CHIHANDE CHAKULINANGULA 21
MWASO 107 Chakutalilaho chaZangi yaKalunga
Mwakuwanyina Mutu Wamwenemwene Wakwingila Nenyi muUlo
“Iyaze mwahasa kuwana pwevo wamwenemwene? Pwevo kana napu wamulemu kuhambakana malolwa akolale.”—VISHI. 31:10
CHISHINA
Natushimutwila hajindongi jamuMbimbiliya jize najikafwa mutu awane mutu wamwenemwene wakwingila nenyi muulo, nomwo nawa vandumbwetu muchikungulwilo vanahase kukafwa vajike vaze vali nakusaka kwingila muulo.
1-2. (a) Vyuma muka vatela kushinganyeka vaka-Kulishitu vavajike shimbu kanda vaputuke kulisesembwa? (b) Uno lizu “kulisesembwa” lyalumbununa ika? (Talenu “Mazu Vanalumbununa.”)
KUTALA muli nakusaka kwingila muulo tahi? Numba tuhu ulo keshi ukiko weji kunehanga kuwahililako, oloze vaka-Kulishitu vavavulu vavajike, vakweze chipwe vakulwane, veji kutalililanga kupwa namutu wakwingila nenyi muulo. Chipwe ngocho shimbu kanda muputuke kulisesembwa namutu, mwatela kupwa nausoko wakukola naYehova, nakulitachikiza kanawa enu vavene nakupwa najimbongo jakulikafwa najo muulo wenu. a (Koli. 1, 7:36) Echi chinahase kukamikafwa mukapwe naulo wakufukila.
2 Chipwe ngocho, shimbu jimwe kachapwa chachashi kuwana mutu wamwenemwene wakwingila nenyi muuloko. (Vishi. 31:10) Numba nge munawane lyehi mutu uze muli nakufwila kutachikiza kanawa, echi kacheshi nakulumbununa nge nachipwa chachashi kuputuka kulisesembwako. b Muchihande chino natushimutwila vyuma navikafwa vaka-Kulishitu vavajike vawane mutu wamwenemwene wakwingila nenyi muulo, nakuputuka kulisesembwa. Natushimutwila nawa omwo vandumbwetu muchikungulwilo vanahase kukafwa vaze vali nakusaka kwingila muulo.
VYUMA NAVIMIKAFWA MUWANE MUTU WAMWENEMWENE WAKWINGILA NENYI MUULO
3. Vyuma muka atela kushinganyekaho muka-Kulishitu wamujike kachi nge ali nakutonda mutu wakwingila nenyi muulo?
3 Nge muli nakusaka kwingila muulo, kaha nachipwa chamwaza kutachikiza vyuma munakusaka hali mutu uze munakusaka kwingila nenyi muulo, shimbu kanda muputuke kulisesembwa. c Nge kamweshi kulinga ngochoko, chinahase kumilingisa muhone kusakula mutu wamwenemwene shimbu kanda muputuke kulisesembwa, chipwe kuputuka kulisesembwa namutu uze kamiteleleko. Chipwe ngocho, tachikizenu ngwenu mutu wamwenemwene wakwingila nenyi muulo atela kupwa muka-Kulishitu wakumbapachisa. (Koli. 1, 7:39) Oloze echi kacheshi nakulumbununa nge kala mutu wakumbapachisa nahase kupwa mutu wamwenemwene wakwingila nenyi muuloko. Shikaho, munahase kulihulisa ngwenu: ‘Vyuma muka ngwalitomena kulinga mukuyoya chami? Vilinga muka atela kupwa navyo mutu uze nguli nakusaka kwingila nenyi muulo? Kutala vyuma ngwatalilila natukahasa kukavitesamo tahi?’
