Kalunga Alongesa Vyuma Kweseka naMukanda Wenyi
“Yehova alile mavu mumangana. Azamishile melu mukunangakana.”—VISHI. 3:19.
MYASO: 6, 24
1, 2. (a) Vatu vamwe vashinganyeka ngachilihi hakuwana nge Kalunga atwama naliuka? (b) Vyuma muka natushimutwila muchihande chino?
UNO Kalunga atwama naliuka tahi? Vatu vamwe vashinganyeka ngwavo, “Etu vatu katwasakiwa liuka lyakututwaminyinako. Chuma chachilemu shina kupwa nausoko naKalunga.” Uno vishinganyeka kana vyakwoloka tahi? Vyuma kana vyasolola ika?
2 Muchihande chino, natushimutwila unjiho wakusolola nge Yehova Kalunga alongesa kanawa vyuma vyenyi vyosena. Kaha nawa natushimutwila omu twatela kumona jindongi jakufuma kuliuka lyaYehova. (Koli. 1, 14:33, 40) Kufuma vene mulikulukaji lyamyaka lyakulivanga, Visoneka vinakafwenga vatu muchihanda chahamavu chaliuka lyaYehova mangana vazate kanawa mulimo wakwambulula mujimbu wamwaza. Hakuwana nge tweji kukavangizanga Mbimbiliya najindongi jamuliuka, ngocho twapwa vatoma, twatwama mukuunda nakulinunga muchikungulwilo.
YEHOVA APWA MUKA-KULONGESA KANAWA VYUMA
3. Vyuma muka vyamilingisa mufwelele ngwenu Yehova alongesa kanawa vyuma?
3 Vyuma atenga Kalunga vyamusolola kupwa Muka-kulongesa kanawa vyuma. Mbimbiliya ngwayo: “Yehova alile mavu Vishi. 3:19) Etu twatachikiza “vyuma vyavindende kaha kumilimo [yaKalunga],” kaha “tweji kumwivwanga nakalizu kakuyeveta kaha.” (Yopa 26:14) Vyuma vyavindende twatachikiza hajipulaneti, navatanganyika, namilalaji vyatukafwa tutachikize ngwetu vyuma kanevi vavilongesa kanawa. (Samu 8:3, 4) Mumilalaji mwatwama vihita navihita vyavatanganyika vaze veji kutambukanga muutangatanga mujila yakulonga. Jipulaneti nawa jeji kunyengumukanga kulikumbi chakuzeneka kulipupa najikwavo. Pundu vene, vyumevi vyamumelu vyakukomwesa vyatukafwa tutachikize ngwetu Yehova uze ‘atengele melu namavu naunyongochima’ twatela kumwalisa, nakumulemesa, nakulyononona kuli ikiye.—Samu 136:1, 5-9.
mumangana. Azamishile melu mukunangakana.” (4. Mwomwo ika vaka-sayasi vanahono kukumbulula vihula kanevi vyavilemu?
4 Vaka-sayasi vanawane vyuma vyavivulu vyatwama muutangatanga nahano hamavu, kaha vinakutunganyalisa mwamunene. Oloze kuli vihula vyavivulu vize vaka-sayasi vanahono kukumbulula. Chakutalilaho, vaka-kulinangula vyamumelu kavatachikiza kanawa omu melu namavu ejile nakupwako, novyo vyalingisa etu tutwamenga hano hapulaneti yamavu haze hatwama vyuma vyakuyoya vyavivulu. Vatu nawa kavatachikiza ovyo vatu vasakila kuyoya myaka yosenako. (Kwambu. 3:11) Mwomwo ika vihula kanevi vyavilemu vahonena kuvikumbulwila? Mwomwo vaka-sayasi vavavulu vashinganyeka ngwavo Kalunga katwamoko, vyuma vyalijilile vivene. Oloze Yehova akumbulula vihula kanevi vyavilemu muMukanda wenyi.
