1. Vyuma muka twalinangwile hakuliwana chamwaka himwaka chaliuka chamu 2023?

 HAKULIWANA chamwaka himwaka chaliuka chamu 2023, a twevwile kuwaha kwivwilila kuulumbunwiso wauhya wakutalisa kuvyuma twafwelela nakuvyakuvilika vyamwaza vyakutalisa kumulimo wakwambulula. Chakutalilaho, twalinangwile nge vatu vamwe vanahase kukapwa nakutokwa chakupwa kusali yavatu jaYehova nahanyima yakunongesa Mbavilone Yayinene. Twalinangwile nawa nge kuputuka muNovember 2023, vaka-kwambulula Wangana kaveshi kusonekanga cheka milimo yavo yosena yamuwandeko. Uno kwalumuka kana chasolola nge tunamono mulimo wakwambulula kupwa wamokomoko, chipwe nge katwatela kuuzata mukapachapachako tahi? Nduma.

2. Mwomwo ika mulimo wetu wakwambulula uli nakusakiwila kuuzata mukwanguhwa hakumbi hakumbi? (Mako 13:10)

² Hakumbi hakumbi, mulimo wetu wakwambulula wasakiwa kuuzata mukwanguhwa. Mwomwo ika? Mwomwo kunasale kaha lwola lwalundende. Achishinganyekenu havyuma ahanjikilile chimweza Yesu kutalisa kumulimo wakwambulula hamakumbi akukuminyina. (Tangenu Mako 13:10.) Kweseka namujimbu wakulifwanako wamumukanda waMateu, Yesu ahanjikile ngwenyi mujimbu wamwaza navakawambulula hamavu hosena shimbu kanda “kukuma” chizenga. (Mateu 24:14) Lizu lyakwamba ngwavo kukuma, lyatalisa kukunongesa kaye kaSatana kakuhuka. Yehova anoneka ‘likumbi naola’ kutalisa kuvyuma navisoloka kalinwomu. (Mateu 24:36; 25:13; Vili. 1:7) Hakumbi hakumbi tuli nakupandama chikuma kulwola kana. (Loma 13:11) Muholyapwanyi, twatela kutwalaho lika kwambulula nomu kukuma nachikeza.

3. Chuma muka cheji kutukunyulanga twambulule?

 ³ Omu tuli nakushinganyeka hamulimo wetu wakwambulula, twatela kushinganyeka chikuma hachihula chino chachilemu: Mwomwo ika tweji kwambulwilanga mujimbu wamwaza? Kukumbulula mukavatu ngwetu, zangi yikiko yeji kutukunyulanga twambulule. Vyuma tweji kulinganga mumulimo wakwambulula vyeji kusololanga nge twazanga mujimbu wamwaza, nakuzanga vatu, kaha chachilemu chikumanyi tweji kusololanga ngwetu twazanga Yehova nalijina lyenyi. Tushimutwilenu havyuma kana.

TWEJI KWAMBULULANGA MWOMWO TWAZANGA MUJIMBU WAMWAZA

4. Uno mwevwile ngachilihi omu mwatambwile mujimbu wamwaza?

⁴ Kutala muli nakwanuka omwo mwevwile halwola mwatambwile mujimbu wamwaza, chakutalilaho pamo mujimbu wakusemuka chakemba nyi pamo mwawanyine milimo yize mwapwile nakusakiwa? Chakuzeneka kukakasana, tunafwelela ngwetu mwafwililile kulwezako vaka-tanga yenu namasepa jenu mujimbu kanou wamwaza. Kutala omu mukiko chapwile omu mwevwile mujimbu wamwaza chikuma waWangana waKalunga tahi?

5. Mwevwile ngachilihi omu mwalinangwile muchano wamuMazu aKalunga halwola lwatete? (Talenu nawa mivwimbimbi.)

⁵ Achishinganyekenu omu mwevwile halwola lwatete mwalinangwile muchano wamuMazu aKalunga. Mwalinangwile ngwenu, Senu wamwilu amizanga, kaha asaka mupwenga mutanga yavaka-kumulemesa, kaha nawa amishika ngwenyi mwakafumisako ukalu wosena nakuyanda muli nakumona. Mwalinangwile nawa vyalutalililo lwakukamona vatu vaze mwazanga vaze navakasanguka mukaye kakahya, navyuma vyeka vyavivulu. (Mako 10:​29, 30; Yowa. 5:​28, 29; Loma 8:​38, 39; Kuso. 21:​3, 4) Muchano kana wamihetele chikuma kumuchima. (Luka 24:32) Mwazangile vyuma mwalinangwile, kaha mwafwililile kulwezako vakwenu muchano kanou waulemu.—Esekesenuko Yelemiya 20:9.