4. Uno vatu vamwe vanavulukanga vyuma muka mukulomba chavo?
4 Nge muli nakusaka kwingila muulo, kaha tunafwelela ngwetu munavangila kulomba kuli Yehova hachihande kana. (Fwili. 4:6) Chipwe ngocho, Yehova kafwelelesa ngwenyi mutu himutu mwawana mutu wakwingila nenyi muuloko. Oloze azakama vyuma mwasakiwa nomwo mweji kwivwanga, kaha nawa nahase kumikafwa muwane mutu wakwingila nenyi muulo. Shikaho, twalenuho lika kumulweza vyuma mwafwila nomwo mweji kwivwanga. (Samu 62:8) Lombenu Yehova amikafwe mupwenga namuchima wakutalilila chikoki nakumihana mangana. (Yako. 1:5) John, d uze apwa ndumbwetu walunga wamuUnited States, alumbunwine vyuma eji kuvulukanga mukulomba chenyi ngwenyi: “Ngweji kulwezanga Yehova vilinga vize ngwafwila kumona muli mutu uze nangwingila nenyi muulo. Ngweji kulombanga Yehova angukafwe nguwane mutu wamwenemwene wakwingila nenyi muulo. Ngweji kulombanga nawa Yehova angukafwe ngupwenga navilinga vize navikangulingisa ngukapwe ngulunga wamwenemwene.” Ndumbwetu Jennifer wakuSri Lanka, ambile ngwenyi: “Omu nguli nakutalilila mutu wamwenemwene wakwingila nenyi muulo, ngweji kulombanga Yehova angukafwe ngutwaleho lika kupwa wakushishika, nakumona vyuma mujila yamwaza, nakupwa wakuwahilila.” Numba nge kamweshi kuwana mutu wamwenemwene wakwingila nenyi muulo halwola vene luze muli nakumutondako, oloze Yehova amishika ngwenyi mwatwalaho lika kumizanga nakumizakama.—Samu 55:22.
5. Kutokwa muka vatwama nacho vandumbwetu vavajike mangana vawane mutu uze azanga Yehova? (Wavaka-Kolinde 1, 15:58) (Talenu nawa muvwimbimbi.)
5 Mbimbiliya yatukolezeza tupwenganga “navyuma vyavivulu vyakuzata mumulimo waMwata.” (Tangenu Wavaka-Kolinde 1, 15:58.) Omu namutwalaho kupwa navyuma vyavivulu vyakuzata mumulimo waYehova, nakupwa nalwola lwakushikama navandumbwetu vakulisezaseza, namulivwisanga kuwaha kulikolezeza nakupwa nawa nakutokwa chakuwana vakwenu vajike vaze vahaka muchima kukuzachila Yehova, ngana muze mweji kulinganga yenu. Kaha omu muli nakuzata nangolo mangana mwivwise Yehova kuwaha, namupwa nakuwahilila chamwenemwene.
Nge namupwa navyuma vyavivulu vyakuzata mumilimo yaYehova nakupwanga nalwola lwakushikama navandumbwetu vakulisezaseza, kaha munahase kuwana mutu uze ali nakusaka kwingila muulo (Talenu palangalafu 5)
6. Uno vaka-Kulishitu vavajike vatela kwanuka chuma muka omu vali nakutonda mutu wakwingila nenyi muulo?
6 Vangulukenu nachuma chino: Kanda kumona kutondatonda mutu wakulimbata nenyi kupwa hichuma chachilemu chikuma mukuyoya chenuko. (Fwili. 1:10) Kuwahilila chamwenemwene kachapendamina hakupwa muuloko, oloze chapendamina hakupwa nausoko wakukola naYehova. (Mateu 5:3) Kaha tachikizenu ngwenu omu muli muvajike, munahase kupwa vakulihehwa kutohwesa mulimo wenu wakwambulula. (Koli. 1, 7:32, 33) Shikaho, mwatela kuzachisa kanawa lwola lwenu. Ndumbwetu wapwevo Jessica wamuUnited States uze asombokele mumyaka yakukokela kuji 40, ambile ngwenyi: “Kuzata chikuma mumulimo wakwambulula changukafwile ngupwenga wakusuuluka, chamokomoko nakufwila kusomboka.”
FWILENU KUTACHIKIZA KANAWA MUTU MULI NAKUSAKA KWINGILA NENYI MUULO
7. Mwomwo ika chapwila chamangana kufwila kutachikiza kanawa mutu munakufwila kwingila nenyi muulo shimbu kanda mumulweze ngwenu mwamuzanga? (Vishimo 13:16)
7 Ngachilihi nge munawane mutu munashinganyeka ngwenu nahase kupwa mutu wamwenemwene wakwingila nenyi muulo? Kutala mwatela kulusuka nakumulweza hahaze vene ngwenu mwamuzanga tahi? Mbimbiliya yahanjika ngwayo, mutu wakuzangama eji kutondanga chinyingi shimbu kanda alinge vyuma. (Tangenu Vishimo 13:16.) Shikaho, namulinga kanawa kukekesa mutu kana mujila yakuzangama, shimbu kanda mumulweze ngwenu mwamuzanga. Aschwin wakuNetherlands ambile ngwenyi: “Muchima wakufwila kuzanga mutu unahase kwiza washi, kaha nawa nakuya washi. Shikaho nge namupwa nalwola lwakutachikiza kanawa mutu, kaha kamweshi kulusuka kuputuka kulisesembwa kweseka nomu muli nakwivwako.” Kutwala muze, omu muli nakufwila kutachikiza kanawa mutu kana, pamo munahase kumona ngwenu kamweshi kuhasa kwingila muulo namutu kanako.
