1, 2. Lumbunununenu ovyo chapwila chachilemu kukolezeza vakwetu.

CRISTINA ^[1] wamyaka yakusemuka 18 ambile ngwenyi: “Visemi jami kanda vangukolezezengaho lyenyi. Veji kungupopololanga kaha. Mazu veji kungwambanga eji kungukolanga kumuchima. Veji kwambanga ngwavo ngweji kulinganga vyaunyike, ngukavihu, kaha nawa ngwatohwa mwamupi. Ngweji kulivwanga kupwa nguwamokomoko, kangwasaka kuvahanjikisako, kaha kakavulu ngweji kulilanga.” Pundu vene, chapwa chachipi kuyoya chakuzeneka mutu wakutukolezeza.

² Chapwa chamwaza kukolezeza vakwetu. Rubén ambile ngwenyi: “Ngunalivunga nge nguwamokomoko hamyaka yayivulu. Oloze likumbi limwe, ngwapwile nakuzata muwande namukulwane umwe uze amwene ngwenyi ngunahombo. Angwivwililile omu ngwapwile nakumulumbunwina ukalu wami. Kufumaho angulwezele milimo yamwaza ngwazachilenga. Angwanukishile nawa mazu aYesu akwamba ngwenyi tuvosena mutu himutu apwa wamulemu kuhambakana tujilili vavavulu. Chisoneka kana changukwachile kumuchima, kaha ngweji kuchanukanga lika. Mazu enyi angukolezezele chikuma.”—Mateu 10:31.

3. (a) Vyuma muka ahanjikile Paulu kutalisa kukukolezeza vakwetu? (b) Natushimutwila ika muchihande chino?

 ³ Mbimbiliya yatulweza tukolezezenga vakwetu lwola lwosena. Kaposetolo Paulu asonekelele vaka-Kulishitu vavaHepeleu ngwenyi: “Zangamenu enu vandumbwami, kuchina umwe hali enu mwasosoloka kuli Kalunga ou ayoya nakupwa namuchima wakuhuka wakuzeneka lufwelelo. Oloze likolezezenunga lika navakwenu hakumbi hakumbi, . . . kuchina umwe hali enu mwakakama muchima mwomwo yashili yize yatwama nangolo jakutangisa.” (Hepe. 3:12, 13) Nge namwanuka omu vamikolezezele likumbi limwe, kaha namutachikiza kanawa omu chalema kukolezeza vakwetu. Shikaho tushimutwilenu vihula vino: Mwomwo ika chapwila chachilemu kukolezezanga vakwetu? Uno Yehova, naYesu, naPaulu vatunangula vyuma muka kutalisa kukukolezeza vakwetu? Natukolezeza ngachilihi vakwetu mujila yamwenemwene?

4. Veya vasaka kuvakolezeza, oloze mwomwo ika chinapwila chachikalu vatu kukolezeza vakwavo makumbi ano?

⁴ Tuvosena twasaka kutukolezeza, chikumanyi nge tuchili tuvanyike. Mulongeshi Timothy Evans ambile ngwenyi: “Vanyike . . . vasaka kuvakolezeza chikuma nganomu mutondo wasaka meya numba ukole kanawa. Nge kanyike navamukolezeza nakumusangejeka, eji kwivwanga kanawa nakumona ngwenyi apwa wamulemu.” Oloze tuli nakuyoyela mulwola lwalukalu. Vatu valizanga vavene, kavazanga vakwavoko, kaveshi nakukolezezanga vakwavoko. (Chimo. 2, 3:1-5) Visemi vamwe kaveshi kukolezeza vana vavoko mwomwo kavavakolezezelenga kuli visemi javoko. Vaka-milimo navakiko vali nakuyayavalanga ngwavo vakulwane javo kaveshi kuvasangejeka nakuvakolezezako.

5. Uno kukolezeza chalumbununa ika?

⁵ Kukolezeza chalumbununa kusangejeka mutu havyuma vyamwaza nalingi. Tunahase kukolezeza nawa vakwetu hakuvalweza ngwetu vakwechi vilinga vyamwaza chipwe ‘kuvendejeka vatu vaze vanahombo.’ (Teso. 1, 5:14) Lizu lyachiHelase valumuna ngwavo “kukolezeza” lyalumbununa “kusanyika mutu ezenga nakukukafwa nakukuvendejeka.” Omu tuli nakuzachila hamwe navandumbwetu, twatela kuvakolezeza havyuma vyamwaza vyavivulu veji kulinganga. (Tangenu Muka-kwambulula 4:9, 10.) Kutala tweji kulwezanga vakwetu ovyo twavazangila namilimo yamwaza veji kuzatanga? Shimbu kanda tukumbulule echi chihula, twatela kushinganyeka hamazu amuMbimbiliya akwamba ngwavo: “Mazu akuhanjika halwola lwakutamo anapu amwaza.”—Vishi. 15:23.

