1. Mwomwo ika natwambila ngwetu tuli nakuyoyela mulwola luze vyuma vyamwaza vili nakusoloka?

 TULI nakuyoyela mulwola luze vyuma vyamwaza vili nakusoloka. Hakumbi hakumbi tuli nakumona nameso etu kapu, omu upolofweto wamuMbimbiliya uli nakutesamo. Chakutalilaho, tuli nakumona omu “mwangana wakunote” “[namwangana wakusulo]” vali nakulipika hakufwila kupwa nangolo jakuyula kaye kosena. (Ndanye. 11:​40, kwinyikila) Tuli nakumona omu mujimbu wamwaza waWangana waKalunga vali nakuwambulula mukaye kosena, nomu nawa vatu vavavulu vali nakwakula kanawa kumujimbu kana. (Isa. 60:22; Mateu 24:14) Kaha nawa tuli nakutambula kulya chakushipilitu chachivulu “halwola lwakutamo.”—Mateu 24:​45-47.

2. Uno vyuma muka twafwelela, kaha vyuma muka twatela kutachikiza?

² Yehova ali nakutwalaho lika kutukafwa twivwishise kanawa vyuma vyavilemu vize navisoloka kalinwaha. (Vishi. 4:18; Ndanye. 2:28) Tunafwelela ngwetu halwola nalukaputuka luyando lwalunene, natukatachikiza vyuma vyosena natukasakiwa kutachikiza, mangana tukapwe vakumika halwola lwalukalu ngana. Chipwe ngocho, twatela kutachikiza ngwetu, kuli vyuma vimwe vize katwatachikizako kutalisa kuvyuma vize navikasoloka kulutwe. Muchihande chino, natuvangila kushimutwila ovyo tunalumwinako vyuma vize twahanjikile hakavanga kutalisa kuvyuma vimwe vize navikasoloka kulutwe. Kufumaho, natushimutwila havyuma vimwe vize twatachikiza kutalisa kuvyuma vize navikasoloka kulutwe, najila Setu wamwilu mwakalingilamo vyuma.

VYUMA VIZE KATWATACHIKIZAKO

3. Vyuma muka twahanjikile kutalisa kulwola luze Yehova keshi kuketavisa vatu vamufweleleko, kaha mwomwo ika twahanjikilile ngocho?

³ Kunyima twahanjikilenga ngwetu, nge luyando lwalunene lunaputuka,  kakweshi kukapwa mutu uze ketavako, uze mwakafwelela Yehova nakuyovoka haAlamangetoneko. Twakukulwile ngocho, mwomwo twatachikijile ngwetu mujimbu waLivaji lyamumakumbi aNowa wemanyinyineko vyuma navikasoloka kulutwe. Chakutalilaho, twashinganyekele ngwetu ngana muze kakwapwile mutu umwe engilile muwato omu ‘Yehova asokele chikoloko,’ shikaho twamwene ngwetu weshovo mwakafwelela Yehova omu nalukaputuka luyando lwalunene kaveshi kukamuyovolako.—Mateu 24:​37-39.

4. Uno oholyapwa tuli nakumona mujimbu waLivaji kupwa himujimbu uze wemanyinako vyuma vyavilemu vize navikatesamo kulutwe tahi? Lumbununenu.

⁴ Uno twatela kumona mujimbu waLivaji kupwa himujimbu uze wemanyinako vyuma navikasoloka kulutwe tahi? Nduma. Mwomwo ika? Mwomwo Visoneka kavyahanjika hatoma hachuma kanako. a Numba tuhu Yesu afwanyishile “makumbi aNowa” kulwola lwakupwako chenyi, oloze kahanjikile ngwenyi, vyuma vyosena vize vyasolokele mumakumbi aNowa, vyemanyinyineko vyuma vyavilemu vize navikatesamo kulutweko. Chakutalilaho, omu Yehova asokele kuchikolo chawato, kachemanyinyineko vyuma vyavilemu vize navikatesamo kulutweko. Echi kacheshi nakulumbununa nge katwatela kulinangula mujimbu waNowa naLivajiko.