8. Uno mujike nahase kutachikiza ngachilihi mutu wamwenemwene wakwingila nenyi muulo? (Talenu nawa muvwimbimbi.)
8 Uno munahase kutachikiza ngachilihi kanawa mujila yakuzangama mutu uze muli nakusaka kwingila nenyi muulo? Munahase kutachikiza kanawa mutu kana omwo apwa kushipilitu, navilinga vyenyi natwamiso yenyi hakukunguluka chachikungulwilo chipwe kuviwanyino. Vatu muka vapwa masepa jenyi, kaha vyuma muka eji kuhanjikanga? (Luka 6:45) Kutala vyuma alitomena vyalitombola nevi vyenu tahi? Munahase kuhulisa vakulwane muchikungulwilo chipwe vaka-Kulishitu vakuhya kushipilitu vaze vamutachikiza kanawa. (Vishi. 20:18) Munahase kuhulisa hali mutu kana kutalisa kupuho yenyi navilinga vyenyi. (Lute 2:11) Omu muli nakutalilila mutu kana, mwatela kulihenda kukulinga vyuma vize navimwivwisa sonyi. Hakusaka mulinge ngocho, fwilenu kuvumbika omwo eji kwivwanga nakuhona kutondatonda mijimbu yakusweka yachiyoyelo chenyi navyuma vyeka.
Shimbu kanda mulweze mutu ngwenu mwamuzanga, mwatela kumbata lwola lwakumutachikiza kanawa mujila yakuzangama (Talenu palangalafu 7-8)
9. Vyuma muka mwatela kukunyuka shimbu kanda mulweze mutu ngwenu mwamuzanga?
9 Lwola lungahi mwatela kumbata hakutachikiza kanawa mutu numba mumulweze ngwenu mwamuzanga? Nge namulusuka kulweza mutu ngwenu mwamuzanga, kaha navamimona ngwavo kamwashinganyeka kanawa shimbu kanda musakule vyakulingako. (Vishi. 29:20) Kaha nawa nge namushimbula kulweza mutu ngwenu mwamuzanga, chikumanyi uze natachikiza ngwenyi munamuzange, kaha vanahase kumimona ngwavo mweji kulangisanga chikuma shimbu kanda musakule vyakulinga. (Kwambu. 11:4) Anukenu ngwenu, shimbu kanda mulweze mutu ngwenu mwamuzanga, kamwatela kukunyuka ngwenu namwingila nenyi muuloko. Oloze mwatela kukunyuka ngwenu munalizange kwingila muulo, kaha nawa mutu uze munawane natemo kupwa muka-mahyenu.
10. Namulinga ngachilihi nge munamono ngwenu kuli mutu ali nakusaka kumitachikiza kanawa, oloze enu kamweshi nakusaka kulisesembwa nenyiko?
10 Namulinga ngachilihi nge munamono ngwenu kuli mutu ali nakusaka kumitachikiza kanawa? Kachi nge munamono ngwenu kamweshi nakusaka kulisesembwa namutu kanako, kaha mulwezenu hatoma kuhichila muvyuma namulinga. Nachipwa chakuhenga kulingisa mutu ashinganyeke ngwenyi muli nakusaka kulisesembwa okunyi chiku.—Koli. 1, 10:24; Efwe. 4:25.
11. Vyuma muka vatela kwanuka vaze vatwama mumafuchi muze veji kutondelanga vakwavo mutu wakwingila nenyi muulo?
11 Mumafuchi amwe, visemi chipwe vatu veka vaze vanakolo lyehi, vakiko vanahase kusakwila kausoko kavo wamujike mutu atela kwingila nenyi muulo. Kaha mumafuchi eka nawa, tanga chipwe masepa vakiko veji kuwanyinanga mutu wamujike mutu wakwingila nenyi muulo nakulongesa vyuma mangana ava valunga napwevo valiwane nakushimutwila mangana vamone numba nge vanahase kuputuka kulisesembwa. Nge vanamilombo mutondele mukwenu mutu wakulisesembwa nenyi chipwe wakwingila nenyi muulo, kaha kamwatela kushinganyeka kaha havyuma asaka mutu umweko, oloze mwatela kushinganyeka kujisali josena jivali. Nge munawane mutu kana, kaha fwilenu kutachikiza kanawa vilinga vyenyi, chachinenenyi fwilenu kutachikiza kanawa omwo apwa kushipilitu. Anukenu ngwenu usoko wamutu naYehova ukiko waulemu chikuma, kuhambakana jimbongo chipwe kulinangula, chipwe ulemu. Anukenu ngwenu, ndumbwetu walunga wamujike nandumbwetu wapwevo wamujike, vakiko vakwechi lisesa lyakusakula numba nge navalimbata nyi chiku.—Ngale. 6:5.