6. Mwomwo ika Liyavolo asakila kutuhombesa? Hanenu chakutalilaho.

⁶ Satana Liyavolo asaka kutupopolola mwomwo atachikiza ngwenyi nge natushinganyeka ngwetu twapwa tuvamokomoko, kaha natuzeya kushipilitu. Hali Vishimo 24:10 vatulweza ngwavo: “Kachi nge nauhomba halwola lwavihuli, kaha ngolo jove najikeha.” Satana anehelele vihuli mutu wakwoloka Yopa nakumuvangijikila vyavipi mangana amuhombese, oloze ahonene. (Yopa 2:3; 22:3; 27:5) Tunahase kuhonesa Liyavolo kachi nge natukolezezanga vatanga jetu navakwetu muchikungulwilo. Echi nachilingisa jitanga jetu navandumbwetu vawahilile nakwivwa kuwaha kwizanga kukukunguluka haZuvo yaWangana.

7, 8. (a) Vyakutalilaho muka muMbimbiliya vyasolola nge Yehova amona kukolezeza vatu kupwa chachilemu? (b) Visemi vatela kulondezeza ngachilihi Yehova? (Talenu muvwimbimbi wakulivanga.)

⁷ Yehova. Muka-kwimba jisamu embile ngwenyi: “Yehova ali hakamwihi navaze vali  nakulyonyinga mumuchima. Kaha eji kulwilanga vaze vanahombo.” (Samu 34:18) Omu Yelemiya evwile woma nakwivwa ngwenyi wamokomoko, Yehova akolezezele ou kapolofweto wakushishika. (Yele. 1:6-10) Kaha nawa achishinganyekenu kuwaha evwile kapolofweto Ndanyele uze apwile kashinakaji omu Kalunga atumine kangelo kwiza nakumujikijisa nakumulweza ngwenyi apwa “mutu wamulemu chikuma,” ngwenyi “mutu wamwaza chikuma.” (Ndanye. 10:8, 11, 18, 19; kwinyikila chamwishi.) Nayenu munahase kukolezeza vaka-kwambulula, navapayiniya, navandumbwetu vatushinakaji.

⁸ Kalunga kashinganyekele ngwenyi hakuwana nge azachilenga naMwanenyi Yesu hamyaka yayivulu mwilu, ngocho kasakiwile kukolezeza ou Mwanenyi omu apwile hano hamavuko. Mapapa kavali Yesu evwile Ise mwahanjika kufuma mwilu ngwenyi: “Ou ikiye Mwanami, ou ngwazanga, ou ngwevwila kuwaha.” (Mateu 3:17; 17:5) Hano Kalunga apwile nakusangejeka Yesu nakumufwelelesa ngwenyi apwile nakulinga kanawa. Yesu evwile kuwaha kwivwa awa mazu omu aputukile mulimo wenyi hano hamavu, namumwaka wamakumishilo shimbu kanda eyenga mwilu. Yehova nawa atumine kangelo kwiza nakukolezeza Yesu omu apwile nakulyonyinga mumuchima haufuku wakukokela kukufwa chenyi. (Luka 22:43) Nge twapwa tuvisemi, kaha twatela kulondezeza Yehova hakukolezezanga vana vetu nakuvasangejeka havyuma vyamwaza navalinga. Twatela nawa kuvakafwa nge vali nakumonanga vyeseko kushikola.

9. Vyuma muka natulinangula kuli Yesu kwesena nomu atwaminyinemo natumbaji twenyi?

⁹ Yesu. Haufuku uze aputukile chilika chaKwanuka Kufwa chenyi, Yesu amwene ngwenyi vaposetolo jenyi vapwile namuchima wakulivwimba. Shikaho Yesu alinyishile nakuvasanyisa kumahinji, oloze vakiko vachipwile lika nakulipula jipami hakusaka kuwana iya apwile wamulemu hali vakiko. Petulu nawa alivwile kupwa wamulemu chikuma. (Luka 22:24, 33, 34) Oloze Yesu avasangejekele hakulikata nenyi lika namulwola lwavyeseko. Atachikijile ngwenyi navakazata milimo yayivulu chikuma kuhambakana yize azachile ikiye, kaha avakolezezele ngwenyi Kalunga avazanga chikuma. (Luka 22:28; Yowa. 14:12; 16:27) Tuvosena twatela kulihulisa ngwetu, ‘Uno ngweji kulondezezanga Yesu hakusangejeka vana vami navakwetu havyuma vyamwaza veji kulinganga, muchishishisa chakutokomenya hatutenga twavo?’

10, 11. Uno kaposetolo Paulu asolwele ngachilihi nge amwene mulimo wakukolezeza vakwavo kupwa waulemu?

