1-2. Vatu vamwe veji kwivwanga ngachilihi kutalisa kukulisesembwa?

 KULISESEMBWA chapwa hichuma chamwaza chikuma, kaha cheji kulingisanga vatu vawahilile. Kachi nge muli nakulisesembwa, kaha tunafwelela ngwetu muli nakufwila vyuma vyosena vitambuke kanawa. Kaha vatu vavavulu vanafukilanga. Tsion, a ndumbwetu wapwevo wakuEthiopia ambile ngwenyi: “Lwola ngwapwilenga wakuwahilila chikuma mukuyoya chami shina, luze twapwilenga nakulisesembwa nalunga lwami. Twashimutwililenga havyuma vyavilemu chikuma kaha nawa twasehelenga. Ngwevwile kuwaha hakuwana nge ngwawanyine mutu uze ngwazangile, uze nawa anguzangile chikuma.”

² Ndumbwetu Alessio wakuNetherlands ambile ngwenyi, “Ngwevwile kuwaha hakutachikiza kanawa puwami omu twapwile nakulisesembwa. Chipwe ngocho twamwenenga ukalu.” Muchihande chino, natushimutwila haukalu umwe uze veji kumonanga valunga napwevo vaze vali nakulisesembwa najindongi jamuMbimbiliya jize jinahase kuvakafwa vafukile. Natushimutwila nawa omwo vandumbwetu muchikungulwilo vanahase kuvakafwa.

OVYO VYEJI KULINGISANGA VATU VALISESEMBWE

3. Mwomwo ika vapwevo nalunga vatela kulisesembwela? (Vishimo 20:25)

³ Numba tuhu vatu veji kulivwisanga kuwaha kulisesembwa, oloze vatela kumona kulisesembwa kupwa hichuma chachilemu chize chinahase kuvalingisa vengile muulo. Halikumbi lyakulimbata, valunga napwevo veji kushikanga Yehova ngwavo navalizanganga nakulivumbika mukuyoya chavo. Shikaho, shimbu kanda tulishike kala lushiko, twatela kushinganyeka kanawa havyuma kana. (Tangenu Vishimo 20:25.) Omu mukiko chapwa nakulushiko lwaulo. Kulisesembwa cheji kuhananga vapwevo nalunga lwola lwakulitachikiza kanawa nakusakula kanawa vyakulinga. Shimbu jimwe veji  kusakulanga kulimbata chipwe chiku. Shikaho, nge vapwevo nalunga vaneche kulisesembwa, kaha kacheshi nakulumbununa nge vanahonoko. Oloze kulisesembwa chinavakafwe vasakule kanawa vyakulinga.

4. Mwomwo ika twatela kumwena kulisesembwa mujila yamwaza?

⁴ Mwomwo ika chapwila chachilemu kumona kulisesembwa mujila yamwaza? Kachi nge vajike navamona kulisesembwa mujila yamwaza, kaha nachivakafwa vaputuke kulisesembwa namutu navishinganyeka vyakufwila kukengila nenyi muulo. Chipwe ngocho, vajike keshi vakiko kaha vatela kumona kulisesembwa mujila yamwazako. Nayetu tuvosena twatela kuchimona mujila yamwaza. Chakutalilaho, vamwe vashinganyeka ngwavo nge vapwevo nalunga vali nakulisesembwa, kaha vatela kukalimbata. Uno vishinganyeka kana vyeji kulingisanga vandumbwetu vavajike vamone ukalu muka? Ndumbwetu wapwevo wamujike Melissa wakuUnited States ambile ngwenyi: “Vandumbwetu vaze vali nakulisesembwa veji kumonanga ukalu wakuvashinyinyika valimbate. Ngocho, echi cheji kulingisanga vandumbwetu vamwe vatwaleho lika kulisesembwa numba tuhu vyuma kavyeshi kanawako. Kaha vamwe veji kulitwaminanga kushinganyeka vyakulisesembwa. Ngocho veji kulizakaminanga chikuma.”