6. Vyuma muka munalinangula kumujimbu waErnest napuwenyi Rose?

⁶ Achishinganyekenu hachakutalilaho chino.  Ndumbwetu Ernest b apwile namyaka yakusemuka 10 omu afwile ise. Ernest ambile ngwenyi: “Ngwalihulishilenga ngwami, ‘Uno tata nayi mwilu tahi? Nyi nafu kunahu?’ Ngwevwilililenga lushiushiu vakwetu vanyike vaze vapwilenga namasevo.” Ernest ayilenga mapapa kakavulu kumafuka, kaha afukaminenga hachimbumbe chaise nakulomba ngwenyi: “Ove Kalunga, ngulweze okwo ali tata.” Omu mwahichile kafwe myaka 17 kufuma haze afwile ise, Ernest etavilile kulinangula Mbimbiliya. Awahililile omu atachikijile ngwenyi vafu kavatachikiza chumako, vali kwijiva nge vanasavala tulo, kaha nawa Mbimbiliya yatushika ngwayo vafu navakavasangula. (Kwambu. 9:​5, 10; Vili. 24:15) Kutwala muze, awanyine muvakumbulwila vihula vyenyi vize alipikilenga navyo halwola lwalusuku. Ernest awahililile chikuma hamuchano wamuMbimbiliya uze apwile nakulinangula. Puwenyi Rose aputukile kulinangula Mbimbiliya hamwe naikiye, kaha naikiye azangile mujimbu waWangana. Kuheta mumwaka wa 1978 vavambapachishile. Kaha vafwililile kulwezako vausoko wavo, namasepa javo, navatu vyuma vafwelela. Ngocho, Ernest napuwenyi Rose vanakafwe vatu vakuzomboka 70 mangana vazovoloke nakuvambapachisa.

7. Vyuma muka navisoloka kachi nge tunazange chikuma vyuma vyamuMbimbiliya tuli nakulinangula? (Luka 6:45)

⁷ Chikupu vene, nge natuzanga vyuma tunalinangula muMbimbiliya, kaha natufwila kuvilwezako vakwetu. (Tangenu Luka 6:45.) Tweji kwivwanga ngana muze vevwile tumbaji twaYesu vamulikulukaji lyamyaka lyakulivanga vaze vambile ngwavo: “Katweshi kuhasa kulitwamina kuhanjika vyuma tunamono nakwivwako.” (Vili. 4:20) Hakuwana nge twazanga chikuma muchano wamuMbimbiliya, ngocho tweji kufwilanga kulwezako vatu vavavulu muchano kana.

TWEJI KWAMBULULANGA MWOMWO TWAZANGA VATU

8. Vyuma muka vyeji kutukunyulanga twambulile vakwetu mujimbu wamwaza? (Talenu lipwata lyakwamba ngwavo “ Zangenu Vatu—Muvanangule Vapwenga Tumbaji.”) (Talenu nawa muvwimbimbi.)

⁸ Ngana mwaYehova naMwanenyi, nayetu twazanga vatu. (Vishi. 8:31; Yowa. 3:16) Tweji kutetelanga vatu vaze ‘kavatachikiza Kalunga’ vaze nawa ‘kavatwama nalutalililoko.’ (Efwe. 2:12) Hakuwana nge vali nakuhita muukalu, chili kwijiva nge vali mulishima lyalisuku, kaha yetu tuli namukole wakuvafumisamo. Mukole kana shina mujimbu wamwaza waWangana waKalunga. Zangi namuchima wakutetela vyeji kutukunyulanga mangana tuzate nangolo twambulile vatu kana mujimbu wamwaza. Mujimbu kanou waulemu unahase kuvakafwa vapwenga nalutalililo, nakupwa nachiyoyelo chamwaza oholyapwa, nakuvahana  lutalililo lwakukapwa ‘nakuyoya chamwenemwene’ chahaya myaka yosena mukaye kakahya kaKalunga.—Chimo. 1, 6:19.

