1, 2. (a) Vangamba jaKalunga vatalilila fweto muka? (b) Vyuma muka navitukafwa tushishike hafweto? (Talenu muvwimbimbi wakulivanga.)

NGANA muze chapwile kuli kaposetolo Paulu, navaka-Kulishitu vawavisa makumbi ano vatwama nalutalililo lwakukatambula “fweto yakusanyika chaKalunga.” (Fwili. 3:14) Vali nakutalilila kukazachila hamwe naYesu Kulishitu muWangana wamwilu nakuzachila hamwe hakulingisa vatu hamavu vakapwe vakukupuka mwosena. (Kuso. 20:6) Ocho kutokwa kana vatwama nacho hakuvashika vyumevi kuli Kalunga! Oloze mikoko veka vatwama nalutalililo lweka. Vatalilila kukatambula fweto yakukalivwisa kuwaha kuyoya hamavu myaka yosena. Lutalililo kana lwapwa lwamwaza chikuma.—Petu. 2, 3:13.

² Paulu akolezezele vakwavo vaka-Kulishitu vawavisa vatwaleho lika kushishika mangana vakatambule fweto. Ambile ngwenyi: “Hakenu vishinganyeka vyenu kuvyuma vyamwilu.” (Kolo. 3:2) Vatelelele kushinganyeka halutalililo lwavo lwamwilu. (Kolo. 1:4, 5) Chapundu vene, kushinganyeka havyuma vyamwaza vize Yehova atushika nachitukafwa tuvosena tushishike hafweto atushika,  numba tukwechi lutalililo lwamwilu chipwe lwahamavu.—Koli. 1, 9:24.

3. Paulu alwezele vakwavo vaka-Kulishitu valihende kuponde muka?

³ Paulu anukishile nawa vakwavo vaka-Kulishitu vyuma vinahase kukavahonesa kutambula fweto. Chakutalilaho, asonekelele vandumbwenyi muKolose valihende kuli vaka-Kulishitu vamakuli vaze vapwile nakulyonga kuzachila Kalunga hakukavangiza Jishimbi jize vahanyine Mose, oloze kavafwelelele muli Kulishituko. (Kolo. 2:16-18) Avulukile nawa ukalu uze unakusoloka namakumbi ano uze unahase kukatuhonesa kutambula fweto. Chakutalilaho, ahanjikile havyuma vinahase kutukafwa tulihende kuujila, nomu tunahase kukumishilamo ukalu nge tunalyambe navandumbwetu, chipwe mutanga. Mazu aze ahanjikile apwa amalemu namakumbi ano. Shikaho tushimutwilenu havyuma vize Paulu ahuhumwine vaka-Kulishitu muKolose.

4. Uno kufwila ujila chinahase kutuhonesa ngachilihi kukatambula fweto?

⁴ Omu Paulu akumishile kulweza vandumbwenyi vyalutalililo lwavo, asonekele ngwenyi: “Shikaho jihenu vilyo vyenu vyamujimba vize vili hamavu vyakufwila ujila, namajilo, napeha yayipi yakusaka kulisavala, navyuma vyavipi, nachipululu.” (Kolo. 3:5) Kufwila ujila chinahase kutulingisa tuhone kupwa nausoko wamwaza naYehova. Ndumbwetu umwe walunga ahungumukile mwomwo yakufwila ujila, oloze omu akindulukile kuchikungulwilo ambile ngwenyi: “Chapwile chachikalu kutachikiza ngwami nguli nakuhungumuka.”