5. Mujila muka kuyoya chetu chapendamina havyuma ahakako Kalunga?
5 Kuyoya chetu chapendamina havyuma vize ahakako Yehova. Vaka-kulinangula vyakakahya kakezi, navaka-kusokejeka miyengo yameya, navamanjimela, navaka-kutambukisa jindeke, navandotolo, vosena vapendamina havyuma kanevi hakuzata milimo yavo. Chakutalilaho, vandotolo veji kuzatanga kanawa mulimo wavo mwomwo vihanda vyamujimba vavihaka kanawa muvihela vyavyo. Ngocho ndotolo keshi kutondatonda oho hatwama muchimako nge anakusaka kupula mutu. Tuvosena twamona vyuma ahakako Kalunga kupwa vyavilemu. Kuleununa vyuma kana chinahase kuhaka kuyoya chetu muponde.
VAVILONGESA KULI KALUNGA
6. Mwomwo ika twatela kufwelela ngwetu vangamba jaYehova vatela kupwa vakulongesa kanawa?
6 Vyuma vyamumelu vavilongesa kanawa. Ngocho echi chasolola nge Yehova asaka navangamba jenyi vapwenga vakulongesa kanawa. Evi vikiko Kalunga atuhanyina Mbimbiliya mangana yitutwaminyine. Katweshi kuhasa kuyoya kanawa nakupwa vakuwahila chakuzeneka liuka lyaKalunga najishimbi jenyiko.
7. Vyuma muka vyasolola nge vihande vyamuMbimbiliya vavilongesa kanawa?
7 Mbimbiliya kawapwa mukanda wanganavene uze vasoneka vihande vyavaka-Kulishitu navaYuleyako. Oloze wapwa mukanda waKalunga vahwima, uze vasonekamo vihande vyavilemu. Mijimbu vasonekamo yalinunga kanawa, kaha nawa kayalimbalakako. Kufuma vene kumukanda waKuputuka nakuheta kuKusoloka, Mbimbiliya yakundwiza chihande chimwe kaha chakuvumbika wata waYehova nakutesamo vyuma ajina hamavu kuhichila muWangana wenyi vayula kuli Kulishitu uze apwa “muka-tanga.”—Tangenu Kuputuka 3:15; Mateu 6:10; Kusoloka 11:15.
8. Mwomwo ika natwambila ngwetu vaIsalele valingilenga vyuma mukulonga?
8 VaIsalele vapwile muyachi uze valongesele kanawa mangana vyuma vitambuke mukulonga. Chakutalilaho, muJishimbi jaMose vavulukamo “vyamapwevo vaze vazachilenga Kulo. 38:8) Omu vaIsalele vafuminenga hachihela chimwe nakuya hachihela chikwavo, vatutukilenga natavanaku yavo mujila yakulonga. Kutwala muze, Mwangana Ndavichi alongesele vaLevi navapilishitu mumazavu. (Miji. 1, 23:1-6; 24:1-3) Omu vaIsalele vononokelenga Yehova vavakiswilenga, kaha vatwaminenga mukuunda nakulinunga hamwe.—Lushi. 11:26, 27; 28:1-14.
mukulonga kuchikolo chambalaka yakuliwanyina.” (9. Ika yasolola nge chikungulwilo chavaka-Kulishitu mulikulukaji lyamyaka lyakulivanga chalingilenga vyuma mukulonga?
9 Chikungulwilo chavaka-Kulishitu mulikulukaji lyamyaka lyakulivanga chalingilenga vyuma mujila yakulonga, kaha changanyalile kujindongi jafuminenga kulizavu lyakutwaminyina lize lyapwile lyavaposetolo halwola luze. (Vili. 6:1-6) Kutwala muze, vandumbwetu veka vavatongwele kupwa mulizavu kana. (Vili. 15:6) Kaha nawa vavatuminyinyinenga mikanda yajindongi jakuvakafwa kuli malunga vaze vatongwele kulizavu lyakutwaminyina lyamulikulukaji lyamyaka lyakulivanga. (Chimo. 1, 3:1-13; Chitu. 1:5-9) Uno vikungulwilo vyanganyalile ngachilihi kujindongi jize jafuminenga kulizavu lyakutwaminyina?