9. Mujimbu muka wavyuma vyakulutwe wakuhuhumuna uze tweji kwambululanga, kaha mwomwo ika? (Ezekele 33:​7, 8)

⁹ Kuzanga vatu cheji kutukunyulanga nawa tuvahuhumune vyakukuma chakano kaye kakuhuka chize chinapandama. (Tangenu Ezekele 33:​7, 8.) Tweji kutetelanga vakwetu vaze twatunga navo navausoko wetu vaze kavetavako. Vatu vavavulu vali nakuyoya chakuzeneka kutachikiza vyuma vili nakwiza kulutwe. Vyuma kana shina “luyando lwalunene, luze kanda lusolokengaho lyehi kufuma kukuputuka chakaye palanga nakulelo lino, kaha chipwe kulutwe nawa kalweshi kukasoloka chekako.” (Mateu 24:21) Tweji kufwilanga kuvakafwa vatachikize vyuma navikasoloka halikumbi lyakusopesa, kulumbununa kufumisako kwitava chamakuli nakunongesa kaye kosena kaSatana haAlamangetone. (Kuso. 16:​14, 16; 17:​16, 17; 19:​11, 19, 20) Shikaho tuli nakulomba ngwetu vatu vavavulu navakula kukuhuhumuna kanechi nakwazana hamwe nayetu mukulemesa chamuchano oholyapwa. Nyi ngachilihi vaze kaveshi kwivwilila kukuhuhumuna kanechi oholyapwa, kuhakilako vene navausoko wetu vaze twazanga?

10. Mwomwo ika mujimbu wakuhuhumuna uli nakusakiwila kuwambulula mukwanguhwa?

¹⁰ Ngana muze valumbununanga muchihande chinafumuho, pamo Yehova mwakasaka kukayovola vatu vaze navakalumuna michima yavo omu navakamona kunongesa chaMbavilone Yayinene. Nge mukiko, kahanyi twatela kwambulula ou mujimbu wakuhuhumuna mukwanguhwa. Achishinganyekenu hachumechi: Vyuma tuli nakuvalweza oholyapwa pamo navakavyanuka halwola kana. (Esekesenuko Ezekele 33:33.) Pamo navakanuka mujimbu wakuhuhumuna twavalwezele kunyima nakukunyuka vazachile Yehova hamwe nayetu shimbu kanda kunongesa chivawane. Ngana muze chapwile kuli muka-kulama kamenga muFwilipi uze alumukile hanyima “[ya]mundenda waunene,” pamo mukiko nawa nachikapwa kuli vaze kaveshi nakwivwilila kumujimbu wakuhuhumuna oholyapwa. Vatu kana pamo navakalumuna michima yavo hanyima yakunongesa Mbavilone Yayinene.—Vili. 16:​25-34.

TWEJI KWAMBULULANGA MWOMWO TWAZANGA YEHOVA NALIJINA LYENYI

11. Mujila muka tweji kuhanyinangamo Yehova upahu nakavumbi nangolo? (Kusoloka 4:11) (Talenu nawa mivwimbimbi.)

¹¹ Chuma chachilemu chikuma cheji kutulingisanga twambulule mujimbu wamwaza shina, kuzanga Yehova Kalunga nalijina lyenyi lyajila. Twamona mulimo wakwambulula kupwa jila tweji kwalishilangamo Kalunga ketu uze twazanga. (Tangenu Kusoloka 4:11.) Twetavila namuchima wetu wosena ngwetu Yehova Kalunga atamo kutambula upahu, nakavumbi, nangolo kuli vaka-kumulemesa vakushishika.  Tweji kumuhananga upahu nakavumbi hakulwezako vakwetu unjiho wakusolola nge ikiye atengele “vyuma vyosena,” kaha nawa twapwako mwomwo yaikiye. Tweji kumuhananga ngolo jetu hakuzachisa lwola lwetu ngolo jetu navikumba vyetu hakwambulula mujimbu wamwaza kweseka nachiyoyelo chetu. (Mateu 6:33; Luka 13:24; Kolo. 3:23) Chikupu vene, twazanga kuhanjika hali Kalunga ketu uze twazanga. Tweji kukunyukanga nawa kulwezako vakwetu vyalijina lyenyi naulumbunwiso walyo. Mwomwo ika?