5. Tunahase kulihenda ngachilihi kuponde yakulinga ujila?

⁵ Chapwa chachilemu kulihenda kuvyuma vize vinahase kutulingisa tuhokole jishimbi jaYehova. Chakutalilaho, chapwa chamwaza kuli vaze vanalishiki kulimbata kulihenda kuvyuma vize vinahase kuvalingisa valinge ujila, vyakufwana nge, kulikwatakwata, chipwe kulisweswenya, chipwe kupwa kwaukawavo. (Vishi. 22:3) Muka-Kulishitu nahase nawa kupwa muponde yakulinga ujila nge mwaya ungeji hatando yayisuku, chipwe nge anakuzata namutu wausonyi weka. (Vishi. 2:10-12, 16) Shikaho lwola lwosena mwatela kulijimbula washi ngwenu mwapwa muVinjiho jaYehova, nakupwa nahanjikiso yamwaza, nakulihenda kukusapula chaseya. Chinahase nawa kupwa chachikalu kulihenda kuujila nge tunahombo chipwe nge tuli muukalu weka, mwomwo halwola kana tunahase kusakiwa mutu wakutukafwa. Tunahase nawa kufwila kupwa namutu wakutuvendejeka uze mwevwishisa ukalu wetu. Nge muli muukalu kana, kaha lombenu kuli Yehova nakulweza vandumbwetu vamikafwe mangana mukatambule fweto.—Tangenu Samu 34:18; Vishimo 13:20.

6. Vyuma muka twatela kwanuka hakusakula vyakuhemahema?

⁶ Twatela nawa kulihenda kuvyakuhemahema vize vyakundwiza ujila. Kuhema chachivulu makumbi ano chinalifwane nachize chapwile muSotome naNgomola. (Yuta 7) Vatu vaze veji kutunganga vyakuhemahema, veji kusololanga nge kulinga ujila chapwa chamwaza kaha naukalu unahase kufumaho vene wauchi. Shikaho twatela kuzangama nakuhemahema chiliko makumbi ano. Twatela kusakulanga kuhemahema chamwaza chize nachitulingisa tukatambule fweto.—Vishi. 4:23.

7. Ukalu muka unahase kusoloka muchikungulwilo?

⁷ Twapwa vakutokwa kupwa muchikungulwilo chavaka-Kulishitu. Mazu aKalunga tweji kulinangulanga kukukunguluka nakusolwela vandumbwetu likoji nazangi vyeji kutukafwanga tutwaleho kushinganyeka hafweto. Oloze shimbu jimwe tunahase kuhona kulivwasana  navandumbwetu nakutulingisa tulizungise. Kachi nge natuhona kukumisa ukalu kana, chinahase kutulingisa tulilamine koko.—Tangenu WaPetulu 1, 3:8, 9.

8, 9. (a) Vilinga muka vize navitukafwa tukatambule fweto? (b) Vyuma muka navitukafwa mangana tutwaleho kutwama mukuunda navakwetu nge vanatulingi mwamupi?

⁸ Ika twatela kulinga kuchina koko nayitulingisa tukahone kukatambula fweto? Paulu akolezezele vakwavo vaka-Kulishitu muKolose ngwenyi: “Hakupwa muvatu asakula Kalunga, vajila, vaze azanga, vwalenu muchima wakeke, nalikoji, nakulinyisa, nakuvova, nakutalilila chikoki. Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova amikonekelele namuchima wakusuuluka, nayenu mwatela kulinga mwomumwe. Oloze kuvyuma vyosenevi, vwalenunga zangi, mwomwo yikiko yeji kununganga vatu hamwe mujila yakukupuka.”—Kolo. 3:12-14.

⁹ Kupwa nazangi nalikoji nachitukafwa tukonekelenga vakwetu. Chakutalilaho, nge ndumbwetu natuhukanyisa, kaha twatela kushinganyeka havyuma vyavipi vize twahukanyishile vakwetu. Twevwile kuwaha chikuma omu vandumbwetu vatusolwelele likoji nazangi hakutukonekela upi twavalingile. (Tangenu Muka-kwambulula 7:21, 22.) Tweji kusakwililanga chikuma likoji lyaKulishitu hakutukafwa tulinunge hamwe. (Kolo. 3:15) Tuvosena twazanga Kalunga youmwe, tweji kwambululanga mujimbu woumwe, kaha nawa tuvosena tweji kumonanga ukalu wakulifwana. Ngocho nge natukonekelanga vakwetu kaha nachitukafwa tutwaleho lika kulinunga nakushinganyeka hafweto vatushika kulutwe.

10, 11. (a) Mwomwo ika muchima walwiso wapwila waupi? (b) Tunahase kuhonesa ngachilihi muchima walwiso?