10. Vikungulwilo vyapwile ngachilihi omu vakavangijile jindongi jalizavu lyakutwaminyina? (Talenu muvwimbimbi wakulivanga.)
10 Tangenu Vilinga 16:4, 5. Vandumbwetu vaze vatumine kutambukila vikungulwilo mangana vemanyineko lizavu lyakutwaminyina vahanyine vatu “jishimbi jize vakashile vaposetolo navakulwane vakuYelusalema.” Omu vikungulwilo vyakavangijile jize jishimbi, “vyazaminenga lika mulufwelelo, kaha hakumbi hakumbi vatu vapwile nakuvulilako lika.” Mujimbu kana watunangula ngwawo, chapwa chamwaza kukavangiza jindongi vanakutuhana makumbi ano muliuka lyaKalunga.
KAVANGIZENUNGA JINDONGI
11. Vakulwane veji kumonanga ngachilihi jindongi veji kuvahananga kuliuka lyaKalunga?
11 Uno Komiti yaMutango chipwe Komiti yaLifuchi, tulama vakujinguluka, navakulwane muchikungulwilo veji kulinga vyuma muka nge vanatambula jindongi kuliuka lyaKalunga makumbi ano? Mukanda waYehova watulweza twononokenga nakuliluula. (Lushi. 30:16; Hepe. 13:7, 17) Muliuka lyaKalunga kamwatela kupwa vatu vakulikangako mwomwo vanahase kuneha vikokojola, navijindo, naliuya muchikungulwilo. Kakweshi muka-Kulishitu mwasaka kupwa namuchima wakulikanga ngana uze apwile nawo Ndeyotelefweko. (Tangenu WaYowano 3, 9, 10.) Twatela kulihulisa ngwetu: ‘Uno ngweji kukolezezanga vakwetu kushipilitu tahi? Kutala ngweji kwitavila washi jindongi nakukundwiza vandumbwetu vaze vali nakutwaminyina tahi?’
12. Vyuma muka valumwene vyomu vatela kutongwelamo vaka-kuzachila navakulwane?
12 Achishinganyekenu vyuma vimwe Lizavu Lyakutwaminyina lyalumunanga kalinwaha. Chihande chakwamba ngwavo “Vihula Vyakufuma Kuli Vaka-Kutanga” chize chapwile muKaposhi Kakutalila waNovember 15, 2014, chalumbunwine vyuma valumwineko mujila yakutongwelamo vakulwane navaka-kuzachila. Muchihande kana vavulukile ngwavo, mulikulukaji lyamyaka lyakulivanga vahanyine lisesa tulama vakujinguluka vatongole vandumbwetu vakutetekela muvikungulwilo. Kufuma vene haSeptember 1, 2014, tulama vakujinguluka vanatongolanga vakulwane navaka-kuzachila. Kalama wakujinguluka eji kufwila kutachikiza kanawa vandumbwetu anakusaka kutongola nakuzata navo muwande nge chinahase. Kaha nawa eji kukekesanga tanga yandumbwetu kana. (Chimo. 1, 3:4, 5) Lizavu lyavakulwane nakalama wakujinguluka veji kukekesanga vyuma vyamuVisoneka vize vatela kutesamo vaka-kuzachila navakulwane.—Chimo. 1, 3:1-10, 12, 13; Petu. 1, 5:1-3.
