Uno Mwamona Mukanda waYehova Kupwa Waulemu Tahi?
“Omu mwatambwile mazu aKalunga, . . . kamwawetavilile nge himazu avatuko, oloze nge himazu aKalunga, nganomu vene apwa.”—TESO. 1, 2:13.
MYASO: 96, 94
1-3. Ukalu waYuwochiya naSunduke waputukile ngachilihi, kaha ukalu wangana tunahase kuukumisa ngachilihi? (Talenu muvwimbimbi wakulivanga.)
VANGAMBA jaYehova vamona mukanda waKalunga kupwa wajila. Hakuwana nge katwakupukako tuvosena twasakiwa kutwolola naVisoneka shimbu jimwe. Uno tweji kulinga ngachilihi nge vanatwolola? Talenu vyasolokele kuli Yuwochiya naSunduke vamulikulukaji lyamyaka lyakulivanga. Ava vandumbwetu vamapwevo vakuwavisa valimbalakile. Uno ukalu muka vapwile nawo? Mbimbiliya kayatulumbunwinako. Oloze tushimutwilenu havyuma vyasolokele.
2 Twambenga ngwetu, Yuwochiya asanyikile vandumbwenyi kuzuvo yenyi mangana vashikame nakulila hamwe vyakulya. Oloze Sunduke kamusanyikileko, kaha evwile ngwavo vakwavo vavasanyikile kuzuvo yaYuwochiya nakulivwisa kuwaha. Sunduke evwile kupihya nakushinganyeka ngwenyi: ‘Ngwashinganyekele ngwami Yuwochiya apwa sepa lyami, oloze ngwalikomokela hakuhona kungusanyikako nayami.’ Sunduke aputukile kwivwa kupihya Fwili. 4:2, 3.
nakujinda sepa lyenyi. Kaha Sunduke nayikiye asanyikile vaze vandumbwetu vosena kuzuvo yenyi nakusezaho Yuwochiya. Chijindo chaYuwochiya naSunduke atela chalingishile vandumbwetu vosena muchikungulwilo vahone kulinunga. Mbimbiliya kayatulweza vyuma vyasolokele haukalu kanouko, oloze twafwelela ngwetu atela vakwile kanawa kuvyuma avahuhumwine Paulu.—3 Makumbi ano muchikungulwilo chaYehova munahase kusoloka ukalu wakufwana ngana. Oloze tunahase kukumisa ukalu kana nge natukavangiza jindongi jamuMbimbiliya. Nge natumona Mbimbiliya kupwa yayilemu, kaha natwitavila jindongi jatwamamo.—Samu 27:11.
MAZU AKALUNGA NOMU VYAPWA VISHINGANYEKA VYAVATU
4, 5. Jindongi muka jamuMazu aKalunga jatukafwa mwakuhonesela matoto?
4 Chapwa chachikalu kuhona kupihilila nge vanatulingi mwamupi. Tunahase kwivwa kupihya nge vakwetu vanakutusekeleka mwomwo yachisemwa chetu, chipwe chikova chetu, chipwe omu twapwa kumujimba. Chinahase kutuviza kumuchima, chikumanyi nge ndumbwetu ikiye natwambe mazu kana. Uno Mazu aKalunga atwama najindongi jakutukafwa mwakulingila nge tuli muukalu kana tahi?
5 Yehova atachikiza omu vatu vatela kutwama kanawa navakwavo, kaha ejiva omu tweji kwivwanga. Vishinganyeka vyetu vinahase kutuzondola tulinge vyuma vyakuhenga vize navikatulingisa tukaliveye kulutwe. Shikaho, chapwa chachilemu kukavangiza jindongi jamuMbimbiliya jakutukafwa kuhonesa muchima wamatoto nautenu. (Tangenu Vishimo 16:32; Muka-kwambulula 7:9.) Tuvosena twatela kufwila kukonekelanga vakwetu nakumbila muchima wamatoto. Yehova naYesu vasaka tuvosena tukonekelenga vakwetu. (Mateu 6:14, 15) Uno mweji kukonekelanga vakwenu tahi, nyi mweji kuvalaminanga koko?