FWILENU KULITACHIKIZA KANAWA

5-6. Vyuma muka vatela kutachikiza valunga napwevo vali nakulisesembwa hali umwe namukwavo? (WaPetulu 1, 3:4)

⁵ Nge muli nakulisesembwa, chuma muka nachimikafwa mumone numba nge mwatela kwingila muulo chipwe chiku? Fwilenu kulitachikiza kanawa. Numba tuhu mwatachikijileko mijimbu yimwe hali mukwenu shimbu kanda muputuke kulisesembwa, oloze mwatela jino kutachikiza “mutu wakusweka wamumuchima.” (Tangenu WaPetulu 1, 3:4.) Mwatela kutachikiza kanawa mutu uze muli nakulisesembwa nenyi, omu apwa kushipilitu, navilinga vyenyi navishinganyeka vyenyi. Mukuhita chalwola, munahase kukumbulula vihula vino: ‘Kutala mutu kana nahase kupwa muka-mahyami wamwenemwene tahi?’ (Vishi. 31:​26, 27, 30; Efwe. 5:33; Chimo. 1, 5:8) ‘Kutala tunahase kulisolwela zangi nakulizakama tahi? Kutala tunahase kuliula tutenga twaumwe namukwavo tahi?’ b (Loma 3:23) Omu namulitachikiza namukwenu, mwatela kwanuka ngwenu, chuma chize chapwa chachilemu chikuma shina vaka-kwashiwisa muchima muvyuma vize mwalihandununa keshi muvyuma vize mwalifwanako.

 ⁶ Vyuma muka vikwavo mwatela kutachikiza hali mutu nge muli nakulisesembwa? Shimbu kanda muputuke kulizanga chikuma, mwatela kushimutwila havyuma vyavilemu vyakufwana nge vize mutu himutu alitomena kutesamo. Munahase kushimutwila nawa havihande vimwe vyakufwana nge kulikangula kumujimba, ukalu wakuhona jimbongo, chipwe havyuma vyavipi vyamisolokelele kunyima vize vyeji kumiyanjisanga muvishinganyeka. Vihande vimwe kavyasakiwa kuvishimutwila kumaputukilo akulisesembwako. (Esekesenuko Yowano 16:12.) Nge mukwenu ali nakumihulisa vihula vize munamono ngwenu kamwatela kuvikumbulula hahaze veneko, kaha mulwezenu ngwenu namukamukumbulula kulutwe. Mukuhita chalwola, mutu uze muli nakulisesembwa nenyi mwakasakiwa kutachikiza mijimbu yosena hali yenu mangana akasakule kanawa vyakulinga. Shikaho, lwola lumwe namukasakiwa kumulweza vyuma vyosena.

7. Uno valunga napwevo vaze vali nakulisesembwa vanahase kulitachikiza ngachilihi? (Talenu nawa lipwata lyakwamba ngwavo, “ Kulisesembwa naMutu Uze Atwama Kwakusuku.”) (Talenu nawa mivwimbimbi.)

⁷ Uno munahase kutachikiza ngachilihi kanawa mutu? Jila yimwe shina kuhanjika hatoma vyuma vyosena, nakuhulisa vihula nakwivwilila kanawa. (Vishi. 20:5; Yako. 1:19) Chuma nachimikafwa shina kulinga vyuma vize navimikafwa kupwa vakukasunuka kushimutwila, vyakufwana nge kulilanga hamwe, nakutambukila hamwe muvihela vyasanga, nakuzachila hamwe mumulimo wakwambulula. Munahase nawa kulitachikiza kanawa hakushimutwilanga namasepa jenu najitanga jenu. Kaha nawa munahase kulinga vyuma vize navimikafwa mutachikize vilinga vyamukwenu namuchima eji kusololanga nge muli kuvihela vyakulisezaseza navatu vakulisezaseza. Talenu vyuma alingilenga ndumbwetu Aschwin uze atwama muNetherlands. Ahanjikile kutalisa kulwola apwilenga nakulisesembwa naAlicia ngwenyi: “Twalingilenga vyuma vize vyatukafwile tulitachikize kanawa. Vyuma twalingilenga kakavulu shina kulila hamwe vyakulya chipwe kuzachila hamwe milimo yakukanda. Kulinga vyuma kanevi chatukafwile tutachikize mutu himutu oho ahehelela nangolo jenyi.”