VYUMA MWATELA KULINGA MANGANA MUPUTUKE KULISESEMBWA
12. Nge munazange mutu kaha muli nakusaka kulisesembwa nenyi, munahase kulweza ngachilihi mutu kana?
12 Nge munakusaka kuputuka kulisesembwa namutu, kaha munahase kulweza ngachilihi mutu kana ngwenu mwamuzanga? e Munahase kulongesa vyuma mangana mushimutwile namutu kana. Munahase kulinga ngocho kuchihela chasanga chipwe hashinga. Lwezenu hatoma mutu kana ngwenu mwamuzanga, kaha munakufwila kumutachikiza kanawa. (Koli. 1, 14:9) Nge chinahase, kaha hanenu mutu kana lwola lwakushinganyeka mwakukumbulwila. (Vishi. 15:28) Nge mutu kana keshi nakusaka kulisesembwako, kaha mwatela kuvumbika vishinganyeka vyenyi.
13. Vyuma muka namulinga kachi nge mutu nasolola ngwenyi amizanga? (Wavaka-Kolose 4:6)
13 Namulinga ngachilihi nge mutu nasolola ngwenyi amizanga? Tachikizenu ngwenu mutu kana kachiwananga kupwa chachashi kumilweza ngwenyi amizangako, shikaho mwatela kumusolwela likoji nakumuvumbika. (Tangenu Wavaka-Kolose 4:6.) Nge muli nakusaka kumihana lwola lwakushinganyekaho shimbu kanda mwitavile, kaha hanjikenu hatoma. Chipwe ngocho, kumbululenu washi mukwenu. (Vishi. 13:12) Nge kamweshi nakusaka kulisesembwa namutu kanako, kaha mulwezenu hatoma mujila yalikoji. Ivwenu omwo akumbulwile ndumbwetu walunga Hans wamuAustria, omwo ndumbwetu wapwevo amulwezele ngwenyi ali nakusaka kulisesembwa nenyi. Ambile ngwenyi: “Ngwamulwezele hatoma vyuma ngwashinganyekelenga kaha mujila yakuzangama. Ngwalingile ngocho hahaze vene, mwomwo kangwasakile kumulingisa amone ngwenyi, nayami nguli nakufwila kulisesembwa nenyiko. Ngocho, echi changulishile jino ngupwenga wakuvanguluka najila nangushimutwilanga nenyi.” Shikaho nge munamono ngwenu muli nakusaka kulisesembwa namutu, kaha shimutwilenu omwo muli nakwivwa navyuma namufwila kutalilila omu namulisesembwa. Vyuma namutalilila vinahase kulihandununa navyuma mwatalilila mukwenu, kweseka nachisemwa chenu chipwe vyuma vyeka.
UNO VANDUMBWETU VANAHASE KUKAFWA NGACHILIHI VAKA-KULISHITU VAVAJIKE?
14. Uno tunahase kukafwa ngachilihi vandumbwetu vavajike kuhichila mumazu natuhanjika?
14 Uno tuvosena tunahase kukafwa ngachilihi vaka-Kulishitu vavajike vaze vali nakusaka kwingila muulo? Jila yimwe shina kupwa vakuvanguluka navyuma natuhanjika. (Efwe. 4:29) Tunahase kulihulisa ngwetu: ‘Kutala ngweji kusekelekanga vatu vaze navasaka kwingila muulo tahi? Uno nge ngunamono ndumbwetu walunga wamujike nandumbwetu wapwevo wamujike vali nakushimutwila, kutala ngweji kukukululanga ngwami vanalizange tahi?’ (Chimo. 1, 5:13) Kaha nawa katwatela kulingisa vaka-Kulishitu vavajike valivwe kupwa vamokomoko, mwomwo yakuhona kupwa muuloko. Hans uze twavulukanga hakavanga ambile ngwenyi: “Vandumbwetu vamwe vahanjikilenga ngwavo, ‘mwomwo ika unahonena kwingila muulo? Ngwetu unakolo.’ Mazu kana, eji kulingisanga vajike valivwe kupwa vamokomoko, nakuvalingisa vafwile chikuma kusaka kupwa muulo.” Shikaho, twatela kuwananga jijila jamwaza jakusangejekelamo vandumbwetu vavajike.—Teso. 1, 5:11.