6. Mwomwo ika twatela kumbila muchima wamatoto?
6 Vatu vaze kaveshi kufungulula muchima wavo wamatotoko veji kupihililanga washi. Echi cheji kulingisanga vatu vahone kulikata navo. Mutu wamatoto nahase kulingisa chikungulwilo chipwenga navilinga vyavipi. Nahase kusweka muchima kana, oloze mukuhita chamakumbi “upi wenyi naukasoloka kuchikungulwilo.” (Vishi. 26:24-26) Vakulwane muchikungulwilo vanahase kumukafwa ambile muchima kana, mwomwo vatu vamuliuka lyaKalunga kavatela kupwa navilinga kanako. Mbimbiliya yahanjika hatoma vyuma kana. (Levi 19:17, 18; Loma 3:11-18) Uno nayenu mukiko mwamona tahi?
TACHIKIZENU OMU VALI NAKUTUTWAMINYINA
7, 8. (a) Yehova eji kutwaminyinanga ngachilihi chihanda chaliuka lyenyi lyahano hamavu? (b) Jindongi muka jimwe jatwama muMazu aKalunga, kaha mwomwo ika twatela kujikavangiza?
7 Yehova eji kutwaminyinanga nakulisa vaze vamuchihanda chaliuka lyenyi lyahamavu kuhichila muli “ndungo wakushishika wakuzangama” hakuvatwaminyina kuli Kulishitu uze apwa “mutwe wachikungulwilo.” (Mateu 24:45-47; Efwe. 5:23) Ngana muze chapwile kulizavu lyakutwaminyina mulikulukaji lyamyaka lyakulivanga, ou ndungo amona Mbimbiliya kupwa yayilemu, kaha yakuhwima kuli Kalunga. (Tangenu Wavaka-Tesolonyika 1, 2:13.) Jindongi muka jakutukafwa jatwama muMbimbiliya?
8 Mbimbiliya yatukolezeza tupwenganga kukukunguluka lwola lwosena. (Hepe. 10:24, 25) Yatulweza tulinunge navandumbwetu. (Koli. 1, 1:10) Yatulweza tuhake milimo yaWangana kulutwe mukuyoya chetu. (Mateu 6:33) Yatulweza nawa tuzate chikuma mulimo wakwambulula kuzuvo hizuvo, nakuvihela vyasanga, namukutulukila. (Mateu 28:19, 20; Vili. 5:42; 17:17; 20:20) Mbimbiliya yakolezeza vakulwane valame chikungulwilo kupwa chitoma. (Koli. 1, 5:1-5, 13; Chimo. 1, 5:19-21) Yehova asaka vosena vaze vatwama muliuka lyenyi vapwenga vatoma kumujimba nakushipilitu.—Koli. 2, 7:1.
9. Jila muka anakuzachisa Kalunga hakutukafwa kwivwishisa Mazu enyi?
9 Vatu vamwe vashinganyeka ngwavo vanahase kulumbununa Mbimbiliya vavene nakuyivwishisa. Oloze Yesu atongola “ndungo wakushishika” atuhanenga kulya chakushipilitu. Kufuma vene mu 1919, Yesu Kulishitu nazachisanga ou ndungo mangana akafwe vangamba jenyi vevwishise Mbimbiliya nakukavangiza jindongi jatwamamo. Nge natukavangiza jindongi vasonekamo, kaha natupwa vatoma, vakuunda, nakulinunga muchikungulwilo. Tuvosena twatela kulihulisa ngwetu, ‘Uno nguli nakwononokanga kuli vaze anakuzachisa Yesu hakutunangula tahi?’
LITEMBA LYAYEHOVA LINAKUTAMBUKA!