¹⁰ Vyakutalilaho vyamuMbimbiliya vyatukafwa tutachikize ngwetu lwiso lunahase kutuhonesa kukatambula fweto. Chakutalilaho, Kena evwililile lwiso songo yenyi Avele nakumujiha. Kola naNdatane vevwililile lwiso Mose ngocho vamufumbukilile. Kaha nawa Mwangana Saulu evwililile lwiso Ndavichi ngocho asakile kumujiha. Shikaho Mazu aKalunga ahanjika mwakwoloka hakwamba ngwawo: “Kweshokwo kuli lwiso nakulikindukila, nakupwa nawa liuya navyuma vyaunyengwe vyosena.”—Yako. 3:16.

¹¹ Nge natupwa nalikoji nazangi, kaha katweshi kwivwilanga vakwetu lwisoko. Mazu aKalunga amba ngwawo: “Zangi yeji kutalililanga chikoki kaha nawa yeji kutetelanga. Zangi kayevwa lwisoko.” (Koli. 1, 13:4) Hakusaka tulihende kumuchima walwiso, twatela kufwila kumona vyuma ngana muze avimona Kalunga. Twatela kumona vandumbwetu vosena muchikungulwilo kupwa vavalemu. Nge natulinga ngocho, kaha natusolola nge tuli nakukavangiza mazu amuMbimbiliya aze amba ngwawo: “Kachi nge chilyo chimwe navachitohwesa, kaha vilyo vyosena naviwahilila hamwe nachikiko.” (Koli. 1, 12:16-18, 26) Shikaho muchishishisa chakwivwila vakwetu lwiso, twatela kuwahilila navo hamwe nge Kalunga navakisula mujila yimwe. Achishinganyekenu hachakutalilako chaYonatane mwana Mwangana Saulu. Kevwililile lwiso Ndavichi omu vamutongwele ngwavo ikiye mwaswana halitanda lyawanganako. Oloze amukolezezele. (Samwe. 1, 23:16-18) Kutala nayetu natulondezeza muchima waYonatane nakusolwela vakwetu likoji nazangi tahi?

12. Mazu muka amuMbimbiliya vatela kukavangiza vatu mutanga hakusaka vakatambwile hamwe fweto?

¹² Kukavangiza jindongi jamuMbimbiliya cheji kunehanga kuunda nakuwahilila mutanga,  nakuvalingisa vakatambule fweto. Mazu muka akuhuhumuna jitanga aze Paulu asonekelele vaka-Kulishitu muKolose? Avasonekelele ngwenyi: “Enu mapwevo, liluulenunga kuli malunga jenu, nganomu chatela muli Mwata. Enu malunga, zangenunga lika mapwevo jenu, kanda namuvakwachilanga chikuma matotoko. Enu vana, ononokenunga kuli visemi jenu muvyuma vyosena, mwomwo echi cheji kwivwisanga Mwata kuwaha. Enu masevo, kanda namusowangizanga vana venuko, kuchina navahomba.” (Kolo. 3:18-21) Chikupu vene, nge malunga namapwevo hamwe navana vavo navakavangiza mazu ahanjikile Paulu nachivakafwa vatwame mukuunda.

13. Ndumbwetu wapwevo nahase kukafwa ngachilihi lunga lyenyi uze kapwa Chinjihoko etavile muchano?

¹³ Namulinga ngachilihi nge mwasomboka kulunga uze kapwa Chinjihoko, uze keshi nakumizakama kanawako? Kutala mwatela kumutatwokesanga mangana amizakame tahi? Numba nge mwamivwilila nakumilingila vyuma munakusaka, kutala nahase kwitavila muchano tahi? Nahase kuchiwana kupwa chachikalu kwitavila. Oloze nge namuvumbikanga lunga lyenu hakupwa mutwe watanga, namukafwa tanga yenu yitwame mukuunda, nakwivwisa Yehova kuwaha. Echi chinahase kukafwa lunga lyenu etavile muchano nakumilingisa mukatambwile hamwe fweto natanga yenu.—Tangenu WaPetulu 1, 3:1, 2.