8. Uno valunga napwevo vaze vali nakulisesembwa vanahase kunganyala ngachilihi hakulinangwila hamwe?

⁸ Munahase nawa kulitachikiza kanawa hakulinangwilanga hamwe vihande vyakushipilitu. Kachi nge munakalimbata, munahase kukanonekanga lwola lwakukalemesanga Kalunga mwatanga, mangana Kalunga akapwe muulo wenu. (Kwambu. 4:12) Shikaho nachipwa chamwaza kunoneka lwola lwakulinangulanga Mbimbiliya halwola muli nakulisesembwa. Oloze mwatela kwanuka ngwenu halwola kanelu kanda muchilimbate,  kaha lunga nawa kanda apwenga mutwe watanga. Chipwe ngocho, kulinangwilanga hamwe nachimikafwa mutachikize numba nge mukwenu ali nausoko wakukola naKalunga nyi chiku. Max naLaysa vaze vatwama muUnited States vahanjikile hachuma chikwavo chachilemu. Max ambile ngwenyi: “Kumaputukilo akulisesembwa chetu, twalinangwilenga vihande vyamumikanda yetu vize vyahanjika hakulisesembwa, nahaulo nahatanga. Vihande kana vyatulingishile tupwenga vakukasunuka kushimutwila havihande vyavilemu vize pamo kachi katwahashile kushimutwilako.”

VYUMA VIKWAVO VYAKUSHINGANYEKAHO

9. Vyuma muka vatela kushinganyekaho valunga napwevo vaze vali nakulisesembwa?

⁹ Iya mwatela kulweza ngwenu muli nakulisesembwa? Enu vavene mwatela kusakula. Kumaputukilo akulisesembwa chenu munahase kusakula vatu vavandende vaze namulwezako. (Vishi. 17:27) Echi nachimikafwa mulihende kuvihula vyavivulu nakuhona kumishinyinyika mulusuke kusakula vyakulinga. Oloze nge kamweshi kulwezako mutu numba umweko, kaha namuputuka kulihandununa kuvatu nakwivwa woma ngwenu vatu navatachikiza ngwavo munakulisesembwa. Echi chinahase kuneha ukalu waunene. Shikaho nachipwa chamangana kulwezako vatu vamwe vaze vanahase kumikafwa mulinge vyuma vyakwoloka. (Vishi. 15:22) Chakutalilaho, munahase kulwezako vatanga jenu vamwe, namasepa jenu vamwe vakuhya kushipilitu, navakulwane vamwe muchikungulwilo.

10. Vyuma muka vanahase kulinga vapwevo nalunga vali nakulisesembwa mangana kulisesembwa chavo chinehe kavumbi? (Vishimo 22:3)

¹⁰ Uno munahase kulingisa ngachilihi kulisesembwa chenu chinehe kavumbi? Omu namutwalaho lika kulisesembwa, namuputuka kulizanga chikuma. Vyuma muka navimikafwa mulihende kukulinga vyuma vize navivwisa Yehova kupihya? (Koli. 1, 6:18) Lihendenu kukushimutwila vyuma vyasonyi, nakupwa kuchihela chauka wenu nakunwa wala wauvulu. (Efwe. 5:3) Vyuma kana vinahase kumilingisa mwivwenga peha yakulisavala, nakuhona kulinga vyuma vyakwoloka. Shikaho nachipwa chamwaza kushimutwilanga kakavulu havyuma vize navilingisa kulisesembwa chenu chinehe kavumbi. (Tangenu Vishimo 22:3.) Talenu vyuma vyakafwile Dawit napuwenyi Almaz vamuEthiopia. Vambile ngwavo: “Twashikaminyinenga kuvihela kuze kwapwilenga vatu vavavulu chipwe kupwa hamwe namasepa jetu. Katwapwilenga ukawetu muminyau chipwe muzuvoko. Echi chatukafwile mangana tulihende kukulinga vyuma vyakuhenga.”