12. Uno tweji kulingisanga ngachilihi lijina lyaYehova kupwa lyajila nge tuli mumulimo wakwambulula?

¹² Kuzanga Yehova cheji kutukunyulanga tulingise lijina lyenyi kupwa lyajila. (Mateu 6:9) Twasaka kwazana mumulimo wakutomesa lijina lyenyi kumakuli ahanjika Satana halijina kana. (Kupu. 3:​1-5; Yopa 2:4; Yowa. 8:44) Nge tuli mumulimo wamuwande, tweji kufwilanga kuhakwila Kalunga ketu nakuhanjika muchano kuli vosena vaze navatwivwilila. Twasaka vatu vosena vatachikize ngwavo, havilinga vyosena atwama navyo Kalunga, zangi yikiko yapwa yayilemu chikuma, kaha eji kuyulanga mwakwoloka kaha nawa mwachiyulo. Tweji kuvalwezanga nawa vatachikize ngwavo kalinwomu Wangana wenyi ufumiseko kuyanda chosena nakulingisa vatu vosena vatwame mukuunda nakupwa vakuwahilila. (Samu 37:​10, 11, 29; Yowa. 1, 4:8) Shikaho, kachi nge natulweza vatu vyuma kana hali Yehova, kaha tuli nakulingisa lijina lyenyi kupwa lyajila. Tweji kuwahililanga nawa mwomwo tweji kulinganga vyuma vize twatela kulinga hakupwa tuVinjiho jaYehova. Mujila muka?

13. Mwomwo ika tweji kwivwilanga kuwaha hakutuvuluka kupwa tuVinjiho jaYehova? (Isaya 43:​10-12)

¹³ Yehova atuvuluka kupwa ‘tuvinjiho’ jenyi. (Tangenu Isaya 43:​10-12.) Myaka kunyima, mukanda wakufuma kuLizavu lyaKutwaminyina wambile ngwawo: “Enga, twatokwa chikuma hakutuvuluka kupwa tuVinjiho jaYehova.” c  Mwomwo ika? Achishinganyekenu hachakutalilaho chino. Kachi nge muli nakusaka chinjiho wakumimanyinako muzango yakusopela, tunafwelela namusaka mutu uze mwatachikiza kanawa kaha nawa mwafwelela, uze akwechi puho yamwaza yize nayilingisa vatu vamone unjiho mwahana kupwa waulemu. Shikaho Yehova hakutusakula etu tupwenga tuVinjiho jenyi, asolola nge atutachikiza kanawa, kaha nawa atufwelela ngwenyi natuhana unjiho wamuchano wakuvuluka ngwetu ikiye kaha apwa Kalunga wamuchano. Hakuwana nge twatokwa kupwa tuVinjiho jenyi, ngocho tweji kufwilanga kuzachisa lwola lwetu mangana tulingise lijina lyenyi valitachikize kuvatu nakulitomesa kumakuli aSatana. Kulinga ngocho cheji kutulingisanga tuyoye kweseka nalijina vatuvulukila lyaVinjiho jaYehova.—Samu 83:18; Loma 10:​13-15.

NATUTWALAHO LIKA KWAMBULULA SWI NAKUSONGO

14. Vyuma muka vyamwaza tuli nakutalilila kulutwe?

¹⁴ Chikupu vene tuli nakutalilila vyuma vyamwaza navisoloka kulutwe. Shikaho tunafwelela ngwetu Yehova mwatukisula mangana tukafwe vatu vavavulu vetavile muchano shimbu kanda luyando lwalunene luputuke. Kaha nawa tunatachikiza ngwetu, nahaluyando lwalunene luze nalukapwa lwola lwalukalu chikuma, tunahase kukamona vatu vavavulu navafuma mukaye kaSatana kaze kali nakuya nakunonga nakwalishila hamwe Yehova nayetu.—Vili. 13:48.

15-16. Mulimo muka uze natutwalaho lika kuzata, kaha palanga nakulwola muka?

¹⁵ Muholyapwa ngananyi, tuli namulimo uze twatela kuzata. Tuli nakutokwa chakwazana mumulimo uze katweshi kukazata chekako, mulimo kana shina, kwambulula mujimbu wamwaza waWangana waKalunga mukaye kosena. Halwola lwolumwe nawa, twatela kwambulula mujimbu wakuhuhumuna. Vatu vatela kutachikiza ngwavo kukuma chakano kaye chinapandama kwakamwihi. Kaha omu lwola lwakusopesa nalukaheta, vatu kana navakatachikiza ngwavo mujimbu twapwile nakuvambulila wafumine kuli Yehova Kalunga.—Ezeke. 38:23.

¹⁶ Vyuma muka tuli nakufwila kulinga? Tuli nakufwila ngwetu, vyuma tunashimutwila vyakufwana nge kuzanga mujimbu wamwaza, nakuzanga vatu, kaha chachilemunyi kuzanga Yehova Kalunga nalijina lyenyi, vitukunyule tutwaleho lika kwambulula mujimbu wamwaza natwima kaha nawa mukwanguhwa, palanga nomu Yehova mwakamba ngwenyi, “Kunahu!”