14. Vyuma muka atela kulinga muka-Kulishitu nge pwevo lyenyi uze kapwa Chinjihoko keshi nakumuvumbikako?

 ¹⁴ Namulinga ngachilihi nge mwambata pwevo uze kapwa Chinjihoko, uze keshi nakumivumbikako? Kutala mwatela kumutenukilanga mangana amivumbikenga tahi? Kamwatela kulinga ngochoko. Kalunga asaka enu malunga musolwelenga mapwevo jenu zangi hakulondezeza Yesu. (Efwe. 5:23) Yesu atetekelelenga chikungulwilo mujila yazangi. (Luka 9:46-48) Nge lunga mwalondezeza chakutalilaho chaYesu, kaha nahase kukafwa puwenyi etavile muchano.

15. Lunga muka-Kulishitu eji kulinganga vyuma muka mangana asolole ngwenyi azanga puwenyi?

¹⁵ Malunga vavalweza ngwavo: “Zangenunga lika mapwevo jenu, kanda namuvakwachilanga chikuma matotoko.” (Kolo. 3:19) Shikaho lunga wazangi eji kuvumbikanga puwenyi nakumwivwilila nakumulweza ngwenyi amona vyuma eji kuhanjikanga kupwa vyavilemu. (Petu. 1, 3:7) Numba tuhu keshi kulinga vyuma vyosena mwahanjika puwenyiko, oloze eji kuvangilanga kumuhulisa evwenga munayi vishinganyeka vyenyi. (Vishi. 15:22) Lunga wazangi eji kuzanganga puwenyi, kaha vilinga vyenyi vyamwaza vikiko vyeji kukunyulanga puwenyi amuvumbike chakuhona kumushinjila. Ngocho lunga uze azanga puwenyi navana venyi eji kuvakafwanga mangana vazachile Yehova nakuwahilila, nakukatambula fweto yakuyoya chamyaka yosena.

16, 17. Enu vakweze, vyuma muka navimikafwa muhone kupihilila nge visemi jenu navamihuhumuna?

¹⁶ Uno namulinga ngachilihi kachi nge mwamona ngwenu visemi jenu vaze vapwa Vinjiho vakaluhwisa chikuma jishimbi? Pamo munahase kuputuka kushinganyeka ngwenu kuzachila Yehova kachapwa chamwazako. Oloze nge namulitwamina kuzachila Yehova, mukuhita chamakumbi namukamona jino ngwenu kakweshi mutu weka amizakama kuhambakana visemi jenu vaze vevwa Kalunga woma navandumbwenu muchikungulwiloko.

¹⁷ Kachi nge visemi jenu kaveshi kumihuhumunako, kutala namushinganyeka ngwenu vamizanga tahi? (Hepe. 12:8) Nyi pamo jila veji kumihuhumwinangamo yikiko kamwazangako? Kamwatela kupihilila najila navamihuhumwinamoko, oloze tachikizenu ngwenu pamo kuliko vyuma vimwe vinavalingisa vahanjike mujila kana. Shikaho mwatela kuunda nakwivwilila ovyo navamihuhumuna visemi jenu. Mazu aKalunga amba ngwawo: “Mutu wachinyingi keshi kulusuka kuhanjika mazu enyiko, kaha mutu wakunangakana eji kuholanga kulu.” (Vishi. 17:27) Ngocho mwatela kufwila kuzovoloka kushipilitu hakuhona kulizakaminanga chikuma hajila navamihuhumwinamo mangana munganyale. (Vishi. 1:8) Tachikizenu ngwenu chapwa hikutokwa chachinene kupwa navisemi vazanga Yehova. Vanakufwila kumikafwa mangana mukawane kuyoya chamyaka yosena.

18. Mwomwo ika muli nakufwila kuzata nangolo mukawane fweto?

¹⁸ Twatela kumona fweto vatushika kupwa yayilemu chikuma numba yipwa yakuyoya myaka yosena mwilu chipwe hano hamavu. Lutalililo kana nalukatesamo, mwomwo Tengi ikiye atushikalwo. Kalunga ahanjika kutalisa kuPalachise ngwenyi: “Hamavu hosena nahakazala nachinyingi chakumutachikiza Yehova.” (Isa. 11:9) Shikaho vatu vosena hamavu navakavanangula kuli Kalunga. Fweto kana yapwa yayilemu chikuma ngocho twatela kufwila kuzata nangolo mangana tukayitambule. Shikaho shinganyekenunga hafweto namishiki Yehova, kaha kanda kwechelela vyuma vyeka vimihonese kukayitambulako.