13. Natusolola ngachilihi ngwetu twononoka kujindongi veji kutuhananga vakulwane?
13 Twatela kukavangiza jindongi jamuMbimbiliya veji kutulwezanga vakulwane. Ava tufunga vakulyononona vamuliuka lyaKalunga veji kuvatwaminyinanga ‘kujindongi jamwenemwene,’ chipwe ngwetu “jajikangule; janganyo,” jize jatwama muMukanda waKalunga. (Chimo. 1, 6:3; kwinyikila chamwishi.) Achanukenu mazu aze Paulu ahuhumwine vatu valiwayanga muchikungulwilo. Vatu vamwe ‘kavapwile nakuzata chipwe chachindendeko, oloze vapwile nakulingisa muvyuma vize kavyapwile vyavoko.’ Vavahuhumwine kuli vakulwane, oloze vakiko kavevwililileko. Jino chikungulwilo chamwene ngachilihi vatu kana? Paulu avalwezele ngwenyi: “Nyingililenu mutu kana nakulitwamina kulikata nenyi.” Oloze avalwezele nawa ngwenyi kavatelele kumona mutu kana kupwa muka-koleko. (Teso. 2, 3:11-15) Makumbi ano, vakulwane vanahase kuhanjika chihande muchikungulwilo chakuhuhumuna vandumbwetu valihende kuvilinga vyavipi, vyakufwana nge kulisesembwa namutu uze kapwa ndumbwetuko. (Koli. 1, 7:39) Mweji kulinganga ngachilihi nge vakulwane vanahanjika chihande chakutuhuhumuna? Nge munatachikiza ndumbwetu anakulinga vyuma vanavuluka muchihande, kutala mweji kulihenda kukulikata nenyi tahi? Kulihenda kukulikata nenyi nachimukafwa ambile vilinga vyenyi vyavipi. [1]
PWENUNGA VATOMA, VAKUUNDA, NAKULINUNGA
14. Tunahase kukundwiza ngachilihi chikungulwilo chipwenga chitoma?
14 Tunahase kulingisa chikungulwilo kupwa chitoma hakukavangiza jindongi jamuMazu aKalunga. Talenu chakutalilaho chasolokele muKolinde. Paulu alisuwile kwambulwila munganda kana, kaha azangile chikuma vandumbwenyi “vaka-kujila.” (Koli. 1, 1:1, 2) Oloze awanyinenga ukalu wakukafwa vandumbwenyi vaze vechelelele vaka-ujila muchikungulwilo. Paulu alwezele vakulwane vahane muka-ujila kuli Satana, kulumbununa kumufumisa muchikungulwilo. Hakusaka chikungulwilo chipwenga chitoma, vakulwane vatelele kufumisamo “chimbalwila.” (Koli. 1, 5:1, 5-7, 12) Nge natukundwiza vyuma vanakase vakulwane vyakufumisa mutu muchikungulwilo uze nahono kupihilila nakwalumuka, kaha natulingisa chikungulwilo chipwenga chitoma, nakulingisa nawa uze mutu apihilile nakwalumuka nakulomba Yehova amukonekele.
15. Natulama ngachilihi kuunda muchikungulwilo?
15 MuKolinde mwapwile nawa ukalu ukwavo. Vandumbwetu vamwe vapwile nakutwala vandumbwavo kujizango jakusopela. Paulu avahulishile ngwenyi: “Ikaze namukanyina kwecha tuhu vamivulumune milonga?” (Koli. 1, 6:1-8) Namakumbi ano ukalu wangana unakusolokanga. Lwola lumwe vandumbwetu vanalikokojwesanga mwomwo vyuma mukusekasana chavo kavyatambukile kanawako, chipwe umwe nali jimbongo. Vandumbwetu vamwe vanatwalenga vakwavo kujizango jakusopela, oloze Mukanda waKalunga watulweza ngwawo chapwa chakwoloka kujimbalisa luheto lwetu kuhambakana kusaula lijina lyaKalunga nakuneha liuya muchikungulwilo. [2] Twatela kukavangiza mazu aYesu aze atukafwa mwakukumishila vikokojola navakwetu. (Tangenu Mateu 5:23, 24; 18:15-17.) Nge natulinga ngocho, kaha natutwama mukuunda navandumbwetu vosena.