5. (a) Vyuma muka alingile Nowa shimbu kanda Livaji? (WavaHepeleu 11:7; WaPetulu 1, 3:20) (b) Uno mulimo wakwambulula wamumakumbi aNowa unalifwane ngachilihi namulimo wakwambulula wamumakumbi etu?

⁵ Omu Nowa evwile mujimbu waYehova wakuhuhumuna, asolwele hatoma ngwenyi apwile  nalufwelelo hakusonga wato. (Tangenu WavaHepeleu 11:7; WaPetulu 1, 3:20.) Chochimwe nawa, vatu vaze navevwa mujimbu wamwaza waWangana waKalunga, vatela kulinga vyuma kweseka navyuma vize navevwa. (Vili. 3:​17-20) Petulu avulukile Nowa kupwa “muka-kwambulula kwoloka.” (Petu. 2, 2:5) Chipwe ngocho, ngana muze twashimutwilanga muchihande chinafumuho, katwatachikizako numba nge Nowa ambulilile mutu himutu hamavu shimbu kanda Livajiko. Makumbi ano, tuli nakuzata nangolo mangana twambulile mutu himutu mukaye kosena. Chipwe ngocho, numba tuzata tuhu ngachilihi, katweshi kuhasa kwambulula mujimbu wamwaza kuli mutu himutu mukaye kosena shimbu kanda kukuma chizengako. Mwomwo ika?

6-7. Mwomwo ika natukukulwila ngwetu katweshi kuhasa kwambulula mujimbu wamwaza kuli mutu himutu hano hamavu shimbu kanda kukuma chizengako? Lumbununenu.

⁶ Shinganyekenu havyuma ahanjikile Yesu kutalisa kukutohwa chamulimo wetu wakwambulula. Apolofwetele ngwenyi, mujimbu wamwaza navakawambulula “hamavu hosena, nakupwa unjiho kuli vaka-mafuchi osena.” (Mateu 24:14) Upolofweto kanou uli nakutesamo chikuma mumakumbi ano kuhambakana kunyima. Mujimbu waWangana uli mumalimi akuzomboka 1,000, kaha nawa vatu vavavulu chikuma mukaye kosena vali nakulinangula vyaWangana kuzachisa keyala yetu ya jw.org.

⁷ Chipwe ngocho, Yesu alwezele tumbaji twenyi ngwenyi, kaveshi ‘kukakumisa kujinguluka mujinganda josena,’ chipwe kwambulila vatu vosena, shimbu kanda ezengako. (Mateu 10:23; 25:​31-33) Mazu ahanjikile Yesu ali nakutesamo namumakumbi etu nawa. Vatu vavavulu chikuma makumbi ano, vatwama mujingalila jize mulimo wetu wakwambulula vaukanyisa mujijila jimwe. Kaha nawa hakumbi hakumbi kuli nakusemuka vakemba vavavulu. Tweji kuzatanga nangolo mangana twambulule mujimbu wamwaza kuli “vaka-mafuchi osena, navaka-miyachi yosena, navaka-malimi osena.” (Kuso. 14:6) Oloze kuhanjika muchano, katweshi kuhasa kwambulula mujimbu wamwaza kuli mutu himutu hano hamavu shimbu kanda kukuma chizengako.

8. Chihula muka tunahase kuhulisa kutalisa kukusopesa chaYehova chakulutwe? (Talenu nawa mivwimbimbi.)

⁸ Jino chihula echi: Nachikapwa ngachilihi kuli vaze navazeneka kupwa nakutokwa chakwivwa mujimbu wamwaza shimbu kanda luyando lwalunene luputuke? Uno Yehova naMwanenyi uze nahane mulimo wakusopesa, navakalinga vyuma muka kuvatu kana? (Yowa. 5:​19, 22, 27; Vili. 17:31) Chisoneka chamutwe wachihande chino chinavuluka ngwacho, Yehova “kazanga mutu numba umwe akanongeko.” Oloze asaka “vosena vapihilile nakwalumuka.” (Petu. 2, 3:9; Chimo. 1, 2:4) Numba tuhu twatachikiza vyuma kana kutalisa kuli Yehova, oloze katwatachikiza jila mwakasopeselamo vatu vaze kavapwile nakutokwa chakwivwilila kumujimbu wamwazako. Chipwe ngocho, Yehova kasakiwa kutulweza vyuma nalingi chipwe vize mwakalingako.

