LIKUMBI limwe muYelusalema mwapwile kuliwana chachilemu. Mwangana Ndavichi akungulwile vilolo jenyi vosena, natupitau, navingazule jamalunga vosena. Vawahililile kuvasanyika kukuliwana kanechi. Yehova ahanyine Solomone mwanaNdavichi mulimo wakutunga zuvo yayinene yaulangaji yize vatu navakalemesalangamo Kalunga wamuchano. Ndavichi uze apwile mwangana wavaIsalele atambwile mapapilo amwakutungila eyi zuvo, ngocho awahanyine kuli Solomone. Ndavichi ambile ngwenyi: “Mulimo unatoho. Mwomwo tembele mwatunga keshi yamutuko, oloze yaYehova Kalunga.”—Miji. 1, 28:1, 2, 6, 11, 12; 29:1.

Kufumaho Ndavichi ahulishile ngwenyi: “Iya mwalisuula kuhana wana kuli Yehova likumbi lyalelo?” (Miji. 1, 29:5) Nge kumwapwile, kachi mwalingile ngachilihi? Kutala kachi mwalisuwile kuzata ou mulimo waunene tahi? VaIsalele valisuwile nakuputuka kuzata. Pundu vene, “vawahililile hakuhana awa mawana akulisakila mwomwo vawahanyine kuli Yehova namichima yavo yosena.”—Miji. 1, 29:9.

Omu mwahichile myaka yayivulu, Yehova ahakileko chuma chachilemu chikuma kuhambakana tembele. Ahakileko tembele yayinene yakushipilitu, kulumbununa jila yize vatu veji kumulemeselangamo kuhichila muwana ahanyine Yesu. (Hepe. 9:11, 12) Uno Yehova ali nakukafwa ngachilihi vatu makumbi ano mangana vapwenga masepa jenyi? Anakuvakafwa kuhichila mukwambulula nakutunga tumbaji. (Mateu 28:19, 20) Ngocho mwaka himwaka makombakaji namakombakaji avatu vali nakuvanangula Mbimbiliya, nakuvambapachisa, kaha vikungulwilo vyavihya nawa vili nakusemuka.

Mwomwo yakuzovoloka kanechi, kuli nakusakiwa mikanda yayivulu yahanjika haMbimbiliya, nakutunga jiZuvo jaWangana nakujiwahisa, nakulanda vihela vyakukungulukila chachihanda nachechi changalila. Chapundu vene, nayenu munetavila ngwenu mulimo wetu wakwambulula mujimbu wapwa wamwaza, kaha unakutohwelako lika.—Mateu 24:14.

Vatu jaKalunga ‘vali nakulisuula kuhana mawana kuli Yehova’ mwomwo vamuzanga, nakuzanga vakwavo, kaha nawa vatachikiza ngwavo ou mulimo wakwambulula Wangana vatela kuuzata mukwanguhwa. Enga, tweji kwivwanga kuwaha ‘hakuvumbika Yehova naluheto lwetu,’ nahakumona omu vali nakuzachisa luheto kana mujila yakashishi kumulimo ou waunene chikuma.—Vishi. 3:9.