15. (a) Kweseka nalundongi lwahali Wavaka-Loma 15:2, vyuma muka twatela kushinganyeka shimbu kanda tukafwe mutu awane mutu wakwingila nenyi muulo? (Talenu nawa muvwimbimbi.) (b) Vyuma muka mwazanganga chikuma muvindiyo mwatalanga?
15 Ngachilihi nge tunamono ngwetu ndumbwetu umwe walunga nandumbwetu umwe wapwevo vanahase kulitela kulimbata? Mbimbiliya yatulweza tuzakamenga omwo veji kwivwanga vakwetu. (Tangenu Wavaka-Loma 15:2.) Vajike vavavulu kavasaka kuvalweza mutu wamwenemwene wakwingila nenyi muuloko. Ngocho twatela kuvumbika vishinganyeka vyavo. (Teso. 2, 3:11) Kaha veka nawa vasaka kuvalweza mutu wakwingila nenyi muulo, kaha twatela kulinga ngocho, nge vanatulwezemo. f (Vishi. 3:27) Veka nawa kavasaka kuvalweza hatoma nge kuli mutu navazangeko. Ndumbwetu wapwevo wamujike Lydia uze atwama muGermany, ambile ngwenyi: “Munahase kusanyika ndumbwetu walunga nandumbwetu wapwevo hamwe kaha navandumbwetu vavavulu mushikame navo. Enu lingisenu kaha ndumbwetu walunga nandumbwetu wapwevo valiwane nakushikama nakuseza vyuma vyosena mumavoko avo.”
Kulikungulwila hamwe chinalingisa vandumbwetu vavajike vawane lwola lwakulitachikiza (Talenu palangalafu 15)
16. Uno vandumbwetu vavajike vatela kwanuka vyuma muka?
16 Tuvosena numba tupwa tuvajike chipwe twatwama muulo, tunahase kupwa vakuwahilila nakupwa vakusuuluka mukuyoya. (Samu 128:1) Shikaho nge muli nakusaka kwingila muulo, oloze kanda muwane mutu wakwingila nenyi muuloko, twalenuho lika kushinganyeka hamilimo yenu muli nakuzachila Yehova. Ndumbwetu wapwevo Sin Yi wamuMacao ambile ngwenyi: “Lwola luze mutu mwatwama ujike, lunakehe chikuma hakulwesekesa kulwola luze mwakatwama namuka-mahyenyi mupalachise. Shikaho, monenunga lwola muli nalwo oholili kupwa lwalulemu nakuluzachisa kanawa.” Nyi ngachilihi nge munawane lyehi mutu wakwingila muulo kaha nawa munaputuka kulisesembwa? Chihande chinakavangizaho nachishimutwila omwo munahase kufukila hakulisesembwa.
MWASO 137 Mapwevo Vakushishika
a Nge munakusaka kutachikiza numba nge munalizange kwingila muulo, yenu ha jw.org muwane chihande chakwamba ngwavo, “Dating—Part 1: Am I Ready to Date?” muChingeleshi.
b MAZU VANALUMBUNUNA: Muchihande chino nechi nachikavangizaho, lizu lyakwamba ngwavo, “kulisesembwa” lyatalisa kulwola luze pwevo nalunga navafwila kulitachikiza kanawa mangana vamone numba nge navakatamo kwingila muulo. Kulisesembwa cheji kuputukanga nge valunga napwevo vanasolola hatoma ngwavo valizanga chikuma, kaha cheji kutwalililangaho lika swi nomu navakamona ngwavo vatela kwingila muulo chipwe chiku.
c Mujipalangalafu jinakavangizaho natushimutwila hali mutu wamwenemwene kutalisa kuli lunga. Chipwe ngocho, jindongi natushimutwila najitalisa nakuli vandumbwetu vamapwevo.
d Majina amwe vanawalumuna.
e Muvisemwa vimwe vandumbwetu vamalunga vakiko vavula kulweza vandumbwetu vamapwevo vaputuke kulisesembwa. Chipwe ngocho, nandumbwetu wapwevo nahase kuya nakulweza ndumbwetu walunga vaputuke kulisesembwa. (Lute 3:1-13) Hakusaka mutachikize vyavivulu, talenu chihande chakwamba ngwavo, “Young People Ask . . . How Can I Tell Him How I Feel?” muTonenu! yaOctober 22, 2004 yaChingeleshi.
f Talenu vindiyo yili ha jw.org yakwamba ngwavo, Vatu Vaze Vali naKulama Lika Lufwelelo Lwavo—Vaka-Kulishitu Vavajike.