11. Vyuma muka vatela kushinganyekaho valunga napwevo vali nakulisesembwa kutalisa kujijila jakulisolwelamo zangi?

¹¹ Nyi ngachilihi kulinga vyuma vyakulisolwela zangi? Mukuhita chalwola, munahase kuputuka kulingako vyuma vimwe vyakulisolwela zangi. Oloze nge namuputuka kwivwa peha yakulisavala, kaha nachimikaluhwila kusakula kanawa vyakulinga. (Mwaso 1:2; 2:6) Vilinga vyakulisolwela zangi vinahase kuhambakanyisaho nakulingisa vatu valinge vyuma vize navivwisa Yehova kupihya. (Vishi. 6:27) Shikaho, kumaputukilo akulisesembwa chenu, mwatela kushimutwila jijila namulisolwelangamo zangi jize kajalimbalaka najindongi jamuMbimbiliyako. c (Teso. 1, 4:​3-7) Lihulisenu ngwenu: ‘Uno vatu mungalila twatwama navatumona ngachilihi nge tuli nakulinga vyuma vyakulisolwela zangi? Uno kulinga vyuma kana nachitulingisa twivwenga peha yakulisavala tahi?’

12. Vyuma muka vatela kutachikiza valunga napwevo nge vali nakulisesembwa kutalisa kuukalu nakuhona kulivwasana?

¹² Munahase kukumisa ngachilihi ukalu navikokojola? Uno munahase kulinga ngachilihi nge kakavulu kamweshi nakulivwasanako? Uno echi nachisolola nge kulisesembwa chenu kacheshi nakufukilako tahi? Nduma, mwomwo vatu vosena veji kulikokojwesanga. Ulo weji kufukilanga kachi nge vapwevo nalunga navazachila hamwe mangana vakumise ukalu wavo. Shikaho, jila  namukumishilamo ukalu wenu oholyapwa nayisolola numba nge ulo wenu naukafukila nyi chiku. Ngocho lihulisenu ngwenu: ‘Kutala tunahase kushimutwila mukuunda kaha nawa mukavumbi tahi? Uno tweji kwitavilanga washi tutenga twetu nakufwila kuzachilaho tahi? Uno tweji kwashiwisanga washi muchima nakulikonekela, nakukonekela mukwetu tahi?’ (Efwe. 4:​31, 32) Kachi nge namulikokojwesanga lika nakuhona kulivwasananga, kaha chinahase kumilingisa mukalingenga ngocho namuulo. Nge munamono ngwenu mukwenu katelemo kukapwa muka-mahyenuko, kaha nachiwaha kulitwamina kulisesembwa. d

13. Vyuma muka navikafwa vatu vali nakulisesembwa mangana vatachikize tando vatela kumbata?

¹³ Uno tando yingahi mwatela kumbata hakulisesembwa? Kakavulu, kulusuka kusakula vyakulinga cheji kunehanga ukalu. (Vishi. 21:5) Shikaho, mwatela kumbata tando yakutamo mangana mulitachikize kanawa. Chipwe ngocho, kamwatela kumbata tando yayisuku chikumako. Mbimbiliya yamba ngwayo: “Nge vyuma natalilila mutu vinashimbula kutesamo, cheji kwivwisanga kumuchima kukola.” (Vishi. 13:12) Kaha nawa omu namutwalaho lika kulisesembwa, chinahase kupwa chachikalu kuhonesa cheseko chakufwila kulisavala. (Koli. 1, 7:9) Muchishishisa chakushinganyeka halwola mwaputukile kulisesembwa, lihulisenu ngwenu, ‘Vyuma muka ngwatela kutachikiza hamutu nguli nakulisesembwa nenyi mangana ngusakule kanawa vyakulinga?’

UNO VANDUMBWETU VANAHASE KUKAFWA NGACHILIHI VAZE VALI NAKULISESEMBWA?

