi.) Chochimwe nawa, Yesu ahanjikile kutalisa kuli vatwamina vamukwitava vaze valikangile kuli ikiye ngwenyi, nge vanafu kaha kaveshi kukasangukako. (Mateu 23:33; talenu Mateu 23:33 nachishina chakulinangula muMbimbiliya yakulinangula yaChingeleshi, haze vanavuluka ngwavo “the man.”) Kaha nawa kaposetolo Paulu ahanjikile ngwenyi, vaka-kulikanga kuli Kalunga vaze kaveshi kupihilila nakwalumukako navakavanongesa.—Hepe. 6:​4-8; 10:29.

12. Vyuma muka twatachikiza kutalisa kumuchima waYehova wakutetela? Hanenu vyakutalilaho.

¹² Vyuma muka twatachikiza kutalisa kumuchima waYehova wakutetela? Uno nasolola ngachilihi ngwenyi “kazanga mutu numba umwe akanongeko”? Talenu omwo asolwele muchima wenyi wakutetela kuvatu vaze valingile shili yayinene. Mwangana Ndavichi alingile jishili jajinene. Chakutalilaho alingile ukoji nakumwanga manyinga. Oloze Ndavichi apihililile nakwalumuka, kaha Yehova amutetelelele nakumukonekela. (Samwe. 2, 12:​1-13) Mwangana Manase apwile wakuhuka chikuma mukuyoya chenyi. Numba tuhu ou lunga apwile wakuhuka chikuma, oloze Yehova  amwivwililile keke, nakumukonekela omu apihililile nakwalumuka. (Miji. 2, 33:​9-16) Vyakutalilaho kana vyeji kutwanukisanga nge Yehova eji kusololanga muchima wenyi wakutetela heshoho namwena ngwenyi chinatemo kulinga ngocho. Shikaho, mwakasangula vatu kana mwomwo vamwene ngwavo valingile shili yayinene chikuma, kaha vapihililile nakwalumuka.

13. (a) Mwomwo ika Yehova evwililile keke vaka-Nyineve? (b) Vyuma muka ahanjikile Yesu mukuhita chalwola kutalisa kuli vaka-Nyineve?

¹³ Twatachikiza nawa omwo Yehova asolwele muchima wenyi wakutetela kuli vaka-Nyineve. Alwezele Yona ngwenyi: “Ngunamono vilinga vyavo vyakuhuka.” Oloze omu vapihililile nakwalumuka Yehova avakonekelele jishili javo. Avatetelele chikuma kuhambakana muze alingile Yona. Kalunga anukishile kapolofweto kenyi Yona uze apihililile ngwenyi, vaka-Nyineve “kavatachikiza kuhandununa vyuma vyamwaza navyevi vyavipiko.” (Yona 1:​1, 2; 3:10; 4:​9-11) Kutwala muze, Yesu azachishile chakutalilaho kana mangana anangule hachiyulo chakwoloka chaYehova nakutetela chenyi. Yesu ambile ngwenyi vaka-Nyineve vaze vapihililile nakwalumuka “navakasanguka mulwola lwakusopesa.”—Mateu 12:41.

14. Uno ‘kusangukila kukusopesa’ nachikakwata ngachilihi hali vaka-Nyineve?

¹⁴ Uno vaka-Nyineve ‘navakasangukila’ ‘kukusopesa’ muka? Yesu anangwile ngwenyi kulutwe nakukapwa vatu “navakasangukila kukuvasopesa.” (Yowa. 5:29) Apwile nakutalisa kuchiyulo chenyi chamyaka 1,000, muze navakasangukila “vaka-kwoloka navaka-kuhenga.” (Vili. 24:15) Vaka-kuhenga ‘navakasangukila kukuvasopesa.’ Kulumbununa nge Yehova naYesu navakakekesa kanawa vilinga vyavo, mangana vakamone omu navakakula kuvyuma navakalinangula. Nge vaka-Nyineve vaze navakasanguka navakakana kulemesa chamuchano, kaha navakavanongesa. (Isa. 65:20) Oloze vosena vaze navakasakula kulemesa Yehova nakashishi navakapwa nakutokwa chakukayoya haya myaka yosena.—Ndanye. 12:2.

15. (a) Mwomwo ika katwatela kuhanjikila ngwetu naumwe wauchi havatu vanongesele muSotome naNgomola navakasangula? (b) Uno tunahase kwivwishisa ngachilihi mazu atwama hali Yuta 7? (Talenu lipwata lyakwamba ngwavo “ Uno Yuta Alumbunwine Ika?”)