10. Chihanda chaliuka lyaYehova lyamwilu vachilumbununa ngachilihi mumukanda waEzekele?
10 Mbimbiliya yatukafwa twivwishise nachihanda chamwilu chaliuka lyaYehova. Chakutalilaho, kapolofweto Ezekele vamumwenesele chakumwenesa chakusolola chihanda chamwilu chaliuka lyaYehova kwijiva nge litemba. (Ezeke. 1:4-28) Yehova eji kutambukisa litemba kana, kaha lyeji kuya kwoshoko yinasake shipilitu. Chihanda kanechi chamwilu chaliuka lyaYehova cheji kulingisanga nachihanda chahano hamavu chitambuke. Chapundu vene, eli litemba linapunga nakutambuka lika. Vyuma vyamuliuka vize vinalumukanga kufuma vene kunyima, vinasolola hatoma nge Yehova ikiye anakutambukisa litemba lyenyi. Hakuwana nge Kulishitu navangelo jenyi vangolo kalinwaha venyeke kano kaye kakuhuka, ngocho eli litemba lyaYehova lili nakutambuka chikuma mangana vajilike lijina lyenyi nakutohwesa wata wenyi.
Tweji kusakwilila chikuma ava vandumbwetu vali nakulisuula kuzata mulimo wakutunga. (Talenu palangalafu 11)
11, 12. Vyuma muka liuka lyaYehova lili nakuhundangana?
11 Achishinganyekenu vyuma vize chihanda chaliuka lyaYehova lyahano hamavu linatesamo mumakumbi ano akukuminyina. Kutunga. Vandumbwetu vavavulu valisuulanga kuya nakutunga chikota chachihya chaVinjiho jaYehova muWarwick, New York, U.S.A. Kaha nawa Lipatimende lyaKutunga mukaye kosena linakutwaminyina mulimo wakutunga jiZuvo jaWangana, nakutohwesa mitango. Vandumbwetu vavavulu vali nakulisuula kuzata mulimo kana. Tweji kusakwilila chikuma mulimo vali nakuhundangana ava vandumbwetu. Chapundu vene, Yehova ali nakukisula vandumbwetu mukaye kosena mangana valisuule kukundwiza milimo kana najimbongo javo.—Luka 21:1-4.
12 Kunangula. Tuchitalenu mashikola amwe aze anakunangula vyaWangana. (Isa. 2:2, 3) Oholyapwa kuli Shikola yaMulimo wauPayiniya, naShikola yaVaka-Kwambulula Wangana, naShikola yaNgileyate, naShikola Yavaze Vavahya muMbetele, naShikola yaTulama vaKujinguluka naMapwevo Javo, naShikola yaVakulwane VamuChikungulwilo, naShikola yaMulimo waWangana, naShikola Yavaze Vatwama muKomiti yaMutango naMapwevo Javo. Chapundu vene, Yehova ali nakufwila kunangula vatu jenyi. Kaha nawa vatu vali nakulinangula Mbimbiliya kuhichila hakeyala yetu ya jw.org, haze hali mikanda yamumalimi amavulu. Hali nawa chihanda chavanyike, najitanga, namijimbu yinakusoloka mukaye. Kutala mweji kuzachisanga jw.org muwande chipwe hachilongesa chenu chatanga tahi?