9. Vyuma muka natusolwela Yehova muMbimbiliya?

⁹ Yehova atulweza kuhichila muMazu enyi vyuma vimwe vize mwakalinga kulutwe. Chakutalilaho, Mbimbiliya yatulweza ngwayo, Yehova mwakasangula “vaka-kuhenga,” vaze kavapwile nakutokwa chakwivwilila kumujimbu wamwaza nakwalumuna jijila javoko. (Vili. 24:15; Luka 23:​42, 43) Echi chepula nawa vihula vikwavo vyavilemu.

10. Vihula muka vikwavo vinahase kwepuka?

¹⁰ Kutala vatu vaze navakafwa haluyando lwalunene navakavanongesa haya myaka nakuhona kupwa nalutalililo lwakukasanguka tahi? Visoneka vyahanjika hatoma ngwavyo vaka-kulikanga kuli Yehova vaze ikiye namaswalale jenyi navakanongesa haAlamangetone, kaveshi kukasangukako. (Teso. 2, 1:​6-10) Nyi ngachilihi vatu veka, chakutalilaho vaze navakafwa haluyando  lwalunene mwomwo yakuviza chipwe ushinakaji, nyi pamo mwomwo yakufwa muponde chipwe kuvajiha kuli vakwavo vatu? (Kwambu. 9:11; Zeka. 14:13) Kutala vatu kana navakapwa hamukana ‘wavaka-kuhenga’ vaze navakasangula mukaye kakahya tahi? Katwatachikijileko.

VYUMA VIZE TWATACHIKIZA

11. Uno haAlamangetone, vatu navakavasopesa kweseka naka?

¹¹ Twatachikiza vyavivulu kutalisa kuvyuma navikasoloka kulutwe. Chakutalilaho, twatachikiza ngwetu haAlamangetone vatu navakavasopesa kweseka najila vamwenenengamo vandumbu jaKulishitu. (Mateu 25:40) Vatu vaze navakasopesa nakuvavuluka kupwa mikoko hivatu vaze vakundwijilenga vawavisa naKulishitu. Twatachikiza nawa ngwetu vandumbu jaKulishitu vamwe navakapwa hano hamavu omu nalukaputuka luyando lwalunene, kaha kaveshi kukaya mwiluko palanga nomu nakukasala kalwola kakandende nakuputuka chajita yaAlamangetone. Chikalu kaha vandumbu jaKulishitu vachili hano hamavu, vatu vamichima yamwaza navakapwa nakutokwa chakuvakundwiza nakwazana mumilimo navakazata. (Mateu 25:​31, 32; Kuso. 12:17) Mwomwo ika vyuma kana vyapwila vyavilemu?

12-13. Vyuma muka pamo navakalinga vatu vamwe omu navakamona “Mbavilone Yayinene” vanayinongesa? (Talenu nawa mivwimbimbi.)

¹² Omu luyando lwalunene nalukaputuka, vatu vamwe vaze navakamona omu “Mbavilone Yayinene” navakayinongesa, navakanuka ngwavo Vinjiho jaYehova vanahanjikanga havyuma kana evi hamyaka yayivulu. Kutala vatu vamwe vaze navakamona vyuma kana navakalumuna michima yavo tahi?—Kuso. 17:5; Ezeke. 33:33.

¹³ Chuma kana nachikalifwanako nachuma chasolokele muEjipitu mumakumbi aMose. Anukenu ngwenu kwapwile “vatu veka vavavulu” valiwezele hamukana wavaIsalele hakulovoka muEjipitu. Vatu vamwe vapwile jino nalufwelelo hakumona omwo vyuma avahuhumwine Mose kutalisa kuvipupu 10 navitesamo. (Kulo. 12:38) Shikaho, kachi nge vyuma vyakulifwanako navikasoloka hakunonga chaMbavilone Yayinene, kutala twatela kukevwa kupihya nakwamba ngwetu vatu kana vaneza hamukana wetu omu kunonga chinapandama tahi? Nduma.  Mwomwo tuli nakufwila kulondezeza Setu wamwilu uze apwa “Kalunga wakeke nakutetela, wakushipwokela kukwata utenu, wazangi yakwilila, wamuchano.” b—Kulo. 34:6.