¹⁵ Yesu ahanjikile kutalisa kuli vatu vamuSotome naNgomola ngwenyi, navakayovoka “haLikumbi lyaKusopesa,” kuhambakana vatu vaze vamukanyine nakukana kunangula chenyi. (Mateu 10:​14, 15; 11:​23, 24; Luka 10:12) Uno alumbunwine ika? Pamo tunahase kushinganyeka ngwetu  Yesu apwile nakukakisa vyuma halwola kana. Oloze omu keshi mukiko apwile nakutalikisa halwola apwile nakuhanjika hali vaka-Nyineveko. c Chipwe ngocho, chasoloka nge Yesu kapwile nakukakisako, apwile vene nakuhanjika muchano. Shikaho “Likumbi lyaKusopesa” apwile nakuhanjikaho halwola kana, lyapwile lyolimwe nalize ahanjikile kutalisa kuli vaka-Nyineve. Ngana mwavaka-Nyineve, navatu vamuSotome naNgomola navikiko valingilenga vyuma vyavipi. Oloze vaka-Nyineve vapihililile nakwalumuka. Anukenu vyuma ahanjikile Yesu, kutalisa kuvatu vaze “navakasangukila kukuvasopesa.” Havatu navakasanguka nahakapwa navatu “vaze valingile vyuma vyaunyengwe.” (Yowa. 5:29) Shikaho, chasoloka nge vatu vamwe vaze vapwile muSotome naNgomola, vakwechi lutalililo lwakukasanguka. Kaha natukapwa nakutokwa chakuvanangula hali Yehova naYesu Kulishitu.

16. Vyuma muka twatachikiza hali Yehova kutalisa kuvatu vaze mwakasangula? (Yelemiya 17:10)

¹⁶ Tangenu Yelemiya 17:10. Vesi kana yatukafwa tukukulule vyuma vize twatachikiza ngwetu: Yehova kaha ikiye eji “kuhehwojolanga michima, [na]kukekesanga vishinganyeka vyavatu.” Shikaho, kutalisa kukusanguka chakulutwe mwakalinga nganomu nalinginga, hakushishishilamo “mutu himutu kweseka najijila jenyi.” Yehova mwatwalaho kutetela vatu nge chinahase. Shikaho, katwatela kukukulula ngwetu mutu keshi nalutalililo lwakukasangukako, kuvanga kaha nge tunatachikiza ngwetu tuli naunjiho wakutamo.

“MUKA-KUYULA VAKA-MAVU VOSENA” MWAKALINGA “MWAMWAZA”

17. Vyuma muka navikasoloka kulutwe kutalisa kuli vatu vaze vanafunga?

¹⁷ Kufuma vene haze Alama naEve valikangile kuli Yehova Kalunga nakulipanjika kuli Satana, vatu vavavulu chikuma vanafunga. Chikupu vene, kufwa chapwa “muka-kole” wetu wamunene. (Koli. 1, 15:26) Vyuma muka navikasoloka kuli vatu kana? Vatu vavandende kaha vakuheta ku 144,000, vaze vapwa vaka-kukavangiza Kulishitu vakushishika, navakasanguka nakukayoyela mwilu. (Kuso. 14:1) Liyongomena lyamalunga namapwevo vakushishika vaze vazangile Yehova ‘navakasanguka nakupwa hamukana wavaka-kwoloka,’ kaha navakalivwisa kuwaha kuyoya haya myaka yosena hano hamavu nge navakatwalaho  kupwa vakwoloka muChiyulo chaKulishitu chaMyaka 1,000 nahacheseko chamakumishilo. (Ndanye. 12:13; Hepe. 12:1) Kaha nawa muChiyulo chaKulishitu chaMyaka 1,000, “vaka-kuhenga” kuhakilako vene navaze kavazachililenga Yehovako chipwe “vaze valingile vyuma vyaunyengwe,” navakavahana lwola mangana vakalumune vilinga vyavo nakupwa vakushishika. (Luka 23:​42, 43) Chaluvinda, vatu vamwe valingilenga vyuma vyavipi chikuma kuli Yehova nakufwila kulikanga, nakuhona kulinga mwaya muchima wenyi. Shikaho, Yehova ajina ngwenyi keshi kukasangula vatu kanako.—Luka 12:​4, 5.

18-19. (a) Mwomwo ika twatela kufwelela mukusopesa chaYehova kutalisa kuvatu vaze vafwa? (Isaya 55:​8, 9) (b) Vyuma muka natushimutwila muchihande chinakavangizaho?

¹⁸ Uno twatela kufwelela chikupu ngwetu Yehova eji kusakulanga kanawa vyakulinga omu eji kusopesanga vatu tahi? Eyo. Apalahama atachikijile kanawa ngwenyi Yehova apwa wakukupuka, wamangana, kaha nawa muka-kutetela uze apwa “Muka-kuyula vaka-mavu vosena.” Anangula kanawa Mwanenyi, kaha amuhana mulimo wakusopesa. (Yowa. 5:22) Yehova naYesu vatachikiza vyuma vili mumichima yavatu. (Mateu 9:4) Shikaho veji kulinganga “mwamwaza” hakusopesa vatu.

¹⁹ Shikaho, tufwilenu kufwelela ngwetu Yehova atachikiza kanawa vyuma vyosena. Twatachikiza ngwetu etu katwatamo kusopesa vatuko, oloze ikiye atamo. (Tangenu Isaya 55:​8, 9.) Twatela chikupu kuseza kusopesa chosena kuli ikiye naMwanenyi uze apwa Mwangana wakukupuka, uze nawa eji kulondezezanga chiyulo chakwoloka chaIse nakutetela chenyi. (Isa. 11:​3, 4) Jino natukukulula ngwetu ika kutalisa kujila Yehova naYesu navakasopeselamo vatu halwola lwaluyando lwalunene? Vyuma muka vize katwatachikizako? Kaha vyuma muka vize twatachikiza? Chihande chinakavangizaho nachikakumbulula vihula kana.