ONONOKENU KULI YEHOVA NAKUKUNDWIZA LIUKA LYENYI
13. Mulimo muka twatwama nawo etu vangamba jaYehova?
13 Tweji kwivwa kuwaha chikuma kupwa muliuka lyaYehova. Chinyingi chaKalunga tunalinangula chatela kutukafwa tulinge vyuma vyakwoloka nakutohwesa wata wenyi. Numba tuhu mukaye vilinga vyavipi vili nakuvulilako lika twatela ‘kuhunga vyuma vyavipi’ ngana mwaYehova. (Samu 97:10) Twatela kulihenda kuhanjikiso yavaka-kaye yakumona “kuwaha ngwavo kupihya, kaha kupihya ngwavo kuwaha.” (Isa. 5:20) Twatela kufwila kupwa vatoma kumujimba, namuvishinganyeka, nakushipilitu mangana twivwise Kalunga kuwaha. (Koli. 1, 6:9-11) Twazanga Yehova nakufwelela muli ikiye, ngocho twafwila kwononoka nakulama jishimbi jenyi mukuyoya chetu ngana muze vasoneka muMbimbiliya. Kaha nawa tweji kufwila kukavangiza jindongi kana hamembo etu, namuchikungulwilo, nakumilimo, nakushikola, nakuvihela vyeka kuze tweji kupwanga. (Vishi. 15:3) Tutalenu jijila jeka jize twatela kusolwelamo ngwetu tuli nakwononoka Kalunga.
14. Visemi vaka-Kulishitu vanahase kusolola ngachilihi ngwavo vononoka Kalunga?
14 Kulela vana. Visemi vaka-Kulishitu veji kwononokanga Yehova hakunangula vana vavo mwaya jindongi jaKalunga. Kaveshi kwitavila visemwa vivahonese kunangula vana vavo mujila yize asaka Kalungako. Kavatela kwitavila vilinga vyavaka-kaye vipwenga hazuvo yavoko. (Efwe. 2:2) Chisemi walunga muka-Kulishitu katela kushinganyeka ngwenyi, ‘Kweseka nachisemwa chetu, mapwevo vakiko vatwama namulimo wakunangula vana.’ Mbimbiliya yahanjika hatoma ngwayo: “Enu masevo, . . . valelenunga [vana venu] mukuvazangamisa namukuhuhumuna [namukunangula; namukutwaminyina] chakuli Yehova.” (Efwe. 6:4; kwinyikila chamwishi.) Visemi vaze vazanga Kalunga, vasaka vana vavo vapwenga nge Samwele, mwomwo Yehova amukiswile omu apwile nakukola.—Samwe. 1, 3:19.
15. Natusolola ngachilihi ngwetu twononoka Yehova halwola natusakulanga vyakulinga?
15 Kusakula vyakulinga. Nge tuli nakusakula vyuma vyavilemu vyakulinga mukuyoya, twatela kupendamina hamazu aKalunga naliuka lyenyi mangana atukafwe. Echi nachisolola nge twononoka Yehova. Tuchishimutwilenuko haukalu umwe uze weji kusolokanga kuli visemi vavavulu. Visemi vamwe vaze vazachila mumafuchi eka, veji kutumanga vana vavo kulifuchi lyavo vavalelelevo mangana vakiko vatwaleho lika kuzata milimo yavo nakuwana jimbongo jajivulu. Numba tuhu chuma kana chapwa chakulisakwila visemi vavene, oloze twatela kwanuka ngwetu mutu himutu mwakalyambulula ivene kuli Kalunga havyuma mwasakula. (Tangenu Wavaka-Loma 14:12.) Uno chinahase kupwa chakwoloka kusakula vyuma vyakulinga chakuzeneka kuvangila kukekesa Mbimbiliya tahi? Nduma! Twasaka kutukafwa kuli Setu wamwilu, mwomwo yetu katwatwama nangolo jakulitwaminyina yetu vaveneko.—Yele. 10:23.
16. Pwevo umwe asakwile kulinga ika omu mwanenyi asemukile, kaha vyuma muka vyamukafwile asakule kulinga vyuma vyakwoloka?
