KWAPWILE chihande chakwamba ngwavo: “Enu Vaka-Kwambulula Wangana muBritain—Zatenu naNgolo!!” (Informant, * December 1937, London edition) Mumukanda kana mwapwile kamutwe kakandende kakwamba ngwavo: “Kakwapwile Kuzovoloka haMyaka 10 Yinahichimoko.” Lipoti lyamulimo vasonekelenga mumyaka 10 kufuma mu 1928 nakuheta mu 1937 lyasolwele nge vaka-kwambulula kavapwile nakuvulako.

Chuma muka chalingishile vatu vazelendende mulimo wakwambulula muBritain? Hamyaka yayivulu, vikungulwilo kavyapwile nakuzovolokako. Ofesi yamutango nawa yavulukile ngwayo nayikafwa kaha vapayiniya 200 vaze vapwile nakwambulwila kuvihela vyakwakusuku, keshi vaze vapwile nakuzachila muvikungulwilo vyavoko. Yalwezele nawa vaka-kwambulula vaze vasakile kulisonekesa upayiniya ngwavo muBritain kamweshi nakusakiwa vapayiniya vekako, kuvanga vayenga nakuzachila kumafuchi eka amuEurope. Ngocho vapayiniya vavavulu vafumine muBritain nakuya nakuzachila kumafuchi eka akufwana nge France, numba tuhu kavatachikijile malimi akuzeko.

Mumukanda waInformant wamu 1937 mwapwile chihande chakukolezeza vaka-kwambulula vazate jola 1,000,000 mumwaka wa 1938. Vavalwezele ngwavo navatesamo jola kana nge muka-kwambulula wosena mwazata jola 15 mukakweji, kaha vapayiniya 110. Vavakolezezele valiwane mumazavu nakuya nakwambulula jola 5 halikumbi nakukindulukila chikuma kuvatu mukachi kachalumingo nachingoloshi.

Vyuma kana vyevwishile kuwaha vaka-kwambulula vavavulu. Ndumbwetu Hilda Padgett * ambile ngwenyi: “Ou mutambi wakuchikota wejile halwola lwamwaza, mwomwo walingishile mulimo wakwambulula uzovoloke.” Ndumbwetu E. F. Wallis ambile ngwenyi: “Twawahililile chikuma hakutulweza kwambulula jola 5 halikumbi. Twalivwishile kuwaha kuzata mulimo waMwata jola 5 halikumbi. . . . Twazeyelenga vene, oloze twapwile vakusuuluka.” Ndumbwetu Stephen Miller nayikiye amwene ngwenyi mulimo kana vatelele kuuzata mukapachapacha. Asakile kwazanamo shimbu apwile nangolo muukweze wenyi. Eji kwanukanga omu valivwishilenga kuwaha kuya nakwambulula mwalizavu likumbi lyosena najikinga, kaha chingoloshi vakungulwilenga vatu vevwilile kuvihande vyakukopa lyehi. Valisukijekelenga mapapilo amujimbu wamwaza omu vapwilenga nakwambulwila mumikwakwa nakuhana vatu jimangazini.

Mumukanda waInformant mwapwile mazu akwamba ngwavo: “Tunakusaka vapayiniya 1,000.” Vavalwezele jindongi jajihya jakwamba nge vapayiniya jino vatela kuzachila hamwe navikungulwilo mangana vavakolezeze nakuvajikijisa. Joyce Ellis (née Barber) ambile ngwenyi: “Vandumbwetu vamalunga vamwene jino ngwavo navakiko vatelele  kuzata upayiniya. Numba tuhu ngwapwile ngukanyike wamyaka 13, oloze nayami ngwasakile kuzata upayiniya.” Kaha muJuly 1940 omu apwile namyaka 15, aputukile kuzata upayiniya. Peter uze ambachile Joyce nayikiye evwile mutambi kana, kaha “aputukile kushinganyeka haupayiniya.” Kuheta muJune 1940, omu apwile namyaka 17, ayile ungeji wajikilomita 105 nakinga kuScarborough kuze akaputukile kuzata upayiniya.

Cyril naKitty Johnson valisuwile kuzata upayiniya. Valanjishile vikumba nalimbo lyavo mangana vazachise jimbongo kana kumulimo waupayiniya. Cyril echele milimo yakukaye apwile nakuzata nakuputuka mulimo waupayiniya. Ambile ngwenyi: “Twatachikijile ngwetu tunakulinga vyuma vyakwoloka, kaha twasuulukile kwecha vyuma kana.”

Omu vapayiniya vapwile nakuvulilako lika, vandumbwetu vapwile nakutwaminyina muliuka vashinganyekele jila yakuvakafwilamo. Ndumbwetu Jim Carr, uze apwile kalama wakujinguluka mu 1938, vamulwezele kuzata mulimo wakutonda jizuvo jakutwama vapayiniya. Vapayiniya vavalwezelenga kutwama muzuvo yimwe mwalizavu mangana vakeheseko jimbongo jakuzachisa. Munganda yaSheffield, vafwetelelenga zuvo yayinene, nakutongola ndumbwetu ayitalenga. Kaha chikungulwilo chahanyinenga jimbongo navyuma vyakuzachisa muze muzuvo. Jim ambile ngwenyi: “Tuvosena twalinungile nakuzachila hamwe.” Muzuvo kana mwatwaminenga vapayiniya 10 vaze vazachilenga milimo yakushipilitu lwola lwosena. Ambile nawa ngwenyi: “Nachimene vashimutwililenga hachisoneka chalikumbi halwola lwakulyaula, kufumaho vayilenga nakwambulula jino kujingalila vavahanyine.”

Vaka-kwambulula navapayiniya vakwile kumutambi wakwambulula chikuma, kaha mu 1938 vateselemo jola 1,000,000 vavalwezele. Lipoti lyamulimo wamuwande lyasolwele nge vazachile chikuma. Hamyaka yitanu kaha, vaka-kwambulula muBritain vavulilileko mapapa katatu. Vyuma valumwineko mumulimo wakwambulula vyakafwile vatu jaYehova vapwenga vakuzama omu kwejile jita.

Makumbi ano, vapayiniya muBritain vanakuvulilako omu tunakupandama kwakamwihi najita yaKalunga yaAlamangetone. Hamyaka 10 yinahichimo, vapayiniya vanapunga nakuvulilako lika, kaha muOctober 2015 vahetanga 13,224. Ava vapayiniya vanakuzata nangolo hakumona ngwavo mulimo washimbu yosena wapwa waulemu chikuma mukuyoya chavo.