¹⁰ Kaposetolo Paulu. Mumukanda asonekelele vandumbwenyi, Paulu avasangejekele chikuma. Numba tuhu atachikijile tutenga twavo hakuzata navo hamyaka yayivulu, oloze avasangejekele havyuma vyamwaza vazachilenga. Chakutalilaho, Paulu avulukilenga Chimoteu ngwenyi, “mwanami ngwazanga muli Mwata,” uze azakaminenga vandumbwenyi vaka-Kulishitu. (Koli. 1, 4:17; Fwili. 2:19, 20) Ou kaposetolo asangejekele Chituse kuli vaka-Kolinde ngwenyi “ikiye himukwetu mutwazachila milimo mangana tuminganyalise.” (Koli. 2, 8:23) Chikupu vene mazu kana evwishile kuwaha Chimoteu naChituse.

¹¹ Paulu naMbalanape vahakile myono yavo muponde hakukindulukila kuvihela kuze vambile kuvajiha. Chakutalilaho, numba tuhu vavanyemukilile muLusutala, oloze vakindulukilileko mangana vakakolezeze tumbaji vavahya vatwamenga lika mulufwelelo. (Vili. 14:19-22) Paulu vamunyemukilile kuvatu vavavulu muEfwesu. Hali Vilinga 20:1, 2 vatulweza ngwavo: “Omu lyakumine lize liuya, Paulu atumine  vatu vasanyike tumbaji. Kahomu alingile hanavakolezeza lyehi nakuvasalisa, atwalilileho naungeji nakuya kuMasetonya. Omu alingile hanahichi lyehi mujingalila jize nakukolezeza tumbaji namazu amavulu, ahetele muHelase.” Pundu vene, Paulu amwene kukolezeza vakwavo kupwa chachilemu.

12. Kukunguluka cheji kutukafwanga ngachilihi tulikolezeze navakwetu?

¹² Chuma chimwe Setu wamwilu ahakilako kukunguluka shina mangana tulikolezeze umwe namukwavo. (Tangenu WavaHepeleu 10:24, 25.) Ngana muze valingilenga tumbaji twaYesu vakulivanga, tweji kulikungululanga mangana tulinangule nakulikolezeza umwe namukwavo. (Koli. 1, 14:31) Cristina uze twavulukanga kumaputukilo achihande chino ambile ngwenyi: “Ngwazanga chikuma kukunguluka mwomwo vandumbwami veji kungusolwelanga zangi nakungukolezeza. Lwola lumwe ngweji kuhombanga hakuya kuZuvo yaWangana, oloze omu vandumbwetu veji kungulwezanga ngwavo vanguzanga, ngwavo ngunakuzovoloka kushipilitu, nakungupakata mukasamba, nakungusangejeka, ngweji kwivwanga kuwaha chikuma.” Chapwa chamwaza nge tuvosena ‘natulikozezenga’ umwe namukwavo.—Loma 1:11, 12.

13. Mwomwo ika vangamba jaKalunga vakuhya vasakiwa kuvakolezeza?

¹³ Navangamba jaKalunga vakuhya navakiko vasakiwa kuvakolezeza. Chakutalilaho, Yoshuwa azachililile Kalunga hamyaka yayivulu. Oloze Yehova alwezele Mose amukolezeze, ngwenyi: “Tongola Yoshuwa, mukolezeze nakumuzamisa, mwomwo ikiye mwakapwa kulutwe lwavatu ava hakuzauka kalwiji, kaha ikiye nawa mwakavatwaminyina vakaswane lifuchi eli mumona.” (Lushi. 3:27, 28) Halwola kana, Yoshuwa te kalinwomu vamuhane mulimo waunene wakutwaminyina vaIsalele muLifuchi lyaLushiko. Kaha mwamona ukalu wauvulu nakumufungulula kuli vaka-kwasa jita vamwe. (Yoshu. 7:1-9) Evi vikiko Yoshuwa asakiwile kumukolezeza chikuma. Shikaho tuvosena twatela kukolezezanga tulama muvikungulwilo natulama vakujinguluka vaze veji kuzatanga nangolo hakulama mikoko jaKalunga. (Tangenu Wavaka-Tesolonyika 1, 5:12, 13.) Kalama wakujinguluka umwe ambile ngwenyi: “Lwola lumwe vandumbwetu veji kutusonekelanga mikanda yakutusakwilila hamilimo tweji kuzatanga. Mikanda kana tweji kuyilamanga nakuyitanga nge tunahombo, kaha yeji kutukolezezanga.”