16 Pwevo umwe uze apwile nakuzachila mulifuchi lyeka asakile kutuma mwanenyi wakemba kulifuchi afumine mangana vakamulele kuli kaka yenyi. Oloze shimbu kanda amutume, aputukile kulinangula Mbimbiliya naChinjiho chaYehova. Jino omu aputukile kuzovoloka, alinangwile nge visemi vakiko vatwama namulimo wakulela vana vavo mangana vahase kuvanangula kwivwa Kalunga woma. (Samu 127:3; Vishi. 22:6) Uze pwevo alombele Yehova amukafwe kusakula kanawa vyakulinga. (Samu 62:7, 8) Ashimutwilile nawa ukalu wenyi nauze ndumbwetu apwile nakumunangula Mbimbiliya, navandumbwetu veka muchikungulwilo. Kufumaho, awanyine jino nge chapwile chakwoloka kulela mwanenyi, numba tuhu vausoko namasepa jenyi vamushinjilile atume uze mwana kuli kaka yenyi. Lunga lyenyi evwile kuwaha omu vandumbwetu muchikungulwilo vavakafwile namwanavo, kaha etavilile kumunangula Mbimbiliya. Kutwala muze aputukile kukunguluka napuwenyi hamwe kaha namwanavo. Uno mwashinganyeka ngwenu Yehova evwililile kulomba chou pwevo tahi? Chapundu vene, amwene ngwenyi Yehova amukumbulwile.
17. Jindongi muka vanatuhanenga jakutulweza mwakukafwila vilongesa vyaMbimbiliya?
17 Kukavangiza jindongi. Jila yimwe yayilemu yakusolwelamo ngwetu twononoka Kalunga shina kukavangiza jindongi veji kutuhananga muliuka lyenyi. Chakutalilaho, tutalenu jindongi jimwe vatuhanyine jakuzachisa hakukafwa vilongesa vyetu vyaMbimbiliya. Vatulwezele ngwavo, nge tunaputuka kunangula mutu mukanda waUno Chikupu Mbimbiliya Yanangula Vyuma Muka?, twatela kuwanangako minyutu yayindende mangana tumulweze vyaliuka lyetu. Tunahase kulinga ngocho hakumutalisa vindiyo yaVyuma Muka Vyeji Kusolokanga haZuvo yaWangana? nambuloshuwa yaVeya Vali Nakulinga Mwaya Muchima waYehova Makumbi Ano? Vatulwezele nawa ngwavo nge tunakumisa mukanda waMbimbiliya Yanangula nachilongesa uze ali nakuzovoloka, twatela kuya mumukanda “[wa]Twamenunga muZangi yaKalunga,” numba tuhu vanamumbapachisa lyehi halwola kana. Liuka linatuhanenga jindongi kana mangana tumbaji vavahya ‘vazame mbe mulufwelelo.’ (Kolo. 2:7) Kutala muli nakukavangiza eji jindongi vanakutuhananga muliuka lyaYehova tahi?
18, 19. Vyuma muka vyatela kutulingisa tusakwilile Yehova?
18 Kuli vyuma vyavivulu vyatela kutulingisa tusakwilile Yehova. Eji kutukafwa tuyoye, kaha chakuzeneka ikiye katweshi kuhasa kuyoyako. (Vili. 17:27, 28) Atuhana mukanda wenyi Mbimbiliya uze wapwa wana waulemu chikuma. Twamona Mbimbiliya kupwa mazu aKalunga, ngana muze vaka-Kulishitu vamuTesolonyika vetavilile mazu kana nakuwamona kupwa mazu aKalunga.—Teso. 1, 2:13.
19 Mukanda vatuhana kuli Kalunga unatukafwe tupandame chikuma kuli Yehova, kaha ikiye nawa napandama kuli yetu. (Yako. 4:8) Setu wamwilu Yehova natukafwe tupwenga muliuka lyenyi. Tweji kumusakwililanga chikuma havyuma kana. Muka-kwimba jisamu asonekele ngwenyi: “Musakwililenunga Yehova, mwomwo apwa wamwaza. Zangi yenyi yakwilila kuyatwama haya myaka yosena.” (Samu 136:1) Mazu akwamba ngwavo “Zangi yenyi yakwilila kuyatwama haya myaka yosena,” asoloka mapapa 26 mumukanda waSamu 136. Nge natwononoka Yehova naliuka lyenyi, natukamona omu nawakatesamo mazu kana mwomwo natukayoyanga myaka yosena.