14. Mujijila muka muze vandumbwetu vanahase kukafwilamo vaze vali nakulisesembwa? (Talenu nawa muvwimbimbi.)

¹⁴ Nge twatachikizako valunga napwevo vaze vali nakulisesembwa, tunahase kuvakafwa ngachilihi? Tunahase kuvasanyika tulile navo hamwe vyakulya, chipwe kupwa navo kukulemesa Kalunga mwatanga, chipwe kuya navo nakulihizumuna. (Loma 12:13) Kulingila navo hamwe vyuma kanevi nachivakafwa valitachikize kanawa. Uno kunakusakiwa mutu wakupwa navo, chipwe kuvakafwa mwakutambukila, chipwe chihela chakuhengama mangana vakashimutwilileko tahi? Nge mukiko, kaha munahase kuvakafwa mujijila kana. (Ngale. 6:10) Alicia uze twavulukanga hakavanga ahanjikile omwo ikiye nalunga lyenyi Aschwin vavakafwile. Ambile ngwenyi, “Twawahililile chikuma omu vandumbwetu vamwe vambile ngwavo tuvatambukile kuzuvo yavo nge tuli nakusakiwa chihela chakuhengama mangana tukashimutwilileko.” Nge vanamilombo mukapwe navo hamwe, kaha mwatela kuchimona kupwa hikutokwa chachinene. Kamwatela kuvaseza vavali kahako, chipwe ngocho, pwenu vakuvanguluka nakutachikiza  lwola lwakutamo lwakuvaseza vashimutwile.—Fwili. 2:4.

15. Jila muka yikwavo yize masepa vanahase kukafwilamo vatu vali nakulisesembwa? (Vishimo 12:18)

¹⁵ Tunahase nawa kukafwa valunga napwevo vaze vali nakulisesembwa kuhichila muvyuma natuhanjika navize natulinga. Shimbu jimwe twatela kupwa namuchima wakulikanyisa. (Tangenu Vishimo 12:18.) Chakutalilaho, tunahase kufwila kulwezako vatu veka ngwetu vandumbwetu vanganji nakananga vali nakulisesembwa, okunyi pamo vaze vali nakulisesembwa navasaka kukalihanjikila vavene. Katwatela kuyongolanga vatu vaze vali nakulisesembwa chipwe kuvamona mujila yayipi havyuma vanasakula kulingako. (Vishi. 20:19; Loma 14:10; Teso. 1, 4:11) Kaha nawa vaze vali nakulisesembwa vanahase kwivwa kupihya kuvahulisa numba nge navakalimbata nyi chiku. Ndumbwetu wapwevo Elise nalunga lyenyi vambile ngwavo, “Twevwilenga sonyi omu vatu vatuhulishilenga numba nge tunaputuka kuliwahisa vyawenga, okunyi yetu katwavishimutwilileko.”

16. Vyuma muka twatela kulinga nge valunga napwevo vanalitwamina kulisesembwa?

¹⁶ Nyi ngachilihi nge vaze vali nakulisesembwa navasakula kulitwamina kulisesembwa? Katwatela kwingila muvihande vyavo chipwe kupwa kusali yimweko. (Petu. 1, 4:15) Ndumbwetu wapwevo Lea ambile ngwenyi: “Ngwevwile kupihya chikuma omu ngwevwile ngwavo vandumbwetu vamwe vatondeletondelenga mijimbu yakusaka kutachikiza ovyo ngwalitwaminyinyine kulisesembwa nandumbwetu umwe.” Ngana muze twavulukanga hakavanga, kulitwamina kulisesembwa kachalumbununa nge vapwevo navalunga vanasakula kulinga chuma chakuhengako. Oloze chalumbununa nge kulisesembwa chinavakafwe valitachikize kanawa nakusakula kanawa vyakulinga. Chipwe ngocho, vyuma vanasakula vinahase kuvevwisa kukola kumuchima nakuvalingisa vevwenga uli. Shikaho tunahase kuwana jijila jakuvakafwilamo.—Vishi. 17:17.

17. Vyuma muka vatela kutwalaho kulinga vaze vali nakulisesembwa?

¹⁷ Nganomu tunalinangula, vatu vaze veji kulisesembwanga veji kumonanga ukalu, oloze vanahase nawa kulivwisa kuwaha. Jessica ambile ngwenyi: “Kuhanjika muchano, kulisesembwa chasakiwa kuzata nangolo. Chipwe ngocho, ngwawahilila mwomwo kulisesembwa chatuhanyine lwola lwakulitachikiza kanawa.” Kachi nge muli nakulisesembwa, kaha twalenuho kulitachikiza kanawa. Nge namulinga ngocho, kaha namufukila nakumikafwa musakule kanawa vyakulinga.