16. Mwomwo ika vatu jaKalunga vatela kulinunga?
16 Mukanda waKalunga wasolola ovyo vatu jenyi vatela kupwila vakulinunga. Muka-kwimba Samu 133:1) Omu vaIsalele vononokelenga Yehova, valinungilenga nakutwama mukuunda. Kalunga ahanjikile vyuma mwakalingila vatu jenyi ngwenyi: “Nangukavahaka hamwe nge mikoko mulimba, nge utanga wamikoko kuulilo wavo.” (Mika 2:12) Kaha nawa Yehova ahanjikile kuhichila muli kapolofweto Zefwanyiya ngwenyi: “Nangukalumuna lilimi lyavatu veka naveka likapwe lilimi litoma [muchano wamuVisoneka], mangana vosena vakasanyikenga halijina lyaYehova, mangana vakalinunge hamwe nakunguzachila [chipwe “nakungulemesa,” kwinyikila chamwishi].” (Zefwa. 3:9) Tweji kwivwanga kuwaha chikuma kuzachila Yehova hamwe mukulinunga.
jisamu ambile ngwenyi: “Talenu! Omwo chawaha nomwo chayema vatu muundumbwavo kutwama hamwe mukulinunga!” (Vakulwane veji kufwilanga kwolola muka-Kulishitu nge nayi mujila yakuhenga (Talenu palangalafu 17)
17. Vakulwane vatela kulinga ika numba chikungulwilo chipwenga chitoma nakulinunga?
17 Hakusaka chikungulwilo chipwenga chitoma nakulinunga, vakulwane vatela kutalanga washi hamilonga yinasoloka muchikungulwilo. Paulu atachikijile ngwenyi zangi yaKalunga kayatala mutu kumesoko, kaha nawa keshi kuliula milongako. (Vishi. 15:3) Echi chikiko chalingishile Paulu asonekele vaka-Kolinde mukanda wenyi watete wakuvahuhumuna mulikoji. Omu mwahichile tukweji vavandende, avasonekelele mukanda wenyi wamuchivali wakuvasangejeka mwomwo vakulwane vakavangijile vyuma avalwezele. Nge muka-Kulishitu nayi mujila yakuhenga chakuzeneka ivene kutachikiza, kaha vakulwane vatela kwolola mutu kana nashipilitu yayivwovu.—Ngale. 6:1.
18. (a) Jindongi jamuMazu aKalunga jakafwile ngachilihi vikungulwilo vyamulikulukaji lyamyaka lyakulivanga? (b) Vyuma muka natushimutwila muchihande nachikavangizaho?
18 Chapundu vene, mazu vahwima amumukanda waKalunga akafwile vaka-Kulishitu mulikulukaji lyamyaka lyakulivanga vapwenga vatoma, nakutwama mukuunda nakulinunga muchikungulwilo. (Koli. 1, 1:10; Efwe. 4:11-13; Petu. 1, 3:8) Echi chalingishile vandumbwetu vazate kanawa mulimo wakwambulula. Evi vikiko vyalingishile Paulu ahanjike ngwenyi mujimbu wamwaza vawambulwile “kuvyuma vyakutenga vyosena vize vyatwama mwishi yamelu.” (Kolo. 1:23) Makumbi ano, vyuma ajina Kalunga vali nakuvyambulula kuvatu vosena hano hamavu kuhichila muvatu vaze valinunga nakuzachila hamwe. Chihande chinakavangizaho nachihana unjiho ukwavo wakusolola nge vatu kana vamona Mbimbiliya kupwa yayilemu kaha vafwila kuvumbika Mwata Wakulitulaho Yehova.—Samu 71:15, 16.