14-15. Uno kuyoya chamutu chahaya myaka yosena chakulutwe nachikapendamina kweseka nalwola mwakafwa chipwe kweseka nokwo ayoyela tahi? Lumbununenu. (Samu 33:​4, 5)

¹⁴ Shimbu jimwe, vandumbwetu vamwe vanahase kuhanjika kutalisa kuli kausoko kavo uze kazachila Yehovako ngwavo: “Kachi nachiwaha kausoko kami kufwa shimbu kanda luyando lwalunene luputuke mangana akapwe nalutalililo lwakukasanguka.” Chikupu vene, kuli vyuma vimwe vyeji kulingisanga vandumbwetu vahanjike mujila kaneyi. Oloze kuyoya chamutu chahaya myaka yosena kachapendamina halwola mutu mwafwako. Yehova apwa Muka-kuyula wakukupuka, kaha vyuma eji kusakulanga kulinga vyapwa vyakwoloka kaha nawa vyachiyulo. (Tangenu Samu 33:​4, 5.) Twafwelela chikupu ngwetu “Muka-kuyula vaka-mavu vosena” mwakalinga mwakwoloka.—Kupu. 18:25.

¹⁵ Chapwa nawa chakutamo kukukulula ngwetu, kuyoya chamutu chahaya myaka yosena, kacheshi kupendamina kuchihela ali nakuyoyelako. Shikaho nachipwa chakuhenga kukukulula ngwetu Yehova mwakasopesa vatu vavavulu kupwa “vapembe,” mwomwo yakuyoyela kuchihela kuze kavapwile nakutokwa chakwivwilila kumujimbu waWanganako. (Mateu 25:46) Muka-kuyula vaka-mavu vosena eji kuzakamanga vatu kana kuhambakana muze tunahase kuvazakama yetu. Katwatachikiza mujila Yehova  mwakalingilamo vyuma haluyando lwaluneneko. Pamo vatu vamwe halwola kana navakapwa nakutokwa chakulinangula hali Yehova nakumufwelela nakupwa kusali yenyi, omu mwakalijilika kumeso avaka-mafuchi osena.—Ezeke. 38:16.

16. Vyuma muka tunatachikiza jino hali Yehova? (Talenu nawa muvwimbimbi.)

¹⁶ Kulinangula Mbimbiliya chinatukafwe tutachikize ngwetu, Yehova amona kuyoya chavatu kupwa chachilemu. Ahanyine kuyoya chaMwanenyi mangana vatu vosena vapwenga nakutokwa chakuyoya haya myaka yosena. (Yowa. 3:16) Tuvosena tunamono omwo Yehova atuzanga. (Isa. 49:15) Atutachikiza mutu himutu halijina. Hakuwana nge Yehova atutachikiza kanawa, ngocho numba nge natufwa mwakatusangula, mwomwo mwakanuka vyuma vyosena hali etu, kuhakilako vene navize twashinganyekelenga. (Mateu 10:​29-31) Chikupu vene, kuli vyuma vyavivulu vyatela kutulingisa tufwelele ngwetu, Setu wamwilu wazangi mwakasopesa mutu himutu mujila yakwoloka, kaha nawa yakutetela.—Yako. 2:13.

17. Vyuma muka natushimutwila muchihande chinakavangizaho?

¹⁷ Vyuma tunalumunako navitulingisa tuzate mulimo wakwambulula mukwanguhwa kuhambakana kunyima. Mwomwo ika tunahanjikila ngocho? Vyuma muka vyeji kutulingisanga tutwaleho lika kuzata mulimo wakwambulula natwima chakuzeneka kulitwamina? Muchihande chinakavangizaho natukakumbulula vihula kana mukujiminyina.