14. Mwomwo ika chapwila chamwaza kusangejeka vakwetu nakuvakolezeza?

¹⁴ Tulama navisemi vamona ngwavo chapwa chamwaza kuhanjika mazu akukolezeza hakukafwa mutu naMbimbiliya. Omu Paulu asangejekele vaka-Kolinde hakukavangiza mazu avahuhumwine, atela vevwile kuwaha nakutwalaho lika kulinga mwakwoloka.  (Koli. 2, 7:8-11) Andreas, chisemi wavana vavali ambile ngwenyi: “Kukolezeza vana cheji kuvakafwa vazovoloke kushipilitu nakupwa vakuwahilila. Cheji kuvakafwa vakavangize vyuma nauvalweza. Vana vetu vatachikiza vyuma vyakwoloka, kaha veji kuvilinganga mukuyoya chavo mwomwo tweji kuvasangejekanga.”

15. Vyuma muka twatela kulinga kuli vandumbwetu?

¹⁵ Sakwililenunga vandumbwenu havilinga vyavo vyamwaza nahamilimo yavo. (Miji. 2, 16:9; Yopa 1:8) Yehova naYesu vamona milimo yaWangana tweji kuzatanga kupwa yayilemu numba tuhu katweshi kuyizata chikumako mwomwo yaukalu wamukuyoya. (Tangenu Luka 21:1-4; Wavaka-Kolinde 2, 8:12.) Chakutalilaho, vandumbwetu vamwe vatushinakaji cheji kuvakaluhwilanga kukunguluka nakuyanga muwande lwola lwosena. Chipwe ngocho, twatela kuvasangejeka nakuvakolezeza.

16. Mwomwo ika twatela kufwila kukolezezanga vakwetu?

¹⁶ Talenunga havyuma vyamwaza vize mwatela kusangejekelaho vandumbwetu. Nge munamono ngwenu ndumbwetu nalingi vyuma vyamwaza, mwatela kumusangejeka hahaze vene. Tumonenu vyuma vyasolokele omu Paulu naMbalanape vapwile kuAndeyoka muPishicha. Vakulwane vamusunangonga vavalwezele ngwavo: “Enu malunga, enu vandumbwetu, kachi nge muli namazu amwe akukolezeza vatu, ahanjikenu.” Ngocho Paulu ahanjikile chihande chakuvakolezeza. (Vili. 13:13-16, 42-44) Nge tuli namazu akukolezeza vandumbwetu kaha twatela kuwahanjika kuli vakiko. Nge natukolezezanga vakwetu, kaha navakiko navatukolezezanga.—Luka 6:38.

17. Vyuma muka vyeji kulingisanga kusangejeka chetu chikolezeze vandumbwetu?

¹⁷ Vasangejekenunga chakufuma kumuchima havyuma vize vanalingi. Mazu ahanjikile Yesu kuli vaka-Kulishitu muTulachila asolola nge chapwa chamwaza kusangejeka mutu nakuvuluka hatoma vyuma nalingi. (Tangenu Kusoloka 2:18, 19.) Chakutalilaho, nge vana vetu vanakuzovoloka kushipilitu, kaha twatela kuvalweza hatoma vyuma kana. Tunahase nawa kusangejeka chisemi wapwevo hajila yamwaza ali nakulelelamo vana venyi, numba tuhu anakumona ukalu hakupwa ukawenyi. Kusangejeka changana cheji kukolezezanga chikuma vandumbwetu.

18, 19. Tunahase kukolezeza ngachilihi vakwetu?

¹⁸ Makumbi ano, Yehova keshi kutulweza mazu akukolezeza vandumbwetu ngana muze alwezele Mose akolezeze Yoshuwako. Chipwe ngocho, Kalunga eji kwivwanga kuwaha nge natuhanjika mazu akukolezeza vandumbwetu. (Vishi. 19:17; Hepe. 12:12) Chakutalilaho, tunahase kulweza ndumbwetu ahananga chihande chalikungumbuwa omu chihande chenyi chatukafwanga kwivwishisa kanawa chisoneka chimwe. Ndumbwetu umwe wapwevo asonekelele ndumbwetu ejile nakuhana chihande hachikungulwilo chavo ngwenyi: “Numba tuhu twashimutwilile haminyutu yayindende, oloze wanguvendejekele nakungukolezeza chikuma. Ngunasoneka mangana utachikize ngwove wahanjikile mujila yalikoji hautenda nomu twashimutwilile hanyima yachihande. Ngwamwene ngwami Yehova ikiye akutumine kwiza nakutukolezeza.”

¹⁹ Tunahase kukolezeza vandumbwetu havyuma vyamwaza veji kulinganga nge natukavangiza mazu aPaulu akwamba ngwenyi: “Likolezezenunga navakwenu, nakulitunganga nawa navakwenu nganomu vene muli nakulinga.” (Teso. 1, 5:11) Tuvosena natwivwisa kuwaha Yehova nge ‘natulikolezezanga lika navakwetu hakumbi hakumbi.’